1 Xa̱bo̱ Korínto̱ 14
14
Rí naxná Xu̱u̱ꞌ Ana̱ꞌlóꞌ kajngó mu̱mbáñúúlóꞌ tsí nanimbu̱únꞌ juyáá Jesús
1Ga̱galaꞌ máꞌ xúꞌkhue̱n ju̱ñu̱ú xa̱bo̱. Xúꞌkhue̱n máꞌ gu̱ꞌyálaꞌ ñajun rí naxná Xu̱u̱ꞌ Ana̱ꞌlóꞌ kajngó mu̱ne̱-mba̱a̱laꞌ. I̱ndo̱ó máꞌ numuu rí i̱tha̱án máꞌ gu̱ꞌyálaꞌ rí mu̱rawíjnga̱alaꞌ ajngóo Ana̱ꞌlóꞌ. 2Numuu rí xa̱bo̱ tsí naꞌthán ajngáa rí tsígu̱ma-nuwiin, naꞌthán-mine̱e̱ꞌ máꞌ ikhaa̱ ga̱jmáa̱ i̱ndo̱ó máꞌ Ana̱ꞌlóꞌ, ra̱ꞌkhá i̱ꞌwíin xa̱bo̱ iꞌthúu̱n. Ndawa̱a̱ tsí ifroꞌo̱o̱ rí naꞌthée̱n, maske máꞌ ga̱jma̱á majñu̱u̱ Xu̱u̱ꞌ Ana̱ꞌlóꞌ naꞌthée̱n awan drígo̱o̱ Ana̱ꞌlóꞌ rí i̱ndo̱ó máꞌ ikhaa̱ ni̱gi̱da̱ꞌ idxu̱u̱ nákhí wajyúú. 3Xómáꞌ xa̱bo̱ tsí na̱gu̱wíjnga̱a ajngóo Ana̱ꞌlóꞌ, naꞌthúu̱n xa̱bo̱ ajngáa rí nambáñúu̱ ma̱gajii̱n, rí naxnúu̱ tsiakhe̱ jamí naꞌne rí ma̱ꞌni̱i a̱kuíi̱n. 4Tsí naꞌthán ajngáa rí tsígu̱ma-nuwiin, ikhaa̱ máꞌ imbáyú-mine̱e̱ꞌ rí ma̱gaja̱a̱. Xómáꞌ tsí na̱gu̱wíjnga̱a ajngóo Ana̱ꞌlóꞌ rá, nambáyúu̱ rí ma̱gaji̱in tsí nanimbu̱únꞌ juyáá Jesús. 5Ikhúúnꞌ naꞌne a̱kui̱nꞌ rí mbá xúgiáanꞌlaꞌ gútha̱nlaꞌ ajngáa rí tsígu̱ma-nuwiin, i̱ndo̱ó máꞌ numuu rí phú i̱tha̱án naꞌne a̱kui̱nꞌ rí mbá xúgiáanꞌlaꞌ gúrawíjnga̱alaꞌ ajngóo Ana̱ꞌlóꞌ. Numuu rí phú i̱tha̱án máꞌ gíꞌdoo numuu xa̱bo̱ tsí na̱gu̱wíjnga̱a ajngóo Ana̱ꞌlóꞌ xó rí xa̱bo̱ tsí naꞌthán ajngáa rí tsígu̱ma-nuwiin. O i̱ndo̱ó máꞌ xí tsí naꞌthán ajngáa rí tsígu̱ma-nuwiin, naꞌthán-wíi̱ ne̱ mangaa rá mbo̱ꞌ, kajngó rúꞌkhue̱n mambáyúu rí ma̱gaji̱in tsí nanimbu̱únꞌ juyáá Jesús.
6A̱ngui̱nꞌ, xí ikhúúnꞌ ma̱ꞌgá gáya̱ꞌlaꞌ jamí ma̱tha̱nꞌlaꞌ ga̱jma̱á ajngáa rí tsígu̱ma-nuwiin, náá lá rí gámbáyálaꞌ rúꞌkhue̱n rá. I̱ndo̱ó máꞌ xí ma̱tha̱nꞌlaꞌ mbá rí wasngájmuꞌ, o mbá rí na̱ma̱ñuꞌ, o ma̱gúwíjnga̱a ajngóo Ana̱ꞌlóꞌ, o mbá gisngáá mbo̱ꞌ, rúꞌkhue̱n rí mambáyálaꞌ. 7Xí na̱nguá jaꞌwu iwán ixe̱ rí naríya̱ꞌ ajmúú, xómá talalí o xi̱tha mbo̱ꞌ, nda̱a̱ xó mbu̱ꞌyáálóꞌ náá rí ajmúú nagájnuu ga̱jma̱á talalí jamí xi̱tha. 8Xúꞌkhue̱n máꞌ xí na̱nguá jaꞌwu iwán ajwa̱nꞌ e̱ꞌmbi, ndawa̱a̱ tsí gáꞌne-mbánu-mina̱ꞌ rí ma̱ꞌga ná ríga̱ xkujndu. 9Xkuaꞌnii máꞌ eꞌne ga̱jma̱á nindxa̱ꞌlaꞌ mangáanꞌlaꞌ. Xí tsíthu̱únlaꞌ xa̱bo̱ ga̱jma̱á ajngáa rí nafruꞌu̱ún, ndawa̱a̱ tsí gáfroꞌo̱o̱ rí nu̱tha̱nlaꞌ. Numuu rí asndo xómá ná inuu máꞌ gíñá i̱tha̱nlaꞌ rí xkuaꞌnii. 10Ná numbaa ríge̱ꞌ maphú mbaꞌa inii ajngáa rí nuthan xa̱bo̱ ríga̱, jamí mbá xúgíí ne̱ gíꞌdoo xó mi̱ꞌthán rí ndaꞌyóo ma̱fruꞌu̱ún xa̱bo̱. 11Xí ikhúúnꞌ tsífroꞌo̱ꞌ ajngáa rí naꞌthán mbáa xa̱bo̱, ikhúúnꞌ ma̱nindxu̱ꞌ xómá xa̱bo̱ tsí na̱ꞌkha̱ i̱mba̱ xuajen ná inuu tsí naꞌthán, jamí ikhaa máꞌ ma̱nindxu̱u̱ ikhaa̱ ná inuꞌ ikhúúnꞌ xí tsífroꞌo̱o̱ rí na̱tha̱nlo̱ꞌ. 12Ikhaa jngó ikháanꞌlaꞌ, tsáanꞌ na̱ni̱gua̱ꞌlaꞌ guéño ñajun rí naxná Xu̱u̱ꞌ Ana̱ꞌlóꞌ, gu̱ꞌyálaꞌ rí ma̱janálaꞌ mbaꞌa rí nambáyúu rí ma̱gaji̱in tsí nanimbu̱únꞌ juyáá Jesús.
13Ikhaa numuu rúꞌkhue̱n, tsí naꞌthán ajngáa rí tsígu̱ma-nuwiin, gaꞌthán-jáñuu̱ Ana̱ꞌlóꞌ rí ma̱ꞌngo̱o̱ maꞌthán-wíi̱ ne̱ mangaa. 14Xí ikhúúnꞌ na̱tha̱n-jáñuu Ana̱ꞌlóꞌ ga̱jma̱á ajngáa rí tsígu̱ma-nuwiin, a̱kui̱nꞌ naꞌthúun Ana̱ꞌlóꞌ, i̱ndo̱ó máꞌ numuu rí tsíga̱nú ná idxu̱ꞌ rí na̱tha̱nlo̱ꞌ. 15Dí gáne̱ xúꞌkhue̱n rá. Ma̱tha̱n-jáñuu Ana̱ꞌlóꞌ ga̱jma̱á a̱kui̱nꞌ, jamí ga̱jma̱á máꞌ idxu̱ꞌ ma̱ne̱ rí ma̱froꞌo̱ꞌ mangaa. Ma̱sian rawunꞌ ga̱jma̱á a̱kui̱nꞌ, jamí ga̱jma̱á máꞌ idxu̱ꞌ ma̱ne̱ rí ma̱froꞌo̱ꞌ mangaa. 16Xí ikháánꞌ nathane̱-mba̱a̱ Ana̱ꞌlóꞌ ga̱jma̱á i̱ndo̱ó máꞌ a̱kia̱anꞌ, nda̱a̱ rí gáfroꞌo̱o̱ tsí tsíma̱ñuu, jamí ma̱xáxóo maꞌthée̱n «xkuaꞌnii gáꞌne» ga̱jma̱á nindxa̱a̱ꞌ, numuu rí táfroꞌo̱o̱ rí nirathán. 17Á gáꞌne xí phú mitsaan nitrígu̱u la gamaku inuu Ana̱ꞌlóꞌ, i̱ndo̱ó máꞌ numuu rí nda̱a̱ rí gámbáñúú ne̱ tsí i̱ꞌwíin.
18Núma̱aꞌ la Ana̱ꞌlóꞌ rí ikhúúnꞌ i̱wa̱á máꞌ na̱tha̱nlo̱ꞌ ajngáa rí tsígu̱ma-nuwiin xó rí mbá xúgiáanꞌlaꞌ ikháanꞌlaꞌ. 19Xómáꞌ ná majñu̱ú tsí nanimbu̱únꞌ juyáá Jesús i̱wa̱á máꞌ naꞌne a̱kui̱nꞌ rí ma̱tha̱nlo̱ꞌ witsu ajngáa rí nafroꞌo̱ꞌ, kajngó mambáñúú tsí i̱ꞌwíin mangiin, xó rí ma̱tha̱n mbaꞌa guéño ajngáa rí tsígu̱ma-nuwiin.
20A̱ngui̱nꞌ, mu̱xúndxa̱ꞌwa̱-mijnálaꞌ xómá e̱je̱n. Ga̱nindxa̱ꞌlaꞌ xómá e̱je̱n rí tsíne̱laꞌ rí xkawe̱ꞌ, xómáꞌ rí nafraꞌa̱ꞌlaꞌ rá, ga̱nindxa̱ꞌlaꞌ xómá xa̱bo̱ tsí buanuu. 21Ná xtángoo ka̱ma naꞌthán:
«Ma̱thu̱ún xa̱bo̱ tsíge̱ꞌ ga̱jma̱á majñu̱u̱ ajngáa rí tsíne̱-nuwiin,
jamí ga̱jma̱á majñu̱ú xa̱bo̱ tsí naguwá i̱ꞌwá xuajen.
Maske máꞌ xúꞌkhue̱n gáne̱, mu̱xúdxawunꞌ rí ma̱thúu̱n, xkuaꞌnii iꞌthán Táta̱».#14.21 Ajngáa ríge̱ꞌ na̱ꞌkha̱ ná I̱yu̱u̱ꞌ Isaía̱s 28.11-12.
22Ikhaa jngó, ído̱ nithán ajngáa rí tsígu̱ma-nuwiin, mbá rí mbuyáá xa̱bo̱ tsí tsínimbu̱únꞌ juyáá Ana̱ꞌlóꞌ ñajuun ne̱, ra̱ꞌkhá rí mu̱dxawíín tsí nanimbu̱únꞌ. Xómáꞌ rí nagájnanga̱a ajngóo Ana̱ꞌlóꞌ rá, mbá rí mbuyáá tsí nanimbu̱únꞌ ñajuun ne̱, ra̱ꞌkhá rí ma̱fruꞌu̱ún tsí tsínimbu̱únꞌ. 23Ga̱ju̱ma̱ꞌlaꞌ rí mbá xúgíin tsí nanimbu̱únꞌ juyáá Jesús na̱gi̱mbíin jamí mbá xúgíi̱n nuthee̱n ajngáa rí tsígu̱ma-nuwiin, a̱ꞌkhue̱n na̱tu̱ꞌu̱ún mbá tikhuun xa̱bo̱ tsí tsíma̱ñúú o tsínimbu̱únꞌ mbo̱ꞌ, muthee̱n rí mbá xúgiáanꞌlaꞌ najmiyalaꞌ. 24I̱ndo̱ó máꞌ numuu rí, xí mbá xúgíin nu̱rawíjnga̱a ajngóo Ana̱ꞌlóꞌ, jamí na̱to̱ꞌo̱o̱ mbáa tsí tsíma̱ñuu o tsínimbo̱o̱ꞌ mbo̱ꞌ, a̱ꞌkhue̱n mayaxe̱-mine̱e̱ꞌ jamí mbá xúgiáanꞌlaꞌ mu̱ne̱laꞌ rí mba̱ꞌyoo̱ rí xa̱bo̱ aꞌkhán ñajuu̱n. 25Mbá xúgíí rí ríga̱ ngu̱ꞌwo̱o̱ ná awúun a̱kuii̱n ma̱kujma. A̱ꞌkhue̱n masmáti̱go̱o̱ jamí maꞌgíi̱ inuu̱ asndo mbayíí rí ma̱ꞌne-mba̱a̱ Ana̱ꞌlóꞌ, jamí maꞌthée̱n: «Gakon rí Ana̱ꞌlóꞌ xtáa ga̱jma̱á nindxa̱ꞌlaꞌ».
Xáne gíꞌmaa rí ma̱gu̱ma-mba̱a̱ Ana̱ꞌlóꞌ
26Ikhaa jngó a̱ngui̱nꞌ, ído̱ rí na̱gi̱mbáanꞌlaꞌ, mbáa gáꞌsian rawuun ajmúú, i̱mba̱a̱ꞌ gáꞌsngáá, i̱mba̱a̱ꞌ gáꞌthán rí Ana̱ꞌlóꞌ nisngájmuu, i̱mba̱a̱ꞌ gáꞌthán ajngáa rí tsígu̱ma-nuwiin, i̱mba̱a̱ꞌ gáꞌthán-wíi ajngáa. I̱ndo̱ó máꞌ numuu rí mbá xúgíí gágu̱ma rí mambáyúu ma̱gaji̱in xa̱bi̱i Ana̱ꞌlóꞌ. 27Xí mbá tikhuun nuthan ajngáa rí tsígu̱ma-nuwiin, guthee̱n a̱jmii̱, o asndo atsúu̱n mbo̱ꞌ. Mbámbáa gáꞌthán ído̱ rí najanáá maꞌthán, jamí mbáa gáꞌthán-wíi rí naꞌthán mbámbáa. 28Xí ndawa̱a̱ tsí maꞌthán-wíi, ga̱ꞌne-wíyuu rawúu̱n ná inúú tsí nanimbu̱únꞌ juyáá Jesús, jamí guthan-mijnée̱ máꞌ i̱ndo̱ó ikhii̱n gajmíi̱ Ana̱ꞌlóꞌ.
29Xúꞌkhue̱n máꞌ tsí nu̱rawíjnga̱a ajngóo Ana̱ꞌlóꞌ, guthee̱n a̱jmii̱ o atsúu̱n mbo̱ꞌ. Xómáꞌ tsí i̱ꞌwíin gu̱ra̱jwe̱e̱ꞌ xí gakon rí nuthee̱n. 30Jamí xí mbáa tsí ꞌgí ikhín wasngájmáá mbá rí maꞌthán eꞌne Ana̱ꞌlóꞌ, ga̱ꞌne-wíyuu rawuun tsí ginii naꞌthán máꞌ. 31Xkuaꞌnii kajngó mbá xúgiáanꞌlaꞌ ma̱goo mu̱rawíjnga̱alaꞌ ajngóo Ana̱ꞌlóꞌ, i̱ndo̱ó máꞌ numuu rí mbámbáa gáꞌthán, kajngó mbá xúgíin gáma̱ñúú jamí muda̱a tsiakhe̱. 32Xa̱bo̱ tsí nu̱rawíjnga̱a ajngóo Ana̱ꞌlóꞌ, nduyáa̱ máꞌ ikhii̱n nguáná jaꞌyoo rí muthee̱n. 33Numuu rí Ana̱ꞌlóꞌ tsíꞌne rí ma̱ju̱wá nikhuáa xa̱bo̱, rí naꞌnii̱ rí ma̱ju̱wá tsímáá xa̱bo̱.
Xkuaꞌnii máꞌ jaꞌnii ná mbá xúgíí kuthuun tsí jaꞌwuun nanimbu̱únꞌ juyáá Jesús, 34na̱tha̱n rí wíí gáꞌne rawúún go̱ꞌo̱ ná na̱gi̱mbáanꞌlaꞌ, numuu rí ra̱jáꞌñúu̱ muthee̱n, rí i̱ndo̱ó máꞌ jaꞌyoo rí mune̱-mbáníi̱ rí nithúu̱n, xómá ka̱ma naꞌthán ná xtángoo mangaa. 35Xí ríga̱ mbá rí nandúu̱n ma̱ma̱ñúu̱, gu̱ra̱xúu̱n a̱jmbáa̱n ná guꞌwúu̱n, numuu rí na̱nguá mitsaan ikujma ído̱ rí mbáa a̱ꞌgo̱ naꞌthán ná na̱gi̱mbáanꞌlaꞌ.
36A̱gu̱ya̱álaꞌ rí ra̱ꞌkhá ná majña̱ꞌlaꞌ ikháanꞌlaꞌ nigájnuu ajngáa rawuun Ana̱ꞌlóꞌ, ni máꞌ ra̱ꞌkhá i̱ndo̱ó ikháanꞌlaꞌ ni̱drígúlaꞌ ne̱. 37Xí mbáa na̱ju̱mu̱u̱ rí xa̱bo̱ tsí na̱gu̱wíjnga̱a ajngóo Ana̱ꞌlóꞌ ñajuun, o xtáa xómá nandoo Xu̱u̱ꞌ Ana̱ꞌlóꞌ mbo̱ꞌ, ga̱ꞌyoo̱ rí ajngáa rí naxná-ñájun Táta̱ ñajuun ríge̱ꞌ, rí na̱tháán ma̱ꞌga inalaꞌ. 38Xómáꞌ xa̱bo̱ tsí tsíyoo gádxawuun ajngáa ríge̱ꞌ rá, ndawa̱a̱ máꞌ tsí gádxawuun rí naꞌthée̱n mangaa̱.
39Ikhaa jngó, a̱ngui̱nꞌ, gu̱xna̱-míjnálaꞌ tsiakhe̱ rí mu̱rawíjnga̱alaꞌ ajngóo Ana̱ꞌlóꞌ, jamí mu̱xúrikháálaꞌ rí mi̱ꞌthán ajngáa rí tsígu̱ma-nuwiin. 40I̱ndo̱ó máꞌ numuu rí ga̱gu̱ma mbá xúgíí ga̱jma̱á gamaku jamí ra̱ꞌkhá nikhuáa jayu.
Attualmente Selezionati:
1 Xa̱bo̱ Korínto̱ 14: tcf
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2025 SIL Global. Creative commons license CC BY-SA.