1 Xa̱bo̱ Korínto̱ 5
5
Xa̱bo̱ tsí nabóo ga̱jma̱á ru̱dúsko̱jo̱o̱
1Phú mbaꞌiin xa̱bo̱ nuthan rí mbáa tsí ikháanꞌlaꞌ nabóo ga̱jma̱á ru̱dúsko̱jo̱o̱ asndo xómá a̱ꞌgui̱i. Mi̱ndaꞌkho xkawe̱ꞌ rúꞌkhue̱n, rí asndo ná majñu̱ú xa̱bo̱ tsí tsíne̱-nuwiin Ana̱ꞌlóꞌ tsíríga̱ rí xkuaꞌnii. 2Á ikhaa numuu rúꞌkhue̱n rí nu̱xu̱xí-mijnálaꞌ guéño ga̱jma̱á numuu rá. Nagui̱i̱ꞌ xí ma̱ti̱ya̱ꞌlaꞌ rí ná majña̱ꞌlaꞌ a̱ꞌkhue̱n xtáa̱ tsí xkuaꞌnii eꞌne, jamí nagui̱i̱ꞌ xí mu̱xkriya̱a̱ꞌlaꞌ. 3Maske máꞌ ndawu̱ún ikhúúnꞌ a̱ꞌkhue̱n ga̱jma̱á nindxa̱ꞌlaꞌ, mbóó máꞌ a̱kui̱nꞌ ga̱jma̱á nindxa̱ꞌlaꞌ. Ikhaa jngó, ikhúúnꞌ ni̱ra̱jwa̱ꞌ máꞌ ga̱jma̱á numuu xa̱bo̱ tsí xkuaꞌnii eꞌne, asndo xómá rí xtáá máꞌ a̱ꞌkhue̱n jaꞌnii. 4Ikhaa jngó ído̱ rí nu̱ru̱wa-mijnáalaꞌ ga̱jma̱á numuu Tátiálóꞌ Jesukrísto̱, ikhúúnꞌ mangúúnꞌ xtáá ga̱jma̱á nindxa̱ꞌlaꞌ. A̱ꞌkhue̱n rí ga̱jma̱á ski̱yu̱u̱ꞌ Tátiálóꞌ Jesukrísto̱, 5gu̱xna̱xíilaꞌ xa̱bo̱ tsúꞌkhue̱n ná ñawúun Satanás kajngó ma̱ja̱ñúu rí nandoo xuyuu̱, xómáꞌ nímii̱ ma̱jríya̱a̱ꞌ ído̱ gáꞌkha̱a Táta̱ Jesús.
6Ra̱máján e̱ne̱laꞌ rí nu̱xu̱xí-mijnálaꞌ. Ndu̱ya̱álaꞌ máꞌ rí «mbá lájwíin ñu̱u̱ miga̱ꞌ naꞌne ne̱ rí ma̱ga̱yu̱u̱ꞌ mbá xúgíí ñu̱u̱ rí máján». 7Ikhaa jngó, gu̱ni̱ꞌñáálaꞌ janíí ñu̱u̱ miga̱ꞌ wayuu rí naꞌne-maꞌcháanꞌlaꞌ, kajngó ma̱nindxa̱ꞌlaꞌ xómá ñu̱u̱ nuxe̱ꞌ, rí na̱nguá gíꞌdoo ñu̱u̱ miga̱ꞌ. Ikháanꞌlaꞌ ñajwanlaꞌ xómá guma bopho rí naꞌpho̱ xa̱bo̱ ído̱ naríga̱ ndxa̱a̱ Páskua̱, jamí Krísto̱ ñajuun A̱ꞌdá-mógó tsí nijáñuu ga̱jma̱á numalóꞌ. 8Ikhaa numuu rúꞌkhue̱n gu̱ꞌne̱-ri̱ya̱aꞌlóꞌ ndxa̱a̱ Páskua̱, ra̱ꞌkhá ga̱jma̱á ñu̱u̱ miga̱ꞌ rí niꞌchúu, ni máꞌ ra̱ꞌkhá ga̱jma̱á rí xkawe̱ꞌ jamí rí mi̱nduwa, rí gu̱ꞌne̱-ri̱ya̱aꞌlóꞌ ne̱ ga̱jma̱á guma bopho rí na̱nguá gíꞌdoo ñu̱u̱ miga̱ꞌ, ikhaa rí gakon jamí rí máján.
9Ni̱tha̱nꞌlaꞌ máꞌ ga̱jma̱á majñu̱u̱ mbá i̱yi̱i̱ꞌ rí ni̱xu̱ꞌmá inalaꞌ, rí ma̱xámbáxa̱ꞌlaꞌ gajmiálaꞌ xa̱bo̱ tsí nubúún gajmíí xa̱bo̱ tsí túya̱a̱. 10Tsítha̱nꞌlaꞌ rí ma̱xámbáxa̱ꞌlaꞌ mbá jayu gajmiálaꞌ xa̱bo̱ tsí nune̱ aꞌkhán ná numbaa ríge̱ꞌ: tsí nubúún gajmíí xa̱bo̱ tsí túya̱a̱, o tsí na̱ni̱gu̱ún mu̱guaꞌdáá mi̱ndaꞌkho, o tsí nune̱-ku̱ꞌwá, o tsí nune̱-mbi̱in tsí ra̱ꞌkháa Ana̱ꞌlóꞌ ñajúún mbo̱ꞌ. Xí rúꞌkhue̱n iyoꞌ gátha̱nꞌlaꞌ, ma̱nda̱ꞌa̱ꞌlaꞌ rí ma̱ga̱jnáaꞌlaꞌ mbá jayu ná numbaa xúꞌkhue̱n rá. 11Rí phú nandoꞌ gátha̱nꞌlaꞌ ñajuun rí ma̱xámbáxa̱ꞌlaꞌ gajmiálaꞌ nimbáa tsí naꞌthán rí dxájwalóꞌ ñajuun, jamí nabóo ga̱jma̱á a̱ꞌgo̱ tsí táyáa, o na̱ni̱gu̱u̱ꞌ ma̱gi̱ꞌdoo mi̱ndaꞌkho, o naꞌne-mbi̱in tsí ra̱ꞌkháa Ana̱ꞌlóꞌ ñajúún, o naꞌthán xkawe̱ꞌ, o najnga̱a̱, o naꞌne-kúwa̱ꞌ mbo̱ꞌ. Ni ma̱xátrigáanꞌlaꞌ rí mu̱peꞌtso gajmiálaꞌ xa̱bo̱ tsí naꞌne rúꞌkhue̱n. 12Numuu rí na̱nguá máꞌ jaꞌyoꞌ ikhúúnꞌ rí ma̱ra̱jwa̱ꞌ numúú tsí gachúún rixa̱á. Xómáꞌ ikháanꞌlaꞌ jaꞌyalaꞌ rí mu̱ra̱jwa̱ꞌlaꞌ numúú tsí gatiin awúún. 13Jamí Ana̱ꞌlóꞌ jaꞌyoo rí ma̱ra̱jwa̱ꞌ numúú tsí gachúún rixa̱á. Ikhaa jngó, gu̱xkriya̱a̱ꞌlaꞌ xa̱bo̱ aꞌkhán tsúꞌkhue̱n ná majña̱ꞌlaꞌ.
Attualmente Selezionati:
1 Xa̱bo̱ Korínto̱ 5: tcf
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2025 SIL Global. Creative commons license CC BY-SA.