If you have would like a copy of this version please contact info@davarpartners.org

Pahari Mahasu New Testament, CC-BY-SA-4.0, The Love Fellowship (Text), Pahari Mahasu New Testament Audio Bible, CC-BY-SA-4.0, Davar Partners International, 2021 (Audio)

Pahari Mahasu New Testament

This work is licensed under Creative Commons Attribution-ShareAlike 4.0 License.

“हाऊं तुमुलै सौच़्च़ौ-सौच़्च़ौ बोलाऊ कि ज़ुण-कुण दारा बाटीऐ भेरी रै बाड़ै दी नाईं आशा लौ, पर और केशी यालै आशा लौ, सेऊ च़ोर और डाकु आ। पर सेऊ भेरी रौ भेराल़ड़ु आ ज़ुण दारा बाटीऐ भितरै आशा आ। तेसलै दारा खोलणै वाल़ै दार खोलाई, और भेरी तेसरी बाच़ शुणियौ रवावा ई, और सेऊ आपणी भेरीऊ लै नावां कौरीऐ औटाइया और बाइरै नियां आ। ज़ेबी सेऊ आपणी सारी भेरी बाइरै च़ौराउणा लै गाड़ा सा, ता तिऊंकु औगाड़ी-औगाड़िऐ आण्डा सा, और भेरी तेस आइलै पिछ़ाड़ी-पिछ़ाड़ी हुआई, कैलैकि सै भेरी तेसरी बाच़ शुणियौ रवावा ई। पर सै बिगानै पिछ़ु नाईं डेउंदी, और तेसकु ओरु-पोरु भागा ई, कैलैकि सै ओरी री बाच़ नाईं रवाउंदी।” यीशुऐ तिउंलै एऊ औनैणौ दैऔ आ, पर सै नाईं सौमझ़ै कि इऊं बुशु रौ का मतलब आ ज़ो आमु आइलै बोला आ।

तैबै यीशुऐ तिउंलै तौंइऐ बोलौ, “हाऊं तुमु आइलै सौच़्च़ौ-सौच़्च़ौ बोलाऊ, कि ‘भेरीऊ लै भितरै आशणै रौ दार हाऊं ऊ।’ ज़ेती मुकु पैहलै आशै ई सै सारै च़ोर और डाकु ई, पर मेरी भेरीउऐ तिउंरी नाईं शुणी। ‘दार हाऊं ऊ।’ परमेश्‍वर मैरै ज़ौरिऐ आशणै वाल़ै लोगु बौच़ावा आ, और ज़ुण भितरै-बाइरै आशदै डेउंदै थाका लौ लागी तेसलै खाणा लै रोटी मिला आ। च़ोर केज़ै दुजै कामा लै नाईं पर सिरफ च़ोरी कौरदै और झ़ांगदै और नाश कौरदै आशा आ। हाऊं एथलै आशौ ऊ कि सौभी लै ज़िन्दगी मिला, और भौरी मिला।” “आच़्छ़ौ भेराल़ड़ु हाऊं ऊ। आच़्छ़ौ भेराल़डु भेरीऊ लै आपणी ज़ान दिआ आ। ज़ो नुकुर औआ सेऊ ना ता भेराल़डु आ, और ना भेरीऊ रौ मालिक आ, शाल़टौ आशदै देखीयौ सेऊ भेरीऊ छ़ाड़िऔ भागा आ। और शाल़टौ तिऊं भेरीऊ माथै हामलौ कौरा आ और एक भेर पाकड़ियौ ओरीऊ तितर-बितर कौरा आ। सेऊ एथीलै भागा आ कि सेऊ नुकुर आ, और तेसकै भेरी री फिकर नाईं आसती। आच़्छ़ौ भेराल़ड़ु हाऊं ऊ। और हाऊं आपणी भेरीऊ ज़ाणाऊ, और मेरी भेरी मुं ज़ाणाई। ज़िणौ बाब मुं ज़ाणा आ तिणी ई हाऊं बाब ज़ाणाऊ और हाऊं आपणी भेरीऊ लै आपणी ज़ान दिआऊ। मेरी तौंइऐ भी भेरी ई, ज़ो एस बाड़ै री नाईं ई। मुं सै भी आणनी ज़ुरुरी ई। सै मेरी बाच़ शुणाली रवावा ई, तैबै एका शाल़ और एका भेराल़ड़ु हुआ। बाब एथीलै मुं आइलै प्यार छ़ाड़ा आ कैलैकि हाऊं आपणै प्राण दिआऊ ताकी हाऊं तौंइऐ ज़िउंदौ ऊ। कोई मैरै प्राण मुकु नाईं नींई बौल़दौ, पर हाऊं आपु ई दिआऊ, मुकै तेस प्राण देणै रौ भी हक्क आ और, तेस निणा रौ भी हक्क आ, कैलैकि एज़ौ हुकम मैरै बाबा कु आ मुलै मिलौ औन्दौ।”
इऊं बुशु कौरीऐ यहुदिऊ दी आपु मांझ़िऐ फूट पौड़ी गोई। तिऊं मांझ़िऊ कु भौरी ज़ौणै बोलदै लागै, “तेसदी बुरी आत्मा आ, और सेऊ पागल आ। तेसरी कैलै शुणाई?” ओरी लोगुऐ बोलौ, “एज़ी बुशै इणै आदमी री नाईं ज़ासदी बुरी आत्मा आ। का बुरी आत्मा शेड़ै री आखी ठीक कौरी बौल़ा आ?”

यरुशलेमा दी स्थापना रौ साज़ौ हुऔ। और हिऊंदा रौ मौसम थौ। यीशु परमेश्‍वरा रै घौरा दी सुलेमाना री खौल़ै दी घुमदै थौ लागौ औन्दौ। तैबै यहुदिउऐ सेऊ आशीयौ घेरौ और पुछ़ौ, “तू आमारौ ज़िऊ केबी झ़ांऊ धोखा दी छ़ाड़ाई? अगर तू मसीह ता आमु आइलै साफ-साफ बोल।” यीशुऐ तिउंलै ज़वाब दैऔ, “मुंइऐ तुमुलै बोली गौ पर तुमै विश्वास ई ना कौरदै। ज़ो काम हाऊं आपणै बाबा रै हक्‍का कौरीऐ कौराऊ सै काम ई मैरै गवाह ई, पर तुमै एथीलै विश्वास नाईं कौरदै कैलैकि तुमै मेरी भेरी मांझ़िया कु नाईं आसती। मेरी भेरी मेरी हाक शुणियौ रवावा ई। हाऊं तिऊं ज़ाणाऊ, और सै मुं पिछ़ु-पिछ़ु आण्डाई। और हाऊं तिउंलै सौदा री ज़िन्दगी दिआऊ। सै केबी भी नाश नाईं औआ ली, और कोई तिऊं मैरै हाथा कु नाईं नींई। मैरौ बाब, ज़ुणिऐ सै मुकै देई ऐन्दी ई, सारेऊ कु बौड़ौ आ और कोई तिऊं बाबा रै हाथा कु नाईं नींई बौल़दौ। हाऊं और मैरौ बाब एका ई।” यहुदी मुख्येउऐ तेसदी पात्थरै लाइणा लै तौंइऐ पात्थर च़ुंगै। एथ माथै यीशुऐ तिउंलै बोलौ, “मुंइऐ तुमुकै बाबा री तौरफा कु भौरी भौलै काम देखाल़ै ई। तिऊं मांझ़िआ कु केज़ै कामा लै तुमै मुंदी पात्थरै लाआ ई?” यहुदी मुख्येउऐ तेसलै ज़वाब दैऔ, “भौलै कामा लै आमै ताऊं दी पात्थरै नाईं लाइंदै पर परमेश्‍वरा री बुराई कौरना लै। और एथलै कि तू आदमी हुइयौ आपु ई परमेश्‍वर बौणा ई।” यीशुऐ तिउंलै ज़वाब दैऔ, “का तुमारै पवित्रशास्त्रा दी नाईं आ लिखौ औन्दौ, ‘मुंइऐ बोलौ, तुमै ईश्वर ई?’ अगर तिणीऐ तिउंलै ईश्वर बोलौ ज़ास काऐ परमेश्‍वरा रौ वचन पौउंच़ौ (और पवित्रशास्त्रा री बूश गलत नाईं हुई बौल़दी), ता ज़ुण बाबै पवित्र चाणीऔ धौतरी दी भेज़ौ आ, तुमै तेसलै बोलाई, ‘तू बुराई कौरा ई,’ एथीलै कि मुंइऐ बोलौ, ‘हाऊं परमेश्‍वरा रौ छ़ोहरु ऊ?’ अगर हाऊं बाबा रौ काम नाईं कौरदौ, ता मैरौ विश्वास नाईं कौरौ। पर अगर हाऊं कौराऊ, ता च़ाऊ मैरौ विश्वास नाईं भी कौरौ। पर तिऊं कामा रौ ता विश्वास कौरौ, ताकी तुमै ज़ाणा और सौमझ़ा कि बाब मुंदी आ और हाऊं बाबा दी।” तैबै तिंउऐ तौंइऐ तेस पाकुड़नै री कोशिश की पर सेऊ तिंउरै हाथा कु निकल़ी गौ।
तैबै यीशु यरदना नौईं पारभिलै सेज़ी ज़ागाह दी डेई गौ, ज़िऐ यहुन्ना पैहलै बपतिस्मौ दिआ थौ, और तिऐ रौऔ। भौरी लोग तेस काऐ आशीयौ बोला थै, “यहुन्नै ता कोई हैरानी वाल़ै काम नाईं देखाऐ, पर ज़ो कुछ़ यहुन्नै एसरै बारा दी बोलौ थौ, सेऊ सारौ सौच़्च़ौ थौ।” और तिऐ भौरी लोगुऐ यीशु माथै विश्वास कियौ।

聞く यहुन्ना 10