If you have would like a copy of this version please contact info@davarpartners.org

Pahari Mahasu New Testament, CC-BY-SA-4.0, The Love Fellowship (Text), Pahari Mahasu New Testament Audio Bible, CC-BY-SA-4.0, Davar Partners International, 2021 (Audio)

Pahari Mahasu New Testament

This work is licensed under Creative Commons Attribution-ShareAlike 4.0 License.

इऊं बुशु आपणै च़ेलेऊ आइलै बोलणै बासिऐ, यीशुऐ सौरगा भिलै देखौ और बोलौ, “ओ बाब, सेज़ौ बौगत आशी गौ आ। आपणै छ़ोहरु री बौड़ाई कर की छ़ोहरु भी तेरी बौड़ाई कौरा, कैलैकि ताइंऐ तेसकै सौभी लोगु माथै हक्क दैऔ, कि ज़ो ताइंऐ तेसकै दैऔ आ तिऊं सौभी लै सेऊ सौदा री ज़िन्दगी दिआ। और सौदा री ज़िन्दगी इऐ आ की लोग तुमु ज़ुण एका सौच़्च़ै परमेश्‍वर और यीशु मसीह, ज़ो ताइंऐ भेज़ौ औन्दौ आ, ज़ाणा। ज़ो काम ताइंऐ मुकै कौरना लै दैऔ थौ, तेस पुरौ कौरीऔ मुंइऐ धौतरी माथै तेरी बौड़ाई की आ। आबै ओ बाब, तू आपु आइलै मेरी बौड़ाई तिऐं बौड़ाई आइलै कर ज़ो सण्सारा रै चाणनै कु पैहलै, मेरी ताऊं आइलै थी।

“मुंइऐ तुमारौ नाऊं तिऊं लोगु माथै पौगड़ौ किऔ आ ज़ो ताइंऐ दुनिया मांझ़िऐ कु सै मुकै ई दैऔ औन्दै, और सै तैरै थै और ताइंऐ सै मुकै दै, और तिंउऐ तैरौ वचन मानी गौ आ। आबै तिंउऐ ज़ाणी गौ कि ज़ो कुछ़ ताइंऐ मुकै दैऔ आ, सेऊ सब तेरी तौरफा कु आ। कैलैकि ज़ो वचन ताइंऐ मुकै देई। मुंइऐ सै तिऊं काऐ पौउंच़ाई गौऐ। और तिंउऐ सै अपणाऐ, और सौच़्च़ौ-सौच़्च़ौ ज़ाणी गौ की हाऊं तेरी तौरफा कु ऊ, और विश्वास कौरी गौ कि तांऐ ई हाऊं भेज़ौ ऊ। हाऊं तिउंलै प्राथना कौराऊ, ज़ुण तांइऐ मुकै ई दैऔ औन्दै, कैलैकि सै तैरै ई। दुनिया रै लोगु लै प्राथना नाईं कौरदौ। और ज़ो कुछ़ मैरौ आ सेऊ सारौ तैरौ आ और ज़ो तैरौ आ सेऊ मैरौ आ, और इऊं कु मेरी बौड़ाई पौगड़ौ हुई आ। हाऊं आबै सण्सारा दी नाईं रौउंदौ, पर इऐ सण्सारा दी रौआ ई, और हाऊं ताऊं काऐ आशाऊ। ओ पवित्र बाब, आपणी तिऐं शक्ति कौरीऐ ज़ो ताइंऐ मुकै दैऔ आ, तिऊं री रक्षा कर कि सै आमु ज़िणै एक हुआ। ज़ेबी हाऊं तिंउरै साथाई थौ, ता मुंइऐ तैरै तेस नावां कौरीऐ, ज़ो ताइंऐ मुकै दैऔ तिउंरी रक्षा की। मुंइऐ तिउंरी देखभाल़ की, और नाशा रै छ़ोहरु छ़ाड़ियौ तिऊं मांझ़िऐ कु कोई नाश नाईं हुऔ, एथीलै पवित्रशास्त्रा दी ज़ो लिखौ औन्दौ आ सेऊ पुरौ हुआ। आबै हाऊं ताऊं काऐ आशाऊ, और इऊं बुशै हाऊं सण्सारा दी रौइयौ बोलाऊ, कि सै मेरी खुशी आपु दी पुरी कौरा। मुंइऐ तैरौ वचन तिउंकै पौउंच़ाई गौ आ। और दुनिया रै लोग तिऊंकु नफरत की, कैलैकि ज़िणौ हाऊं दुनिया रौ नाईं, तिणी ई मैरै च़ेलै भी दुनिया रै नाईं। हाऊं इणी प्राथना नाईं कौरदौ कि तू तिऊं धौतरी कु उठाऊ। पर इणी कि तू तिऊं शैताना कु बौच़ाई छ़ाड़ै। ज़िणौ हाऊं दुनिया रौ नाईं, तिणी सै भी दुनिया रै नाईं। तैरौ वचन सौच़्च़ौ आ, तिऊं सौच़्च़ाई दी आपु कालै अलग कर। ज़िणौ ताइंऐ हाऊं धौतरी दी भेज़ौ ऊ, तिणी मुंइऐ भी सै दुनिया दी भेज़ै ई। और तिउंलै हाऊं आपु भी पवित्र हुआ ऊ, ताकी सै भी सौच़्च़ाई कौरीऐ पवित्र हुआ।

“हाऊं सिरफ इऊं च़ेलेऊ लै औरज़ नाईं कौरदौ, पर तिउंलै भी ज़ुण तिंउरै वचना कौरी मुं माथै विश्वास छ़ाड़ा लौ, कि सै सारै एक हुआ लै। ज़िणौ ओ बाब तू मुंदी ई, और हाऊं ताऊं दी, तिणी ई सै भी आमुदी हुआ, ज़ेथ कौरी दुनिया रै लोग विश्वास कौरा की ताइंऐ ई हाऊं भेज़ौ ऊ। सै बौड़ाई ज़ो ताइंऐ मुकै देई मुंइऐ तिउंकै देई आ, कि सै तिणी ई एक हुआ ज़िणौ की आमै एक ई, हाऊं तिऊंदी और तू मुंदी ई कि सै पवित्र हुइयौ एक हुआ लै, और सण्सार ज़ाणालौ कि ताऐं ई हाऊं भेज़ौ ऊ, और ज़िणौ ताइंऐ मुं आइलै प्यार किऔ तिणी ई तिऊं आइलै प्यार किऔ आ। ओ बाब, हाऊं च़ाहा ऊ कि ज़ो ताइंऐ मुकै देई, ज़िऐ हाऊं ऊ तिऐ सै भी मुं आइलै औआ, कि सै मेरी तिऐं बौड़ाई देखा ज़ो ताइंऐ मुकै देई आ, कैलैकि ताइंऐ धौतरी चाणनै कु पैहलै मुं आइलै प्यार कियौ। ओ भौलै बाब, दुनिया रै लोगुऐ हाऊं नाईं ज़ाणौ, पर मुंइऐ तू ज़ाणौ। और इऊं च़ेलेऊ भी ज़ाणौ कि ताऐं ई हाऊं भेज़ौ ऊ। मुंइऐ तुमै तिऊं काऐ पौगड़ौ कौरै ई और पौगड़ौ कौरदै थाकाऊ लागी की ज़ो प्यार तैरौ मुं आइलै थौ सेऊ तिऊंदी रौआ, और हाऊं भी तिऊंदी रौऊ।”

聞く यहुन्ना 17