Yala - 1979 BSNIG (NT) Non Drama

Aa̍ wa̍a̍ nyɔ̄ bɛ̍ɛ̄nɛ̄, de Iji̍sɔ̄ɔsi bī pīya ga ɛbɛ yī Ipa̍yi̍lēeti. E̍ de oko̍o nāa lɛlā yī Iji̍sɔ̄ɔsi de ɔ̍ bɛ̍ɛ̄nɛ̄ hīka, “Alɔ ku ɔngrɔ̄ɔ nūma̍ nīi o̍ yɛ ē tu̍ āchɛ ē tū, ka ɛ̍lɛ ge̍ e̍e ta̍ i̍kpa̍da̍ de Isi̍sa Ɔchwɔ̄lɛ̍ Ɔnɔ̄kɔ̄kū ni̍. O̍ ka hīka anɔ̍lɔ - Ikra̍yisi nɛ, anɔ̍lɔ - Ɔchwɔ̄lɛ̍ nɛ.”
Ipa̍yi̍lēeti che Iji̍sɔ̄ɔsi ikpo̍ bɛ̍ɛ̄nɛ̄ hīka, “Awɔ - ɔchwɔ̄lɛ̍ yī Iju̍u nɛ.”
Iji̍sɔ̄ɔsi hīya anu̍ ɔkɔ hīka, “I̍ngɔ̍ɔ nīi a ka a̍nɛ.”
Ipa̍yi̍lēeti ka de alɛhu̍ aligbe ba̍la āchɛ ɛla̍ā wa̍a̍ hīka, anɔ̍lɔ i̍ ma̍ ochi̍chi̍ yī lɛlɛ̄lā lɛbɛ ge̍ē de lɛpɔ̄ ku̍ ɔngrɔ̄ɔ nūma̍ ni̍.
Āchɛ ɛla̍ā ka ga iyɔ̄bū iyɔ̄bū bɛ̍ɛ̄nɛ̄ hīka, “Lēchi̍, ɔngrɔ̄ɔ nūma̍ yɛ amu ē ta̍tu̍tu̍ yī lɛlā ogbōgbo ē de āchɛ wa̍a̍ bū la lɛlā ongōngū yī nū. O̍ wu̍tu bū abɔ̍ɔ la Iga̍līli: o̍ ga i̍ngɔ̍ɔ la ajɛ yī Ijudi̍ya wa̍a̍ mɛ̍; aa̍ nīi o̍ wā ma̍ bɛ̍ɛ̄nɛ̄ a̍nɛ.”

Ipa̍yi̍lēeti de po̍ i̍ngɔ̍ɔ ma̍, o̍ chikpo̍ hīka, ɔngrɔ̄ɔ nūma̍ ɔ̍lɔ - Oliga̍līli nɛ? O̍ de jo̍ōkū hīka Iji̍sɔ̄ɔsi ɔ̍lɔ bū la ɔcha nīi Ihɛ̍rɔ̄ɔdi ɔ̍lɔ re̍ ɔchwɔ̄lɛ̍ ma̍, o̍ de ɔ̍ tɛ̄rɔ̄ hu Ihɛ̍rɔ̄ɔdi. Yɛ̄grāa ɔla̍ā, Ihɛ̍rɔ̄ɔdi wā hɔ̄ abɔ̍ɔ la Ijɛru̍sālɛm i̍ngi̍ngɔ̍ɔ. Ihɛ̍rɔ̄ɔdi ma̍ Iji̍sɔ̄ɔsi ma̍, o̍ lɛ ɔwɔ̄wīyā kpɛ̍ɛji. Wu̍chē oji̍ nɛ, o̍ po̍ wɔ̄kā yī Iji̍sɔ̄ɔsi gbi̍chɛ-gbi̍chɛ ma̍, o̍ yɛ ē chikpo̍ ge̍ē ma̍ ɔ̄ la eyī. O̍ yɛ ē deyīrɛ ge̍ē ma̍ nīi o̍ yɛ̍ɛ̄lā ɔlɛbɛ̍bi̍ ɔha̍. Wu̍chē yī ɔla̍ā, o̍ che Iji̍sɔ̄ɔsi ikpo̍ yī lɛlā yɛ̄mɛ̄mɛ̄; Iji̍sɔ̄ɔsi i̍ chɛ̄ ho̍ko̍o tū ɔ̄ ni̍. Alɛhu̍ aligbe ba̍la āchɛ ongū Lihɔ yī Iju̍u wu̍ rɛ gāa ge̍ koko̍o yī lɛlā yī Iji̍sɔ̄ɔsi dwɔ̄bi̍-dwɔ̄bi̍. Ihɛ̍rɔ̄ɔdi ba̍la icho̍ojiya yī nū kū la obī Iji̍sɔ̄ɔsi ya̍ bɛ̍ɛ̄nɛ̄. E̍ ya̍ ɔ̄ lɛlā oliwēyī-iwēyī. E̍ de aru̍ ɔkwajɛ ɔnɛ̄ɛhɛhi ɔha̍ ru ɔ̍, ku̍chē de ɔ̍ tɛ̄rɔ̄ hu Ipa̍yi̍lēeti bɛ̍ɛ̄nɛ̄. I̍chi̍chɛ ɔla̍ā nīi Ihɛ̍rɔ̄ɔdi ba̍la Ipa̍yi̍lēeti de pīya arɛ̍ɛya a̍nɛ. Nɛ̄ni̍, aluji iyī wā o̍bū nɛ.


Ipa̍yi̍lēeti hī alɛhu̍ aligbe ɛra̍ ba̍la alɛhu̍ yī Iju̍u ba̍la āchɛ ji wa̍a̍ ge̍ grēeyī. O̍ da wa̍ hīka, “Ala̍ bī ɔngrɔ̄ɔ nūma̍ ge̍ de u, ka hīka ɔ̍lɔ yɛ ē tu̍ āchɛ ē tū dwɔ̄bi̍-dwɔ̄bi̍. Amu la iyɔ̄bū yī ala̍ nīi n che ɔ̍ ikpo̍ yī lɛlā ɔla̍ā po̍ a̍nɛ. N i̍ chī ma̍ lɛlɛ̄lā ɔdwɔ̄bi̍ nīi o̍ ya̍ abɔ̍ɔ lipu̍ yī lɛlā ɔla̍ā wa̍a̍ nīi ala̍ ka ku̍ ɔ̄ ma̍ ni̍. Ihɛ̍rɔ̄ɔdi titi i̍ de lɛpɔ̄ ɔha̍lɔha̍ ku̍ ɔ̄ ni̍. Wu̍chē oji̍ nɛ, o̍ chōo̍chē de ɔ̍ tɛ̄rɔ̄ hu u. Ɔngrɔ̄ɔ nūma̍ i̍ ya̍ lɛlɛ̄lā nīi ngma̍ la ode ɔ̍ ngmo̍ ni̍. Wu̍chē yī ɔla̍ā, n ge̍ē ka nīi e̍ ē grāa anu̍ a̍grɛ̄chi̍, nīi n ē tu̍ hī ɔ̄ nīi o̍ ē pīya.”
[Yɛ̄grāa yī Ɔwɔ̄wīyā yī Owu̍lā nūma̍, Ipa̍yi̍lēeti ē wu̍ oligbakɔbɔ ɔha̍ ē ngmɛ̍ɛchɛ ē de wa̍.] Āchɛ ɛla̍ā wa̍a̍ ya̍ ojiya, ka ɛ̍lɛ ge̍ de ɔ̍lɔ ngmo̍, nīi ɛ̍lɛ ge̍ tu̍ hī Ibara̍bāsi. Ɔ̄chɛ ɔla̍ā nīi re̍ka Ibara̍bāsi ma̍, e̍ ku̍ ɔ̄ tū abɔ̍ɔ la igbakɔbɔ. E̍ ku̍ ɔ̄ wu̍chē yī a̍tu̍tu̍ yī lɛlā ogbōgbo ɔha̍ nīi lā abɔ̍ɔ la ipwo̍gra ɔla̍ā je̍ ma̍. E̍ gba̍a ku̍ ɔ̄ wu̍chē yī āchɛ nīi o̍ ngmo̍ ma̍.
Ipa̍yi̍lēeti yɛ ē chikpo̍ ge̍ē de Iji̍sɔ̄ɔsi hɛ̍ta̍. Wu̍chē yī ɔla̍ā, o̍ ka gbōō grāa aa̍. Aa̍ titi ka gbōō grāa anu̍ ka ɛ̍lɛ ge̍ de ɔ̍lɔ gwōba̍ la ɔchi̍ ɔhrɛ̍ɛpa oo! Ɛ̍lɛ ge̍ de ɔ̍lɔ gwōba̍ la ɔchi̍ ɔhrɛ̍ɛpa!
Ipa̍yi̍lēeti ka o̍mgbo̍mɛta̍ hīka, “Lɛlā ɔdwɔ̄bi̍ ɔna̍ nīi o̍ ya̍ ma̍? Ami i̍ ma̍ lɛlā ɔdwɔ̄bi̍ ɔha̍lɔha̍ nīi o̍ ya̍ nīi ngma̍ lɛbɛ nīi e̍ ge̍ē ngmo̍ ɔ̄ ni̍ oo! N ge̍ē grāa anu̍ a̍grɛ̄chi̍ ji ē tū la abɔ̄ hī ɔ̄.”
Aa̍ wa̍a̍ ya̍ ojiya, to̍ohwe̍e ga iyɔ̄bū iyɔ̄bū. Ɛ̍lɛ ge̍ de Iji̍sɔ̄ɔsi gwōba̍ la ɔchi̍ ɔhrɛ̍ɛpa oo! Ipa̍yi̍lēeti pi̍ye̍mā wu̍chē ojiya yī wā ɔla̍ā bɛ̍ɛ̄nɛ̄. Bū la ɛbɛ ɔla̍ā, Ipa̍yi̍lēeti de lɛpɔ̄ ku̍ Iji̍sɔ̄ɔsi lɔkɔ nīi e̍ chikpo̍ ma̍. O̍ tū hī ɔngrɔ̄ɔ ɔla̍ā nīi tū la igbakɔbɔ wu̍chē yī a̍tu̍tu̍ yī lɛlā ogbōgbō ba̍la āchɛ ongmo̍ōngmo̍ ma̍ de wa̍ bɛ̍ɛ̄nɛ̄. O̍ ya̍ lɔkɔ nīi e̍ chikpo̍ ke̍e̍ ma̍. O̍ wa̍ābɔ̄ la Iji̍sɔ̄ɔsi de wa̍ nīi e̍ ge̍ē ya̍ tāa anu̍ lɔkɔ nīi o̍ ku̍ wā ɔkɔ ma̍ bɛ̍ɛ̄nɛ̄.


E̍ de Iji̍sɔ̄ɔsi bī pīya bɛ̍ɛ̄nɛ̄. E̍ yɛ gāa ma̍, e̍ grāa ɔngrɔ̄ɔ ɔha̍ nīi o̍ bū la ikō yɛ ē wā la ipwɔ̍ɔ̄lɛ̍. Ɔngrɔ̄ɔ ɔla̍ā re̍ka Isa̍yi̍mɔ̄ɔn Oyo̍olisayiri̍in. E̍ de ɔngrɔ̄ɔ ɔla̍ā ku̍, nāa ɔchi̍ ɔhrɛ̍ɛpa ɔla̍ā che ɔ̍; ka ɔ̍lɔ ge̍ bī yɛ la okwi̍ihi yī Iji̍sɔ̄ɔsi.
Āchɛ pɛ̍ kpɛ̍ɛ ku ɔ̍ la u̍tu. Anyā ɛha̍ nīi yɛ abɔ̍ɔ ma̍ yɛ ē drɛ̄ɛgba, ē gwe̍ejrīkā wu̍chē yī Iji̍sɔ̄ɔsi. Iji̍sɔ̄ɔsi pīya iyɔ̄bū ta̍ wā da wa̍ hīka, “Anānyā yī Ijɛru̍sālɛm! Ala̍ e̍e drɛ̄ɛgba wu̍chē yī u ni̍! Ala̍ ā dɛ̄ wu̍chē yī ala̍ ɛlɛjā ba̍la ayi̍ yī ala̍! Wu̍chē oji̍ nɛ, ɔ̄chī ɔha̍ yɛ amu yewā nīi āchɛ ge̍ē ka hīka, ‘A̍hōhi ge̍ - iyī anyā ɔdwɔma! A̍hōhi ge̍ - iyī anyā nīi i̍ ma ayi̍ je̍ ni̍ ma̍! A̍hōhi ge̍ - iyī anyā nīi i̍ de amɛ̄ pī ɔyi̍ je̍ ni̍ ma̍!’ Yɛ̄grāa ɔla̍ā, āchɛ ge̍ē da yɛwu hīka ɔ̍lɔ ge̍ mi̍ya chiya aa̍ gɛ! E̍ ge̍ē da u̍kpo̍chi ka ɔ̍lɔ ge̍ tu̍ aa̍ ba̍ ajɛ gɛ! Wu̍chē oji̍ nɛ, lɛlā nūma̍ wa̍a̍ ge̍ ya̍ tāa ɔchi̍ olīmīmɛ̄ i̍ngɔ̍ɔ lɔkɔ nīi o̍ hɔ̄ ma̍ ma̍, iyī ɔchi̍ ongmo̍ōngmo̍ ma̍ ge̍ē lɛ kana̍ ma̍ ēēe?”
E̍ bī āchɛ ɛpa ɛha̍ nīi - alɛlā abi̍ ɔyɔ̍ɔ̄ya̍ ma̍ gānyɔ̄ i̍ngi̍ngɔ̍ɔ; hɛ̄ɛbɛ ge̍ē de wa̍ ē ngmo̍ abɔ̍ɔ ba̍la Iji̍sɔ̄ɔsi. E̍ gbajɛ ga ɛbɛ ɔ̍lɔma̍ nīi re̍ka “Ɛbɛ yī Īkplɛ̄hu̍ Āchɛ” ma̍, e̍ de Iji̍sɔ̄ɔsi gwōba̍ la ɔchi̍ ɔhrɛ̍ɛpa abɔ̍ɔ. E̍ de alɛlā abi̍ ɔyɔ̍ɔ̄ya̍ āchɛ ɛpa ɛla̍ā gwōba̍ la ɔchi̍ i̍ngi̍ngɔ̍ɔ. Ɔha̍ hɔ̄ la wāā yī abɔ̄ līre̍ yī nū; ɔha̍ hɔ̄ la wāā yī abɔ̄ līfīyē. Iji̍sɔ̄ɔsi ka bɛ̍ɛ̄nɛ̄ hīka, “A̍dā yī u! Chu̍chu̍u, de kɔ̄ de wa̍; ma̍a e̍ i̍ je̍ ɔjā nīi e̍ yɛ ē ya̍ ma̍ ni̍!”
E̍ ta̍ ɔjā ɔha̍ la ajɛ bɔ̄ɔjā nīi e̍ ē chɛbā ma̍ o̍bū de ɛjā otūlibi̍īyē yī Iji̍sɔ̄ɔsi kɔ̄ tāa iyī wā. Āchɛ gblāa abɔ̍ɔ ē ma̍ nīi alɛhu̍ yī Iju̍u yɛ ē bī ɔ̄ ya̍ ma̍. E̍ ka ɔ̍lɔ nīi - ɔ̍lɔ ē hɛ̍ āchɛ ē ta̍ ma̍, ɔ̍lɔ ge̍ hɛ̍ iyī ɔ̍lɔ ta̍ mɛ gɛ/ Ɔ̍lɔ ge̍ Ɔhɔ̍ɔnyɛta̍ Nīi Ɔwɔ Ɔ̍lɔ Hōhu Ma̍, ɔ̍lɔ ge̍ hɛ̍ iyī ɔ̍lɔ ta̍ gɛ!
Icho̍ojiya nīi gblāa abɔ̍ɔ ma̍ titi bī ɔ̄ ya̍. E̍ ta̍ ɔ̄ oko̍o yī ɛ̍mwɔ̄ ɔbachā nīi mɔ̍ɔ̄ma̍ gba̍a̍ ma̍. E̍ da ɔ̍ hīka, “A ge̍ - Ɔchwɔ̄lɛ̍ yī Iju̍u ma̍, a hɛ̍ iyī wɔ ta̍ gɛ/.”
Ipa̍yi̍lēeti ta̍ ɔjā ba̍ abɔ̍ɔ la ɛbɛ yī lɛhu̍ yī Iji̍sɔ̄ɔsi hīka,
“ɔCHWɔ̄Lɛ̍ Yī IJU̍U Hɔ̄ MA̍ A̍Nɛ.”
Ɔ̄chɛ ɔha̍ lipu̍ yī alɛlā abi̍ ɔyɔ̍ɔ̄ya̍ ɛla̍ā nīi e̍ de wa̍ gwōba̍ ma̍ cha̍ Iji̍sɔ̄ɔsi ɛcha̍ i̍ngi̍ngɔ̍ɔ. O̍ da Iji̍sɔ̄ɔsi hīka, “Je̍ka awɔ re̍ka Ɔhɔ̍ɔnyɛta̍ Ɔ̍lɔma̍ Nīi Ɔwɔ Hōhu a̍nɛ? Hɛ̍ iyī wɔ ta̍ ba̍la alɔ gɛ/.”
Ɔ̄chɛ ɔ̍mɛpa yī nū ka alābi̍ tāa anu̍ hīka, “O̍ re̍ka a i̍ ē tūuhwi yī Ɔwɔ ni̍ kpɛkpɛ? Alɔ wa̍a̍ chī nāa akanya ūkpo̍he-ūkpo̍he. Iyī alɔ ma̍ chī ngma̍ la alɔ. Wu̍chē oji̍ nɛ, lɛlā abi̍ nīi alɔ ya̍ ma̍ nīi alɔ nāa ɛpiyabuna yī nū a̍nɛ. Anu̍ ma̍ i̍ chī yɛ̍ɛ̄lā ɔdwɔ̄bi̍ ɔha̍lɔha̍ o̍bū ni̍.” O̍ pīya oko̍o kpa̍ta̍ ka de Iji̍sɔ̄ɔsi bɛ̍ɛ̄nɛ̄ hīka, “Iji̍sɔ̄ɔsi be̍e! Chu̍chu̍u bla tū u yɛ̄grāa nīi a ge̍ē wā bāa Ɔchwɔ̄lɛ̍ ma̍!”
Iji̍sɔ̄ɔsi ka grāa anu̍ hīka, “N ā koko̍o de wɔ gɛ ko̍ō! I̍chɛ nūma̍, a ge̍ē hɔ̄ ba̍la ami abɔ̍ɔ la Ɛbɛ A̍hōhi.”


I̍chi̍chɛ ɔla̍ā, bāa yɛ̄grāa yī oje igwo̍lɛpa yī yɛnɔ ma̍, yɛnɔ pi̍ye̍mā la ɔchɔ̄chɛ̄ i̍ngɔ̍ɔ ke̍e̍. Ɛbɛ wa̍a̍ de dobū abɔ̍ɔ la ɔcha ɔla̍ā wa̍a̍, i̍ngɔ̍ɔ kpɛɛ ge̍ ku oje ɛta̍ yī yɛnɔ ɔ̄nɛ̄. Ɔ̄pa̍ ɔla̍ā nīi e̍ de hɛ̍ u̍kwee̍ yī u̍nu̍ yī Ɔwɔ ma̍ ku̍ ta̍āā ɛpa i̍ngɔ̍ɔ ke̍e̍. Iji̍sɔ̄ɔsi to̍ohwe̍e gbōō bɛ̍ɛ̄nɛ̄ hīka, “A̍dā yī u be̍e! N de uhu yī u tū wɔ la abɔ̄!” O̍ de ka i̍ngɔ̍ɔ ɔpɔ̄ɔpɛ̄ ma̍, o̍ hīyɔtū.
Ɔlɛhu̍ icho̍ojiya ɔla̍ā ma̍ lɛlā nūma̍ wa̍a̍ nīi ya̍ ma̍, o̍ kā Ɔwɔ ɔkɔ̄kā. O̍ ka ɔ̍lɔ ge̍ lēchi̍, ɔngrɔ̄ɔ nūma̍ ɔ̍lɔ - ɔ̄chɛ ɔnɛ̄ɛhɛhi nɛ.
Āchɛ ɛla̍ā wa̍a̍ nīi gāa ge̍ grēeyī hɛ̄ɛbɛ ge̍ myɛ̍ma̍ īkprī ma̍, e̍ ma̍ lɛlā ɔla̍ā nīi ya̍ ma̍, e̍ kpo̍ abɔ̄ ba̍ ɔkɔ pīya yī wɔlɛ̍. Āchɛ wa̍a̍ nīi je̍ ɔ̄ yɛ̍yɛ̍ ma̍, tūla anyā ɛla̍ā nīi ku ɔ̍ bū la Iga̍līli ma̍ e̍ hɛ̍ rɛ abɔ̍ɔ hwɛɛ ē ma̍ lɛlā ɔla̍ā wa̍a̍.


Ɔngrɔ̄ɔ ɔha̍ re̍ka Ijo̍sɛ̄ɛfu. O̍ bū la ipwo̍gra yī Iju̍u ɔha̍ nīi re̍ka Arīmati̍ya ma̍. Ɔ̄chɛ ɔnɛ̄ɛhɛhi nīi āchɛ ē tū ɔ̄ la ichō nɛ. O̍ hɔ̄ de ɔtū che ɔwɔ̄wā yī ɔchwɔ̄lɛ̍ Oro̍ōre̍ yī Ɔwɔ. Anu̍ titi - ɔ̄chɛ ɔha̍ lipu̍ yī Ogrēeyī yī Alihiyo yī Iju̍u nɛ. O̍ i̍ ē chī chɛ̄ lɛlā nīi e̍ ē ka gba̍a ē ya̍ ma̍ ni̍. O̍ wā ge̍ pīya dikpo̍ba̍ Ipa̍yi̍lēeti ka ɔ̍lɔ ge̍ tu̍ hī okū yī Iji̍sɔ̄ɔsi de anu̍. O̍ de okū hrāa, ha̍aba ku̍ ɔ̄ la ābāchā gblɛ̍ɛgblɛ̍ɛ ma̍, o̍ de ɔ̄ nāa ge̍ nyi la wɔ̄gɔ̄ yī u̍nwɔ̍wu̍ ɔha̍ nīi e̍ bū lɔ̄lā abɔ̍ɔ lipu̍ yī lɛchɔ̄ ma̍. E̍ i̍ de ɔ̄chɔ̄chɛ nyi abɔ̍ɔ je̍ ni̍. I̍chi̍chɛ ɔla̍ā - ɔ̄chī Ifra̍yidēe nīi lā che Ɔ̄chī Ɔmyɛ̍nyɛ̍ ma̍ nɛ. Ɔ̄chī Ɔmyɛ̍nyɛ̍ yɛ aa̍ ge̍ē hwa bɛ̍ɛ̄nɛ̄ a̍nɛ.
Anyā ɛla̍ā nīi ku Iji̍sɔ̄ɔsi bū la Iga̍līli ma̍ gāa ba̍la Ijo̍sɛ̄ɛfu ge̍ ma̍ wɔ̄gɔ̄ yī u̍nwɔ̍wu̍ ɔla̍ā ba̍la ɔkɔ nīi o̍ de okū yī Iji̍sɔ̄ɔsi gbo abɔ̍ɔ ma̍. E̍ wā ge̍ pīya yī wɔlɛ̍ bɛ̍ɛ̄nɛ̄. E̍ gāa ge̍ ya̍ ɔchi̍ oni̍pī kwɛ̍kwɛ̍ ba̍la yanɔ̄ oni̍pī kwɛ̍kwɛ̍ hɛ̄ɛbɛ ge̍ē de ē re̍tū okū yī Iji̍sɔ̄ɔsi.
La ɔ̄chī yī Isa̍bāati nīi re̍ka “Ɔ̄chī Ɔmyɛ̍nyɛ̍” ma̍, e̍ de myɛ̍nyɛ̍ lɔkɔ nīi Lihɔ yī Imo̍sīisi ka ma̍.

聞く Ilu̍uku 23