ഈ ബൊക്കുന പറ്റി സ്‌ന്ന ഒന്റു സേദി
<<ഇദ് സാമിമഗാന് ഏസ്സ് ക്‌റ്‌സ്‌ത്ത്‌ന പറ്റി സൊല്ല്യ പോവ നല്ല സേദി>> എന്റ് സൊല്ലി കൊണ്ടുത്തെ മര്‌ക്കോസു ഈ നല്ല സേദി എ്ള്‌ദ്യ പ്‌ഡിത്താദ്. എല്ലാദ്‌നാമ് അദിഗരത്തോഡ ഗേവ മന്‌സാനായിത്തെ ഈ ബൊക്കുലു ഏസ്സ്‌ന പറ്റി സൊല്ലുവാദ്. ഏസ്സ് സൊന്ന ബുദ്ദി നായാത്ത്‌ല്‌മ്, ആള്‌ഗാള്‌ക്ക് തട്ടിരിക്കുവ കെ്ട്ടജാദിഗാള്‌ന തട്ടിസി തള്ളുവാദ്‌ല്‌മ്, ആള്‌ഗാള്‌ത്ത് പാവഗാള്‌ന പൊറുത്തു കൊഡുക്കുവാദ്‌ല്‌മ് തന്ന് അദിഗരാന നമാക്ക് കാണ്യ മുഡിമ്. ആള്‌ഗാള് ഗേന്ത പാവഗാള്‌ക്ക് കെ്ഡേക്കുവ ദെ്ണ്ടണേലിന്ത് അവാര്‌ന കാപാറ്റ്യ ഏസ്സ് തന്ന് ഉജുരുന കൊഡുക്ക്യ മന്‌സാനായി പ്‌റാന്താന് എന്റ്‌ത്തെ ഏസ്സ് തനാന പറ്റി താനെ ഈ നല്ല സേദില് സൊല്ലുവാദ്.
ഏസ്സ് പഡ്‌സ്‌ന കാര്യഗാള്‌ന ബ്‌ഡ ഏസ്സ് ഗേന്ത കാര്യഗാള്‌ന എ്ള്‌ദ്യാത്തെ മര്‌ക്കോസു മുക്ക്യമായിമ് ആസെപട്ടാദ്. ഓഗന്നാന്‌നാമ്, ഏസ്സ് നീര്‌ക്ക് മുളുഗുവാദ്‌നാമ്, ഏസ്സ് സോദണെപഡുവാദ്‌നാമ് പറ്റി സുരുക്കാത്ത്‌ല് എ്ള്‌ദി മുഡിത്ത്, അന്നാല് താനെ ഏസ്സ് നോയിഗാറാര്‌ന തെള്‌സുവാദ്‌നാമ് ആള്‌ഗാള്‌ന പഡുസുവാദ്‌നാമ് പറ്റി മര്‌ക്കോസു എ്ള്‌ദി ബെത്ത്‌റ്‌ന്റാന്. ഏസ്സ് പിന്ന്‌മേലെ നഡാന്തവാര്‌ഗാള്‌ക്ക് നാള് പോഗപോഗ ഏസ്സ് ആര് എന്റ് നലമായി തെരിന്ത് കൊണ്ടു ഇന്ത്‌ദ്. ആന അയാള് പോട്ടിഗാറാര്‌ക്ക് അയാളോഡ ബയിരാമ് പെരിഗികൊണ്ടു ഇന്ത്‌ദ്. കഡേസി, ഈ ബൊക്കുലു ഏസ്സ്‌ത്ത് ദൊഡ്ഡ കൊഡിമെനാമ്, തനാന കുരുസുക്കു സേത്തി ആണി അഡിത്ത് കൊല്ലുവാദ്‌നാമ്, താന് സത്തവാര് പട്ട്‌ലിന്ത് ഉജുര്‌ളാഗുവാദ്‌ന പറ്റിമ് മര്‌ക്കോസു എ്ള്‌ദി ബെത്ത്‌റ്‌ന്റാന്.
ഈ ബൊക്കുലു അഡാങ്കിര്‌ക്കുവാദ്
നല്ല സേദിന സൊല്ല്യ പ്‌ഡിക്കുവാദ് 1:1–13
ഏസ്സ് ഗലീല നാഡ്‌ല് ഗേവ കാര്യഗാള് 1:14—9:50
ഏസ്സ് ഗലീല നാഡ്‌ലിന്ത് എര്‌സലേമ് പട്ടണാക്ക് പോവാദ് 10:1–52
ഏസ്സ് സാവാദ്‌ക്ക് മുദാല് എര്‌സലേമ് പട്ടണാത്ത്‌ല്‌മ് അദ്‌ക്ക് അര്‌ഗേമ് 11:1—15:47
ഏസ്സ് സത്തിന്ത് ഉജുര്‌ളാഗുവാദ് 16:1–8
ഉജുര്‌ളാഗ്‌ന ആണ്ടവാന് കണ്ണ്‌ക്ക് കാട്ടുവാദ്‌മ് പ്‌റ മേലോഗാക്ക് പോവാദ്‌മ് 16:9–20

聞く മര്‌ക്കോസു ഈ ബൊക്കുന പറ്റി സ്‌ന്ന ഒന്റു സേദി