Kodaku

हेना वरी फेर दूय दिन बितो केन रे गलील जिला राः काना गाँव रे कनय ओड़ाः रेकू बियाहुः दोहो एनु, अवुर हेना रे ईसु इंगत होय दोहो एना। हेना बियाह रे ईसु अवुर चेला कुतय होकू नेंवता तेडकुआ। अवुर हेना रे अंगूर रस हनी यन दोहो एनु, तहाँ इंगत ईसु थरेय कहनी तेडा, “नेकू थरे अंगूर रस हनी यना।” तहाँ ईसु कहनी तेडा, “ए कोड़ीहोन, अम नआँ इंञ थरे ची लगड मी कहनी यडा? निहों ईञाः समय अनायिन मेजुआ।” हेना वरी इंगत हेना रे बुताकू थरेय कहनी तेडा, “जे-ना अपे थरेय कहनियू, हें-नपे करो।” हेना रे एहूदिकू राः रीति रिवाज राः अनुसार ते सूधुः लगड छो गोटंग दिरी राः गगेर कू मँडो तडा, अवुर हेना गगेर ते दुदू तीतिन मन समोः दोहो एनु। हेना वरी ईसु बुताकू थरेय कहनी तेडा, “मेना गगेर ते दाः पे पेरेजू।” अवुर हेंकू हेना छप छप तेकू पेरेज तेडा। हेना वरी हेंकू थरेय कहनी तेडा, “निहों बुराः केते बियाह राः देख रेखाय मुखिया थरे पे इदियू।” हेना वरी हेंकू हेंय थरे कू इदी तेडा। हेना वरी बियाह देख रेखाय अंगूर रस बनो यन दोहो एनु, हेना दाईय चिखो तेडा, अवुर करा वरी कू अगतेडा, हेना हेंय मेनेय पपाड़ी दोहो एनु। (लेकिन बुराः इदी तेड हेंकू बुताःकू पपाड़ी दोहो एनकू) तहाँ बियाह देख रेखाय दुल्हाय राःकेते हेंय थरेय कहनी तेडा, “सींड़कू मड़ंग ते बढ़ियाँः अंगूर रस कू ए-मा, हेना वरी होड़कू ञूँ पिटो जोम तहाँ, पतारा कू ए-मा; लेकिन अम निहों मेनते बढ़ियाँः अंगूर रस मी बंचो केडा!” ईसु गलील जिला राः काना गाँव रे पहला चिन्ह तिबके ते अनेज तीमिन बडे गिआयू हेनाय तिब तेडा, अवुर चेला कुतय हेंय थरे मसीहा हवे मेनते कू बिसवास तेडा।
हेना वरी ईसु अवुर इंगत अवुर बोहोत अवुर चेला कुतय कफरनहूम सहर कू सेनेना, अवुर हें-डे कुछ दिन कू दोहो एना।

ईसु एहूदिकू राः पस्का परब तयाः बंचो तन तोलोग एरूसलेमिय सेनेना। हेना वरी ईसु मँडिल रे बयेलकू, भेंड़िकू अवुर कबूतर केकेजाकू अवुर पेयसा बदला कू दुड़ूब तन तोलोगिय ञेंल ञँमतेड कुआ। तहाँ हेंय लुड़ूम राः कोड़ा बनो केते सींड़ भेड़ाकू अवुर बयेल कुय उडूंग तेडा। अवुर पेयसा बदला कू राः पेयसाय मिरीज तेडा अवुर टिबुलिय कलथो तेडा, अवुर कबूतर केकेजाकू थरेय कहनी तेडा, “नेकू न वरी गोःकू पे। अपुंञ राः मँडिल बेयपारियाकू ओड़ाः अलोपे बनोवे।” तहाँ चेला कुतय धरमग्रंथ रे न याःते लिखल इदाना हेना कू उहयर तेडा, “अम ओड़ाः राः मान मरजाद होयाः लगड इंञ एतना चिन्ता इदाना कि इंञ हेना लगड जीविंञ घलिंञ एम सकोआ।” हेना वरी एहूदिकू रेनकू मुख मुखकू हेंय थरे कू कहनी तेडा, “अम नआँ काम राः अधिकार इदाना मेनाआँ, अले पपाड़ी लगड चिन्ह मी तिःवाले?” हेना वरी ईसु हेंकू थरेय कहनी तेडा, “न मँडिल पे धसगों गोत्ते, अवुर इंञ तीन दिन तेंञ चड़ाँया।” तहाँ एहूदिकू कहनी तेडा, “नआँ मँडिल बबानोरे छियालीस बरिस लगो केना, हेना अम तीन दिन तेम चड़ाँ सकोआ?” लेकिन हेंय अनेज राः देंह, मँडिल हवे मेनतेय कहनिय दोहो एनु। हेना वरी हेंय जियो रिमेन तहाँ, चेला कुतय ईसु कहनी तेड हेना कू उहयर तेडा। हेना वरी धरमग्रंथ रे लिखल इदाना, हेना अवुर हेंकू ईसु राः बचन रेकू बिसवास तेडा।

एरुसलेम रे पस्का परब रेय दोहोएन तोलोग हेंय अहचरज कामिय तिब दोहो एनु, हेना ञेंलके ते अखीर होड़कू मसीहा हवे मेनते हेंय थरे कू बिसवास तेडा। तबो लेहो ईसु हेंकू राः भरोस रे मेनेय दोहो गना, कहेकि हेंय सींड़कू राः मानिय पपाड़ी दोहो एनु; अवुर हेंय नआँ टेबोः राः जरूरत मेने दोहो गना कि होड़कू राः बारे ते कनय लाय वयू। ईसु दो होड़ राः मन रे ची इदाना, हेना खूदिय पपाड़ी दोहो एनु।

聞く एहुन्‍ना 2