Kodaku

हेना तोलोग चेलाकू ईसु थरे मेजकेन तेकू होंबोरे दोहो एनु, “सरग राज रे सींड़कू वरी बडे ईया इदाना?” हेना वरी ईसु मियाँहोड़ चोंडिज राःकेते हेंकू राः मँझर रेय चड़ाँ तेडिया, अवुरिय कहनी तेडा, “इंञ अपे थरे सही मेतेंञ कहनी यडा, अपे अपन अपन बुरा चाल वरी मन मेने पे बदलो वेरेदो, अवुर चोंडिजकू घयते अनायिन पे बनोः मेन दिन, अपे सरग राज रे एरो पे सेन सको एना। हेनाते जे नेय चोंडिज घयते अनानेजिय होडिञूँ, हें-नी सरग राज रे सींड़कू वरिय बडे गिआ। कनय हो नेय चोंडिज घियाअय इंञ ञुमू तेय अपनो विय रेदो, हेंय ईंञिय अपनोआँ।


लेकिन जे होड़कू इंञ थरे कू बिसवासेआ, हेंकू होड होडींञ कू मेंडे कनय मियाँहोड़ हो एर पाप केकू ते, भगवान वरी कू अलग कू रेदो, हेंय होड़ होटोः तुरे जनता चकी तोलकेते, समुन्धर रे अटड़ गोत्तेय हेना बढ़ियाँ गिआ, लेकिन नआँ वरी हो भगवान बगरा सजाय ओवाया। न दुनिया रे पाप रे एर लोलोजोर कू अखीर इदान कुआ! न घयते पाप रे एर लोलोजोर कू दुनिया रेनकू थरे अखीर तकलिप मेजुआ, पाप रे एर लोलोजोर हेना टेबोः दो मेने जुआ, लेकिन एटाःकू पाप रे एर लोलोजोराय थरे अखीर ते तकलिप मेजुआ। अगर तीम चहे कटम पाप रे लोजोर मी रेदो, हेना बोंगेर केतेम घिर गोत्ते; बाटंग कटम अवुर बाटंग तीम रह ते हमेसा सेंगेल धरोः तन हेना रेम एर डलोः सेथा दो, ठुठा कोःते चहे लंगड़ा कोःते जीवन मी ञँम हेना बढ़ियाँ गिआ। अगर मेड मी पाप रे लोजोर मी रेदो, हेना उडूंग केतेम घिर गोत्ते, बाटंग मेड रह ते नरक रेम एर डलोः सेथा दो, कनवाँ कोःते जीवन मी ञँम हेना बढ़ियाँ गिआ।


अँजोम पे, अपे नेकू होड होडिंञकू मेंडे कनय अलोपे मेरंगवा, कहेकि इंञ अपेंञ लाय वपे तना, नेकू रेनकू दूतकू सरग रे अपुंञ मड़ंग रे हमेसा कू दोहोना। [कहेकि इंञ होड़ होपोन अडकेन हेंकू बंचो लगाडिय मेजकेना।] अपे काःतेपे अड़ींग तना? अगर कनय होड़ रेनकू सव गोटंग भेंड़िकू दोहोनू, अवुर हेंकू मेंडे रे मियाँटंग अडुः रे, निनानबे गोटंग बुरू रे अटु केकुते अडकेन हेनी छछापा एरोय सेनेना किदो? अवुरिय ञँमेयू, इंञ अपे थरे सही मेतेंञ कहनी यडा, मेने कू अडगन हेंकू निनानबे गोटंग भेंड़िकू वरी हो, अडतन हेनी भेड़ी लगड अखीर तेय खुसीआ। नेन घयते सरग रे इदानिया, हेनी अपापे हो नेकू होड होडिंञकू मेंडे रे कनय अलोकू बिलोः मेनतेय चहोः तना।


ईसु अनावुरिय कहनी तेडा, अगर कनय भाई अमाः बिरूध रेय कसूरे रेदो, मिनियें होड़ ते सेनकोःतेम टेबोः समझो वियू। अगर अमाः टेबोईय अँजोम रेदो, अम अमाअय भाई सुदा रिस्ता तम मी बंचो केडा। अगर हेंय मेनेय अँजोमे रेदो, अवुर मियाँ बा होड़ मी गती जोमू; ‘ताकि बार पेय होड़ राः गोवाही ते सगोर टेबोःपे फसलायू।’ अगर हेंय हेंकू राः हो मेनेय मनोवे रेदो, कलीसिया रेनकू थरेम लाये, कलीसिया रेनकू राः मेनेय मनोवे रेदो, हेंय अनजातकू अवुर मलगुजारी तिलाकू घयतेम अड़ींग वयू।
इंञ अपे थरे सही मेतेंञ कहनी यडा, जे-ना अपे नआँ धरती रेपे तो-लेआ, हेना सरग रे तोलुआ; अवुर जे-ना धरती रेपे लड़ायू, हेना सरग रे लड़ाआ। फेर अपे थरे सही मेतेंञ कहनी यडा, अगर अपे मेंडे रे बा होड़ न धरती रे एक सूर कोःते कनारा कींञ असी रेदो, हेना सरग रे दोहोनाय अपुंञ हनवरी हेंकीञ लगड ञँमुआँ। कहेकि जहाँ ना बा होड़ चहे पेय होड़ इंञ ञुमू तेकू जवारुःआ, हेना रे इंञ हेंकू मँझर रेंञ दोहोना।”

हेना वरी पतरस ईसु थरेय मेजेना अवुरिय होंबोर तेडा, “ए परभु, अगर इंञाअय भाई ईञाअय कनासुरे महल रेय दोहोन रेदो, तीमिन एसेंञ माफिया? सात एस किदो?” हेना वरी ईसु हेंय थरेय कहनी तेडा, “सीरिफ साते एस मेनते इंञ मेनेंञ कहनी यडा, लेकिन सात एस राः सत्तर गुना मेनते।”
“हेनाते सरग राज अनेज रेनकू हरवाहकू थरे हिसाब तिलाअय राजा घयगिआ। हेंय राजा हिसाबिय असी तेडा, तहाँ दस हजार सोना राः सिक्‍का राः दाम मेनमोट करज दारिय दोहो एना, हेंय कू अगतेडा। लेकिन हेंय थरे मिड़ागे लगड कनर मेने दोहो गना, हेना वरी गिरहत तू कहनी तेडा, ‘नेय अवुर कोड़ीहोन तू अवुर चोंडिज कुतय अवुर जे-ना नेय राः इदाना, हेना सींड़ पे केजायू अवुरू करजा पे असुलू।’ हेनाते हेंय हरवाह उकड़ुम केनतेय जोहार वडिया, अवुर अखीर गोड़ेन मुड़ेन केनतेय कहनी तेडा, ‘ए गिरहत रहा सहोवेमू, सींड़िंञ मिड़ागेः तमिआँ।’ तहाँ गिरहत तू सोग वडिय ते हेंय हरवाहिय बगी वडियू, अवुर करजा तय होय माफ गोत्तेडू।”
“लेकिन हेंय हरवाह बहेरिय उडूंग एना, तहाँ गतितकू मेंडे मियाँहोड़ हरवाह सुदाय जुमो एना, हेंय सव दिनारिय करजा तना; हेंय सबके डियतेय लिंबोड तेडिया, अवुरिय कहनी तेडा, ‘करजाम तिला केड हेना तंञ मी मिड़ाः गोत्ते।’ हेना वरी हेंय गतीत उकड़ूम केनते हेंय थरेय गोड़ेन मुड़ेन एना, ‘रहा सहोवेमू, सींड़िंञ मिड़ागेः तमिआँ।’ लेकिन हेंय मेनेनेय मनो गना, अवुर हेंय सेनकेन ते करजा अनायीनिय भरोवे मेन दिन, हेन जेहेल रेय दोहोन मेनतेय एर हुड़को गोत्तेडियू। अवुर हेंय गति हरवाहकू हेना ञेंलके ते अखीर कू मन उदास यनु, अवुर गिरहत तू थरे सेनकेन ते सींड़ टेबोः कू लाय गोत्तेडू। तहाँ गिरहत तू मेने सोग गनाय हरवाह राःकेडिय तेय कहनी वडियू, ‘ए बयमान हरवाह, अम इंञ थरेम गोड़ेन मुड़ेन एना, तहाँ सींड़ करजांञ माफ तेडा। जेयसे इंञ अम थरेंञ दया एना, हेन घयते गतिम थरेम दया एन सी।’ अवुर हेंय गिरहत तू अखीर धको केनते, सजा एम कुराः ती रे, करजा अनायीनिय मिड़ाः मेन दिन, हेंकू राः ती रेय जिमा तेडिया।
नेन घयते अपे हो कनय भाई पूरा मन ते मेनेय माफ वय रेदो, सरग रे इदानिय हेनी अपुंञ हो अपे सुदा नेन घयतेय करो वेआ।”

聞く मत्ती 18