Text: © Wycliffe India Audio: ℗ Hosanna 2024 and WPT

Pangwali 2023 WBT (NT) Drama

बैतनिया ग्रां अन्तर लाजार नओएं यक मेह्‍णु थिआ, जे बीमार भोई गा। तसे दुई भेण मार्था त मरियम थी। (ए सेईंए मरियम भो, जे पता प्रभु पुठ मुश्कि बाड़ा तेल छइ कइ तसे खुर अपु झशुड़े बइ धूशती। एसे भाई लाजार बीमार थिआ।) त लाजारे भेण यीशु जे ई जवाब लंघाउ कि “ए प्रभु, शुणे। तुं ट्यारा मितर लाजार बीमार भोई गो असा।”
जपल यीशु केईं ई जवाब पुजु त तेन बोलु, “ए बीमारी मरण जे नेईं, बल्कि परमेश्वरे शाने लिए असी, जेसे बेलि परमेश्वरे कुआ जे अउं असा, में शान बधती।”
यीशु मार्था, मरियम त लाजार ट्यारे थिए। पर जपल तेन शुणु कि लाजार बीमार भो असा, त से तठि दुई रोज हउ बिशा। तढ़ेया पता तेन अपु चेली जे बोलु, “हंटे! अस दुबारी यहूदिया राज्य जे घेन्ते।” त चेली तस जे बोलु, “ए गुरु! होता कुछ रोज पेहले त तठियाणि मेह्‍णु तोउ घोड़िआई कइ मरण चहन्तेथ, त तुस दुबारी ता घेण किस चहन्ते?” यीशु तेन्हि जे बोलु, “यक रोज अन्तर कि बाराह घंटे टगड़ियार ना भुन्ति ना? त अगर कोई दिसाई हंटाल त से उछुट ना घेन्ता। किस कि इस धरती टगड़ियारी बेलि तस सुसुर केतु। पर अगर कोई राति हंटाल त से उछुट घेन्ता, किस कि तपल टगड़ियार ना भुन्ति।” ई बोल कइ पता से तेन्हि जे बोलुण लगा, “हें मितर लाजार उंघो असा, पर असी घेई कइ से खड़ेरण असा।” तपल चेली तस जे बोलु, “ए प्रभु, अगर से उंघो असा त ठीक भोई घेन्ता।” यीशु त तेन्हि जे लाजारे मरणे बारे बोलो थिउ, पर से समझे कि से उंघो असा। त यीशु तेन्हि जे सुसुर बोलु, “लाजार मरी गो असा। पर किस कि अउं तठि नेओथ, अब तुस मोउं पुठ विश्वास करियेल। त तुं लिए अउं खुश असा। हंटे! तस केईं घेन्ते।”
तपल थोमा, जेस जे जूंठ बि बोतेथ होरे चेली जे बोलु, “चले, अस बि तस जुए मरण जे घेन्ते।” त यीशु तठि पूज कइ पता लगा कि लाजार मर कइ कब्र अन्तर छोओ चोउर रोज भोई गो असे।

बैतनिया ग्रां यरुशलेम केआं कोई टाई किलोमिटर दूर थिउ। त तठिआ सुआ यहूदी मेह्‍णु मार्था त मरियम केईं मीण जे त बर्तण करण जे ओ थिए।
त जपल मार्था पता लगा कि यीशु पुजी गो असा त से तस जुए मीण जे गई, पर मरियम गी बिशी। मार्था यीशु जे बोलु, “ए प्रभु, अगर तुस इठि भुन्तेथ त में भाई कदी ना मरताथ त अभेईं बि अउं जाणती कि जे बि तुस परमेश्वर केईआं मगेल, से तुं धे देन्ता।” यीशु तस जे बोलु, “तें भाई दुबारी जीन्ता।” मार्था तस जे बोलु, “मोउं पता असा कि परमेश्वरे न्याय करणे रोज से दुबारी जीन्ता।” यीशु तस जे बोलु, “दुबारी जीआणे बाड़ा त जीवन देण बाड़ा अउंए भो। जे बि मोउं पुठ विश्वास कता, से मर बि घियाल, तोउं बि दुबारी जी घेन्ता। त जे जीन्ता असा त मोउं पुठ विश्वास कता, से कदी ना मरता। तु कि इस बोक पुठ विश्वास कती ना?” तेन तस जे बोलु, “आं, ए प्रभु अउं विश्वास कइ छो असा कि परमेश्वर केआं जे मसीह धरती पुठ एणे बाड़ा असा, से परमेश्वरे कुआ तुईएं भो।”

ईं बोल कइ मार्था घेई कइ अपु भेण मरियम जे मठे बोलु, “गुरुजी पुजी गो असा, त तु भिहो असी।” त मरियम ई शुण कइ तपले ईं खड़ भुई त यीशु केईं आई। (यीशु अपल तकर ग्रां अन्तर नेओथ पुजो। से तठि थिआ, जेठि मार्था तस मेओ थी।) तपल जे यहूदी तसे गी थिए त तेन्हि जोई मीण जे ओ थिए, हेरु कि मरियम अजगता खड़ भुई कइ बाहर नश गई, त तेन्हि समझु कि से कब्र पुठ रोलुण जे गो असी। त से सम्हाई तस पतोती गे।
तोउं मरियम तठि पुजी जेठि यीशु थिआ, त तस हेर कइ तसे खुर बिन कइ बोती, “ए प्रभु, अगर तु इठि भुन्ताथ त में भाई ना मरताथ।” जपल यीशु मरियम त तसे पतोती अओ यहूदी मेह्‍णु रोलते काए त तस बि कष्ट त तीं दुख भुआ त बोलु, “तुसी से कोठि छोओ असा?” त तेन्हि बोलु, “ए प्रभु, चले हेरिण दिए।” त यीशु रोलुण लगा। यहूदी मेह्‍णु ई हेर कइ बोलु, “हेरे, ए तस जोई कतु परेम कता।” पर तेन्हि बुचा, केनि केनि बोलु “एन अन्हे सारेरे, त एस मरण केआं बचाई ना बटताथ ना?”

यीशु सुआ दुख जुए कब्रे भेएड़ आ। से यक कुड थी त तस मुंह पुठ बोडा पठि दुतो थिउ। त यीशु बोलु, “पठि उघाड़िण दिए!” त मार्था तस जे बोलु, “ए प्रभु, एस केईआं त अब मुश्क एण लग गो भोल, किस कि एस मरो चोउर रोज पूरे भोई गो असे।” यीशु तस जे बोलु, “ए मार्था, ए मार्था! मेईं तोउ जे बोलु नउ ना कि अगर तु विश्वास कती त परमेश्वरे ताकत हेरती।”
तोउं तेन्हि से पठि उघाड़ छड़ा। त यीशु खड़िया हेर कइ बोलु, “बोउआ, अउं तुं धन्यवाद कता कि तुसी में दुआ शुणो असी। मोउं पेहले ईं पता थिआ कि तु हमेशा में दुआ शुणता। पर अउं ए तोउं बोलुण लगो असा कि जे मेह्‍णु इठि असे, से विश्वास करेल कि तुसी अउं लंघो असा।” ईं बोल कइ तेन जोरी जुए हक दिती, “लाजारा! बाहर आई।” त लाजार जी कइ तठिआ बाहर निस गा। तसे हथ खुर टलि बइ बन्हो थिए त तसे मुंह बि टलि जुए घटो थिउ। यीशु तेन्हि जे बोलु, “अस खोलीण दिए त घेण दिए!”

तपल जे मेह्‍णु मरियम केईं ओ थिए, तेन्हि बुचा सुआ जेईं यीशु ई कम हेर कइ तस पुठ विश्वास किआ। पर तेन्हि बुचा कुछ मेह्‍णु फरीसी केईं घेई कइ इस घटनाई बारे तेन्हि बोलु।
त मुख्य पुजारा त फरीसी, यहूदी मेह्‍णु के टजोट भिआई कइ ब्योरा किआ त बोलु, “ए मेह्‍णु त सुआ चमत्कारे कम करण लगो असा। असी की करुण? अगर तस इरुह घेण देन्ते त सम्हाई मेह्‍णु ‘मसीह’ समझ कइ तस पुठ विश्वास कते। त रोमी सेना एई कइ हें देहेर त असी सम्हाई मुकाई छती।”
तोउं तपले बोडा पुजारा काइफे तेन्हि जे बोलु, “तुसी कुछ पता नेईं। तुसी कि ए ठीक ना लगतु ना कि हें सम्हाई मेह्‍णु मरणे बदले यके मेह्‍णु मरे, हाँ?” (ई बोक तेन अपफ नेईं बोलु, पर तेस साले बोडा पुजारा भुणे खातिर तेन भविष्य वाणि की कि यीशु ना सद यहूदी मेह्‍णु जे मरता। पर, पूरे धरती अन्तर जे सम्हाई परमेश्वरे गभुर असे, तेन्हि जे बि मरता ताकि से सम्हाई यक भोई गो लौते।)
त तिखेईं केईआं खड़ यहूदी नेते तस मरणे मेझर करण लगे। तोउं त, तढ़ेया पता यीशु खुल कइ ना हंटा; पर से तठिआ घेई कइ अरुणि धारे भेएड़, इफ्राईम नओएं यक ग्रां जे गा त अपु चेली जुए तठि बिशुण लगा।
तपल यहूदी मेह्‍णु के बचणे त्योहार नीड़ा एई गो थिआ त इएर-ओवर केआं सुआ मेह्‍णु यरुशलेम जे गे, ताकि बचणे त्योहार मनाण जे अपु रीति रिवाज जुए अपफ शुचा करे। पर मुख्य पुजारे त फरीसी, मेह्‍णु जे निआंग दुतो थी “अगर तुसी बुछ केसे बि पता लगाल कि यीशु कोठि असा, त असी जे जवाब दिए, ताकि अस तेस टाइ बटुं।” त जपल मेह्‍णु देहेर पुजे त तठि यीशु तोपते तोपते अपफ बुच बोलुण लगे, “तुस की सोचते, से त्योहार जे एन्ता नउ ना?”

聞く यूहन्ना 11