Matiu 9
9
Yesu gi yahi sibina hu'ehina bo le'mo bati hu'ehina
Mk 2:1-12; Lk 5:17-26
1Yesu botigu tiloto i behe huto hefunugu i gofa hoto muya beletoga heleko moloto ai'a hepa'alo neheti'ehina yabe. 2Luga'a bona'magi bo mone gi yahi sibina hu'ehina bo sipa'alo ko'ehigo Yesutoga le'mete e'ahana. Ya hago Yesuhi aitoga komopa'ani mele'ahana bu goloto Yesu ana gigusa'a sibina hu'ehina bo ma luto lu emi'ehina: Pana'ni, kipagu fulu hino. Nani foipanaka li nohe'mi ketobe. 3Ya ligo Mosehi keya ka enelepise bona'magi musi musi ka enali'ani ma lite li'ahana: Ma bouba ai Hu'mamofihi megeka nolu etabe. 4Ya nelago Yesu kaga'ani akeheliloto ma luto lu epi'ehina: Lenali henabe lite foipa faipa lenekesa neyigibe? 5To ya'mana bomofihi foipanaka li nohe'mi ketobe nolunauba keta hu'ehifi, to ho tito kapo molobo lilunauba keta hu'ehibe? 6Ya hu'ehina nani lenali'i lenelepilube, Kokulumaguti limi'ehina Bouba ma melugu amuya li'ehinago foipana li he'milina'a huto ni'ibe. Ya luto lu epiloto gi yaha'a sibina hu'ehina bomofihi: Ho tito sipaka kofito hepakaga bubo. 7Ya ligo ana bo ana'asi ho tiloto hepa'aga bufa hu'ehina yabe. 8To boana'i enali anana huto hina be gelete koli hi'ahana. Hu'ma ya'ma huse amuyana bologa molo'ehibe lite enali akeheli'ahana yabe, ya hilete enali Hu'mamofihi gi'a liyafa hi'ahana yabe.
Yesu Matiuhi kehe i'ehina
Mk 2:13-17; Lk 5:27-32
9Yesu ana hepa'i he'miloto kapo moloto binaga takisi nolina bo mone gi'a Matiu yabe lite helata nehana bo ai takisi lilata nohina nonuga nohigo Yesu bu goloto ma luto lu emi'ehina: Nemege'i molobo. Ya ligo Matiu ho tiloto Yesuhi mege'i lifito bu'ehina yabe.
10To Yesu ai noha'agu nose'na noto nohigo takisi nelina bona'i hiti to foipa bona'i hiti babu lite e'ahana. Enali Yesu hiti to koko panana'a hiti nose'na nete mine'ahana yabe. 11Ya nehago Felosi bona'magi be gelete Yesuhi koko panana'a ma lite enoloka he'ahana: Henabe luto tisa botiniuba ai takisi nelina bo hiti to foipa bo hiti nose'na nonabe? 12Yesu enali kaga'ani akehelito ma luto lu epi'ehina: Enali meepesi'ehina bo lusa bo nohinalo mebilata nehabe. To enali epesi'ehina bonako lusa bo nohinalo bilata nehabe. 13Lenali bite ya'ma mono kamofihi hapa keheli bebe sete li buto hilo. Nani yagakafa enehe'ahanamagi nimite nehago menebesibe. To nani fulu huse'na'muko nebesibe Hu'mau lu'ehina ni'ibe, luto Yesu lu epi'ehina yabe. To nani komopa'ani bebe sana bona'i kehe ilube luto meo'ohube. Nani foipa bona'i kehe ilube luto o'ohuna yabe, luto Yesu lu epi'ehina yabe.
Nose'na mo sise hapa'a
Mk 2:18-22; Lk 5:33-39
14Ya'mana kanalo Yonihi koko panana'a Yesutoga nehetilete ma lite loka he'ahana: Hena hu'ehigo lali hiti to Felosi bo hiti nose'na mo silata nohunogo to enali kai koko panakamagi nose'na mo silata menehabe? 15Ya lago Yesu ai lu epi'ehina: To bo moneuba ana kata hilube'mu nohigomo lalu'agi hiti ete li nupa hite neminabe, ya nehanamagi enali enipagu sibina hulata nohifihe? Ya hulata menohibe. Ya hu'ehina alihi ya'mana ana kata nohina bo le'mo nehe'mibe. Ya hago ai lalu'agi hiti meminolata nohibe. Ya hilana yupahi analo enali nose'na mo site minalana'mu yabe, luto Yesu lu epi'ehina yabe.
16Bo mone'amagi yuhufa kata letuha'atu koyapa kata hepu to'ehinalo hetilata menehabe. To ya hilana ai yuhufa kata letuha'auba koyapa kata aku'i i hegege hinogo sipi hokolo kapo aku'i lolo hilina'mu yabe. 17To bona'i mone'amagi yuhufa bai nagami'i lite koyapa meme yaga gufa'a konugu heki bilata menehabe. To enali ya hilana koyapa meme yaga gufa'a kohi i hegege hinogo to bai nagami'i melugu i heki su halina'mu yabe. Ya hina'mu yabe lite enali yuhufa bai nagami'i yuhufa meme gufa'a konugu heki bigo to etali loe sana sana bati hite minelata neha'ibe, luto Yesu lu epi'ehina yabe.
Yesu kaba bomofihi fili'ehina pa'a le'mo ho tito to kefe'alo meko hina a'i le'mo bati hu'ehina
18Yesu ana kaga lu epito nohigo kaba bo mone Yesuhi metoga o leba toloto to ai lapusa nohi fi emiloto ma lu'ehina: Pa'ni ma'asi afili'ehibe. Ya hu'ehinaya kai oto kayaha'atu gufa'alo meko hitogo ai aku'i ho tito minalibe. 19To Yesu ho tito ana bo mege'i nobigo Yesuhi koko pana'a ana hite mege'i melete bi'ahana yabe.
20A'i mone mino'ehina ai asaga yupahi golaha'a he'miba he'miba huto minago kufu'a nayahi luga luga su hoto nigigusagati loemo heleko malago mino'ehina a'i yabe. Ai ana a'uba Yesuhi megesagati oto Yesuhi kefe'a nekisa'alo yahi li'ehina yabe. 21Ai ana a'uba ma luto ai'a keheli'ehina: Nani kefe'alo meko hulenogo'ni nebesise'na'ni su ho netalibe. 22Yesu i behe huto ana a'i bu goloto ma luto lu emi'ehina: Pa'ni, kipakagu fuluna kebesino. Kai nanitoga komopaka moloto minalatanauba kele'mo buto bito kebesise'naka li nohe'mibe luto Yesu lu emi'ehina yabe. Ya noligo ana'asilo ana a'mofihi nobesinana su ho etago bati hu'ehina yabe.
23Ya huloto Yesu kaba bomofihi noha'aluga buto ti'ehina. Ya huloto bona'magi folonemeyahi melete nehago bu go'ehina. To asaga boana'i sipi yibi nama hite nehite kaga babu lite nelite henati hilune, lite enelesa ka lite mine'ahana yabe. 24Ya nehago Yesu asaga bona'i: Fegutoga bilo luto enoho lifi'ehina yabe. Ma lagaso pa'iya mefili'ehibe, ai fa'mene bu'i ko'ehibe. Ya noligo asaga boana'magi Yesuhi kiya yokolo hi ete'ahana yabe. 25To asaga boana'i fegutoga limi su nehago Yesu ana pa'mofihi hasagu tiloto ana pa'i yato li saga higo analo mele'isi ho ti'ehina yabe. 26Ya higo anana huto hinanamofihi kaga'a ana hepalugu bula ola higo asaga bona'magi keheli baga i'ahana yabe.
Yesu bo loemo etubu pisi lina bole etele'mo bati hu'ehina
27Yesu ana hepa'i he'miloto kapo moloto nobigo etubu pisi lu'ehina bo loemale'i mege'i lifite nebite ma lite li'aha'ina: Tatatifu Tebitihi pana'amaka kai le'ali'i kiginaga fi le'emibo lite kehe i'aha'ina yabe. 28Ya nela'igo Yesu ai nonuga notigo etali ana bole Yesutoga neheti'aha'ina yabe. Ya ha'igo Yesu etoloka ho'ehina: Letali le'ele'mo bati hilina'mu yabe lite nanitoga komopatiti nenimi'ifihe? Etali li'aha'ina: O'yo, Sipi Bo, le'ali keheli'ohu'ibe. 29To Yesu yatu'i etubulo meko huloto lu etimi'ehina: Letali nanitoga komopatiti nimi'aha'inago letubutiti bati hilina'mu yabe. 30Yesu ya ligo etubu'atiti ana'asilo mele'isi i gili hu'ehina yabe. Ya higo Yesu etekesa bito ma luto lu etimi'ehina: Letali ya'mana huto nohu letotonamofihi kaga'a bona'i lu meepilo. 31Etali bite Yesu hu etoto'ehina kaga'a asaga hepatoga lu epimofa'na hi'aha'ina yabe.
Yesu negi bo le'mo bati hu'ehina
32Ana bole neba'igo bona'i luga'amagi negi bo mone foipa feleuba gufagu tigo kaga meluse nominana bo Yesutoga le'mete e'ahana yabe. 33Ya hago Yesu ana foipa fele li he'mi etago ana bouba kaga hapi fito lu'ehina yabe. Ya higo asaga boana'i topa hete enekesa yigi babu lilete ma lite li'ahana: Koyapa'i Isilaeli melugu ya'ma huse'na huto higo bu mego'ohuta suhi huto hibe, lite li'ahana yabe. 34Ya nelago Felosi bona'magi ma li'ahana: Ai foipa felemagihi kaba bo'aniuba amuyana emigo foipa fele li nohe'mi epalabe, lite li'ahana yabe.
Yesu boana'i ginaga fi epi'ehina
35To Yesu asaga hepatoga bego humofa'na hu'ehina. Ya huloto asaga boana'i mono noha'anigu lu enelepito Hu'mamofihi ka lamana'a lu noepito to enebesina boana'i enele'mo ye nokoto to enugufagu ketana nina li he'mi epolomofa'na hu'ehina yabe. 36Babu boana'i Yesuhi le'mo bego hite minago bu enogoloto Yesu eniginaga fi epi'ehina yabe. Hena'mugope enali enekesa yigi babu lilete bo moneuba meenehe'mago sipisipi yaga kaba bo'ani meminago tili tele hite minelata nehana suhi lite minana'mu luto yabe. 37Ya huloto Yesu koko panana'a ma luto lu epi'ehina: Babu nose'na foyagu uya'i loto mupa ito ninaya ana nose'na li nupa hilana bona'a loe'asi nehabe. 38Ya hu'ehinagi lenali bite foya afo'afihi numuna hi etenogo ai foya'agu ete lili'na lite nose'na'a li nupa hilana bona'i enele'mo babu lilibe, lu'ehina yabe.
© 1982, Wycliffe Bible Translators, Inc. All rights reserved.