Daa 19
19
Sɔdɔũ ń Gɔmɔɔo kaalɛa
1Kɛ́ malaika gbɛ̃ɔn plapiɔ kà Sɔdɔũ oosi, Lɔtu zɔ̃lɛa Sɔdɔũ bĩibɔlɛu. Kɛ́ à ń é, à fɛ̀lɛ gɛ̀ dàńlɛ à kùlɛnɛ́, à wùlɛ a gbɛɛu 2à mɛ̀: Ma diiɔ, á yã na! À mɔ à gɛ́ pilai mapi á zɔblena bɛ, í zu'o, í i la, zia kɔɔ káaukaau í da zɛ́u. Aa mɛ̀: Aawo, wá i gãaɛɛ. 3Lɔtu nàɛmá maamaaɛ, ɔ̃ aa gbàsa gɛ̃̀ aà bɛ ua aa pìla. À ń yaaekɛ̀ maamaa, à kaakɛ̀nɛ́, ɔ̃ aa sò.
4E aaɔ wulɛ, Sɔdɔũdeɔ lìa Lɔtu kpɛ́i. Wɛ̃lɛpi gɔ̃ɛɔ kã̀aa we miɔmiɔɛ, ɛwaasoɔ ń gbɛ̃zɔ̃ɔɔ pii. 5Aa lɛzù Lɔtuzi aa mɛ̀: Gbɛ̃́ pɔ pìla n bɛ oosiaɔ ku má ni? Bɔlɛwɛ̃ɛńnɔ wà wulɛńnɔ.#Yud 1.7 6Lɔtu bɔ̀ ń kĩi kpɛɛlɛ, à gbatà ń kpɛo 7à mɛ̀: Gbɛ̃́ɔ, ásu yãvãikɛo. 8Má nɛnɔɛɔ vĩ gbɛ̃ɔn pla aa gɔ̃ɛ dɔ̃o, má bɔlɛɛ́ńnɔ. Lá á yei à kɛńnɔ,#Dɔa 19.22-24 ãma ásu yãe kɛ gbɛ̃́ɛ beeɔnɛo, asa aa pìla ma bɛɛ. 9Aa òɛ̀: Gowɛ̃ɛ we! Ɔ̃ aa mɛ̀ lɔ: Gbɛ̃́piá bɔmɔɛ, ɔ̃ a ye kɛ wá yãkpalɛkɛna ũa? Wá yãvãikɛnɛ dɛ lá wálɛ kɛnɛ́la. Ɔ̃ aalɛ nɔnɔaaaazi ń gbãao, aalɛ mɔ gba gbooi. 10Ɔ̃ gbɛ̃ɔn plapiɔ ɔbɔ̀ aa Lɔtu kũ̀ aa gɛ̃̀ò kpɛ́u, ɔ̃ aa zɛtà. 11Aa tò gbɛ̃́ pɔ ku kpɛɛlɛɔ vĩ̀akũ̀ nɛfɛ̃nɛn gbɛ̃zɔ̃ɔ pii,#2 Kia 6.18 ɔ̃ aalɛ zɛwɛɛlɛ e aa kpàsa. 12Gbɛ̃ɔn plapiɔ ò Lɔtuɛ: Deɔ ń ń vĩ la lɔi? Nɛgɔ̃ɛɔ, nɛnɔɛɔ, an gɔ̃kpamaɔ, ń gbɛ̃́ pɔ dɛ n gbɛ̃́ ũ wɛ̃lɛ guuɔ pii. Bɔlɛńnɔ, 13asa wa mɔ guɛ bee kaalɛiɛ. Yã sa pɔ wàlɛ o wɛ̃lɛpideɔ musu yã gɛ̃̀ Dii swãu, ɔ̃ à wá zĩ́ wɛ̃lɛpi kaalɛi. 14Lɔtu bɔ̀ gɛ̀ a ò a nɛɔ gɔ̃kpamaɔnɛ à mɛ̀: À fɛlɛ wà bɔlɛ, asa Dii a wɛ̃lɛɛ bee kaalɛ tiaɛ. Ɔ̃ aalɛ e àlɛ faaiboɛ.
15Kɛ́ gu dɔ̀ malaikapiɔ nàɛ Lɔtuwa aa mɛ̀: Fɛlɛ ǹ n na ń n nɛnɔɛ gbɛ̃ɔn plaɛɔ sɛlɛ ǹ bɔlɛńnɔ la, kɛ́ nsu ga wɛ̃lɛpi kaalɛa guuo yãi. 16Kɛ́ Lɔtu lɛ́ besebesenakɛ, Dii aà wɛ̃nagwà,#2 Piɛ 2.7 ɔ̃ gbɛ̃ɔn plapiɔ aà kũ̀ a ɔwa ń aà nao ń aà nɛnɔɛ plaaɔ, aa bɔ̀lɛńnɔ wɛ̃nkpɛ. 17Kɛ́ aa bɔ̀lɛńnɔ màa, ɔ̃ malaikapiɔ do ò Lɔtuɛ: Baalɛ ǹ nzĩa misi. Nsuli n kpɛ gwao, nsu zɛ guzulɛpiuo. Baalɛ ǹ mipɛ gbɛsĩsĩɔwa, kɛ́ nsu gao yãi. 18Ɔ̃ a ònɛ́: Aawo ma dii! N yã na! 19N mapi n zɔblena wɛgwà, n gbɛ̃kɛkɛ̀mɛɛ maamaa, n ma misì. Ãma má fɔ̃ mà baalɛ mà gbɛsĩsĩpiɔ kĩi leo. E màɔ gɛ́ kai we, kaalɛpi a ma le mà gaɛ. 20Wɛ̃lɛe gwa kee. Lá a kãi, má fɔ̃ mà baalɛ mà le, mɛ́ wɛ̃lɛ nɛnaɛ. To mà baasi mà ta we, mí e màɔ ku aafia. A nɛnaũ nolo? 21Ɔ̃ a òɛ̀: Ma n gba zɛ́ lɔ, má wɛ̃lɛ pɔ nlɛ opi kaalɛo. 22Baalɛ ǹ ta we kpakpa, asa má yãe kɛ gĩ́ao, e ǹ gɛ ǹ kaò we. Ayãmɛto wà tɔkpà wɛ̃lɛpiɛ Zoaa.#19.22 Bee mɛ̀ nɛnaũ
23Kɛ́ Lɔtu Zoaa lè, ĩatɛ̃ lɛ́ fɛlɛ, 24ɔ̃ Dii tò tɛ́ ń ĩatɛ̃gbɔ̃o bɔ̀ musu à kà Sɔdɔũ ń Gɔmɔɔogu. 25À wɛ̃lɛpiɔ kàalɛ ń ń gbɛ̃́ɔ ń guzulɛpio ń líɔ ń sɛ̃ɔ pii.#Mat 10.15; Luk 17.28-29; 2 Piɛ 2.6 26Kɛ́ Lɔtu na a kpɛ gwà, ɔ̃ à gɔ̃̀ zɛa wìsi gbɛ ũ.#Luk 17.32
27Kɛ́ gu dɔ̀, Ablahaũ fɛ̀lɛ kɔɔkɔɔ, à gɛ̀ gu pɔ a zɛu yãa ń Diiopiu. 28Kɛ́ à Sɔdɔũ ń Gɔmɔɔo kĩi oi gwà ń guzulɛpio pii, a è tɛlu lɛ́ fɛlɛ tɔɔlɛ lan mua tɛluwa. 29Beewa kɛ́ Lua guzulɛ pɔ Lɔtu kuu wɛ̃lɛɔ kàalɛ, Ablahaũ yã dɔ̀aagu, ɔ̃ à Lɔtu bɔ̀ wɛ̃lɛ pɔ a kàalɛpiɔ guu.
Lɔtu buiɔ
30Kɛ́ Lɔtu bɔ̀ Zoaa, à gɛ̀ zɔ̃̀lɛ gusĩsĩdeu ń a nɛnɔɛ plaapiɔ, kɛ́ a kua Zoaa vĩa vĩ yãi. Ɔ̃ à gɛ̀ a ku gbɛ'ɛu ń a nɛnɔɛpiɔ. 31Ɔ̃ Yɔ̃ ò Bãaɛ: Wá mae zikũ̀, mɛ́ gɔ̃ɛe ku busuu la à wulɛwanɔ lá wì kɛwao. 32Mɔ wà vɛ̃ɛ kakaɛ̀, wí wulɛaanɔ kɛ́ wà e wàɔ wá bui kũa aà sabai. 33Gwãasĩna bee aa vɛ̃ɛ kàkaɛ̀, ɔ̃ Yɔ̃ gɛ̀ wùlɛaanɔ. Lɔtu i dɔ̃ gɔɔ pɔ à wùlɛanɔ ge gɔɔ pɔ à fɛ̀lɛo.
34Kɛ́ gu dɔ̀ Yɔ̃ ò Bãaɛ: Ma wulɛ ń ma maeo gĩa. Wà vɛ̃ɛ kakaɛ̀ oosia lɔ, ní gɛ́ wulɛiaanɔ sɔ̃, kɛ́ wà e wàɔ wá bui kũa aà sabai. 35Gwãasĩna bee lɔ aa vɛ̃ɛ kàkaɛ̀, ɔ̃ Bãa gɛ̀ wùlɛaanɔ. Lɔtu i dɔ̃ gɔɔ pɔ à wùlɛanɔ ge gɔɔ pɔ à fɛ̀lɛo. 36Màa Lɔtu nɛnɔɛ plaapiɔ kɛ̀, aa nɔsìsiaanɔ. 37Yɔ̃ nɛ'ì gɔ̃ɛ ũ, ɔ̃ à tɔkpàɛ̀ Mɔabu.#19.37 Bee mɛ̀ ma mae nɛ Aapi mɛ́ Mɔabu bui pɔ ku e gbãɔ dezi sɛ̃ia ũ. 38Bãa nɛ'ì gɔ̃ɛ ũ sɔ̃, ɔ̃ à tɔkpàɛ̀ Bɛ̃nami.#19.38 Bee mɛ̀ ma daɛ nɛ Aapi mɛ́ Amɔni bui pɔ ku e gbãɔ dezi sɛ̃ia ũ.
Boko Bible © SIM International, 2024.