Daa 27
27
Izaaki sa'olɛkɛa Yakɔbuɛ
1Izaaki zikũ̀, aà wɛ́ gbãa lɔo, àlɛ gu'e maamaao. Ɔ̃ à a yoa sìsi à mɛ̀: Nɛ! Ɔ̃ a wèwà à mɛ̀: Ma mɔ. 2Izaaki mɛ̀: Ma zikũ̀, má a gagɔɔ dɔ̃o. 3Ǹ n sá sɛ́ ń n gbàlao, gɛ ǹ sɛ̃anɔbɔ wɛɛlɛmɛɛ. 4Ma pɔeã do kuu ǹ mɔòmɛɛ mà ble, mí sa'olɛkɛnɛ e màɔ ga.
5Lɛbɛka yã pɔ Izaaki lɛ́ o Esauɛ mà. Kɛ́ Esau fɛ̀lɛ gɛ̀ toekai, 6ɔ̃ à gɛ̀ a ò Yakɔbuɛ à mɛ̀: Má mà n mae lɛ́ yã'o n vĩiɛ à mɛ̀, 7aà gɛ́ nɔ̀ɔ dɛiɛ, i a pɔeã do kuuòɛ à ble, í sa'olɛkɛɛ̀ ń Dii tɔ́o e àɔ gɛ́ gai. 8Ɔ̃ Lɛbɛka ɛ̀a òɛ̀: Ma yãma, ní yã pɔ má dànɛ kɛ. 9Gɛ́ bleɔ guu, blenɛ maa kũ mɛn pla ǹ dɛ, ní kɛkɛ ǹ mɔò, mí n mae pɔeã do kuuɛ̀, 10ní gɛ́òɛ̀ aà ble, i sa'olɛkɛnɛ e àɔ ga. 11Ɔ̃ Yakɔbu ò a daɛ: Ma vĩi kã́ vĩ mɛ́ má yɔlɔ. 12Tó ma mae ɔkã̀a mɛ́ à ma dɔ̃, a dilɛ malɛ a kɛ pɔɔpɔɔɛ, i lɛkɛmɛɛ sa'olɛ gbɛu. 13Ɔ̃ aà da òɛ̀: Lua to lɛkɛanɛpi gɔ̃mɛɛ. Ma yãma le! Gɛ ǹ dɛ ǹ mɔòmɛɛ.
14Ɔ̃ Yakɔbu gɛ̀, à blepiɔ dɛ̀dɛ à mɔ̀ò a daɛ, ɔ̃ à aà mae pɔeã do kùuòɛ̀. 15Ɔ̃ à a yoa pɔkasa maa pɔ ku a kpɛ́u sɛ̀ a dà a nɛ Sedeɛ. 16À blenɛ báa fĩ̀fĩ aà ɔɔ ń aà waaowa asa a kã́ vĩo. 17Ɔ̃ à do ń pɛ̃ɛ pɔ a kɛ̀o kpàwà.
18Yakɔbu gɛ̀ a mae kĩi à mɛ̀: Baa! À mɛ̀: Má kɛ́! Ma nɛ kpele ni? 19Yakɔbu wèwà à mɛ̀: Mamɛ má Esau n yoa. Lá ń òmɛɛ, má kɛ̀. Fɛlɛ ǹ zɔ̃lɛ ǹ ma ɔ'i ble, ní sa'olɛkɛmɛɛ. 20Ɔ̃ Izaaki ò a nɛɛ: O'o! Ń è kɔa? A wèwà à mɛ̀: Dii n Lua mɛ́ gàlɛ a kpàmɛɛ ma kuɛ. 21Ɔ̃ Izaaki òɛ̀: Sɔ̃mazi mà ɔkãma, kɛ́ mà e mà dɔ̃ tó ma nɛ Esauɛ sĩana. 22Yakɔbu sɔ̃̀ a maezi, ɔ̃ à ɔkã̀wà à mɛ̀: Lɔɔɛ beeá Yakɔbu lɔɔɛ, kási ɔɛ beeá Esau ɔɛ. 23Ɔ̃ i aà dɔ̃o, kɛ́ aà ɔɔ kã́ vĩ lan Esau pɔwa yãi. A ye sa'olɛkɛɛ̀, 24ɔ̃ à aà là gĩ́a: Ma nɛ Esaun n ũ sĩanaa? À mɛ̀: Ao, mamɛ! 25Ɔ̃ à mɛ̀: Pɔ kpaa mà n ɔ'i ble, mí sa'olɛkɛnɛ. Kɛ́ a dìlɛɛ̀, ɔ̃ a blè. À mɔ̀ɛ̀ ń vɛ̃ɛo, a mì lɔ. 26Ɔ̃ aà maepi òɛ̀: Sɔ̃mazi, ní lɛpɛa. 27Ɔ̃ à sɔ̃̀aazi à lɛpɛ̀wà. Kɛ́ Izaaki aà pɔkasaɔ gĩmà, ɔ̃ à sa'olɛkɛ̀ɛ̀ à mɛ̀:
Ma nɛ gĩ dɛ lan búa pɔ Dii ɛfãaidàu gĩwa.
28Lua n gba mɔsɛ bɔa za musu,
i n gba tɔɔlɛ táaede,
pɔwɛna ń vɛ̃ɛo iɔ dinzi.
29Gbɛ̃́ɔ zɔblenɛ,
buiɔ kulɛnɛ,
níɔ dɛ n gbɛ̃́ɔ dii ũ,
n da nɛɔ i kulɛnɛ.
Lua lɛkɛ gbɛ̃́ pɔ lɛkɛ̀nɛɔnɛ,
aà baaada gbɛ̃́ pɔ samaa'ònɛɔgu.#Hɛb 11.20
30Kɛ́ Izaaki sa'olɛkɛ̀ Yakɔbuɛ a làa, ɔ̃ Yakɔbu gò aà kĩi. Kɛ́ aà vĩi sù ń toekao gɔ̃̀ɔ, 31ɔ̃ à blɛkɛ̀ a maeɛ sɔ̃, à gɛ̀òɛ̀, ɔ̃ a òɛ̀: Baa! Fɛlɛ ǹ ma ɔ'i ble, ní sa'olɛkɛmɛɛ. 32Ɔ̃ aà mae aà là à mɛ̀: Mmɛ ń déi? A wèwà à mɛ̀: Mamɛ má n yoa Esau. 33Yãpi dì Izaakiwa, àlɛ lualua à mɛ̀: Demɛ nɔ̀ɔ dɛ̀, à mɔ̀òmɛɛ yãa e ǹyɔ̃ gɛ́ mɔi, má sòi? Ma sa'olɛkɛ̀ adeɛ kɔ̀, mɛ́ a ɛfãaipi eɛ. 34Kɛ́ Esau a mae yãpi mà, à bubuapã̀lɛ à ɔɔlɔ̀, à kɛ̀ wɛ̃na, ɔ̃ à mɛ̀: Baa! Sa'olɛkɛmɛɛ sɔ̃.#Hɛb 12.17 35Ɔ̃ à mɛ̀: N dãuna mɔ̀ ń kɔ̃nio à n sa'olɛ sì kɔ̀. 36Ɔ̃ Esau mɛ̀: Aà tɔ́n Yakɔbuo#27.36 Bee mɛ̀ kɔ̃nikɛnɛde lò? À ɔ̃nɔkɛ̀mɛɛ à kɛ̀ gɛ̃n plan we sa. À ma yoakɛzɛ sìa yãa,#Daa 25.31 ɔ̃ à ma sa'olɛ sìa kɛ lɔ. Má sa'olɛ e lɔo le? 37Izaaki wèwà à mɛ̀: Gwa, ma aà dìlɛ n dii ũɛ, ma aà daɛɔ kɛ̀ aà zĩkɛnaɔ ũ, ma pɔwɛna ń vɛ̃ɛo kpàwà. Bɔ́ má kɛnɛ lɔi? 38Esau ò a maeɛ: Baa, sa'olɛ bee ɔ̃ ń vĩ adoa? Sa'olɛ pãle kɛmɛɛ sɔ̃ Baa. Ɔ̃ Esau nà ɔɔlɔwa. 39Ɔ̃ aà mae wèwà à mɛ̀:
Tɔɔlɛ pɔ ńyɔ̃ɔ kuu aɔ táae vĩo,
mɔsɛ a bɔnɛ za musuo.
40Ńyɔ̃ɔ fɛ̃nda kũa gɔɔpiiɛ,
ńyɔ̃ zɔble n dãunaɛ.
Lá n sɔ̃ a da doũo,
ńyɔ̃ aà zuu bɔnla.
41Esau ibɛlɛsɛ̀ ń Yakɔbuo sa'olɛ pɔ a mae kɛ̀ɛ̀pi yãi, ɔ̃ a ò a sɔ̃u: Ma mae gaa zã̀o, mí gbasa mà a dãuna dɛ. 42Wà yã pɔ Esau ò kɔmalɛkɛ̀ Lɛbɛkaɛ, ɔ̃ à Yakɔbu sìsi a òɛ̀: Esau ye tɔsima à n dɛɛ. 43Ma yãma sa. Fɛlɛ, baalɛ ǹ ta ma dãɔ Labã bɛ Halana, 44níɔ kuaanɔ we gĩ́a e n vĩipi pɔkũma kpalɛ. 45Tó aà pɔ wèe, mɛ́ yã pɔ ń kɛ̀ɛ̀ sã̀aagu, má gbɛ̃́ zĩ n gbɛsii. Má ye mà kua ma nɛ gbɛ̃ɔn plaɔwa pii zĩdoũzĩo.
46Ɔ̃ Lɛbɛka ò Izaakiɛ: Iti nɔɛɔ ni bɔ̀mala. Tó Yakɔbu Iti nɔ sɛ̀ busuu la lan Esau nɔɛ beeɔwa, ma kua aɔ namɛɛ lɔo.
Boko Bible © SIM International, 2024.