Daa 28

Yakↄbu bàasi taa Labã kĩ́i

1Ɔ̃ Izaaki Yakↄbu sìsi, à samaa'òɛ̀ à yãdìlɛɛ̀ à mɛ̀: Ńsu nↄsɛ Kanaa nↄɛↄ guuo. 2Fɛlɛ gɛ́ Mɛsↄpↄtami bùsuu n da mae Bɛtuɛ bɛ, ní nↄsɛ we n desɛ̃ Labã nɛ́ↄ guu.

3Lua Gbãapiide báaadangu,

aà to ǹ nɛ'i maamaa, aaiↄ kã́fĩ,

ní gↄ̃ buiↄ dezi ũ.

4Lua báaa pↄ́ a dà Ablahaũgu dangu ń n buiↄ píi,

kɛ́ bùsu pↄ́ ńlɛ nibↄbleu gↄ̃nɛ,

bùsu pↄ́ a kpà Ablahaũwaɛ bee.

5Ɔ̃ Izaaki Yakↄbu gbàɛ aà gɛ́ Labã kĩ́i Mɛsↄpↄtami bùsuu. Labãá Sili bùsu gbɛ̃́ Bɛtuɛ nɛ́ɛ, Yakↄbu ń Esauo desɛ̃ɛ.

6Esau mà Izaaki samaa'ò Yakↄbuɛ, à aà gbàɛ Mɛsↄpↄtami, kɛ́ aà nↄsɛ we. Kɛ́ à sa maapi òɛ̀ à mɛ̀, asu nↄsɛ Kanaa nↄɛↄ guuo. 7A è Yakↄbu a mae ń a dao yãmà, à dà Mɛsↄpↄtami zɛ́u. 8Ɔ̃ a dↄ̃̀ sa kɛ́ Kanaa bùsu nↄɛↄ lí ká a maeguo. 9Ɔ̃ à gɛ̀ Ablahaũ nɛ́ Isimaɛla kĩ́i, à aà nɛ́ Maalata sɛ dà a nↄ sɛ̃́iaↄ guu. Maalataá Nɛbaio dãeɛ.

Yakↄbu nana'oa Bɛtɛli

10Yakↄbu bↄ̀ Bɛɛsɛba, à dà Halana zɛ́u. 11Kɛ́ à kà guei, àlɛ i we kɛ́ ĩatɛ̃ gɛ̃̀ kpɛ́u yã́i. Ɔ̃ à gbɛ sɛ̀ gupiu midibↄ ũ, à wùlɛ we. 12Ɔ̃ à nana'ò, a è dↄ̃gɛ̃gaa pɛ́lɛa tↄↄlɛ e à gɛ̀ zↄ̃̀ luawa, Lua malaikaↄ lɛ́ dɛdɛwà, aalɛ pila.#28.12 Zãa 1.51 13A è Dii zɛaala à mɛ̀:

Mámɛmaa Dii n dezi Ablahaũ

ń n mae Izaakio Lua.

Má tↄↄlɛ pↄ́ ń wúlɛwàɛ bee kpamaɛ,

mpi ń n buiↄ.

14N buiↄ aaↄ dasi lán bùsu'ũfãawa,

aa ligua gukpɛ ń bɛ'aɛo

ń gugbãntooo ń gɛↄmidↄkĩio.

Dṹnia bui píi a ɛ̀fãai e

mpi ń n buio sabai.

15Máↄ kunnↄɛ,

máↄ n dↄ̃́a gu pↄ́ ńlɛ gɛ́u píi,

mí ɛa sunnↄ bùsuɛ beeu,

asa má n to weo,

má yã́ pↄ́ má ònɛ kɛɛ.

16Kɛ́ Yakↄbu vù ń io à mɛ̀: Dii ku guɛuɛ, ↄ̃ mi dↄ̃o fá! 17Vĩa aà kũ̀ à mɛ̀: Guɛ beeá vĩaguɛ. Luakukĩiɛ, luabɛ zɛ́ɛ.

18Yakↄbu fɛ̀lɛ kↄↄ, à gbɛ pↄ́ a kɛ̀ midibↄ ũpi sɛ̀ a pɛ̀lɛ dↄngubↄ ũ, ↄ̃ à nísikàwà. 19Ɔ̃ à tↄkpà gupiɛ Bɛtɛli,#28.19 Bee mɛ̀ Lua ua. ãma wɛ̃́lɛ pↄ́ wa kàlɛ we tↄ́ sɛ̃́ian Luzu. 20Yakↄbu lɛkɛ̀ Diiwa à mɛ̀: Tó ń kumanↄ, mɛ́ ńlɛ ma dↄ̃́a ma wɛ̃́lɛɛ bee gɛa guu, mɛ́ ńlɛ ma gba pↄblea ń pↄkasaↄ, 21e ma gɛ suò ma mae bɛ aafia, ńyↄ̃ↄ dɛ ma Lua ũɛ. 22Gbɛ pↄ́ má pɛ̀lɛ dↄngubↄ ũpi a gↄ̃ n gbagbakĩi ũɛ, mɛ́ pↄ́ pↄ́ n ma gba píi, má a kwide kpamaɛ.

選択箇所:

Daa 28: BBL2010

ハイライト

コピー

すべてのデバイスで、ハイライト箇所を保存したいですか？サインアップまたはサインインしてください。

Boko Bible © SIM International, 2010.

Bòó Bibeli Luayãtaalaについて知る