Luk 21
21
Gyaa taaside gbadaa
(Mat 12.41-44)
1Kɛ́ Yesu wɛzù a aɛ, ɔ̃ a è ɔdeɔ lɛ́ ń gbaɔ ka ɔsikpagolo guu. 2Ɔ̃ à gyaa taaside búubuue è we, à tãnga dàu mɛn pla. 3Ɔ̃ à mɛ̀: Sĩana malɛ oɛ́, gyaa taasidepi ɔ̃a dàu dɛ gbɛ̃piia. 4Asa ɔ dia ɔ̃ aa dã̀ wa kàu mpii. Nɔɛpi sɔ̃, aà taasidekɛ guu pɔ pɔ a vĩ à pɔbleò ɔ̃ a dàu we pii.
Yelusalɛũ duuzɔ̃a ń dũniaɛ bee laagɔɔ seelaɔ
(Mat 24.1-22; Maa 13.1-20)
5Gbɛ̃eɔ lɛ́ Lua ua yã'o, aa mɛ̀ wà a kpɛ́ɔ kɛ̀kɛ maa ń gbɛ̀ kɛfɛnaɔ ń pɔ pɔ wà Lua gbàɔ, ɔ̃ Yesu mɛ̀: 6Gɔɔe a mɔ́, pɔ pɔ á è keeɔ, baa gbɛe a gɔ̃ dikɔ̃a weo, wa ń duuzɔ̃ɛ. 7Ɔ̃ aa aà là aa mɛ̀: Mɛtulu, bee a kɛ bɔɛ ni? Bɔmɛ aɔ dɛ a kɛgɔɔ seela ũi? 8Ɔ̃ à mɛ̀: À laaika, ásu to wà á sãsão, asa wa mɔ ń ma tɔ́o dasi, aa mɛ wamɛ wa aà ũ, a gɔɔ kà. Ásu tɛńzio. 9Tó a zĩ̀ɔ baomà, ge á mà wà fɛ̀lɛ ń kɔ̃o, ásu to í wãa ka á pɔao. Sema yãpiɔ dɔaa kɛ káau, ãma yã laaan we gĩ́ao. 10Ɔ̃ a ònɛ́: Bui ń buio aa fɛlɛ ń kɔ̃o, màaɛ lɔ busu ń busuo. 11Tɔɔlɛlualuaa pãsĩɔ aaɔ ku. Nɔana ń gagyãɔ ka gu ń guo. Àsi bɛ̃̀ɛ vĩa yãɔ aaɔ ku, wi seela zɔ̃ɔɔ e musu.
12E yãpi àɔ mɔ́, wa á kṹ, wi ĩadawá, wi á kpá luasisikpɛdeɔwa, wi á ká kpɛ́u, wi gɛ́ánɔ kiaɔ ń busu gbãadeɔ aɛ ma yãi. 13Bee a á gba zɛ́ àɔ dɛ ma seeladeɔ ũ. 14À zɛò á sɔ̃ guu ásu laasookɛ lá á owao, 15asa mamɛ má soso mà kaɛ́ á lɛ́u, mí á gba ɔ̃nɔ, kɛ́ á ibɛɛe a fɔ̃ gii ge à a zãsiwáo.#Luk 12.11-12 16Baa á de ń á dao ń á vĩiɔ ń á dãunaɔ ń á daɛɔ ń á gbɛ̃naɔ aa á kpamáɛ, wi á gbɛ̃eɔ dɛ. 17Gbɛ̃pii a zaágu ma yãi, 18ãma baa á mikã mɛndo a vũaao. 19Á mɛnafɔ̃a guu ɔ̃ á aizãna e.
20Tó á è zĩgɔ̃ɔ lìa Yelusalɛũzi, àɔ dɔ̃ kɛ́ a duuzɔ̃a zã̀o. 21Zĩ́ bee Yude busudeɔ baalɛ aa mipɛ sĩ̀sĩɔwa, gbɛ̃́ pɔ ku Yelusalɛũɔ fãaa. Zɔ̃ɛwiadeɔ su gɛ̃uo. 22Asa gɔɔpiá tɔsimagɔɔɛ, kɛ́ yã pɔ wa kɛ̃̀ e papa pii yãi.#Oze 9.7 23Waiyoo nɔsindeeɔ ń nɛadeɔ zĩbeezĩ, asa busupi taasi aɔ zɔ̃ɔ, Lua a pɔkũmabɔbɔ gbɛ̃́piɔwaɛ. 24Wa ń gbɛ̃eɔ dɛdɛ ń fɛ̃ndao, wa ń gbɛ̃eɔ kũ wà tańnɔ busu pii guu zĩ̀zɔɔ ũ, buipãleɔ i ɔ̃zɔ̃ Yelusalɛũwa e an gɔɔ pa.
Gbɛ̃nazĩn Nɛ mɔa
(Mat 24.29-35; Maa 13.24-31)
25Seelaɔ aaɔ ku ĩatɛ̃ ń mɔvuao ń saanaɔwa,#Isa 13.10; Yoɛ 3.4 sɔ̃ a kɛ̃ bui pɔ ku dũniauɔgu pii. Aa bilikɛ isia zãampapaa kɔ̃fĩ yãi. 26Wɛdɔa yã pɔ lɛ́ mɔ́ dũniawai guu, vĩa a to gbɛ̃́ɔ kãsãnkɛ, asa musupɔɔ zĩazĩa, 27wi Gbɛ̃nazĩn Nɛ mɔa e lounaau ń gbãa zɔ̃ɔ gawideo.#Dan 7.13 28Tó yã beeɔ kɛa dàalɛ, à fɛlɛ zɛ, í á mi sɛ musu, asa á suabagɔɔ mɛ́ kãikũ̀.
29Yesu yãlɛ̀ɛũnɛ́ à mɛ̀: À figi lí gwa ń lí kĩniɔ. 30Tó á è aa bɔlɔbɔ̀, ɔ̃ í dɔ̃ ázĩawa kɛ́ guantɛ̃na kãikũ̀. 31Beewa sɔ̃, tó á è yãpiɔ lɛ́ kɛ, àɔ dɔ̃ kɛ́ kia pɔ Lua kpà kãikũ̀. 32Sĩana malɛ oɛ́, gɔɔbeedeɔ gɛ̃lɛ yãpiɔ pii kɛsaio. 33Musu ń tɔɔlɛo a gɛ̃lɛ, ãma ma yãɔ gɛ̃lɛa vĩo.
34À laaika. Ásu to asiakɛ ń wɛ̃dɛkɛo ń wɛ̃nikãakɛao à á laai siwáo, kɛ́ aà mɔgɔɔ su á kṹ kãndo lan baiwao yãi. 35Asa a kulɛ dũnia bṹu gbɛ̃́ɔwa míɔ. 36À itɛ̃kɛ, íɔ wabikɛ gɔɔpii, kɛ́ àɔ gbãa vĩ à e pili yã pɔ lɛ́ mɔ́piɔwa pii, í bɔ zɛ Gbɛ̃nazĩn Nɛ aɛ.
37Lagulɛdɔ Yesu ìɔ yãdanɛ́ Lua ua.#Luk 19.47 Tó oosi kɛ̀, ì bɔ, à gɛ i Kukpɛ sĩsĩpɔlɛu. 38Kɔɔkɔɔ ɔ̃ gbɛ̃pii ì fɛlɛ gɛ́ aà yãmai Lua ua.
Boko Bible © SIM International, 2024.