Mateo 2
2
Chachi Narpù Ad-adchayuwan Wi Ummoy Nangilan Jesus
1Timpun ad na aaliyan Herod, niyanà à Jesus ad Betlehem wi osay ilid Judea. Na sachi ko, chummatong ad Jerusalem na uchumi nangad-achar ta fituwon wi namparpu ta apot ta sumingitan na init. 2Ad inimuscha anani, “Sinun niyanaan na anà wi niyanà à man-alin chiayuy Judio? Tan innilanin fituwon wi singyar na niyanaana ta sumingitan na init, ad sachin ummaliyannisna ta chayawonnì siya.”
3Chingngor pun Ali Herod na sachi, nalifuk na somsomòna ya uray akon chachi uchumi iJerusalem. 4Siyan impaarus Herod na losani pangpangun na papachi ya mangitudtuchu ta Lintog, ad inimusnan chicha, “Sinun miyanaan na Cristu wi umali nu manturay?”
5Ad ananchay summongfat, “Ilid Betlehem wi sakup Judea, tan siyan anan na inyug-is na profeta ta awi wi anana,
6‘Na sachi kàiti ilid Betlehem wi sakup Judea,
namfalin à angatuwani ili ta losani il-ilid Judea,
tan siyan lumoswaan na mangituray
ta takù wi kanà Israel.’”
7Sachi ad inyagkaaw Herod wi nangayag ta chachi kaili wi nangad-achar ta fituwon, ad inimusnan chicha nu naanun ustuustuy lummoswaan na sachi fituwon. Ad imfakachan siya. 8Sachi ad impaligwatna chicha ta umoychad Betlehem ad anana, “Ing-ayu anapon na sachi anà, ta nu ochasanyu, umaliyun saon ifaka ta inyà ako chayawon à siya.”
9,10Ad lummigwatcha wi umoy ad Betlehem. Ingkawcha pun ta charan, amod na lagsakcha tan nampaila ko asin na sachi fituwon wi innilacha ta chamuy lummigwatancha. Siyan inun-unudchan sachi fituwon ingkanà ummillong ta fatug na iningkawan na anà.
11Ad linumnòcha ta sachi foroy, ad innilachan anà ya inanay Maria. Ad nampalintumongchay nanayaw an siya. Ad in-archan atodchan siya wi nan-anginay falituk ya fangfanguy insenso ya lana wi ananchay mirra.
12Ad impain-inop Apudyus an chicha wi achicha pu mangulin an Herod, siyan nangoychà safalì charan wi nangulin ta ilicha.
Na Nangifakwitanchan Jesus Ad Egipto
13Lummayaw pun chachi nangad-achar ta fituwon, nampain-inop akon anghel Apudyus an Jose ad anana, “Fumangon-ayu ta ilayawnun anà ya inana tan anapon Herod na anà ta papatoyna. Siyan mamfakwit-ayud Egipto ad ingkaw-ayud aschi ingkanà ifakà na lumayawanyu.”
14Ad fummangon à Jose ad illayawnan man-ina ta sachi lafi wi ummoychad Egipto. 15Ad iningkawchad Egipto ingkana ta natayan Herod.
Nàwa losan chachì tummuttuwaan na impaifakan Apudyus ta profeta ta awi wi anana, “Inayakà na anàu ta lumayaw ad Egipto.”
Na Nampapatayan Herod Ta An-ananà
16Inakammun pu Herod wi sinikapan chachi nangad-achar ta fituwon à siya, naam-amod na og-otna. Ad illintogna wi mapatoy na losani an-ananà wi larai ad Betlehem ya sinakupna wi mantawon à chuwa ya uray kurang à machuway tawon. Tan umoy à chuway tawon na naparafas nanipud ta nail-an na fituwon wi imfakan chachi nangad-achar ta fituwon.
17Ad sachin tummuttuwaan na imfakan Jeremias wi profeta ta awi wi anana,
18“Mamagngor na ngonot ad Rama
wi amochi ifil ya chomchom.
Ifilan Raquel chachi kanàna tan natoycha.
Ad achi pu maàarù
tan naamin natoy na kanàna.”
Na Lummayawanchad Egipto
19Natoy pun à Herod, asin nampain-inop na anghel Apudyus an Jose ad Egipto, 20ad anana, “Fumangon-a ta ilayawnun man-ina ta mangulin-ayud Israel, tan natoy losan chachi maryad mangtoy ta annay anà.” 21Siyan illayaw Jose na man-ina ad nangulinchad Israel.
22Ngim chingngor pu Jose wi sinukatan Arkelao à amanay Herod wi man-ali ad Judea, ummogyat wi umoy ad aschi. Siyan asin nipain-inop an siya wi Galilea na umayancha, 23ad ummoycha finumroy ta osay ili wi ananchay Nazaret. Nàwan sachì tummuttuwaan na imfakan na profetas ta awi wi anancha, “Awakan na takù siyà iNazaret.”
© 1986, Wycliffe Bible Translators, Inc. All rights reserved.