MATIUS 6
6
Tebaraa' tong pengena' lu' ngan kelunan
1 Ha' Yésus kepéh, Mavaa' keh, mai keh maneu' kekat penganeu' keh tong sebayang dokoo' kelunan pinaa' na'at keh awah. Hun keh maneu' éh kenat awah, bé' keh omok alaa' oléé' jin Tamen keh éh tong seruga. 2Bang hun keh mena' ineu'-ineu' ngan kelunan kari, mai keh mena' éh tong ta'an irah éh jah, barei' éh neu' réh tong lamin sebayang Yahudi ngan neu' réh tong jalan totoo' tong réh pebelih, dokoo' irah éh jah mejing réh. Akeu' bara' mu'un ngan keh, oléé' néh laa' réh tenéh. 3Hun keh mena' ineu'-ineu' ngan kelunan kari, mena' éh selim awah, dokoo' bakéh keh mu'un péh bé' éh jam éh, 4bang Tamen keh éh na'at éh senelim keh inah, Iah omok mena' oléé' néh ngan keh kepéh, ha' néh.
Tebaraa' tong sebayang
(Luk. 11:2-4)
5 Ha' Yésus kepéh, La'ah hun keh sebayang, mai keh sebayang barei' kelunan éh ngelayoo' awah, éh keloo' nekedéng sebayang tong lamin sebayang irah Yahudi ngan tong jalan pebelih péh, dokoo' irah éh jah omok na'at éh. Akeu' bara' mu'un ngan keh, laa' réh oléé' néh tenéh. 6Bang hun keh sebayang, jian keh sebayang tong lamin keh tengéé', ngan sebayang ngan Tamen keh éh pu'un tong retek éh pelim. La'ah Tamen keh éh na'at keh sebayang pelim kenat, omok éh mena' oléé' néh ngan keh kepéh.
7La'ah hun keh sebayang, mai keh kebit ha' barei'-okoo' ha' kelunan éh bé' ngelan tong Tuhan, uban irah seruh Tuhan omok menéng ha' réh hun réh kebit ha' ké'éng. 8Mai keh barei' irah inah, uban Tamen keh éh tenah jam tong kekat éh pengekurang keh hun keh bé' jak menyat éh péh. 9Bang hun keh sebayang, barei' iteu' ha' keh sebayang.
O Tamen mé' éh tong seruga,
jian éh ngaran Ko' pu'un peparen.
10Ka'au' éh Raja' améé'.
Jian Ke' maneu' kekat éh pengeloo' Ko' tong tana' iteu'
pekua' éh pu'un tong seruga.
11Mena' sukup penguman ngan améé' dau iteu'.
12La'ah jian ke' mega' kekat kesa'at améé'
barei'-okoo' améé' mega' kesa'at irah éh pu'un ngesa'at améé'.
13Mai kejeraa' mé' teneng tong tenupat,
bang jian ke' mavaa' mé' jin Sitan.
Kenat ha' sebayang keh.
14Uban hun keh jam pika irah éh ngesa'at keh, adang Tamen keh tong seruga pu'un pika ngan mega' penyala' keh kepéh, ha' néh. 15 Bang hun keh bé' pika irah adang Tamen keh tong seruga péh, bé' omok pika keh ngan mega' penyala' keh, ha' néh.
Tebaraa' tong kelaset
16Ha' Yésus kepéh, Hun keh kelaset mai keh semilep da'in barei'-okoo' kelunan éh ngelayoo' uban irah éh semilep da'in nah dokoo' kelunan éh jah omok jam réh kelaset awah. Akeu' bara' mu'un ngan keh, pu'un réh lepah alaa' oléé' néh tenéh. 17Bang hun keh kelaset, jian keh ngera'up ngan nganyuu' 18dai irah éh jah jam keh pu'un kelaset awah. Bang Tamen keh éh na'at éh senelim keh kenat, omok Iah mena' oléé' néh ngan keh kepéh, ha' néh.
Tong pengekaya' tong seruga
(Luk. 12:33-34)
19 Ha' Yésus kepéh, Mai keh pitah pengekaya' tong tana' éh omok kinan lipah ngan éh omok tedéng, kelunan péh omok ngerekah lamin inah ke' néh nekau éh. 20Bang jian keh modoo' pengekaya' keh tong seruga, boh éh bé' kinan lipah ngan tedéng, boh kelunan bé' omok ngerekah éh ngan nekau éh. 21Uban semah-semah pengekaya' keh nodoo' keh, sinah ke' kenin keh kepéh, ha' néh.
Tong titui ngan usah lu'
(Luk. 11:34-36)
22Ha' Yésus kepéh, Maten lu' iteu' inah éh barei' titui tong usah lu', hun maten lu' jian adang ketem lo'ong usah lu' pu'un rema. 23Bang hun maten lu' sa'at, adang ketem lo'ong usah lu' pu'un merem. Uban néh kenat hun rema keh iteu' tai semilep merem adang néh pelapah merem mu'un, ha' néh.
Tong kekat éh penitah kelunan tong tana'
(Luk. 16:13, 12:22-31)
24Ha' Yésus kepéh, Jah kelunan sohoo' bé' éh omok alaa' duah kelunan pengeja'au néh, adang néh leko tong jah nah ngan murung jah nah awah, adang néh kivu sohoo' jah usah nah ngan bet ha' jah nah awah. Kenat péh ka'ah, bé' keh omok alaa' Allah pengeja'au keh pemung ngan pengekaya' tong tana' iteu'.
25Uban keh bé' omok kenat inah Akeu' bara' ngan keh kepéh, Mai keh béé kenin seruh tong penguman ngan baa' éh nesep keh éh mihin keh murip, kenat péh tong pakai keh. Kineu' urip keh, bé' éh pelapah jian jin penguman keh kei? Kineu' usah keh, bé' éh pelapah jian jin pakai keh kei? 26Jian keh seruh tong kekat juhit tong tana', bé' juhit nah maneu' pulah, ngan bé' éh nérék, ngan bé' éh tipun buaa' lem luvung néh, bang Tamen keh tong seruga, Iah éh mihau réh. Kineu' ka'ah, bé' éh ka'ah éh pelapah jian jin kekat juhit nah kei? 27Séé' jin belah ka'ah omok pekebit urip néh, neu' néh tusah kenin seruh?
28Uban ineu' keh putui kenin seruh tong pakai keh? Seruh keh tong kekat busak tong tana'. Bé' éh kereja' ngan bé' éh pitah pakai. 29 Bang Akeu' bara' ngan keh, na' péh Salomo kaya' mu'un, bé' éh pu'un pakai éh pelapah jian layan jin layan busak inah. 30Bang Tuhan maneu' kekat ureu' murip tong tana', éh pu'un dau iteu' bang sagam notong réh éh. Hun néh kenat kineu' éh tong ka'ah kepéh, bé' Tuhan keloo' mena' pakai sukup ngan keh kei? Kurang pengelan keh, bé' keh ngelan mu'un. 31Hun Tuhan jam seruh tong kekat juhit ngan kekat busak kenat, mai keh béé kenin seruh, Jin semah mé' omok alaa' penguman, ngan alaa' baa' nesep ngan alaa' pakai sukup. 32Uban kekat éh kenat, inah éh penitah kekat kelunan éh bé' ngelan tong Tuhan. Bang Tamen keh tong seruga Iah jam mihau keh mu'un. 33Bang éh bu'un néh jian keh seruh tong kekat jalan éh omok ngepayoo' kenin Tuhan, pitah pengeloo' Néh tenah, boh Iah mena' kekat inah ngan keh. 34Uban néh kenat mai keh béé kenin seruh kineu' sagam da', uban sagam pu'un sukup penusah néh tengéé'. Mai keh pepit penusah tong kekat éh pu'un siget dau, ha' néh.
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia