San Lucas 24
24
Jesús‑ni beyaka benbie lo elhuttiha
(Mt. 28:1-10; Mr. 16:1-8; Jn. 20:1-10)
1Ugwani dila tti bedú ni'a xumanuha, dila tteba udá ka benne nuilaha diake iki baaha cheke ka nu rure ixixxi chi benkeha. 2Tti bisinkeha nna bilákanie íyya yaya ro'o yieru baaha, labíru yaya nuha ro'oni. 3Nianna uta'ake lhi'u, ttaka lanúru Jesús benne anke Xxanari'iha gwaxxakake niha. 4Uka télakanie tti bilákanie nu chi ukaha. Ttiru nna ttu nnelaba chi uka xxe chupa ka benne biyú ata se'ekeha, nukuke xo raka lhalhaba loni. 5Ka benne nuilaha nna itú rasibakanie bedetta loke lo yu. Ttaka ka benne biyúha nna ráke ke:
―¿Beaka regilale benne anka baniha lhe'e ka benne chi uttiha? 6Lanúru benneha tee nii, chiba beyaka ben benneha. Gwalodhú lele ge nu rabie tti sa rekie daka Galilea‑ni. 7Rabie deki lee benne daa yebáha, teeki iginnie lo ná ka nu ruin satsaha nna utákane lo ya kurusiha; eyonna ubisaha nna eyaka benbe.
8La'aniala nna tti bodhú leke ge ka tisa unne Jesús‑ni. 9Nianna bedáke ro'o yieru baaha nna besinke utixxi'akanie ka benne sinea (11) bedhetinieha lhe adíru ka benne se'e niha, utixxi'akanie ke iyá nu chi bilákanieha. 10María Magdalena‑ni nna Juana‑ni nna María nan ge Jacobo‑ni lhe adíru ka benne nuila, ka benneha nuha besinke utixxi'ake. 11Ttaka ka apóstoal nna bitti ukalakanie ge nu ra ka nuilaha nna labí ugía leke ge ka benneha.
12Ttaka Pedro‑ni nna bexunni ttebana diana ro'o yieru baaha. Tti bisinna ro'o nuha nna biyettana beká loni; ttaka lanúru Jesús‑ni bilenna, a sunruba ka lari nu bitesi benneha se'e. Nianna beyekina besinna lhe'e yo'oha nna rebanabinna ge nu chi ukaha.
Nu gwate ka benne diake lhe'esi Emaús
(Mr. 16:12-13)
13La sáha‑gaba, dia chupa ka benne bedhetini Jesús‑ni yu'uke neda diake lhe'e ttu yiesi tee láni Emaús. Re nuha ttiba sinea (11) kilómetru idittu len lhe'esi Jerusalén‑ni. 14Diabake rinneke ge iyá nu chi ukaha. 15Laka diake rinnekeha nna ttiru chi uka xxe Jesús‑ni gwaxenie ke, nianna dia lenie ke turo'o. 16Ttaka ttiba ttu nu yu'u ttu bixa loni, aníha‑ba ankake, labí rugwelhana eyakabiakanie bie. 17Jesús‑ni nna unnaba tise ke, ree:
―¿Bí ge nuná rinnele yu'ule neda‑ni?
Lake nna paba bese'eke nna si'iba du leke. 18Nianna unne ttu ka benneha, delába benne lá Cleofas, bekabie ree:
―¿Si ttúbalu nu dittu dolu lhe'esi Jerusalén‑ni nna abittu binalu nu uka lhe'esi‑ni nnaya nnadhi?
19Labie nna bekabie, ree ke:
―¿Bí uka?
Lake nna ráke:
―Nu gwate Jesús ge Nazaret‑niba xa. Benneha uke profeta ge Tata Do Yebáha. Yalhá lhe'e unnebie lhe xxeniba anka nu benie arlo Tata Do Yebáha lhe arlo iyába ka benne lhe. 20Ttaka ka nu loni ge ka bixxudiha lhe ka uxtisi geri'i‑ni nna betelakane lasi ná ka nu uttikane. Ka nuha nna beda'a ro'okani rákana deki gattie, nianna betákane lo ya kurusiha. 21Batu ri'itu xxenba letu deki labie odilábie ka benne Israel‑ni. Ttaka betse'e loona aníla uka, chi uka tsunna ubisa‑ni tti gwatebie nuha. 22Ttaka anágaba nna ttu chupa ka benne nuila se'eke len ri'ituha, chi bedú téke letu kumu dila tteba ugíake ro'o yieru baaha nna 23ttaka lanúru benne yattiha gwaxxakake. Nianna beyekike besiake lhe'e yo'o ata se'etuha nna rigixxi'ake ráke deki bele'e lo ka anjeli ge Tata Do Yebáha lenke. Ka anjeliha nna ráke deki Jesús‑ni anka benba benneha. 24Chigaba ugía ttu chupa ka benne getu gwalannike ro'o yieru baaha nna gwaxxakabake tti tteba ra ka nuilaha, ttaka Jesús‑ni nna lanúbie bilákanie.
25Nianna rabie ka benneha:
―Gattiparuba riyasale tte denle lhe gattiparuba tsitsi anka ki tsia lele iyá nu unne ka profeta ge Tata Do Yebáha. 26¿Laaba ganna teeki tate Cristuha iyá nuní atti lanila esine yebáha inná xxeni lebie?
27Nianna udulobie utixxi'anie ke ata rinne gebie lo iyába ka yetsi ge Tata Do Yebáha, uduloe len ka yetsi bodha'an Moisés‑ni nna belhuxe len ka yetsi bodha'an ka profetaha.
28Tti bisinke ro'o yiesi ata diakeha, Jesús‑ni nna benbe ttisidiba ttebe tsiabie. 29Ttaka lake nna unnaba ditibake loe kini eya'ane lenke nna ráke bie:
―Utá, beya'ana len ri'itu, kini chiba dia tatubisaha nuní. Chi tteba galha nuní.
Nianna uta'abie eya'ane lenke. 30Tti chi se'eke ro'o mexaha, nianna bedaxxue yettaxtilaha nna begwebie Tata Do Yebáha ixkixaru, nianna ulha'abie lhe'e benneha, begwebie ke. 31La'ania attiba ttu nu biyali loni ukake nna beyoinbia ttebake Jesús‑ni, ttaka lee nna benitti loo ttebe. 32Nianna ra luesike:
―Laxkala bega'a dina lhe'e lastori'i, tti dabie rinne lenbie ri'i tti yu'uri'i nedaha, rigixxi'anie ri'i nu ra lo ka yetsi‑na.
33Nianna birua uledake nna begu'u ttebake neda besinke lhe'esi Jerusalén‑ni. Niha betexxakake tupa ka benne sinea (11) anka apóstoal lhe adíru ka benne lhe. 34Ka benneha nna ráke:
―Gwalíba chi beyaka ben Jesús benne anke Xxanari'iha. Chi bele'e lobie len Simón‑ni.
35Ka benne besinaha utixxi'agabakanie ka benneha nu gwateke tti yu'uke nedaha lhe utixxi'agabakanie ke gasina uka beyakabiakanie Jesús‑ni tti rilha'abie lhe'e yettaxtilaha.
Jesús‑ni bele'e lobie len ka benne rudhetinieha
(Mt. 28:16-20; Mr. 16:14-18; Jn. 20:19-23)
36Sa yu'ulake rinneke ge nuha, ttiruba chi uka xxe Jesús‑ni, udúbie lagwi geke nna begwebie ke padiuxi nna ree ke:
―Bittu aka tenle, xen su lasi gwaltse'e.
37Lake nna yalhá usikanie, rakakanie ganna ttu espírituba nuha rula'akanie. 38Ttaka Jesús‑ni nna rabie ke:
―¿Beaka raka tenle? ¿Beaka rudú chupana lele? 39Gwalulanniruga ka ni'aya‑ni lhe ka náya‑ni lhe. Netiba nuní. Gwaludaxxuruga latia kini aka xen lele. Ttu espíritu labí bela tee lati nuha, nigaba labí yu'una sitta tti rilenle yu'a sitta.
40Tti rabie ke aníha, nianna tti bele'enie ke ka ni'eha lhe ka neeha lhe. 41Ttaka lake nna si se'elake redeakakanie lhe rebanakanie lhe. De nuha nna labí yuke bixa ulaba leke. Nianna unnaba tisa Jesús‑ni ke, ree:
―¿Si bi gwa tee ttu bixa goa?
42Lake nna begweke bie salha'a belha chi biyexxu. 43Labie nna bedaxxube nuha nna utoe na arloke. 44Nianna ree ke:
―Ge nu gwatea‑niba nuha chi utixxi'ania le tti sa doa len lebi'iha tti ria deki teeki satea iyá nu dia lo ka yetsi bodha'an Tata Do Yebáha len Moisés‑ni lhe nu dia lo ka yetsi bodha'an ka profeta ge Tata Do Yebáha lhe, anágaba nu ra lo ka Salmo‑na lhe.
45Nianna tti udhalie ikike ki uka geke ute dákanie ka tisa dia lo ka yetsiha. 46Jesús‑ni nna rabie ke:
―Lo ka yetsiha rixxi'a ra deki Cristuha teeba ki gatti benneha nna eyonna ubisaha nna eyaka benbe lagwi ge ka benne chi uttiha. 47Anágaba nna rixxi'agaba ra deki teeki tsiakana innekana kwenta gebie, kixxi'akinna ka benne deki teeki odúna ke nna odaxxuke neda ge Tata Do Yebáha, kini anáchu nna ixú elha xen lasi ge ka tulha ruinke. Dhulokana kixxi'akana lhe'esi Jerusalén‑ni, nianna tti tsiakana lhe'e iyába ka yiesi se'e itúba yiesi lo yu‑ni. 48Lebi'i nuná kixxi'ale iyá nuní, 49neti nna idhelhaa len lebi'i benne chi ra Tata kia deki utebie gele. Ttaka nna teeki kwedale lhe'esi Jerusalén‑ni axtaliba ganna chi unie kini inná tsitsi lele. Yebáha‑li daa nu tsitsi ra leeha kini utebie na gele.
Jesús‑ni beyapie deyye yebáha
(Mr. 16:19-20)
50Iki de nuha nna tti che Jesús‑ni ke biriake ro'esiha nna bisinke axtaba Betania. Nianna tti ulhidha nábie gwetsá nna unnabe kini aka len Tata Do Yebáha ke. 51Laka due rinnabe geke len Tata Do Yebáha, nianna beru'une ata se'ekeha nna beyapie deyye yebáha. 52Lake nna iki de chi bedú xibike bilhake ge Jesús‑ni, nianna redeaka tábakanie beyekike deyyake lhe'esi Jerusalén‑ni. 53Ttu ttu sába se'eke lhe'e yotuha rulhake ge Tata Do Yebáha.
© 2014, Wycliffe Bible Translators, Inc. All rights reserved.