John 6
6
Iesu mi embobo 5,000 unjisina.
(Matthew 14:13-21; Mark 6:30-44; Luke 9:10-17)
1Ango edo ainda amboda, Iesu temundo Galili ubutu kupo neida maunsisina. (Ubutu ainda dao nei awa Taiberiasi.) 2Edo ine kariwa karu embomaida yai euri embo jiwae gido esitera. Awatedo embo jisi duga tuturo edo imo ambo ambo edo esitera. 3Edo Iesu visido maundo peji demonda edo, ae ainda ambodani de daedo anumbesitera. 4Edo iji ainde Jew embomaida Darutegari Bondo atutumbesisina.
5Edo Iesu jisi piedo embomai jisi duga imo kena gupero gido Philip de sisina, “Kaende bread yai nonda oriaro embomai eiwa indari?” 6Iesu matu buro ro aina awa gosisina. Ata ge awa Philip bavedo gain site sisina.
7Philip mi mina ainde sisina, “Ganu#6:7 Ganu. Ganu einda tega awa ango emboda tau edo deguta 200 buro aina. 200mi bread inono mana oriaro awamane da da mi saka saka indara.”
8Edo Iesu da ambodani nei, Andrew (Simon Peter da nameji) mi Iesu de sisina, 9“Mai einda isira, edo ainda yai bread barley#6:9 barley awa tambara ango, ata ainda vero awa babaingaebé. mi ari ipa da (5) ae un wo saka tote (2) de isira. Ata nongo edo rorae emi embomai jiwaebé eiwa kondade aini?”
10Edo Iesu mi sisina, “Tewo embomai anunumbore!” Edo yai ainda kinya jiwae erari isira. Awatedo embo jijianda berari 5,000 ango awa anunumbesitera. 11Edo Iesu bread kundo ategari God da yai pisido, ambodanide piesiri awamanemi embomai anunumbesitera awamanede kando kando esitera. Edo dá ango un wo de esisina. Edo indari nandogo embomai jipapa ero awamanemi pipisitera.
12Edo amboda awamane injido inono etero ami ainda ambodanide sisina, “Awara, ji itoto dotera awa dada ewo, da ji dowainyae.” 13Awatedo awamanemi bread ipa da (5) ainda ji itoto embomaimi injido doturitera awa, dada edo kanjia berari 12 awa sirero beda esisina.
14Edo iji amboda Iesu mi kariwa awa esiri gido embomaimi akuta tuturo edo mina tara esitera, “Gebé, Peroveta#6:14 Peroveta. Jew embomaimi Peroveta awa God mi tarigarida sisina gumaina gain edo esitera (Deuteronomy 18:18). awa God mi butuda piari gumaina sisina awa eire.” 15Edo Iesu gira awa, awamanemi gundo imo ipami budo awamaneda daotari arate jipapa era, awatedo imo akuta tekago taigedo pejida maunsisina.
Iesu un tamonda ainto esisina.
(Matthew 14:22-33; Mark 6:45-52)
16Ango edo, turo jirido gumbiri ainda ambodani wotedo ubutuda maunsitera. 17Edo muyae matu jiriri awamane mada visido gaigedo Kapenium nasi kena tepeite maunsitera. Edo Iesu awamaneda yai gumbae. 18Edo bisi ikanade tupeiri ubutuda kakawa erari tuturo esisina. 19Ango esiri awamane ma davedo maundo kilometre 5 o 6 ango edo awamane Iesu un tamonda ainto edo ma kena gupeiri jisi piedo gido adu esitera. 20Ata inemi awamanede sisina, “Na awara; adu eoveǃ” 21Edo awamanemi dubodavede imo ma doda buritera, edo ma awa burigibé yai awamane mauntera, ainda papoda denembesisina.
Iesu mi sisina, “Na awa wasiri piarida bread.”
22Edo embomai ubutu kupo neida isite sipo neide erido gositera awa, muyae gisi awa ma da (1) akuta isiri Iesu da ambodanimi ma ainda vitera, edo Iesu ae ainda ambodani de daedo ma ainda vitae, ata ainda ambodanimi akuta ma ainde dodo mambera. 23Edo ainda amboda ma nenei Taiberiasi edo gundo yai Badari mi ategari pisido bread kando esiri embomaimi injitera, ainda demonda denembesitera. 24Edo iji ainde embomaimi Iesu ae ainda ambodani de yai ainda itae gositera, awatedo awamane daedo mada visido Iesu kakowa eite Kapenium temundo maunsitera. 25Ango edo awamane maundo ubutu kupo neida imo taputera. Edo awamanemi embo ainde tedogositera, “Atopatari, imo iji nonde einda gumbesi?”
26Edo Iesu mi awamanede mina sisina, “Eiwa awa gebé bajina imondemane tena. Aindabé inemane kariwa jiwae nane eteno gewa, edo na averi gewa, na kakowa ae. Ata imomane bread injido inono etewa, awatedo na kakowa ewa. 27Tamopisida indari awa itae eira. Awatedo tamopisida indari akuta awaembo buro eove. Ata indari imondemane wasiri natopo itari piaina awaembo buro ewo. Indari awa Embo da Mai mi imondemane piaina. God Mamo mi ainda awara tari Mai da yai pipisisina buro awa arate.”
28Edo awamanemi ainde sitera, “Nakare buro ro aro God dubodave aini?”
29Iesu mi awamanede mina sisina, “God da buro awa eire: embo ave ami piesiri gupusina, ainda yai itomane gebé ari piawate.”
30Awatedo awamanemi ainde sitera, “Kariwa ro ato idegari nakare jisimi gido imo gebé ari? Inemi buro ro asi? 31Natokare apiye ewowomi abu damodamoda rorae dao ‘manna’ injitera. God da Ove Gaiarida tari isira awa: ‘Imo utuda edo awamaneda yai indari bread pipisisina.’ #Exodus 16:4; Nehemiah 9:15; Psalm 78:24”
32Edo Iesu mi awamanede sisina, “Eiwa awa gebé bajina imondemane tena, Moses mi utuda edo imondemane bread#6:32 bread. Iesu bread evekara tote (2)da ge einda sira. Mana awa tamopisida bread God mi Israel embomaida yai pipisisina, edo bread amimi tamopisida wasiri awamanede pipisisina. Ata Iesu awa asisida bread amimi asisida wasiri embomaide pisido eira. Edo Iesu awa wasiri natopo itari tutu. piae. Ata Mamo natomi utuda edo imondemane bread bé pipisira. 33God da bread awa embo ave utuda edo gupeite embomai butu berarida yai wasiri pipisira.”
34Edo awamanemi ainde sitera, “Embo bajina, namondekare bread eiwa iji matawa piewasi.”
35Edo Iesu mi awamanede sisina, “Na awa wasiri piarida bread. Embo ainmi nato yai gupeite awa, mana beji aina, edo embo ainmi ainda gebé ari nato yai pipisite awa, mana un udo tamaina. 36Ata nane imondemane gisi tetena, imomane na daedo gewa, awarata imomane gebé ae. 37Edo embo avekave Mamo mi namonde piedo eira awa, berari nato yai gumbara. Edo berari ainmi nato yai gupeiari awa, nanemi mana onano mamaina. 38Na utuda edo wotedo guputena awa, nato jipapa ain gumbae, ata embo ainmi na piesiri guputena ainda jipapa awa anate. 39Edo Mamo na piesiri guputena, ainda jipapa awa evire, embo berari namonde pipisisina ainda da (1) nane dadoegainyae, ata deguta beao arida awamane berari jiano eraina. 40Edo imo na piesiri guputena, ainda jipapa awa evire, berari ainmi Mai gosite, edo gebé ari ainda yai pipisite awa, wasiri natopo itari baina, edo nanemi deguta beao arida jiano eraina.”
41Ango edo Jew embomaimi tuturo edo ge guguma gaguma ainda daoda sitera, aindabé ine sisina, “Na awa bread utuda edo wotedo guputena.” 42Edo awamanemi tedo esitera, “Aee, eiwa Iesu, Joseph da mai. Ainda mamo ae ai de kaena gari. Nongo edo ine, ‘Na awa utuda edo guputena,’ ango siri?”
43Awatedo Iesu mi awamanede mina sisina, “Imomane akuta ge guguma gaguma teove dowo. 44Embo da ji ainda jipapami nato yai gumbari tao ae. Atako Mamo na piesiri guputena ami awa emboda do dumbari nato yai gumbarate. Edo nanemi deguta beao arida jiano eraina. 45Ge Peroveta maneda Ove Gaiari#6:45 Peroveta maneda Ove Gaiari awa Jew embomaida ove gaiarida dao. Ove ainda doda awa ge God da peroveta manemi iji mamatuda gaguritera. Edo Jew embomaimi God da peroveta maneda ove gaiari dada edo dao eiwa pipisitera.da isira awa, ‘Awamane berari God mi atopataina.’#Isaiah 54:13 Awatedo berari da da ain Mamo da ge ingite, edo ainda atopatari budo, nato yai gundo eira. 46Edo embo da ain Mamo jisimi gae, ata imo ain God da yai edo gupusina, ami akuta Mamo gosisina. 47Eiwa awa gebé bajina imondemane tena. Embo da ainmi ainda gebé ari nato yaida pipisite awa, wasiri natopo itari budo eira. 48Na awa wasiri piarida bread. 49Itomane apiye ewowomi abu damodamoda manna injitera, awarata, awamane bebetegesitera. 50Ata bread eiwa, utuda edo wotedo gundo eiri awa, embo ainmi awa injido betainyae. 51Na awa bread wasiride, utuda edo wotedo guputena. Embo ainmi bread eiwa inaina, imo wasiride natopo itaina. Edo bread nane piana awa nato pisi. Awa nane embomai butu berarida ainda wasiri awaembo piana.”
52Ango tesiri Jew embomai awamane akuta tuturo edo sinigambari edo ge baieite sitera, “Embo eiwa ainda pisi nongo edo kaenato yai piari indari?”
53Edo Iesu mi awamanede sisina, “Eiwa awa gebé bajina imondemane tena. Imomane Embo da Mai da pisi awa indae edo ainda ororo indae gido, imomane wasiri bari tao ae. 54Embo da ainmi nato pisi indeite edo nato ororo indeite awa, wasiri natopo itari budo eira, edo deguta beao arida nane imo jiano eraina. 55Gebé, nato pisi awa indaribé edo nato ororo awa indaribé. 56Embo da ain nato pisi indeite edo nato ororo injido eira awa, imo nato doda isima edo eira, edo na ainda doda isima edo ena. 57Wasiri piarida Mamo mi na piesiri guputena, edo inemi eiuri na wasiri budo ena. Dá ango embo da ain na injido eira, nane ano embo awa wasiri baina. 58Bread eiwa utuda edo wotedo gupusina. Itomane apiye ewowomi manna injitera, awarata, awamane bebetegesitera. Ata embo da ainmi bread eiwa injido eira awa wasiride natopo itaina.” 59Iesu mi ge eiwa benunu oro doda atopaposite sisina, Kapenium nasida.
Ambodani jiwae Iesu dodo maunsitera.
60Awatedo ainda ambodani jiwaemi ge eiwa ingido sitera, “Eiwa awa atopatari okain edo embo da ainmi bari tao ae!”
61Edo Iesu, imo akuta awa gari ainda ambodani ge eiwa ingido guguma gaguma tera. Awatedo awamanede sisina, “Ge emi eiri itomane gebé ari nato yaida dowain jipapa evita? 62Edo imomane Embo da Mai tekago overegedo ainda yai utuda viviteiari gido, nongo avi? 63Asisi Kotopu mi embomaide wasiri piedo eira. Tamopisimi piari tao ae. Edo ge nane tena ami itomane asisi kondade aina edo wasiri piaina. 64Ata itomane doda embo nenei awa gebé ae era.” (Iesu mi tuturoda edo gosisina awa, awamane ainkain awa gebé ae ari, edo embo ainmi imo gitopo emboda ipada piaina, awatedo Iesu awa sisina.) 65Edo ami tedo sisina, “Aindabé eiwa nane imondemane tetena awa, embo da ji nato yai gumbari tao ae, atako embo da ave Mamo natomi ainda yai udo ari do pipisisina.”
66Ainda amboda, ainda ambodani jiwae ainde daedo tenda pepeta ae doturitera.
67Edo Iesu mi ambodani 12de sisina, “Imomane daedo na dodo mamain jipapa evita?”
68Edo Simon Peter mi ainde mina sisina, “Badari, nakare anda yai mambari? Wasiri natopo itarida ge ito yai isira. 69Edo nakare gebé esitera edo gositera awa, imo awa Keriso, God wasirideda Mai.”
70Edo Iesu mi awamanede mina sisina, “Nane imomane 12 geritena, ata itomane doregari doda embo da (1) awa Binei#6:70 Binei awa Satan da dao nei. Anela awa God da ge jindesiri God mi imo utuda kundo augesiri idegedo wowosisina. Edo imo awa God da gitopo edo embo enemboda gitopo. mi gisijido eira!” 71Iesu mi Judas da ge einda sisina, edo Judas awa Simon Iscariot da mai. Imo awa ambodani 12 ainda da (1), awarata amboda ami Iesu gitopoda ipada piaina.
© 2014, Wycliffe Bible Translators, Inc. All rights reserved