Luka 6
6
Lise lia Yenga
1Etakä Yesu la lise lia Yenga nda bilanga ya bangwindi, baeki bande lotwa bangwindi, iyo loowaka bao nda bangasa, iyo lola bao. 2Nde BaFalusi bamɔi loonga lau mbo— Monito bosotefola liti lia Yenga? 3Nde Yesu lomutoel’iyo mbo— ¿Otitange ango lona eloakeläkä Dawidi, inde l’ebaäkä lande, la lise eliayaläk’iyo la isiyɛ? 4Mbo inde lɔɔtɛlɛ ndakɔ ya Mungu la inde lɔɔsɔ la inde lola lituma eliatambomokö nda mɛsa ya Mungu, la inde lofaefa ebayaläkä amamwito lande ani liti yolomo sakolo ko la kanga angɛnɛ? 5Inde loonga lau mbo— Wana-wa-Boto nd’ayali Ngɛnɛ wa Yenga.
Boto wa bosamba bɔlɛmbɛtɛ
6Lise liasi lia Yenga aɔtɔ̈kɔ̈ Inde nda ndakɔ ya ɛsɔngɔmɛlɔ ndoekesa bato, boto loyala omao la aäkä nde la bosamba wa olome ewalɛmbɛtɛ̈kɛ̈. 7Batikasa la BaFalusi lolamba Yesu eluwa atouwes’inde la lise lia Yenga, mbo bɛnɛkɛ fofe yowanjel’Inde. 8Nde Inde lolüwa baenyeli bau, Inde loonga la boto wa bosamba bɔlɛmbɛtɛ mbo— Emalaka, yauku eya nd’atiteni. Inde loemala, inde lɔkɛ atiteni yau. 9Limɔ Yesu loonga lau mbo— Isofel’ino mbo loengani nde la bikela ya Yenga, kwa ndokela olau, kwa ndokela obe? Kwa ndouwesa oto kwa ndoola oto? 10Yesu lomwɛlɛ iyo yatotina, limɔ Inde loonga la boto mbo— Nanolaka bosamba waɛ; inde lokela ongoma la wao losäsa. 11Kongo ko iyo lotuma la luno la iyo lofelana nda loaso elokakelek’iyo la Yesu.
Yesu loaa Baeki bande liu la ambale
12Nda bacho-ba Inde lɔkɛ nda löngo, lise limɔi, okasombokola Mungu, Inde loumwa bocho bototina omao nda lisomboli. 13Limɔ nda mbile ya bonyanya, Inde lota baeki bande lioi, Inde loaa liu la ambale ende iyo, Inde lof’iyo lina liasi mbo Batomomu; bako 14Simona (Inde lot’inde imɔ lina liko Petelo), la etungani yande ako Andelo; la Yakobo, la Yoane, la Filipo, la Balatomayo; 15la Matayo la Toma, la Yakobo wana wa Alufayo, la Simona oyatangomökö Selote, la 16Yuda wana wa Yakobo, la Yuda wa Keliota oyawambäkä Yesu.
17Yesu losokwa nda löngo amamwito lau, Inde loemala nda loanyake amamwito lau la ekuke efi ya bato ba Yudea la Yelusaleme l’eba ngɔngɛ ya Tuloa la Sidona ebayäkä ndoyok’Inde la ndoyuwesomo ngwo yau; 18la bato ebawäkä la belimo ya bɔwɛwɛ louwekesomo. 19Batotina lokotaka ndomata Yesu, eoka bofoka wakuswäkä ndouwekesa batotina.
Inango sha Yesu nda Löngo
20Inde loɛlɛlɛ baeki bande, limɔ Inde loonga mbo—
Limɛngɔ lile l’eba touwe, eoka Bɔkɔta wa Mungu bole wanu,
21Limɛngɔ lile lanu ebatooka isiyɛ kwani, eoka bokaneloko.
Limɛngɔ lile lanu ebatolela ndeli kwani, eoka bosɛkɛkɛ.
22Limɛngɔ lile lanu ani batoiyel’ino, l’ani batosayak’ino,
L’ani batomɔlɔk’ino, l’ani batosingwaka baina banu kwa bɛkɛcha,
Ko l’eoka ya Wana wa Boto;
23Yaimwesaka betema yanu yai la lise lina; tondwaka la limɛngɔ,
Tɛnɛngɔ, bondanda wanu wende ofi nda use;
eoka batata bau bakeeläkä batɔndɔli ko ongoma.
24Aeko wale nde end’ino ebafoka, eoka osɔɔlɔ ndɔɔlɔ bosungi wanu;
25Aeko wale lanu ebasokanelo kwani, eoka bokeke nde tosiyɛ.
Aeko wale end’ino ebatosɛkɛ twɛlɔ kwani eoka bolelaka ndeli.
26Aeko wale end’ino ani bato batotina batoinakel’ino,
eoka batata bau bakeeläkä batɔndɔli ba bolimbake ko ongoma.
27Kongo ko end’ino ebatooka’mi kwani, itoonga mbo— Samaka baiyani lanu; keelaka ebatoiyel’ino ko bolau; 28fotesaka ebatomɔlɔkɔ ino, la somboelak’iyo ebatoluk’ino bɔfi. 29Boto eoma aɛ nda likɛkɛ limɔi, tambak’inde elimɔi; boto oyatɔɔnɔkɔlɔkɔ aɛ kanjo, ofekelëk’inde imɔ ko esinda yaɛ. 30Faefaka ebatömb’aɛ yeka; boto ɛɔnɔkɔlɔ biengo yaɛ, wömbëk’imɔ inde yao. 31Ebisolɛmb’ino mbo bato bakeelek’ino, keelak’iyo ko ongoma.
32¿Bosama ebatosam’ino, wende to booto w’iye? Eoka ango bato abe batosamana l’ebatosam’imɔ ko iyo. 33¿Bokeela booto ende ebatokeela imɔ ko ino booto, bole to boni bɔfɔnɔ wa booto? Eoka bato abe batokela imɔ ko ongoma. 34¿Bofa belima ende bato ani wende l’iyɛli shoɔsɔ yao liasi, bole la booto w’iye? Ango bato abe batofaekefa bato abe belima mbo baɔlɛkɛ imɔ ko bieto-ao liasi. 35Samaka nde ebatoiyel’ino, keelak’iyo booto, fak’iyo belima, owëke esole, limɔ bondanda ebotɔɔlɔ ino boyala nde bofi la ino boyalaka bana ba Mungu Ofi, eoka Inde angɛnɛ atolelaka booto ende ebati la wao la ende bato babe imɔ. 36Yalanaka to la booto kwa ayali Sango wanu imɔ la booto.
37Ofëke bato baɛngɔ lifëlä; ofëke bato se lifëlä mbo ino imɔ botafomo se; mɛsɛlɛkɛ bato limɔ ino bomɛsɛlɔmɔkɔ; 38faefaka bato bafi, limɔ ino bofaefomoko imɔ ko ikweelo esisotumaka fuu, esisɔɔlwa kwa bofonga ebosowamomo nda ikweelo esisoelwaka, botofomo lilya. Eoka ikweelo esitokweel’ino ende basi, ino nd’atokweelomo ngo ko la shao.
39Inde lotel’iyo bombila imɔ, mbo— ¿Boto wa botuku atokɔkɔlɔ ndotola ewa botuku oso nda mboka? ¿Mbo iyo yaambale angokekelana nda liyöndo? 40Boeki aitolongela Boekesi wande, kongo ko boeki la boeki oyasɔɔlɔlɔ liekesi, inde koengana Boekesi wande.
41¿Monito ototicha lofututi elole nda liso lia etungani yaɛ ani oitolembeela bokangela ebole nda liso liaɛ angɛnɛ? 42¿Monito otokɔkɔlɔ ndoonga la etungani yaɛ mbo— Machaka’mi isokoleke lofututi elole nda liso liaɛ, ani aɛ angɛnɛ otiɛnɛ bokangela ebole nda eliaɛ liso? Aɛ bolimbakeli, taɔmɔlɔkɔ bokangela ebole nda liso liaɛ angɛnɛ, limɔ aɛ otɔɛnɛ sandelele ndɔɔmɔlɔ lofututi elole nda liso lia etungani yaɛ.
43Isandu silau siitota tuma tobe, la isandu esisɔɔlɔ siitota tuma tolau, 44eoka isandu la isandu sisoluwana ngo ko la tuma twa shao angɛnɛ. Bato baitotwaka sau nda toilaila la baitotwaka toyayöliki nda toyangiakau. 45Boto olau atokusokola ko bolau ebototumesa bondanda wa botema wande, la boto obe atokusokola ko bobe wa bondanda bobe nda botema wande, eoka bonɔkɔ nd’atoongaka ko yao ebitotumekesa botema.
Besweli imbale ya ndakɔ
46¿Monito ototangaka’mi mbo Ngɛnɛ, Ngɛnɛ, ani otikele yao ebitoonga’mi? 47Oyatoya ende’mi ndoyaoka baoi bami, nde kokelaka bao, Imi nd’atɔɛnɛs’ino ani ayali inde. 48Ende kwa oto oyaswäkä ndakɔ, inde lofuwaka ndoko bilundu, inde loswa yao se suu nda batälɛ; limɔ ayäkä fela, botima losecha sondwäsondwä nda ndakɔ ena, angokɔkɔlɔ ndolɛlɛsɛ yao, eoka yao loswama se suu nda batälɛ. 49Kongo ko oyatooka baoi bami, nde aitokela bao, ayali kwa oto oyaswäkä ndakɔ yande olikolo lia nyɛlɛ, angwɛnɛ eswelo ya batälɛ, limɔ botima losecha sondwäsondwä la yao loukwa kwuu futuku, lowɛlɔmɔ se loa likama.
Le Nouveau Testament in Kele (Lokele) © British and Foreign Bible Society, 1958, 2019.
Luka 6
6
Lise lia Yenga
1Etakä Yesu la lise lia Yenga nda bilanga ya bangwindi, baeki bande lotwa bangwindi, iyo loowaka bao nda bangasa, iyo lola bao. 2Nde BaFalusi bamɔi loonga lau mbo— Monito bosotefola liti lia Yenga? 3Nde Yesu lomutoel’iyo mbo— ¿Otitange ango lona eloakeläkä Dawidi, inde l’ebaäkä lande, la lise eliayaläk’iyo la isiyɛ? 4Mbo inde lɔɔtɛlɛ ndakɔ ya Mungu la inde lɔɔsɔ la inde lola lituma eliatambomokö nda mɛsa ya Mungu, la inde lofaefa ebayaläkä amamwito lande ani liti yolomo sakolo ko la kanga angɛnɛ? 5Inde loonga lau mbo— Wana-wa-Boto nd’ayali Ngɛnɛ wa Yenga.
Boto wa bosamba bɔlɛmbɛtɛ
6Lise liasi lia Yenga aɔtɔ̈kɔ̈ Inde nda ndakɔ ya ɛsɔngɔmɛlɔ ndoekesa bato, boto loyala omao la aäkä nde la bosamba wa olome ewalɛmbɛtɛ̈kɛ̈. 7Batikasa la BaFalusi lolamba Yesu eluwa atouwes’inde la lise lia Yenga, mbo bɛnɛkɛ fofe yowanjel’Inde. 8Nde Inde lolüwa baenyeli bau, Inde loonga la boto wa bosamba bɔlɛmbɛtɛ mbo— Emalaka, yauku eya nd’atiteni. Inde loemala, inde lɔkɛ atiteni yau. 9Limɔ Yesu loonga lau mbo— Isofel’ino mbo loengani nde la bikela ya Yenga, kwa ndokela olau, kwa ndokela obe? Kwa ndouwesa oto kwa ndoola oto? 10Yesu lomwɛlɛ iyo yatotina, limɔ Inde loonga la boto mbo— Nanolaka bosamba waɛ; inde lokela ongoma la wao losäsa. 11Kongo ko iyo lotuma la luno la iyo lofelana nda loaso elokakelek’iyo la Yesu.
Yesu loaa Baeki bande liu la ambale
12Nda bacho-ba Inde lɔkɛ nda löngo, lise limɔi, okasombokola Mungu, Inde loumwa bocho bototina omao nda lisomboli. 13Limɔ nda mbile ya bonyanya, Inde lota baeki bande lioi, Inde loaa liu la ambale ende iyo, Inde lof’iyo lina liasi mbo Batomomu; bako 14Simona (Inde lot’inde imɔ lina liko Petelo), la etungani yande ako Andelo; la Yakobo, la Yoane, la Filipo, la Balatomayo; 15la Matayo la Toma, la Yakobo wana wa Alufayo, la Simona oyatangomökö Selote, la 16Yuda wana wa Yakobo, la Yuda wa Keliota oyawambäkä Yesu.
17Yesu losokwa nda löngo amamwito lau, Inde loemala nda loanyake amamwito lau la ekuke efi ya bato ba Yudea la Yelusaleme l’eba ngɔngɛ ya Tuloa la Sidona ebayäkä ndoyok’Inde la ndoyuwesomo ngwo yau; 18la bato ebawäkä la belimo ya bɔwɛwɛ louwekesomo. 19Batotina lokotaka ndomata Yesu, eoka bofoka wakuswäkä ndouwekesa batotina.
Inango sha Yesu nda Löngo
20Inde loɛlɛlɛ baeki bande, limɔ Inde loonga mbo—
Limɛngɔ lile l’eba touwe, eoka Bɔkɔta wa Mungu bole wanu,
21Limɛngɔ lile lanu ebatooka isiyɛ kwani, eoka bokaneloko.
Limɛngɔ lile lanu ebatolela ndeli kwani, eoka bosɛkɛkɛ.
22Limɛngɔ lile lanu ani batoiyel’ino, l’ani batosayak’ino,
L’ani batomɔlɔk’ino, l’ani batosingwaka baina banu kwa bɛkɛcha,
Ko l’eoka ya Wana wa Boto;
23Yaimwesaka betema yanu yai la lise lina; tondwaka la limɛngɔ,
Tɛnɛngɔ, bondanda wanu wende ofi nda use;
eoka batata bau bakeeläkä batɔndɔli ko ongoma.
24Aeko wale nde end’ino ebafoka, eoka osɔɔlɔ ndɔɔlɔ bosungi wanu;
25Aeko wale lanu ebasokanelo kwani, eoka bokeke nde tosiyɛ.
Aeko wale end’ino ebatosɛkɛ twɛlɔ kwani eoka bolelaka ndeli.
26Aeko wale end’ino ani bato batotina batoinakel’ino,
eoka batata bau bakeeläkä batɔndɔli ba bolimbake ko ongoma.
27Kongo ko end’ino ebatooka’mi kwani, itoonga mbo— Samaka baiyani lanu; keelaka ebatoiyel’ino ko bolau; 28fotesaka ebatomɔlɔkɔ ino, la somboelak’iyo ebatoluk’ino bɔfi. 29Boto eoma aɛ nda likɛkɛ limɔi, tambak’inde elimɔi; boto oyatɔɔnɔkɔlɔkɔ aɛ kanjo, ofekelëk’inde imɔ ko esinda yaɛ. 30Faefaka ebatömb’aɛ yeka; boto ɛɔnɔkɔlɔ biengo yaɛ, wömbëk’imɔ inde yao. 31Ebisolɛmb’ino mbo bato bakeelek’ino, keelak’iyo ko ongoma.
32¿Bosama ebatosam’ino, wende to booto w’iye? Eoka ango bato abe batosamana l’ebatosam’imɔ ko iyo. 33¿Bokeela booto ende ebatokeela imɔ ko ino booto, bole to boni bɔfɔnɔ wa booto? Eoka bato abe batokela imɔ ko ongoma. 34¿Bofa belima ende bato ani wende l’iyɛli shoɔsɔ yao liasi, bole la booto w’iye? Ango bato abe batofaekefa bato abe belima mbo baɔlɛkɛ imɔ ko bieto-ao liasi. 35Samaka nde ebatoiyel’ino, keelak’iyo booto, fak’iyo belima, owëke esole, limɔ bondanda ebotɔɔlɔ ino boyala nde bofi la ino boyalaka bana ba Mungu Ofi, eoka Inde angɛnɛ atolelaka booto ende ebati la wao la ende bato babe imɔ. 36Yalanaka to la booto kwa ayali Sango wanu imɔ la booto.
37Ofëke bato baɛngɔ lifëlä; ofëke bato se lifëlä mbo ino imɔ botafomo se; mɛsɛlɛkɛ bato limɔ ino bomɛsɛlɔmɔkɔ; 38faefaka bato bafi, limɔ ino bofaefomoko imɔ ko ikweelo esisotumaka fuu, esisɔɔlwa kwa bofonga ebosowamomo nda ikweelo esisoelwaka, botofomo lilya. Eoka ikweelo esitokweel’ino ende basi, ino nd’atokweelomo ngo ko la shao.
39Inde lotel’iyo bombila imɔ, mbo— ¿Boto wa botuku atokɔkɔlɔ ndotola ewa botuku oso nda mboka? ¿Mbo iyo yaambale angokekelana nda liyöndo? 40Boeki aitolongela Boekesi wande, kongo ko boeki la boeki oyasɔɔlɔlɔ liekesi, inde koengana Boekesi wande.
41¿Monito ototicha lofututi elole nda liso lia etungani yaɛ ani oitolembeela bokangela ebole nda liso liaɛ angɛnɛ? 42¿Monito otokɔkɔlɔ ndoonga la etungani yaɛ mbo— Machaka’mi isokoleke lofututi elole nda liso liaɛ, ani aɛ angɛnɛ otiɛnɛ bokangela ebole nda eliaɛ liso? Aɛ bolimbakeli, taɔmɔlɔkɔ bokangela ebole nda liso liaɛ angɛnɛ, limɔ aɛ otɔɛnɛ sandelele ndɔɔmɔlɔ lofututi elole nda liso lia etungani yaɛ.
43Isandu silau siitota tuma tobe, la isandu esisɔɔlɔ siitota tuma tolau, 44eoka isandu la isandu sisoluwana ngo ko la tuma twa shao angɛnɛ. Bato baitotwaka sau nda toilaila la baitotwaka toyayöliki nda toyangiakau. 45Boto olau atokusokola ko bolau ebototumesa bondanda wa botema wande, la boto obe atokusokola ko bobe wa bondanda bobe nda botema wande, eoka bonɔkɔ nd’atoongaka ko yao ebitotumekesa botema.
Besweli imbale ya ndakɔ
46¿Monito ototangaka’mi mbo Ngɛnɛ, Ngɛnɛ, ani otikele yao ebitoonga’mi? 47Oyatoya ende’mi ndoyaoka baoi bami, nde kokelaka bao, Imi nd’atɔɛnɛs’ino ani ayali inde. 48Ende kwa oto oyaswäkä ndakɔ, inde lofuwaka ndoko bilundu, inde loswa yao se suu nda batälɛ; limɔ ayäkä fela, botima losecha sondwäsondwä nda ndakɔ ena, angokɔkɔlɔ ndolɛlɛsɛ yao, eoka yao loswama se suu nda batälɛ. 49Kongo ko oyatooka baoi bami, nde aitokela bao, ayali kwa oto oyaswäkä ndakɔ yande olikolo lia nyɛlɛ, angwɛnɛ eswelo ya batälɛ, limɔ botima losecha sondwäsondwä la yao loukwa kwuu futuku, lowɛlɔmɔ se loa likama.
Le Nouveau Testament in Kele (Lokele) © British and Foreign Bible Society, 1958, 2019.