Лука 6
6
Глава 6
Суббота Хунӈин
1Өмнилэ субботала, Пасха гя инэӈэӈнэн, Иисус килебу исувкэчидекли төрли ӈэнэддин, Ноӈан хупкуттыӈэлни килеб нёчэвэн иссэдюр, няӈтаван чуптакритан, ӈалдюр тарав бурдук окан чилкаридюр, дептитэн. 2Хан фарисеил ноӈартакитан гөнитэн:
– Ядавур тарав некэс, субботала тачимур эннэвур некрэ?
3Иисус ноӈартакитан барагрин:
– Эв ху эчилсэн таӈра, Давид мэнкэн дебэмэлми, ноӈнюнни-дэ бичэл дялни дебэмэлрэкэтэн, некчэвэн? 4Он ноӈан Хэвки Дюлан ириди, болдывум Хэвкиду килебу гадин, тарав попал аӈилитан ӈи-дэ эннэн дептэ бис, нян тарав килебу дептин, нян ноӈнюнни-дэ бичэлду дялди дебдэтэн бөрин?
5Нян ноӈартакин гөнин:
– Бэй Хутэн Оча суббота-да хунӈин.
Иисус Христос бутэндук ӈалан чумча бэю бэгдэттэн
6Нян гяла субботала Иисус нэӈэдеклэ дюла#6:6 Нэӈэдек дю – здесь: дом молитвы, синагога. бэилбу хупкуттэй ӈэнрин. Тала өмэн бэй бисин, ангидан ӈалан бутэндук чумча бисин. 7Итум хупкучимӈэл, фарисеил-дэ Иисусу хипкаттитан, субботала бэгдэчиннэвэн, Ноӈан ускан овкандавур. 8Тарбач Ноӈан мулгачавутан ханикан, чумчач ӈаллатытки бэйтэки гөнин:
– Илли, нян дулакандула гиркали.
Тарак бэй илрин, дулакандула гиркарин. 9Таракам Иисус ноӈартакитан гөнин:
– Би хуну улгэмдэку, яв-нян итундули субботала некэвми ай бидин? Аю, эв усу-гу? Ханим айчими, эв көкэвкэми?
Ноӈартан хикутывчиритан. 10Нян ноӈартакитан эйдуткин ичисниди, тартаки бэйтэки гөнин:
– Ӈали алли!
Ноӈан тачин некрин. Нян ӈалан ай одни, гяӈчин. 11Фарисеил тикулритан, нян мэр доливур төрэдилритэн, яв-да Иисусту нектэвур.
Иисус Христос мян дӫрбу апостолалбу хинман
12Таралдула инэӈэӈнэтэн Иисус урэкчэндулэ нэӈэддэй ойчирин, нян долбуну чөптэрэ Хэвкитки нэӈэдникэн тала биддин. 13Инэӈ-нян одакан, хупкуттыӈэлбий эмдэтэн эририн, мян дӫрбу ноӈардукутан хинмарин, апостолалди гэрбурин:
14Симону, ноӈман Пётэрач гэрбурин, Андрею-да, ноӈан акман Иакову, Иоанну-да, Филиппу, Варфоломею-да, 15Матфею, Фомав-да, Алфей Иаковвон, нян Симон, Зилотач гэрбуттыв, 16Иаковлев Иудаван, нян Иудав Искариоту, дюлэски эмкэмӈэ оннав.
Иисус Христос бэилбу бэгдэттэн, хупкуттэн-дэ
17Ноӈарнюнтан эвририди, Иисус авландула илрин, нян хоя Ноӈан хупкуттыӈэлни, хоя-да бэил Иудея чэлэдукун, Иерусалимдук, намгидал-да төрэлдук Тирдук, Сидондук-тэ чакаптитан. 18Ноӈман долчидавур эмчэл, энэкэлбур-дэ бэгдэттэвур, ариӈкалду-да хилрил, аил одитан. 19Чэлэдюр бэил Иисусу тэмисэндэвур дагамасчиритан, ноӈан таррөчинь айчирич эӈилэттэкэн. 20Нян Ноӈан, ясалди хупкуттыӈэлтэкий ичисниди, гөнин:
– Нисэлкэсэл дӫгрил. Хэвки Тэгэмэрэдекчин ху тэгэмэрэдеклэчис. 21Нисэлкэсэл тек демсил. Хэвки хуну дялувкандин, нисэлкэсэл тек хоӈрил. Ху инингэрэдис. 22Ху нисэлкэсэл, хуну тек тыкунакататан, эрэссэкэтэн, яргаракатан, гэрбэвусэн-дэ учиттакатан, Бэй Хутэн Очав тэдеттэкэсэн, 23өрэлдэӈэсэн тарав инэӈу, хокаӈчиӈасан, няниндула эгдем дёлдаӈавур бакчис. Тек хуну тыкунил бэил амтылтан эчинтэтит Хэвки мэтумӈэлбон тыкунитан.
24Ху-си, эӈэел, унэт хилгарадис! Ху укал элэкэн аваӈчинмайгавур бакрисан. 25Ху, тек элэкэн дялуттыл, хилдис! Ху унэт дюлэски демдис. Ху, тек элэкэн ининрил, хилгарадис, ху, хоӈникан, этэрдис. 26Тек хуну чэлэн бэил эскэрэкэтэн, ху унэт дюлэски хилгарадис! Тачимур-та эрэл бэил амтылтан Хэвки мэтумӈэлдин олэкэнь гэрбутчэлбу эскэритэн.
Мэр баргакалбур аявгаралра
27Хунтэки, мину долчирилтаки, би гөнэм: мэн баргакалбур аявгаралра, хуну тыкунилбу аиӈгатан нэккэрэлрэ, 28хуну ниӈиттылбу – ирэмкэткэгрэлрэ, хуну осэгрилбу – ноӈарбутан нэӈгэрэлрэ. 29Ӈи хин хячиндулас пасакладин, гяв хячми алиматӈанри, ӈи хин тэтивус-тэ тестирэкэн, мэн урбаки-да эмэкэн мулан. 30Эйдудун хиндулэ гасчирилду – бөгрэли, хиндулэ-дэ гачавутан, амаски эди гасчиграр. 31Эйду, яв-ка ху аявас хөнтэл бэил хунду нектэтэн, ху-дэ тачин ноӈардутан неккэрэлрэ. 32Нян хуну аяврилбу аявракасан, як тали хунду дёлдаӈасан бидин? Төнӈэкичу-дэ некрил бэил ноӈарбутан аяврилбу аявотта. 33Нян хуну айрилбу-ткан айракасан, як тали хунду дёлдаӈасан бидин? Төнӈэкичу-дэ некрил бэил тачин неккоттэ. 34Бөргэрилду-ткэн бэилду онурэкэсэн, як тали хунду дёлдаӈасан бидин? Төнӈэкичу-дэ некрил мэр доливур онумэтчёттэ, дюлэски бөргэмэттэвур. 35Ху-си баргакалбур аявгаралра, бэлгэрэлрэ, онугрэлрэ-дэ, амаски мучувкам эникэн алатта. Таракам эгдем дёлдам баккарадис, Няниндула Биси нярудилни оградис, Ноӈан этылбу-дэ бачибар, усалбу-да аявран. 36Илрагралра, хун Амансан илраграгчинни.
Хөнтэлбу усалтадяк
37Кэнелич эдилрэ гөгрэкилрэ – хуну-дэ кэнелич этэр гөгрэр, эдилрэ усалтагракилра – хуну-дэ этэр усалтаграр; хэлэгрэлрэ – хуну-дэ хэлэгрэгрэдир. 38Бөгрэлрэ – хунду-дэ бөгрэдир, илкан эгдень милтэрэч бөгрэдир: тилбадир, чапчидир, хэелин окан тэтивусэн дован милтэрэмкэндир. Иррөчинь илкэвунь ху илкэвэчис, таррөчин-да хунду илкэтчир.
39Иисус ноӈартакитан эррөчим тэлэӈу тэлэӈрин:
– Өмэн-нян баликач бэй хөнтэв баликачу элгэдин-гу? Дӫричэндюр-нян кэӈрэлэ этэр тикрэ? 40Хупкутты хупкучимӈэй ойдэлин эсни бивэттэ, хупкуттый-тэкэн мудакриди, хупкучимӈэй гасанни оградин. 41Ями-нян акми ясаллан тукару ичинри, мэн ясаллай мукэчив эникэн иттэ? 42Он-нян акантакий эчин гөндинри: «Акму! Хин ясалдукус тукару нудаку», – мэн ясаллай мукучив эникэн иттэ? Өлэк! Дюлэгэч мэн ясалдукий мукучив нули – тадук-нян, акми ясалдукун тукару он-да нудай итчинри.
Хякитав няӈталин хаватта
43Ай хякита кэнели няӈтан эсни бивэттэ, тарбач хявус хякита ай няӈтан эсни бивэттэ. 44Кубэччон хякитав няӈталин хаватта, инжиру терновникли эстэн тэвливэттэ, винограду-нян хятакагдук эстэн аталлотта. 45Кэнели бэй мэн мявми кэнелив некчинмэйдукун кэнелив бөвэттэн. Бэй мявунни яч милтэрэӈчин, таррөчин-да төрэнни бидин.
Мэргэч, нуӈу-дэ бэил дюгавур оддыл
46Ядавур ху Мину гэрбуччӫчис: «Хунӈи! Хунӈи!» – Мин гөниву эникэн некрэ? 47Ӈи Минтэки эммөтэн, Ӈи Мин гөниву долчиваттан, мин гөнчэгчиму неккоттэн, хунтэки гөндим, тарак ӈи урэчин. 48Бэй дюгай одды урэчин, тарак эгдем кэӈрэв улрин, нян дю хаттон дӫлла овканин. Окат тылканакан, дюн эч мөдэмрэ, эч кавамра, аич оча бими, дӫлду илатми. 49Ӈи Миӈ гөниву долчиваттан, гөнигчиму эникэн некрэ, ноӈан дюгай кэӈгулэлэ, ач хатлач төрлэ овканча бэй урэчин, окат тылканакан, тарак дю тикрин, энтэкэе тарак дюн кавамрин.
© Библияв тулмачин Институт
Москва, 2001
ISBN 5-93943-008-2
ISBN 91-89122-50-X