Lík 23
23
Batiibabu bata Yéesu hákil Filat
(Máciya 27:1-2, 11-14; Maak 15:1-5; Saŋ 18:28-38)
1Bukanabuku feh kalakomuu li hujojahu li kuyito min kuŋa’ Yéesu kújowetum bata Filat. 2Nan kúliiŋumuu, li kútoŋ kúmal kukaan Yéesu koon:
— Jitootook ánayinaawu umme okila li kakaan ésukayi égugguloo. Laaniisaan jakum kuhal báhalabu bata áyiiyawu áamakawu, ban li aan okila humumool ammuu Afakenaawu, áyiiyawu ooliil.
3Muñeˈe Filat li agel̥l̥en Yéesu aanool:
— Awu ommuu áyiiyawu ata Kusuwifaku?
Yéesu li aan Filat:
— Lulobulo mo awu humumi.
4Filat li aan huhaanaahu hata élambaayi li búsukabu:
— Injé ijukut wah wan ánayinaawu umme akaane wajakut, waate úji li abaj katek.
5Bale bukanabuku li kuhaŋ malob li sembe koon:
— Lakaanekaan ésukayi égugguloo li baliikenelabu boola. Li etaamayi yata Gálile látoŋumulo, álowul li yata Súde. Muñeˈe láliiŋulo taate.
Batiibabu bata Yéesu hákil Elod
6Nan Filat ajamumuu li kúl̥imen etaamayi yata Gálile, li agel̥l̥en aan:
— Anáyinaawu ummu an ata etaamayi yata Galile?
7Nan Filat ajamumuu kaanaku Yéesu li etaamayi yan Elod aakenumuu láfulumulo, li aboñool o’ Elod, mata no unnu Elod foof okila li ésukayi yata Yeelusalem. 8Elod li súumool ŋáa’ nan ajukumuu Yéesu, mata lajanjam li kulob moola, ban ló bafiyowe nan afañeenumuu min ajukool. Li afañeen foof min ajuk Yéesu li kakaan wah wájaahaleniye. 9Elod li agel̥l̥en Yéesu kulim kameeŋe, bale Yéesu abagutool. 10Huhaanaahu hata élambaayi li kaliikenemuu ésukayi eluwaayi ésukayi eluwaayi yata Móyiis li kuyito to, min kunaak kuhanken min kúmal kuya li Yéesu. 11Elod li kusollaaliyaku koola li kajakakaay Yéesu, ban li kubesool. Li kukaanool hújufo háyikiye kuban, li kulaañenool bata Filat. 12Elod buko li Filat kajamooleenutumuu naanaŋ, li kulaañ kufaalaay hunakahu unhu.
Filat li asen búsukabu Yéesu boot bumuk
(Máciya 27:15-26; Maak 15:6-15; Saŋ 18:39–19:16)
13Muñeˈe Filat li ahooñ bajoj huhaanaahu hata élambaayi, kunahaanaku, li ésukayi, 14min aaniil:
— Jíŋaluloŋŋalul ánayinaawu ummu min joonom lakaanekaan ésukayi égugguloo. Bale ligel̥l̥enoogel̥l̥en hákiluul, ban ijukut li okila butila banooban bájiwuulumuu li jil̥oofool. 15Ban Elod foof ajukut li okila butila banooban, mata lálaañenulolaaloolaañenul. Mó mújimuu, ánayinaawu ummu akaanut wah waate újiwool li aket. 16Kama boot min ilob min kutekool kuban, li ikatenool.
17[Li kagaan kanookan kata Faak, Elod fan ákatenuliil an an kukul̥e#23:17 Hulimahu unhe hubajeenut li éliibalayi yahaanayi yata Lík, hulet foof li síliibal sameeŋe li sihaanasu (jijuke li Máciya 27:15; Maak 15:6).]
18Bale búsukabu feh li bulob butiya li mano boon:
— Umuk ánayinaawu ummu! Ukátenuloli Balabaas!
19(Balabaas lajokijok kul̥ mata búgugguloo bubaje li ésukayi, li mata an an amuke.)
20Emmuu Filat lafañeene akaten Yéesu, li alaañen alob li búsukabu. 21Bale li kulob butiya koonool:
— Ubaaŋool li ekuluwa! Ubaaŋool li ekuluwa!
22Filat li alaañen alob búhaajut aan:
— Kama waa lakaane wajakut? Ijukut li okila wah wajakut wan akaane waate újiwool li áati aket. Muñeˈe kama boot min ilob min kutekool kuban, li ikatenool.
23Bale búsukabu li jooŋoo to min buhaŋ mahanken min bulob butiya boon, Yéesu laate abaaŋi li ekuluwa. Húcuhahu hooliil li hulamool. 24Muñeˈe Filat li alob min kukaan wahawu wan búsukabu boonoolumuu akaan. 25Mal̥egen li akaten anawu an kufañumuu min ákatenuliil, an kukul̥umuu mata búgugguloo li mata jamuk an, min aseniil Yéesu kujow kukaan loon súumiilumuu.
Li kubaaŋ Yéesu li ekuluwa
(Máciya 27:32-44; Maak 15:21-32; Saŋ 19:17-27)
26Nan kusollaaliyaku kulakomuu kájowetumaku kata Yéesu, li kufam li ánayine akee an koone Simoŋ ata ésukayi yaaneyimuu Siilen, okila li élaañumul bata ul̥ibawu. Kusollaaliyaku li kujok Simoŋ min kutuuŋool ateb ekuluwaayi min anab li búsol Yéesu.
27Búsuk báamak li bunab li Yéesu li foof kanaale kalakowe jíl̥ok li kanaake kul̥okoo mata Yéesu áji. 28Yéesu li átiiwowul ajooŋoo li kanaalaabuku ban li aaniil:
— Kaalaabuke kata Yeelusalem, jakum jil̥okom, bale jil̥ok mata bukuluul humumuul li mata bañooluul. 29Mata kunakaku kunku li ebil, nan bukanabuku kommuu koon: «Awólo kaalaabuku kayilaatumuu kuhalet, kámusutumuu kujam huhaane, li kámusutumuu kulaahen añiil!» 30Taŋayi fan ebil éliiŋ nan bukanabuku kommuu koon kuyuuyaku: «Jílowoli téeti#Oóse 10:8!» Li koon kulijaku: «Jíhimenoli!» 31Mata, fan bunuunukenabu baloŋumuu kucooce, naane baketumuu li kubil kukaan bo buu?
32Li kújowetumoo foof kánayine kúl̥uba kakaane majakut, boot kujow kumukoo to li Yéesu. 33Nan kúliiŋumuu tan koonemuu «Husend», li kubaaŋ to Yéesu li ekuluwaayi. Ban li kubaaŋoo to foof li sikuluwa bukan kúl̥uba kakaane majakut, aahu kaŋen Yéesu kúli, aahu kaŋenool kamay. 34Muñeˈe Yéesu li aan:
— Faafa, ubonketiil, mata kuhaasut waa kukaane li wo.
Kusollaaliyaku li kuñak kútuken min kugaboo wañawu woola.
35Muñeˈe ésukayi li eyito to min enaak ejuke. Kunahaanaku kata Kusuwifaku li kulako kanukuto Yéesu min kunaak koon:
— Emmuu lafakenfaken kukee, muñowu kama afakenoolo okila humumool, nokoomuu loon akila ammuu mal̥egen Afakenaawu, an Ateemit al̥usumuu!
36Kusollaaliyaku foof li kulako kanukuto Yéesu. Li kukoojool min kusenool bunuk bahile. 37Li koonool:
— Nokoomuu loon awu ommuu áyiiyawu ata Kusuwifaku, li ufakenoolo awu humumi min jijuk!
38Li kukiic kulimaku unke kukaan haatiya húkowahu hata Yéesu: «Laale, áyiiyawu ata Kusuwifaku.»
39Akee li bukanabuku kúl̥uba kajakutumuu kan kabaaŋumuu, li agel Yéesu aanool:
— Inti awu ommuu Afakenaawu? Ufakenoolo awu humumi ban li úfakenoli!
40Bale aahu li awataten afaalool aanool:
— Ukóliwut Ateemit, awu jabajumuu katekaku kanolaku li okila? 41Olola, li mal̥egenamu tottook min ubaja katekaku unke, mata wahawu wan ukaanamuu wajakutumuu újimuu li ubaja katekaku unke. Bale okila akaanut wah wajakut.
42Ban li aan Yéesu:
— Yéesu, ban li uwayil̥owom nan ommuu li úlaañul loon áyii.
43Yéesu li aanool:
— Li mal̥egenamu fan ilobi, síyaataye fan ulako lí ínje alijana.
Eketayi yata Yéesu
(Máciya 27:45-56; Maak 15:33-41; Saŋ 19:28-30)
44Muñeˈe nan tinak alehenumuu kayiten, etaamayi feh li élim boot yok ewaatuwayi éhaajutayi banakabu bakel̥e. 45Nan banakabu búlimenumuu, hufalalahu hata eluufayi yata Ateemit li húhaacowumul li tut. 46Yéesu li akaaw butiya aan:
— Faafa, iŋa’ yaalom iseni ooken.
Nan Yéesu alobumuu kulimaku unku aban, li aket.
47Nan anahaanawu ata kusollaaliyaku kata Lom, ajukumuu wahawu wabajumuu, li asal Ateemit ban li aan:
— Li mal̥egenamu, ánayinaawu ummu lakankaan an acole!
48Búsukabu feh babilumuu bajukabu bata min kommuu li kukaan Yéesu, li bujuk wahawu wabajumuu. Muñeˈe li kulaañ kujow bóot máyiyenoole min kunaak kutek li ugiŋawu wooliil. 49Kubuke Yéesu feh, li kanaalaaku kánabulumuu li okila fin to Gálile, li kulako lóyi min kunaak kujukelul wahawu wabajumuu.
Kahokaku kata Yéesu
(Máciya 27:57-61; Maak 15:42-47; Saŋ 19:38-42)
50Muñeˈe li baj ánayine akee an koone Suseef áfulumulo li ésuk yakee yata Kusuwifaku yaaneyi Alimate. Suseef li akaan ánayine asúume ban li acol. Li Hujojahu háamakahu hata Kusuwifaku lalakowe. 51Afañut wahawu wan kaabuku kunongumuu kakaan, li wan kukaanumuu. Suseef banaak ebilayi yata Jáyiiyaju jata Ateemit lalakowe. 52Muñeˈe li ajow boot bata Filat ajow alobool min asenool ehuluŋayi yata Yéesu. 53Fúlum tó, li áwalenul ehuluŋayi li ekuluwaayi, ban li aŋa’ kábil min al̥iim yo aban, li aŋa’ yo ajow ahok li huyaak hawoki li hugisa, dán an ámusut ahoki. 54Hunakahu unhu, hunak hata kafaleyaku kata húyiiyaayahu hata Kusuwifaku, ho balakowe li hútoŋ.
55Kanaalaabuku kánabulumuu li Yéesu li etaamayi yata Gálile, li kunab li Suseef min kujuk huyaakahu, li foof buu ehuluŋayi yata Yéesu ehinteni lómuu eeno. 56Fúlum tó, kanaalaabuku li kulaañ bóot li ésukayi kujow kúfalewul múki’ li eheeñ boot li ehuluŋayi.
Nan hunakahu hata húyiiyaayahu hata Kusuwifaku húliiŋumuu, kanaalaabuku li kujow kuyool̥o, loon eluwaayi elobumuu.
© 2008, Wycliffe Bible Translators, Inc. All rights reserved.