Pi zi tiki 12
12
Alaw a yika Abram buri a hina aftini edi
1EPIƊ-ƊAI a miɗini wiini Abram: Niyasi edi midini aftiku par, arbaɗi pinzibaku par lai, edi war dalamni apuku par, midini afti n'aga mu suŋkuŋku.
2Aga mu bunduku aŋ ziba n'abai, aga mu ɓukuku aga mu bunda yikuku abai, aga ku bunda aŋ ɓiki buriɗi na zamai ɗa paŋ,
3Aga mu ɓikiɗi nagai na e ɓukuku, mu tûûsiɗi nagai n'e miisuku, war yikuku, pinzibaɗi ɗai na midiɗi yai paŋ aga e nivi ɓiki.
4Abram a hala maini n'EPIƊ-ƊAI a miɗiŋni nɵa, Lot a hala gaini lai. Abram a za buza doogo doogo muguzak pi ɵim won hlai n'a zogo edi war Harran par.
5A yimiti munini Sarai, ahi tawalni Lot, wazagai n'a navaŋ, gaiɗi bagakaini gaini faraini lai n'a na ka tini war Harran par. E hili midini afti na Kanaan.
Abram a hala war Kanaan, war Egipte lai
E cûsi midini afti na Kanaan.
6Abram a vuga afti haa won hlai n'e yikiŋ ɓa: Sikem, haa sini luwuŋ n'abai na More. Kanaaniyakai lai e ɗi fu midini afti ni ɗa. 7EPIƊ-ƊAI a siŋka sini arni Abram a muɗa: Afti hanɗa aga mu saŋ sini pinzibaku. Woni Abram a rga gûwiŋ zi ɓaka burini EPIƊ-ƊAI n'a siŋka sini arni.
8Woni par a zogo midiɗi huwuŋ na ɵimaɗi Betel piɗi futi na dawai par, a pa gumuni arbaɗi Betel gaiɗi Aï, Betel piɗi futi na koskoi sek, Aï piɗi futi na dawai par lai. A rga gûwiŋ zi ɓaka woni burini EPIƊ-ƊAI, a yika Alaw ɓa: EPIƊ-ƊAI.
9Agwiya, agwiya, Abram a zogo siɗi Negev sek.
10Wiyamai n'amai te za midini afti, Abram a hala azumai Egipte buri a sumna woni, buri wiyamai te na fu midini afti.
11Amma wuzani hlai n'e niyi aha war Egipte, a miɗiɗi wiiɗi Sarai na munini: Tala, mu sɗa ya tuku ku muni na juvi gara,
12nɵa won hlai na ɗai n'Egipte e tuluku li, aga e miɗi: Te munini sike! Aga e fiɗiŋa, tuku e hunuku karku,
13mu siiwuku ku miɗiɗi ɓa ku tawala kapai e ziŋa pɗem buriku, kapai buriku tuku lai mu sumna kara.
14Maini nɵa, won hlai n'Abram a cosi war Egipte, ɗai n'Egipte e tili ti munini te suwa juvi gara.
15Ɗai zi sda na wiini Faraw e tiliti, e kûlûti ɵimaɗi, e yimiti e kiti ahani.
16Buriɗi na, e zini pɗem wiini Abram, a nava haakai gaini adumai gaini ɵaakai, ablehökai na falakai gaini ɵigini lai.
17Amma EPIƊ-ƊAI a siŋkini gir n'abakai wiini Faraw gaini dalamni paŋ buriɗi Sarai na munini Abram.
18Faraw a yikasi Abram a miɗini: Na ku zaŋa ɵa na ɗa a maɗa? Ku muɗaŋa ɓa te muniku kai buri maɗa?
19Ku muɗaŋa ɓa te tawalku buri maɗa? Ta mu yimiti aŋ muniya, tiyana muniku te na, yimiti, hala wiiku. 20Faraw a sa miɗi wiiɗi ɗaini buri e birgiŋ gaiɗi munini gaini wazagaini paŋ.
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964