Matai 4
4
Jesu ikʉgeligwa na Seetano
(Maalɨka 1:12-13; Lʉʉka 4:1-13)
1Po Jesu alɨnkʉlongosigwa na Mbepo Mwikemo ʉkʉbʉʉka ndʉngalangala ʉkʉtɨ akageligwe na Seetano. 2Alɨnkʉfipɨɨka ɨfindʉ#4:2 Alɨnkʉfipɨɨka ɨfindʉ Bala iisyʉ Ʉkʉfipɨɨka ɨfindʉ kʉ Ɨsyakʉlɨngaania. amasikʉ amalongo mana pakɨlo na pamuusi. Po kʉmmalɨɨkɨsyo, ɨnjala jɨlɨnkʉnndʉma. 3Po Seetano alɨnkwisa kʉkʉnngela alɨnkʉtɨ, “Lɨnga ʉgwe ʉlɨ Mwana gwa Kyala, gabʉʉle amabwe aga gasanuke ʉkʉja fisyesye.” 4Jesu alɨnkʉmmwamula alɨnkʉtɨ, “Sisimbiigwe mwa Kalata ʉMwikemo ʉkʉtɨ, ‘Ʉkʉlya fyene ɨfindʉ ʉmundʉ akabagɨla ʉkʉja mʉʉmi, looli ikʉja mʉʉmi lɨnga ikʉgakonga amasyʉ goosa agaa Kyala.’ ”#4:4 Bala kalata gwa Ʉkʉkʉmbʉka Ɨngomeelesyo 8:3.
5Po Seetano alɨnkʉntwala Jesu mpaka nkaaja akiikemo akaa mu Jelusalemu, alɨnkʉmmbɨɨka ndʉpaso lwa tempeli#4:5 Ɨtempeli Bala kʉ Ɨsyakʉlɨngaania. apa palɨ pamwanya fiijo, 6alɨnkʉmmbʉʉla alɨnkʉtɨ, “Lɨnga ʉgwe ʉlɨ Mwana gwa Kyala, isope paasi. Ʉtikʉfulala, paapo sisimbiigwe mwa Kalata ʉMwikemo ʉkʉtɨ,
‘Kyala ikʉbatʉma abandʉmi baake kʉnongwa jaako,
kangɨ bikʉkʉpɨmba mmaboko gaabo,
ʉkʉtɨ ʉngafulala ɨkɨlʉndɨ kyako pi ibwe.’ ”#4:6 Bala kalata gwa Ɨsabʉli 91:11-12.
7Jesu alɨnkʉmmwamula alɨnkʉtɨ, “Keeta, sisimbiigwe mwa Kalata ʉMwikemo ʉkʉtɨ, ‘Ʉlɨnganngelaga ʉNtwa Kyala gwako.’ ”#4:7 Bala kalata gwa Ʉkʉkʉmbʉka Ɨngomeelesyo 6:16.
8Po Seetano alɨnkʉntwala mpaka pamwanya pa kyamba ɨkɨtali fiijo, alɨnkʉnnangɨsya ɨfiisʉ fyosa ɨfya pakiisʉ nʉ bʉsisya bwake, 9alɨnkʉmmbʉʉla alɨnkʉtɨ, “Lɨnga kʉfugama nʉ kʉʉnyiipuuta, angʉkʉpa fyosa ɨfi.” 10Jesu alɨnkʉmmwamula alɨnkʉtɨ, “Sookapo apa Seetano! Keeta, sisimbiigwe mwa Kalata ʉMwikemo ʉkʉtɨ, ‘Ʉmmwipuutege ʉNtwa Kyala gwako. Kangɨ ʉmmbombelege mwene itolo.’ ”#4:10 Bala kalata gwa Ʉkʉkʉmbʉka Ɨngomeelesyo 6:13.
11Po Seetano alɨnkʉnndeka Jesu, balɨnkwisa abandʉmi baa Kyala, balɨnkʉmmbombela.
Jesu ikʉfumusya ʉBʉnyafyale bwa kʉmwanya
(Maalɨka 1:14-15; Lʉʉka 4:14-15)
12Akabalɨlo kala Johani aapinyiigwe mu nnyololo. Jesu bo apɨliike ɨnongwa ɨsi, alɨnkʉsookapo pala, alɨnkʉbʉʉka nkiisʉ ɨkya Galilai, alɨnkʉfika nkaaja akaa mu Nasaleti. 13Po alɨnkʉsookamo mu Nasaleti, alɨnkwakʉtʉʉgala mu Kapelinaʉmu, akaaja aka kalɨ mumbalɨ mwa sʉmbɨ Galilai, mu mpaka gwa kiisʉ ɨkya mu Sabuloni nɨ kya mu Nafutali. 14Syabombiigwe bo ʉlo ʉkʉtɨ iisyʉ lɨla lɨboneke ɨlɨ Kyala aajobile kʉ njɨla jaa nkunguluka Jeesaja ʉkʉtɨ,
15“Ɨkiisʉ ɨkya mu Sabuloni nɨ kya mu Nafutali,
filɨ mu njɨla ɨjaa kʉbʉʉka kwa sʉmbɨ,
kwi isɨɨlya ɨlya lwɨsi Jolitani.
Ʉko kʉ Galilai ko kʉno bikʉtʉʉgala
abandʉ aba bakaja Banyaisilaɨli.
16Abandʉ aba bikʉtʉʉgala mu ngiisi,
balʉbwene ʉlʉmuli ʉlʉnywamu.
Aba bikʉtʉʉgala mu nsyʉngʉʉlʉ ʉgwa bʉfwe,
ʉlʉmuli ʉlwa nʉlʉbʉnjʉ lʉbamulɨkiile.”#4:15-16 Bala kalata gwa Jeesaja 9:1-2.
17Ʉkʉfuma akabalɨlo kala, Jesu alɨnkwanda ʉkʉlʉmbɨlɨla alɨnkʉtɨ, “Amupɨndʉkege, paapo ʉBʉnyafyale bwa kʉmwanya bʉsegeliile.”
Jesu ikʉbabɨlɨkɨla abafundigwa abaa kwanda
(Maalɨka 1:16-20; Lʉʉka 5:1-11)
18Jesu endaga mumbalɨ mwa sʉmbɨ Galilai, alɨnkʉbabona abalobi babɨlɨ, Simoni ʉjʉ bantɨgɨ Peeteli, nʉ gwamyabo Andeleja. Babɨlɨ abo baataagɨlaga ʉlwelo mwa sʉmbɨ. 19Jesu alɨnkʉbabʉʉla alɨnkʉtɨ, “Mungongege! Nikʉbapela ʉkʉja balobi baa bandʉ.”#4:19 Ʉkʉja balobi baa bandʉ ko kʉbalʉmbɨlɨla abandʉ nʉ kʉbabʉngaania ʉkʉmmwitɨka Jesu. 20Nakalɨnga balɨnkʉsileka ɨnyeelo syabo, balɨnkʉnkonga.
21Bo endilepo nkyenipo panandɨ, alɨnkʉbabona abanyamundʉ abangɨ babɨlɨ, Jaakobo nʉ gwamyabo Johani, abanya Sebetai. Abandʉ babɨlɨ abo baalɨ mwi ibooti pamopeene nʉ gwisabo, baatendekesyaga ɨnyeelo syabo. Jesu alɨnkʉbakoolela boope. 22Nakalɨnga, balɨnkʉlɨleka iibooti pala nʉ gwisabo, balɨnkʉnkonga Jesu.
Jesu ikʉbamanyisya abandʉ nʉ kʉbʉmbʉlʉsya ababine
(Lʉʉka 6:17-19)
23Jesu aasyʉngʉʉtɨlaga moosa mu Galilai, ingɨlaga mu sinagogi,#4:23 Ɨsinagogi Bala kʉ Ɨsyakʉlɨngaania. aabamanyisyaga abandʉ, aalʉmbɨlɨlaga ɨNdʉmi ɨNunu ʉkʉtɨ ʉBʉnyafyale bwa kʉmwanya bʉsegeliile nkiisʉ, nʉ kʉbabʉmbʉlʉsya ʉbʉbine bwabo boosa. 24Po ɨnongwa syake silɨnkʉbalanila mpaka nkiisʉ kyosa ɨkya Silija. Abandʉ balɨnkʉntwalɨla ababine boosa abaa lʉko nʉ lʉko. Ndɨ abo baalimo aba baalɨ babine fiijo, aba bakoliigwe nɨ mbepo ɨnyali, abaa inyiki na aba balalile. Jesu aababʉmbʉlwisye boosa. 25Po abandʉ bingi fiijo bankongaga ʉkʉfuma mu Galilai, mu Ndekapoli,#4:25 Ndekapoli Kokʉtɨ ʉtwaja kalongo. Ɨkiisʉ ɨkyo baatʉʉgalaga abandʉ aba bakaja Bajuuta. mu Jelusalemu, mu Jutai na kwi isɨɨlya ɨlya lwɨsi Jolitani.
© Wycliffe Bible Translators, Inc. All rights reserved.
Matai 4
4
Jesu ikʉgeligwa na Seetano
(Maalɨka 1:12-13; Lʉʉka 4:1-13)
1Po Jesu alɨnkʉlongosigwa na Mbepo Mwikemo ʉkʉbʉʉka ndʉngalangala ʉkʉtɨ akageligwe na Seetano. 2Alɨnkʉfipɨɨka ɨfindʉ#4:2 Alɨnkʉfipɨɨka ɨfindʉ Bala iisyʉ Ʉkʉfipɨɨka ɨfindʉ kʉ Ɨsyakʉlɨngaania. amasikʉ amalongo mana pakɨlo na pamuusi. Po kʉmmalɨɨkɨsyo, ɨnjala jɨlɨnkʉnndʉma. 3Po Seetano alɨnkwisa kʉkʉnngela alɨnkʉtɨ, “Lɨnga ʉgwe ʉlɨ Mwana gwa Kyala, gabʉʉle amabwe aga gasanuke ʉkʉja fisyesye.” 4Jesu alɨnkʉmmwamula alɨnkʉtɨ, “Sisimbiigwe mwa Kalata ʉMwikemo ʉkʉtɨ, ‘Ʉkʉlya fyene ɨfindʉ ʉmundʉ akabagɨla ʉkʉja mʉʉmi, looli ikʉja mʉʉmi lɨnga ikʉgakonga amasyʉ goosa agaa Kyala.’ ”#4:4 Bala kalata gwa Ʉkʉkʉmbʉka Ɨngomeelesyo 8:3.
5Po Seetano alɨnkʉntwala Jesu mpaka nkaaja akiikemo akaa mu Jelusalemu, alɨnkʉmmbɨɨka ndʉpaso lwa tempeli#4:5 Ɨtempeli Bala kʉ Ɨsyakʉlɨngaania. apa palɨ pamwanya fiijo, 6alɨnkʉmmbʉʉla alɨnkʉtɨ, “Lɨnga ʉgwe ʉlɨ Mwana gwa Kyala, isope paasi. Ʉtikʉfulala, paapo sisimbiigwe mwa Kalata ʉMwikemo ʉkʉtɨ,
‘Kyala ikʉbatʉma abandʉmi baake kʉnongwa jaako,
kangɨ bikʉkʉpɨmba mmaboko gaabo,
ʉkʉtɨ ʉngafulala ɨkɨlʉndɨ kyako pi ibwe.’ ”#4:6 Bala kalata gwa Ɨsabʉli 91:11-12.
7Jesu alɨnkʉmmwamula alɨnkʉtɨ, “Keeta, sisimbiigwe mwa Kalata ʉMwikemo ʉkʉtɨ, ‘Ʉlɨnganngelaga ʉNtwa Kyala gwako.’ ”#4:7 Bala kalata gwa Ʉkʉkʉmbʉka Ɨngomeelesyo 6:16.
8Po Seetano alɨnkʉntwala mpaka pamwanya pa kyamba ɨkɨtali fiijo, alɨnkʉnnangɨsya ɨfiisʉ fyosa ɨfya pakiisʉ nʉ bʉsisya bwake, 9alɨnkʉmmbʉʉla alɨnkʉtɨ, “Lɨnga kʉfugama nʉ kʉʉnyiipuuta, angʉkʉpa fyosa ɨfi.” 10Jesu alɨnkʉmmwamula alɨnkʉtɨ, “Sookapo apa Seetano! Keeta, sisimbiigwe mwa Kalata ʉMwikemo ʉkʉtɨ, ‘Ʉmmwipuutege ʉNtwa Kyala gwako. Kangɨ ʉmmbombelege mwene itolo.’ ”#4:10 Bala kalata gwa Ʉkʉkʉmbʉka Ɨngomeelesyo 6:13.
11Po Seetano alɨnkʉnndeka Jesu, balɨnkwisa abandʉmi baa Kyala, balɨnkʉmmbombela.
Jesu ikʉfumusya ʉBʉnyafyale bwa kʉmwanya
(Maalɨka 1:14-15; Lʉʉka 4:14-15)
12Akabalɨlo kala Johani aapinyiigwe mu nnyololo. Jesu bo apɨliike ɨnongwa ɨsi, alɨnkʉsookapo pala, alɨnkʉbʉʉka nkiisʉ ɨkya Galilai, alɨnkʉfika nkaaja akaa mu Nasaleti. 13Po alɨnkʉsookamo mu Nasaleti, alɨnkwakʉtʉʉgala mu Kapelinaʉmu, akaaja aka kalɨ mumbalɨ mwa sʉmbɨ Galilai, mu mpaka gwa kiisʉ ɨkya mu Sabuloni nɨ kya mu Nafutali. 14Syabombiigwe bo ʉlo ʉkʉtɨ iisyʉ lɨla lɨboneke ɨlɨ Kyala aajobile kʉ njɨla jaa nkunguluka Jeesaja ʉkʉtɨ,
15“Ɨkiisʉ ɨkya mu Sabuloni nɨ kya mu Nafutali,
filɨ mu njɨla ɨjaa kʉbʉʉka kwa sʉmbɨ,
kwi isɨɨlya ɨlya lwɨsi Jolitani.
Ʉko kʉ Galilai ko kʉno bikʉtʉʉgala
abandʉ aba bakaja Banyaisilaɨli.
16Abandʉ aba bikʉtʉʉgala mu ngiisi,
balʉbwene ʉlʉmuli ʉlʉnywamu.
Aba bikʉtʉʉgala mu nsyʉngʉʉlʉ ʉgwa bʉfwe,
ʉlʉmuli ʉlwa nʉlʉbʉnjʉ lʉbamulɨkiile.”#4:15-16 Bala kalata gwa Jeesaja 9:1-2.
17Ʉkʉfuma akabalɨlo kala, Jesu alɨnkwanda ʉkʉlʉmbɨlɨla alɨnkʉtɨ, “Amupɨndʉkege, paapo ʉBʉnyafyale bwa kʉmwanya bʉsegeliile.”
Jesu ikʉbabɨlɨkɨla abafundigwa abaa kwanda
(Maalɨka 1:16-20; Lʉʉka 5:1-11)
18Jesu endaga mumbalɨ mwa sʉmbɨ Galilai, alɨnkʉbabona abalobi babɨlɨ, Simoni ʉjʉ bantɨgɨ Peeteli, nʉ gwamyabo Andeleja. Babɨlɨ abo baataagɨlaga ʉlwelo mwa sʉmbɨ. 19Jesu alɨnkʉbabʉʉla alɨnkʉtɨ, “Mungongege! Nikʉbapela ʉkʉja balobi baa bandʉ.”#4:19 Ʉkʉja balobi baa bandʉ ko kʉbalʉmbɨlɨla abandʉ nʉ kʉbabʉngaania ʉkʉmmwitɨka Jesu. 20Nakalɨnga balɨnkʉsileka ɨnyeelo syabo, balɨnkʉnkonga.
21Bo endilepo nkyenipo panandɨ, alɨnkʉbabona abanyamundʉ abangɨ babɨlɨ, Jaakobo nʉ gwamyabo Johani, abanya Sebetai. Abandʉ babɨlɨ abo baalɨ mwi ibooti pamopeene nʉ gwisabo, baatendekesyaga ɨnyeelo syabo. Jesu alɨnkʉbakoolela boope. 22Nakalɨnga, balɨnkʉlɨleka iibooti pala nʉ gwisabo, balɨnkʉnkonga Jesu.
Jesu ikʉbamanyisya abandʉ nʉ kʉbʉmbʉlʉsya ababine
(Lʉʉka 6:17-19)
23Jesu aasyʉngʉʉtɨlaga moosa mu Galilai, ingɨlaga mu sinagogi,#4:23 Ɨsinagogi Bala kʉ Ɨsyakʉlɨngaania. aabamanyisyaga abandʉ, aalʉmbɨlɨlaga ɨNdʉmi ɨNunu ʉkʉtɨ ʉBʉnyafyale bwa kʉmwanya bʉsegeliile nkiisʉ, nʉ kʉbabʉmbʉlʉsya ʉbʉbine bwabo boosa. 24Po ɨnongwa syake silɨnkʉbalanila mpaka nkiisʉ kyosa ɨkya Silija. Abandʉ balɨnkʉntwalɨla ababine boosa abaa lʉko nʉ lʉko. Ndɨ abo baalimo aba baalɨ babine fiijo, aba bakoliigwe nɨ mbepo ɨnyali, abaa inyiki na aba balalile. Jesu aababʉmbʉlwisye boosa. 25Po abandʉ bingi fiijo bankongaga ʉkʉfuma mu Galilai, mu Ndekapoli,#4:25 Ndekapoli Kokʉtɨ ʉtwaja kalongo. Ɨkiisʉ ɨkyo baatʉʉgalaga abandʉ aba bakaja Bajuuta. mu Jelusalemu, mu Jutai na kwi isɨɨlya ɨlya lwɨsi Jolitani.
© Wycliffe Bible Translators, Inc. All rights reserved.