Yohani 3
3
ɄYesu ijova nʉ Nikodemu
1Kwealyale ʉmʼbaha jʉmonga ʉghwa Vayahudi, ʉghwa mʉ kɨpʉgha kya Vafalisayi, akatambʉlwagha Nikodemu. 2Ʉmuunhu ʉjuo alyalʉtile pakɨlo kwa Yesu, akamʼbʉʉla akati, “Ghwe Mʼbʉlanɨsi, tʉkagwile kuuti ʉlɨ Mʼbʉlanɨsi jʉno asungʼhilue nʉ Ngʉlʉve, ʉlwakʉva nakwale ʉmuunhu jʉno ndepoonu ihʉfia ifivalɨlo ifi fino ghuvomba, nave ʉNgʉlʉve naalɨ palɨkɨmo nʉ mwene.”
3ɄYesu akamwamʉla akati, “Kyangʼhaani nɨkʉkʉvʉʉla, nakwale ʉmuunhu jʉno ikwingila mʉ Vʉtwa vwa Ngʉlʉve, nave naaholilue vʉpia.” 4ɄNikodemu akamposia ʉYesu akati, “Ʉmuunhu ʉnʼgoyo iholua ndaani? Ndepoonu ikwingila mʉ lɨleme lya ngʼina neke aholue vʉpia?” 5ɄYesu akamwamʉla akati, “Kyangʼhaani nɨkʉkʉvʉʉla, nakwale ʉmuunhu jʉno ikwingila mʉ Vʉtwa vwa Ngʉlʉve, nave naaholilue na malenga nʉ Mhepo ghwa Ngʉlʉve.#3:5 Naaholilue na malenga nʉ Mhepo ghwa Ngʉlʉve: Mʉ lʉfingo ʉlʉkʉʉlʉ, ʉNgʉlʉve alyavalaghile avaanhu vaake kuuti ilikʉvavalasia na malenga na kʉkʉvapeela ʉMhepo ghwake nkate mʉ moojo ghaave (Sakieli 36:25-27; Yesaya 44:3; Yoeli 2:28-29). Ɨmhola ɨjɨ jɨkʉvakʉmbʉsia avaanhu ʉlwofugho (Vaefeso 5:25-26; Tiito 3:5; 1 Peteli 3:21). 6Ʉmuunhu jʉno iholua na vapaafi, iholua kɨmʼbɨlɨ. Neke jʉno iholua vʉpia nʉ Mhepo ghwa Ngʉlʉve alɨ nʉ vwʉmi ʉvwa fighono fyoni. 7Nʉngadeghaghe ʉlwakʉva nɨkʉvʉlile kuuti, ‘Lulondua mʉholue vʉpia.’ 8Ɨmhepo jigugula kulʉngama kʉno jilonda. Ghupʉlɨka pano jigugula, neke nʉngakagʉle kʉno jihʉma na kʉno jilʉta. Fye lʉlɨvuo na kwa muunhu jʉno aholilue nʉ Mhepo ghwa Ngʉlʉve.”
9ɄNikodemu akamposia ʉYesu akati, “Ʉmuunhu iholua ndaani nʉ Mhepo ghwa Ngʉlʉve?” 10ɄYesu akamwamʉla akati, “Ʉve ʉlɨ mʼbʉlanɨsi ghwa Vaisilaeli, lwandaani nʉsikagwile isi? 11Kyangʼhaani nɨkʉkʉvʉʉla, ʉsue tujova sino tʉsikagwile, kange tukwoleka sino tʉsivwene, neke ʉmue namukwʉpɨla. 12Nave namukwɨtɨka pano nɨkʉvavʉʉla isa mʉ ɨɨsi muno, pe kyande mukwɨtɨka ndaani, pano nɨkʉvavʉʉla isa kʉkyanya? 13Nakwale ʉmuunhu jʉno aghelile kulʉta kʉkyanya, looli ʉne ne Mwana ghwa Muunhu ne jʉno nisile kuhʉma kʉkyanya.
14“ɄMoose alyatendile ɨkɨhwani ɨkya njoka ɨja shaba kʉ lʉkʉve na kutosia mʉnkyanya mʉ lʉpiki#Mbalɨlo 21:4-9 kuuti aVaisilaeli vapokue. Fye enendɨɨkɨ ne Mwana ghwa Muunhu nilondua kutosivua, 15kuuti ʉmuunhu ghweni jʉno ɨkʉnyɨtɨka ʉne aave nʉ vwʉmi ʉvwa fighono fyoni.
16“ɄNgʉlʉve avaghanile fiijo avaanhu vooni mʉ ɨɨsi muno. Fye nambe alyanhavwile ʉne ne mwanaake, ne jʉno nɨlɨ jʉmo mwene. Alyavombile ʉluo, kuuti ʉmuunhu ghweni jʉno ɨkʉnyɨtɨka ʉne, aleke pisova na kuuva patali nʉ mwene, looli aave nʉ vwʉmi ʉvwa kʉvʉsila kʉsila. 17Nijova ʉluo, ʉlwakʉva ʉNgʉlʉve naalyasungʼhile ʉne ne Mwanaake kʉkʉvahɨgha avaanhu, looli alyasungʼhile kʉkʉvapoka.
18“Ʉmuunhu ghweni jʉno ɨkʉnyɨtɨka, naihɨghua. Neke jʉno naɨkʉnyɨtɨka ahɨghilue, ʉlwakʉva naɨkʉnyɨtɨka ʉne ne Mwana ghwa Ngʉlʉve, ne jʉno nɨlɨ jʉmo mwene. 19Ʉvʉhɨghi ʉvuo vwe ʉvʉ: Ʉlʉmuli lwisile mʉ ɨɨsi muno, neke avaanhu vajɨghanile ɨngʼhiisi kukila ʉlʉmuli, ʉlwakʉva imbombo saave mbiivi. 20Ʉmuunhu ghweni jʉno imbombo saake mbiivi, ɨkʉlʉkalalɨla ʉlʉmuli, ikaana kukwisa kʉ lʉmuli, ʉlwakʉva nailonda imbombo saake imbiivi sivoneke pa vʉvalafu. 21Looli ʉmuunhu jʉno ivomba isa kyangʼhaani, ikwisa kʉ lʉmuli, kuuti imbombo saake sivoneke sivombiike mʉ ngʉfu sa Ngʉlʉve.”
ɄYohani ʉMwofughi ijova imhola isa Yesu
22Pambele ʉYesu na vavʉlanɨsɨvua vaake vakalʉta kʉ kɨghavo ɨkya Yudea. Ʉkuo akikala ifighono ndafilɨngi palɨkɨmo na veene, ikwofugha avaanhu. 23Ʉnsiki ʉghuo, ghwope ʉYohani ʉMwofughi alyale ikwofugha avaanhu kʉ kɨkaaja ɨkya Ainoni, piipi nɨ lɨkaaja ɨlya Salemu, ʉlwakʉva ʉkuo kweghalyale amalenga minga. Avaanhu vakalʉtagha kwa mwene, kuuti avofughe. 24Ʉnsiki ʉghuo ʉYohani alyakyale kudindilua mʉ ndinde.
25Ɨkɨghono kɨmonga, avavʉlanɨsɨvua vamonga va Yohani, valyale vikanɨngʼhana nʉ Mʉyahudi jʉmonga vwɨmɨla ʉlwiho ʉlwa kuvalasia. 26Pe vakalʉta kwa Yohani, vakamʼbʉʉla vakati, “Ghwe Mʼbʉlanɨsi, ʉmuunhu jʉla jʉno aava nuuve ɨmwambo ɨja kɨkogha kya Yolidani, jʉno ghwolekagha imhola saake, lɨno ghwope ikwofugha avaanhu. Avaanhu vinga vilʉta kwa mwene.”
27ɄYohani akavamʉla akati, “Ʉmuunhu naangave nɨ kɨmonga, nave ʉNgʉlʉve naampeliile. 28Ʉmue mwemue mʉlɨ volesi vango, mʉ sino nɨkajovile kuuti, ‘Ʉne naneene Kɨlɨsite, ʉlwene ʉNgʉlʉve asungʼhile kuuti nɨmʉlongolele ʉKɨlɨsite.’ 29Ʉmhɨnja jʉno itolua muunhu ghwa ntolanʼdala. Ʉne ne jʉno nɨlɨ ndavʉle ʉmmanyaani ghwa ntolanʼdala, nɨmile palʉbale pa ntolanʼdala, nihovoka pano nipʉlɨka ɨlɨsio lyake. Kyangʼhaani nɨhovwike fiijo. 30Lʉnoghiile ʉmwene aave mʼbaha fiijo, ʉne nɨɨve nʼdebe fiijo.”
Imhola isa jʉno ihʉma kʉkyanya
31Ʉmwene jʉno ikwisa kuhʉma kʉkyanya mʼbaha kukila avaanhu vooni. Jʉno ihʉma mʉ ɨɨsi, ghwa mʉ ɨɨsi, ijova isa mʉ ɨɨsi. Neke jʉno ahʉmile kʉkyanya mʼbaha kukila avaanhu vooni. 32Sino asivwene na kupʉlɨka se sino ikwoleka, neke nakwale ʉmuunhu jʉno ikwʉpɨla ʉvwolesi vwake. 33Ʉmuunhu jʉno ikwʉpɨla ʉvwolesi vwake, ihʉfia kuuti sino ijova ʉNgʉlʉve sa kyangʼhaani. 34Jʉno asungʼhilue nʉ Ngʉlʉve, ijova amasio gha Ngʉlʉve, ʉlwakʉva ʉNgʉlʉve ampeliile ingʉfu sooni isa Mhepo ʉMwɨmɨke. 35ɄNgʉlʉve ʉNhaata amʉghanile ʉMwanaake, kange avɨkile fyoni mʉ mavoko ghaake. 36Ʉmuunhu jʉno ɨkʉmwɨtɨka ʉMwana ghwa Ngʉlʉve, alɨ nʉ vwʉmi ʉvwa kʉvʉsila kʉsila. Neke ʉmuunhu jʉno naɨkʉmwɨtɨka, naalɨ nʉ vwʉmi ʉvuo, ʉlwene alɨ mʉ vʉhɨghi vwa Ngʉlʉve.
© (Active), Wycliffe Bible Translators, Inc. All rights reserved.