Mark 5
5
Ḏarramu yätjmi birrimbirrmi
(Matthew 8:28-34, Luke 8:26-39)
1Djesu ga nhanŋu ḻuṉḏuꞌmiŋu waya buḏapthunana ŋuriki Galilee-wu guḻunꞌku, ga dhawaṯthunaya waya ŋunha galiꞌyina galki yana wäŋaŋu yäkuŋu Garasa.
2-6Ga ŋunhi ŋayi Djesu marthaŋaŋuya yupthuna ga yolŋuyu yätjmiyu birrimbirrmiyu ŋanya nhäŋaya, yurru walmanaya ŋayi ŋunhi beŋu bäyma moluŋu, ŋunhi ŋayi gurrana nhinana ŋunhayayi wiyinŋumi. Ga guḻkuꞌmi gurrana yolŋuyu wayay garrwiꞌyuna ŋanya djeṉdhu malanyŋuyu, ga ḻuku nhanŋu wiripuya ŋuli ḏapmanha, yurru gulkuruna, ŋayiya gurrana ŋuli ḏawꞌyuna, ga yupmanha. Ga bäyŋuna ŋayi gurrana ŋula yolkaya yolŋuwaya ganydjarryuya nhinana. Bitjaya bili munha-ŋupaya ga walu-ŋupaya ŋayi ŋuli buku-wirwiryunaya ŋulana bäymana bukukuna molumikuna girriꞌmiriwnha, yatjuna ŋuli ga miṯmiṯthunminya guṉḏayu raywalꞌyu.
Manymak, ga ŋunhi ŋayi ŋuriŋi ḏarramuyu nhäŋaya Djesunaya ŋunhaŋga yana barrkuyi bala yana waṉḏinana gumurrꞌyunana bala bunꞌkumu-djipthuna gumurryina nhanukaya.
7-8Ga bitjaya ŋayi Djesu waŋana ŋuriki yätjkuya birrimbirrwu gamꞌ, “Way! Gatjuy dhawaṯthu dhiyakaya yolŋuwaya, maꞌ,” bitjaya.
Ŋayŋu ŋayi ŋunhi yätjtja birrimbirr waŋana yatjunana, “Djesu! Gäthuꞌmiŋu God-Waŋarrwu, ŋunhi ŋayi djiwarrꞌwuy, nhattjana nhe yurru ŋarrana dhuwaya yulŋuya? God-Waŋarrwaya yäkuyu ŋarra nhuna gurra ŋäŋꞌthun, yaka ŋarrana baḏuwaḏuyu.”
9Ŋayŋu ŋayi Djesuyuya dhä-wirrkaꞌyunana ŋanya bitjaya, “Yol nhe dhuwaya yäkuya?” bitjaya.
Ga ŋayiya ḻakanhamina bitjaya, “Ŋarraya dhuwaya yäku Mala-Guḻkuꞌ, bili guḻkuꞌna wirrkina ŋarrakaya gurra yätjtja birrimbirr malanynha nhina,” bitjaya.
10Ŋayŋu gurrana ŋunhi yätjtja birrimbirr mala ŋurikaya ḏarramuwayatja buku-ḏuwaṯthunana waŋana Djesuwuya bitjayana, “Yaka ŋanapuna ŋaŋꞌŋaŋdhu dhipuŋu wäŋaŋu!”
11Manymak ga ŋunhaya bili galki yana bukuŋu 2,000 bikipiki malanynha gurrana ḻarruꞌḻarruŋaya ŋathawu. 12Ŋayŋu ŋuriŋiya yätjthuya birrimbirryu malanyŋuyu waŋana wirrkina Djesunaya bitjaya, “Wäy, ŋayŋuna ŋanapuna djuyꞌyu, märr ŋanapu yurru gärri ŋunha bikipikiwayana,” bitjaya.
13Ga ŋunhi ŋayi Djesuyu ŋäkuya wayana ga bitjayana ŋayi waŋana, “Maꞌ... marrtjina waya!” Ŋayŋu gurrana ŋunhi yätjtja birrimbirr mala walmana ḏarramuwayatja ŋayŋu gulŋiyina bikipikiwayana. Ŋayŋu gurrana ŋunhi bikipikiya mala waṉḏinana, ḏurꞌṯuryunmina marrtjina, ŋayŋu gurrana ḻarryuna bukuŋuya, gapuyina guḻunꞌthina yana, bala gurrana guḻwuḻyunana.
14Ga waya ŋunhi bikipiki djäkami waya waṉḏina ŋayŋu wäŋayina malaŋuyi, ŋayŋu waya marrtjina ḻakaŋayana bukmakkuna yana ŋunhi nhä gurrana ŋunhaya maḻŋꞌthuna. Ga guḻkuꞌyu yolŋuyu wayay gurrana gunhaꞌyuna wayaŋgu wäŋa malanynha, djälmiyina waya ŋunhi nhänharaw ŋuriki ŋunhi nhä ŋunhaya maḻŋꞌthuna. 15Ga ŋunhi waya marrtjina Djesuwaya, ŋayŋu waya nhäŋayana ŋunhiya ḏarramuna ŋunhi nhanukaya gurrana ŋäthiyi nhinana guḻkuꞌna wirrkina yätj birrimbirr malanynha. Ga nhinana ŋayi gurrana muḻkurr latjuꞌna ga girriꞌmina dhaṯthunminyayana. Ga ŋunhi waya yolŋuyu wayay nhäŋaya, ŋayŋu waya yana biyaṉiyinana, bili waya yana dharaŋayana ŋunhi yurru gurra bitjandja yolŋuyu yätjtja birrimbirr dhawaṯmama balanyaya ŋunhi yolŋu buluna walꞌŋu ganydjarrmi. 16Ga wayatja ŋunhi maŋutji-marŋgimiyuya gurrana dhäwuꞌna ḻakaŋaya wiripuwuna yolŋuwu wayaŋgu nhanukalaŋuwuy ŋunhi ḏarramuwalaŋuwuynha ga bikipikiwalaŋuwuynha. 17Ŋayŋu wayatja ŋunhi yolŋuyuya wayay gurrana waŋana ŋanya Djesuna marrtjinyawuna yana.
18Ga dhiyaŋuŋga bili ŋayi Djesu ŋalꞌyuna marthaŋayiya, ŋayŋu ŋayiya ŋunhiya ḏarramu ŋunhi nhanukaya gurrana ŋäthiyi nhinana yätj birrimbirr mala, waŋana gurrana wirrkina dhika bitjaya, “Dhuwaya ŋarra yurru nhuŋu malthuna yana!”
19Yurru ŋayiya Djesuya yakaꞌyuna nhanŋu, ga waŋana ŋayi nhanŋu bitjaya, “Gatjuy nhe ŋayŋuyi ŋäthiyi roŋiyi gurruṯumiwu nhokalaŋuwu, ga ḻakaŋu wayaŋgu ŋunhi nhä nhuŋu God-Waŋarryu manymak djäma ga nhattjaya ŋayi nhuŋu maŋutji-wuyuna.”
20Ŋayŋu ŋayi ŋunhi ḏarramuya marrtjina roŋiyinana ŋayŋu makarryi wäŋayi Decapolis-thi, ŋayŋu yana marrtjina ḻakaŋayana bukmakkuna, ŋunhi nhattjaya ŋayi Djesuyu djäma nhanŋu. Ga bukmakthu ŋunhi yolŋuyu wayay ŋäkuya dhäwuꞌ nhanukalaŋuwuy ganyimꞌthunana.
Djesuyu walŋakuŋaya Jairus-ku gäthuꞌmiŋuna, ga miyalknha ŋunhi ŋayi girriꞌ nhanŋu mulkana
(Matthew 9:18-26, Luke 8:40-56)
21Ga dhurrwaraŋu beŋuya ŋayi Djesu ga ḻunḏuꞌmiŋu waya nhanŋu bunana marthaŋayuna ŋunha galiꞌyina ŋuriki guḻunꞌku, yäkuŋu wäŋaŋu Capernaum-nha. Ga ŋunhi waya gurrana marthaŋaŋuya yupthuna, ga malamina ŋunhi yolŋuya waya ḻuŋꞌthuna nhanukaya. 22Ga ŋunhayayi malaŋu gurrana yolŋu yäku Jairus djingaryuna ŋunhi ŋayi ŋurru-ḏawalaŋu Jew-wu biryamiwu buṉbuwu. Ga ŋunhi ŋayi Djesunaya nhäŋaya, ŋayŋu yana ŋayi marrtjinana bala bunꞌkumu-djipthunana munathaꞌyina gumurryina nhanukaya. 23Ŋayŋu ŋayi gurrana waŋana wirrkina Djesuwayana bitjaya gamꞌ, “Marrkapmi! Yothu ŋarraku ŋunha miyalk 12-mi dhuŋgarrami rirrikthun gurra, galki ŋayi yurru ŋunha rakunydhina! Buku-djulŋi, ŋäthiyi marrtji go, ga goŋ-ŋalꞌyu nhanukaya märr ŋayi yurru latjuꞌyi, ga yakana rakunydhiya.”#5:23:1. Ŋunha Greekkuyuya gurra bitjan djingaryun, “Go, goŋ-ŋalyu nhanukaya”. Ŋunhiya mayaliꞌ balanya, “Go, walŋakuŋu ŋanya.” 2. Ŋunha Greekŋuya Dhuyuŋuna Djorraꞌŋu waya bitjan gayꞌ wukirri, waya yurru galkun ga gunha yurru number 42-ŋuna ḻakama dhuŋgarraya nhanŋu ŋurikiya miyalkku.
24Ga marrtjina ŋayi Djesuya malthuna nhanŋu Jairus-kuna.
Ga guḻkuꞌ ŋunhi wirrkina yolŋuya waya gurrana malthuna maṉḏaku yurru ḏurꞌṯuryunminana waya marrtjina.
25Ga ŋunhayayi malaŋu gurrana marrtjina miyalk, yurru ŋayi ŋunhi ŋaraka-djetjiꞌmi. Ga märr wiyinŋumi ŋayi ŋunhi 12-nha dhuŋgarra rirrikthunaya. 26Guḻkuꞌmi ŋayi gurrana marrtjina marrŋgitjkaya wayaŋgaya guŋgaꞌyunawu yurru gulkuruna. Ga warrpamꞌthunana ŋayi ŋuli rrupiya nhanŋuway djalkthuna wayaŋgaya, yurru bäyŋuna ŋayi ŋunhi yuwalktja latjuꞌyina, ga rerriya marrtjina ŋunhi wirrkina bathalayina. 27-29Ga ŋunhi ŋayi ŋuriŋi miyalkthu ŋäkuya Djesunaya, ŋayŋu ŋayi bitjayana guyaŋina, “Ŋuli ŋarra yurru girriꞌya nhanŋu mulka ŋarraya yurru yana latjuꞌyina.” Ŋayŋu yana ŋayi marrtjina ḏiltjikuna dhaḻakarr-yarpuŋaya yolŋuwaya wayaŋgaya malakuyu. Ga ŋunhi ŋayi goŋ-djarryunaya baṯnha mulkana girriꞌya nhanŋu.
Ŋayŋu dhunupana nhanŋu ŋunhi ŋurru-yätjtja gulyunana, ŋayŋu ŋayi dhäkay-ŋäkuya ŋunhi rerriꞌyuya ŋanya gunhaꞌyunana.
30Ga balanyamiyu bili yana ŋayi Djesuyuya dhäkay-ŋäkuyana nhanukiyingaya ŋayi rumbalyu, ŋunhi ganydjarryuya ŋanya gunhaꞌyunana. Ga gulyunana ŋayi, bala gumurr-bilyuna ŋayŋu dhä-wirrkaꞌyunana wayana bitjayana, “Yolthu ŋarraku girriꞌya mulkana?”
31Ga waya ŋunhi ḻuṉḏuꞌmiŋuya waya nhanŋu waŋana bitjaya, “Nhäŋu ŋäthiyi dhuwaya yolŋuna waya mala, ŋapa-ŋalꞌŋalyunmina marrtji ḏurꞌ-ṯuryunmina nhokaya. Nhäku nhe bitjayatja waŋana, guḻkuꞌna dhuwaya wirrkina yolŋuya waya,” bitjaya.
32Ŋayŋu ŋayi Djesuya bilyunana bala marrtjina nhäŋayana yolŋunaya wayana, märr ŋayi yurru maḻŋꞌmama yolthu nhanŋu girriꞌ mulkana. 33Ga dhunupana yana ŋunhi miyalktja marŋgithinana bala marrmarryunana marrtjina biyaṉiyuna nhanukiyingaya ŋayi, bala yana djalkiri-dhatharꞌyuna ŋayŋu yana bunꞌkumu-djipthuna gumurryina nhanukaya Djesuwaya bala ḻakanhamina, “Marrkapmi, ŋarra ŋunhi nhuna mulkanaya.”
34Ŋayŋu ŋayi Djesuya waŋana nhanŋu bitjayana, “Wäy... gäthu, bilina nhe ŋarraku märr-yuwalkthinana, ga bilina nhe dhuwaya walŋathinana rerriŋuya. Gatjuy marrtjina ŋoy-layuna bilina nhe dhuwaya walmanana beŋuya rerriꞌŋuya romŋu,” bitjaya.
35Ga ŋayiya gurrana ŋunhi Djesuya baḏak yana waŋana, ŋayŋu wayatja ŋunhi yolŋuya waya marrtjina dhäwuꞌmiya beŋu Jairus-kayatja wäŋaŋu, ŋayŋu waya ḻakaŋayana bitjayana, “Wäy... wäŋaya dhuwaya ŋonuŋ. Yakana buluya dhuwayi Marŋgikunhaminaya ḻayḻaymaŋu,” bitjaya.
36Ga ŋayiya ŋunhi Djesuyuya wayana djuḻkmaŋaya ŋäkuya, bala ŋayi bitjayana Jairus-kuya waŋana, “Yaka warwuyu ga biyaṉi, yana märr-yuwalkthi ŋarraku,” bitjaya. 37Ŋayŋu ŋayi Djesuya bitjana waŋa, “Gulyuna nhuma wiripuya waya ga dhuwaya yurru ŋaliŋguya malthun wayawuynha yana Peter-na ga maṉḏana wäwaꞌmanydji James-nha ga John-nha ga ḻinyguna.” 38Ga ŋunhi waya Jairus-kaya wäŋaŋu bunana bala waya nhäŋayana yolŋuna wayana waya marrtjina djämana dhika wiripuna ga wiripuna ŋurikina bäpurruꞌwuna romgu. Ga wiripuya yolŋu waya gurrana ŋäthinyamina, wiripuya nhinana gurrumꞌnha ŋäthina ga wiripuya dhä-rirrakaymina manikaynha yuṯuŋgurrnha ḻakaŋaya. 39Ŋayŋu ŋayi Djesuya gulŋiyina ŋayŋu wäŋayina, ŋayŋu ŋayi waŋana wayaŋgu bitjayana, “Nhä nhuma gurra dhuwaya djämaya, nhä nhuma guyaŋinaya yana beni dhuwaya bäpurruꞌna? Ga nhäku nhuma gurra dhuwaya ŋäthinyamiya? Dhuwaya wirrkuḻ yothu yaka ŋayi rakuny, dhuwaya ŋayi gurra yakurr yana gayŋithi.”
40Ga wayatja ŋunhi yolŋuꞌ-yulŋuyuya warkuꞌyuna, gitkitthunmina manapaya nhanŋu.
Ŋayŋu ŋayi gurrana Djesuyuya gukuŋayana wayana bitjayana, “Gatjuy nhumaya bukmaknha yana walmina.” Ŋayŋu waya bukmaknha yana dhawaṯthuna buṉbuŋuya. Manymak, ga garrꞌyunaya ŋayi ŋäṉḏiꞌmiŋuna yana ga bäpaꞌmiŋuna Jairus-nha ga ḻurrkunꞌnhana guyurrꞌmiŋuna wayana nhanŋuway, bala waya garriꞌkarrina ŋunhima buṉbuyina ŋunhi wanhami gurrana yothu wirrkuḻ gayŋithina. 41Ŋayŋu ŋayi Djesuyuya goŋnha ŋanya mulkana ŋunhina wirrkuḻnhaya bala waŋana nhanukaya dhärukkuyuna Arram-guyuna, “Dalitha gom!” (Mayaliꞌ “Wirrkuḻ gaŋgathina!”)
42-43Ga dhunupana yana ŋayi ŋunhi wirrkuḻya gaŋgathinana, bala yana marrtjiꞌmarrtjinana. Ŋayŋu ŋayi Djesuya waŋanana, “Gatjuy ŋula nhä waya nhanŋu wekuŋu ŋayi ḻukana,” bitjaya.
Ga bukmakthuna ŋunhi nhäŋaya ŋayaŋu-ṉirryunami rom, ŋayŋu ŋayi Djesuya waŋana wayana wirrkina yana bitjaya, “Yaka yana ḻakaŋu ŋula yolku yolŋuwu dhiyakuwuyya,” bitjaya.
© 2019, Wycliffe Bible Translators, Inc. All rights reserved.