Bìac Baxèm 16
16
Apram wa Aga
1Jò aih Sarai, mai Apram xôq ùh xa-ông con. Sarai i mòiq ngai hapŏng cadrì Aicàp, hiniq haq Aga. 2Sarai doi ca Apram: “Taiq Chuaq khoi broq ca au xon, 'màng aih au xìn ìh caq ŏi ti mangai cadrì hapŏng ma ŏi patìh ca au beq, èh au jah nhò haq i con am ca au.”
Apram iu tiaq bàu Sarai. 3'Màng aih, atìq ca jò Apram khoi rìh ŏi 10 hanam ta gùng Ca-na-an, Sarai mai Apram, 'ràng Aga mangai Aicàp, aih mangai cadrì hapŏng ma ŏi patìh ca haq, am dèh ca ŏng. 4Ŏng haq cùi ŏi ti mangai cadrì aih, èh haq ŏi jiang.
Jò hnoq dađeh khoi ŏi jiang, Aga khìn Sarai craq dađeh. 5Sarai doi ca Apram: “Bìac camaih au ep ta-ùc hlài ta ìh! Au khoi am dèh mangai cadrì ŏi patìh au ca ìh, mahaq jò haq hnoq dađeh ŏi jiang, haq khìn hlài au. Waiq Chuaq hadrah ta'ne ìh wa au.”
6Apram tèu hlài Sarai: “Cô, mangai cadrì ŏi patìh aih ŏi ta tì gè, gè enh broq 'màng leq, himac da gè!” 'Màng aih Sarai padit padiang Aga, èh Aga cadàu mot khoi ca mat haq.
7Mahaq 'Bình Plình da Chuaq hnoq Aga haten ca tamŏc diac ŏi ta đùng hawit ha'mai trong trùh ta Sura. 8'Bình Plình bòch haq: “Ô Aga mangai cadrì ŏi patìh da Sarai, ìh ŏi enh leq trùh, èh lam ta leq?”
Haq tèu: “Au 'nang cadàu mot hangai ca mat Sarai, craq au.”
9'Bình Plình da Chuaq doi ca haq: “Ìh wìh hlài ta craq ìh wa chìuq xalep ŏi ta tì haq beq.” 10'Bình Plình da Chuaq doi hòm: “Au jah broq xinoi da ìh bàc dìq jaq ùh i mangai leq nui rèn.”
11'Bình Plình da Chuaq doi hòm:
“Manàiq cô, Ìh 'nang ŏi jiang,
èh ìh xa-ông mòiq toq con calô,
hiniq ca haq Ich-ma-ên,
ma jah 'màng aih Chuaq i tàng trùh bìac xa mango da ìh.
12Con nga aih jah tìah ca mòiq toq con lùa brì.
Èh haq i manoh loq enh tajraq ca rìm ngai,
èh rìm ngai tajraq hlài ca haq.
Mahaq haq hadai ŏi haten dèh dìq ca oh daq haq.”
13Aga hiniq ca Chuaq ma capoch tùang ca haq: “Ìh Boc Plình ma loq hnoq ma ro”. Ma jah 'màng aih haq doi: “Au ma ùh khoi hnoq Boc Plình ma loq hnoq au 'mòh?” 14Taiq nen aih, wì creo ca diac adràm ma ŏi ta'ne Cađê wa Bêrêt, aih diac adràm Bê-la-cha-roi.
15Khoi èh Aga xa-ông mòiq toq con calô. Apram hiniq am ca con calô aih Ich-ma-ên. 16'Màng aih jò Aga xa-ông Ich-ma-ên, Apram khoi jah 86 hanam.
© 201̣̣9 WEC International