Maak 9
9
1Ŋɩɩ nɛ Yesu bɩra bʋla pɩ ʋ harɩ-tooroo, “Wʋtɩtɩɩ nɛ mɩ bʋlaa pɩma, nɩaa dɔnsʋŋ hɛ daha, ba bɩ jaŋ sʋʋ, see dɩ ba na Wɩa kuorii-la chɩna dɛrɛ arɩ doluŋ.”
Yesu bɩrɩma
Mat. 17.1-13; Luuk 9.28-36
2Tapʋlaa balɩdʋ sɩ bala, Yesu kɛŋ Pɩɩta arɩ Jeems arɩ Jɔɔŋ, a kaa mʋ jɩl peel-bal kʋbala nyuŋ ba hɛ nɩmɛ ba dʋndʋŋa. Nɩmɛ nɛ Yesu bɩrɩmɛ ba sɩpaaŋ. 3Ʋ gɛnnɩŋ kala pʋllɛ kɩŋkɛŋ a tʋtʋl. Gɛrɩ-chɛsɩrʋ kala bɩ jaŋ wuo chɛsɛ gɛnnɩŋ dɩ ba pʋlla nagɛ ŋɩɩ. 4Ɩlaaja arɩ Mosis kʋ lɩɩ ba sɩpaaŋ a chɩna bʋbʋl wɩaa Yesu teeŋ.
5Ŋɩɩ nɛ Pɩɩta bʋla pɩ Yesu, “La kʋhɩaŋ, ʋ ŋaa wʋzɔŋ nɛ arɩ la sɩ hɛ daha. Leŋ dɩ la hɛ lɛŋŋɛɛ batori, dɩ ŋ kɛŋ dɔŋɔ, dɩ Mosis ma kɛŋ dɔŋɔ, dɩ Ɩlaaja ma kɛŋ dɔŋɔ.” 6Fawʋllʋŋ fa kɛmba nɛ woruŋ, ʋ fa bɩ jɩŋ wɩɩ-la kala ʋ sɩ jaŋ bʋl.
7Ŋɩɩ nɛ duoŋ-bɩlɩmbaanɩŋ kʋ tɔba. Ka yikoro lɩɩ duoŋ-bɩlɩmbaaŋ-la tʋɔŋ a bʋbʋl, “Mɩ Bii-chooluŋ nɛ ŋ-la. Má jegile nɩɩ ʋ teeŋ.”
8Ba guu beŋ leriŋ, ba bɩ nʋʋkala na see Yesu dʋndʋŋa.
9Ba sɩ lɩɩ peel-la nyuŋ kʋʋ tuu, ŋɩɩ nɛ Yesu bʋla pɩba, “Mɩ bɩ chɛ dɩ ma bʋl wɩɩ-la ma sɩ na, see dɩ mɩ-na Nuhuobiine Bie sii sʋʋŋ lɛ.” 10Ŋɩɩ nɛ ba sɛɩ a kɛŋ wɩɩ-la ba tʋɔŋ lɛ aŋ pɩpɩɛsɛ dɔŋɔ, “Sʋʋŋ lɛ siiniŋ bʋbʋɔŋ nɛ bɛɛ?”
11Ŋɩɩ nɛ ba pɩɛsɛ Yesu, “Bɛɛ nɛ tɩɩ Wɩa teniŋ kerichiba bʋl arɩ Ɩlaaja nɛ jaŋ laa sɩpaaŋ kɔ, aŋ ka dɩ Wɩa Bie-na kɔ?”
12Ʋ bʋla pɩba, “Wʋtɩtɩɩ, Ɩlaaja jaŋ sɛnɛ laa sɩpaaŋ kɔ a kɛŋ kʋŋkala wasa bil. Ba saa ŋmʋnsa bil Wɩa teniŋ tʋɔŋ a mʋ tɩgɛ mɩ-na Nuhuobiine Bie lɛ dɩ mɩ jaŋ na hɛɛŋ kɩŋkɛŋ, dɩ ba jaŋ bemmi a nagɛ nɩpɛɩ. Bɛɛ nɛ tɩɩ ba ŋmʋnsɛ ŋɩɩ? 13Lɛɛlɛ mɩ jaŋ bʋla pɩma arɩ Ɩlaaja paala kɔ nɛ. Ba ŋaaʋ ŋɩɩ kala ba sɩɩ chɛ. Ba fa ŋmʋnsɛ ŋɩɩ nɛ a tɩgɛ ʋ lɛ Wɩa teniŋ tʋɔŋ.”
Yesu kiri jɩŋ-bɔmʋŋ bie lɛ
Mat. 17.14-21; Luuk 9.37-43
14Ba sɩ kɔ ʋ harɩ-tooroo kʋkaana-la leriŋ, ba na dɩ nɩaa yʋga a hilimi nɩmɛ. Ba dɩ Wɩa teniŋ kerichiba kɛŋ wɩaa lɩlɛrɛ. 15Nɩalɩŋ sɩ na Yesu dɩ ʋʋ kɔ, ba guu hirigi a sii fá a mʋ chemu a chʋɔlʋ.
16Ŋɩɩ nɛ ʋ pɩɛsɛba, “Wʋbɛɛ nɛ ma hilimi ŋɩɩ a kaa lɩlɛrɛ?” 17Nɩalɩŋ dɔŋɔ bʋl, “La kʋhɩaŋ, mɩ bie nɛ mɩ kaa kɔ ŋ teeŋ. Jɩŋ-bɔŋ nɛ kɛnʋ. Ʋ bɩrɩmɛ taŋɩɩ. 18Ʋ nɛ sii ʋ lɛ na-kala ʋ yie joŋu lo tinteeŋ nɛ, nantʋɔ-fʋnfʋga tɔ ʋ niiŋ, ʋ chɩchaŋ ʋ nyɩlaa a terigi. Mɩ sʋl ŋ harɩ-tooroo dɩ ba kiri jɩŋ-bɔŋ-la ʋ lɛ, ama ba bɩ wuo kiri.”
19Ŋɩɩ nɛ Yesu bʋla pɩba, “Ma lɛɛlɛ nɩaa, ma bɩ Wɩa laa dii. Ɛɛ nɛ mɩ jaŋ hɛ ma teeŋ a diene magɛ? Ɛɛ nɛ mɩ jaŋ nyalɩmɛ a diene magɛ? Má kɛŋ bile kaa kɔ mɩ teeŋ.”
20Ŋɩɩ nɛ ba kɛŋ bile kaa kɔ ʋ teeŋ. Jɩŋ-bɔŋ-la sɩ kʋ na Yesu, ʋ kɛŋ bile terigi, ʋ tuu tel tinteeŋ a bibilimi, nantʋɔ-fʋnfʋga kʋ tɔ ʋ niiŋ.
21Ŋɩɩ nɛ Yesu pɩɛsɛ ʋ nyɩmma, “Wɩɩŋ deeŋ sɩ jʋʋ diene magɛ ɛɛ nɛ?” Ʋ bʋl, “Ʋ hambiiriŋ kala lɛ nɛ ʋ suomi. 22Bʋa dɔŋɔ ʋ yie joŋu lo nyiniŋ lɛ arɩ lɩɩŋ lɛ a chɩchɛ dɩ ʋ kpʋʋ. Ŋ-na sɩ wuo wɩɩ-na kala ŋɩŋaa, fá la nenige aŋ pɛ la lɛ.”
23Ŋɩɩ nɛ Yesu pɩɛsʋ, “Bɛɛ nɛ tɩɩ ŋ sɩ dɩ mɩ nɛ jaŋ wuo? Nɩɩ-la kala sɩ laa Wɩa dii, ʋ jaŋ wuo ŋaa wɩɩ na-kala.”
24Ŋɩɩ nɛ bile nyɩmma sii chɩŋ a faasa bubunsi, “Mɩ laa Wɩa dii nɛ, ama ʋ bɩ yʋgɛ. Pɛ mɩ lɛ dɩ mɩ laaʋ dii a yʋgɛ.”
25Yesu sɩ na dɩ nɩ-daŋ fa kʋ hihilimiba, ʋ kpɩa jɩŋ-bɔŋ-la lɛ, “Jɩŋ-taŋɩɩ, mɩ nɛ bʋla, kʋ lɩɩ bile lɛ. Pʋpɔ dɩ ŋ maachie bɩra sɩ́ ʋ jʋʋ.”
26Jɩŋ-bɔŋ-la chɩɩrɛ aŋ kɛnʋ faasa terigi aŋ lɩɩ ʋ lɛ, ka bile nagɛ dɩ ʋ sʋba. Nɩalɩŋ jesiŋ kala bʋl, “Bile sʋba nɛ.” 27Ama Yesu mʋ kɛŋ ʋ nɩsɩŋ lɛ a chʋʋlɛ ʋ sii chɩŋ.
28Ŋɩɩ nɛ Yesu arɩ ʋ harɩ-tooroo jʋʋ dɩa. Ba lʋara pɩɛsʋ, “Bɛɛ nɛ tɩɩ la-na bɩ jɩŋ-bɔŋ-la wuo kiri?”
29Ʋ bʋla pɩba, “Nʋʋkala bɩ jɩŋ-bɔŋ-la sɩ nagɛ ŋɩɩ wuo kire tɩta, see ʋ chʋɔlɛ Wɩa woruŋ.”
Yesu bɩra bʋl ʋ sʋʋŋ wɩaa
Mat. 17.22-23; Luuk 9.43-45
30Ŋɩɩ nɛ ba sii lɩɩ lee-la a mʋ to Galilii tinteeŋ. Yesu bɩ cho dɩ nʋʋkala jɩŋ lee-la ʋ sɩ hɛ, 31bɛɛ wɩaa ʋʋ dagɛ ʋ harɩ-tooroo nɛ arɩ ba jaŋ kɛŋ ʋ-na, Nuhuobiine Bie a hɛ nɩaa nɩsɩŋ lɛ dɩ ba kpʋʋ, ka dɩ ʋ sii sʋʋŋ lɛ tapʋlaa batori chɛɛŋ a kɛŋ mɩɩsɩŋ. 32Ama ba fa bɩ wɩɩ-la ʋ sɩ bʋla bʋbʋɔŋ jɩŋ aŋ fɩfá fawʋllʋŋ dɩ ba pɩɛsʋ.
Yesu harɩ-tooroo chɛ dɩ ba jɩŋ ba tʋɔŋ kʋhɩaŋ
Mat. 18.1-5; Luuk 9.46-48
33Ŋɩɩ nɛ ba sii kɔ Kapɛnam. Ba sɩ jʋʋ dɩa, Yesu pɩɛsɛ ʋ harɩ-tooro-la, “Wʋbɛɛ nɛ ma fa kaa lɩlɛrɛ ŋɩɩ wombiiŋ lɛ?” 34Ŋɩɩ nɛ ba tɔrɛ ba niiŋ, bɛɛ wɩaa ba fa kɛŋ ba tʋɔŋ kʋhɩaŋ wɩaa nɛ lɩlɛrɛ.
35Ŋɩɩ nɛ Yesu hɔŋ aŋ yɩrɛ ʋ harɩ-tooro-la fii arɩ balɩa a bʋla pɩba, “Nɩɩ-la sɩɩ chɛ dɩ ʋ ŋaa ma tʋɔŋ kʋhɩaŋ, see dɩ ʋ kʋ ŋaa ma tʋɔŋ hambie a tɩmaa pɩ ma kala.”
36Ŋɩɩ nɛ ʋ kɛŋ bii-bie a kaa kʋ bil ba tʋtʋɔbaanɩŋ a guoru aŋ bʋla pɩba, 37“Dɩ nʋʋ nɛ kɛŋ bii-bie deeŋ dɔŋɔ woruŋ a tɩŋ mɩ wɩaa, mɩ nɛ ʋ kɛŋ woruŋ ŋɩɩ. Nɩɩ-la ma kala sɩ kɛmmɛ woruŋ, mɩ dʋndʋŋa dee ʋ kɛŋ woruŋ ŋɩɩ. Nɩɩ-la sɩ tɩmmɛ ma nɛ ʋ kɛŋ woruŋ ŋɩɩ.”
Baala kiri jɩŋ-bɔŋŋɔɔ Yesu yɩrɩŋ lɛ
Luuk 9.49-50
38Ŋɩɩ nɛ Jɔɔŋ bʋla pɩ Yesu, “La Kʋhɩaŋ, la na baal kʋbala dɩ ʋʋ kiri jɩŋ-bɔŋŋɔɔ nɩaa lɛ ŋ yɩrɩŋ lɛ. La kiru dɩ ʋ sɩ́ ŋɩɩ ŋaa, bɛɛ wɩaa ʋ bɩ la dɔŋɔ ŋaa.”
39Ama Yesu bʋla pɩba, “Má sɩ́ ʋ kiru. Dɩ nʋʋ nɛ ŋaa wʋkpuŋkpere kala mɩ yɩrɩŋ lɛ, ʋ chie bɩra bɩ jaŋ chei mɩ yɩrɩŋ. 40Nɩɩ-la kala sɩ bɩ la harɩŋ lɩa, ʋ ŋaa la dɔŋɔ nɛ. 41Wʋtɩtɩɩ mɩ bʋlaa pɩma, dɩ nʋʋ nɛ joŋ gbaŋa ŋaa lɩɩŋ a pɩ ma kʋŋ a tɩŋ ma sɩɩ tomi wɩaa, ʋ jaŋ laa ʋ time.
Wɩalɩŋ sɩ jaŋ kɛnɩŋ hɛ wʋbɔmʋŋ lɛ
Mat. 18.6-9; Luuk 17.1-2
42Nɩɩ-la kala sɩ na hambiisi-la sɩɩ tomi dɔŋɔ a nyɩsʋ dɩ ʋ ŋaa wʋbɔmʋŋ, dɩ ba nɛ joŋ nɔmʋŋ a vɔɔ laalɛ ʋ baŋŋaa lɛ a joŋu yuo hɛ mʋgʋ-balɩŋ tʋɔŋ, ŋɩɩ nɛ kpɩa ʋ sɩ weye. 43Dɩ ŋ nɩsɩŋ nɩɩ chɛ dɩ ʋ kɛnɩŋ hɛ wʋbɔmʋŋ lɛ, kere ta. Ŋ sɩ jaŋ jʋʋ Wɩa kuorii-la tʋɔŋ arɩ nakuuŋ, ʋ nɛ kpɩa ŋ sɩ kɛŋ napilimee aŋ jʋʋ Wɩa nyiniŋ. Lee-la nyiŋ-la bɩ jaŋ dɩsɛ. [ 44Lee-la nanchʋɔlaa jaŋ dii ŋ yaraa deeŋ deeŋ ba bɩ jaŋ sʋʋ, ka nyiŋ-la ma bɩ jaŋ dɩsɛ.] 45Dɩ ŋ naaŋ nɩɩ chɛ ʋ kɛnɩŋ hɛ wʋbɔmʋŋ lɛ, kere ta. Ŋ sɩ jaŋ jʋʋ Wɩa kuorii-la tʋɔŋ arɩ naakuuŋ, ʋ nɛ kpɩa ba sɩ jaŋ joŋuŋ yuo hɛ Wɩa nyiniŋ lɛ arɩ naapilimee. [ 46Lee-la nanchʋɔlaa jaŋ dii ŋ yaraa deeŋ deeŋ ba bɩ jaŋ sʋʋ, ka nyiŋ-la ma bɩ jaŋ dɩsɛ.] 47Dɩ ŋ sɩɩŋ nɩɩ chɛ dɩ ʋ kɛnɩŋ hɛ wʋbɔmʋŋ lɛ, lɩɩsa ta. Ŋ sɩ jaŋ jʋʋ Wɩa kuorii-la tʋɔŋ arɩ sɩɩ-togo, ʋ nɛ kpɩa ba sɩ joŋuŋ yuo hɛ Wɩa nyiniŋ lɛ arɩ sɩaa balɩa. 48Lee-la nanchʋɔlaa jaŋ dii ŋ yaraa
deeŋ deeŋ ba bɩ jaŋ sʋʋ,
ka nyiŋ-la ma bɩ jaŋ dɩsɛ.
49Wɩa jaŋ leŋ dɩ nʋʋkala na hɛɛŋ aŋ-na na wʋzɔmʋŋ.
50Yɩsɩŋ sɩma, ama dɩ ʋ nɛ sɛbɩsɛ, ŋ bɩra bɩ jaŋ wuo ŋaa dɩ ʋ sɩŋ. Má leŋ dɩ ma tʋɔŋ sɩŋ, arɩ yɩsɩŋ sɩ sɩma ŋɩɩ, aŋ kala kɛŋ nii-bala.”
©Ghana Institute of Linguistics Literacy and Bible Translation 1984, 2014
Maak 9
9
1Ŋɩɩ nɛ Yesu bɩra bʋla pɩ ʋ harɩ-tooroo, “Wʋtɩtɩɩ nɛ mɩ bʋlaa pɩma, nɩaa dɔnsʋŋ hɛ daha, ba bɩ jaŋ sʋʋ, see dɩ ba na Wɩa kuorii-la chɩna dɛrɛ arɩ doluŋ.”
Yesu bɩrɩma
Mat. 17.1-13; Luuk 9.28-36
2Tapʋlaa balɩdʋ sɩ bala, Yesu kɛŋ Pɩɩta arɩ Jeems arɩ Jɔɔŋ, a kaa mʋ jɩl peel-bal kʋbala nyuŋ ba hɛ nɩmɛ ba dʋndʋŋa. Nɩmɛ nɛ Yesu bɩrɩmɛ ba sɩpaaŋ. 3Ʋ gɛnnɩŋ kala pʋllɛ kɩŋkɛŋ a tʋtʋl. Gɛrɩ-chɛsɩrʋ kala bɩ jaŋ wuo chɛsɛ gɛnnɩŋ dɩ ba pʋlla nagɛ ŋɩɩ. 4Ɩlaaja arɩ Mosis kʋ lɩɩ ba sɩpaaŋ a chɩna bʋbʋl wɩaa Yesu teeŋ.
5Ŋɩɩ nɛ Pɩɩta bʋla pɩ Yesu, “La kʋhɩaŋ, ʋ ŋaa wʋzɔŋ nɛ arɩ la sɩ hɛ daha. Leŋ dɩ la hɛ lɛŋŋɛɛ batori, dɩ ŋ kɛŋ dɔŋɔ, dɩ Mosis ma kɛŋ dɔŋɔ, dɩ Ɩlaaja ma kɛŋ dɔŋɔ.” 6Fawʋllʋŋ fa kɛmba nɛ woruŋ, ʋ fa bɩ jɩŋ wɩɩ-la kala ʋ sɩ jaŋ bʋl.
7Ŋɩɩ nɛ duoŋ-bɩlɩmbaanɩŋ kʋ tɔba. Ka yikoro lɩɩ duoŋ-bɩlɩmbaaŋ-la tʋɔŋ a bʋbʋl, “Mɩ Bii-chooluŋ nɛ ŋ-la. Má jegile nɩɩ ʋ teeŋ.”
8Ba guu beŋ leriŋ, ba bɩ nʋʋkala na see Yesu dʋndʋŋa.
9Ba sɩ lɩɩ peel-la nyuŋ kʋʋ tuu, ŋɩɩ nɛ Yesu bʋla pɩba, “Mɩ bɩ chɛ dɩ ma bʋl wɩɩ-la ma sɩ na, see dɩ mɩ-na Nuhuobiine Bie sii sʋʋŋ lɛ.” 10Ŋɩɩ nɛ ba sɛɩ a kɛŋ wɩɩ-la ba tʋɔŋ lɛ aŋ pɩpɩɛsɛ dɔŋɔ, “Sʋʋŋ lɛ siiniŋ bʋbʋɔŋ nɛ bɛɛ?”
11Ŋɩɩ nɛ ba pɩɛsɛ Yesu, “Bɛɛ nɛ tɩɩ Wɩa teniŋ kerichiba bʋl arɩ Ɩlaaja nɛ jaŋ laa sɩpaaŋ kɔ, aŋ ka dɩ Wɩa Bie-na kɔ?”
12Ʋ bʋla pɩba, “Wʋtɩtɩɩ, Ɩlaaja jaŋ sɛnɛ laa sɩpaaŋ kɔ a kɛŋ kʋŋkala wasa bil. Ba saa ŋmʋnsa bil Wɩa teniŋ tʋɔŋ a mʋ tɩgɛ mɩ-na Nuhuobiine Bie lɛ dɩ mɩ jaŋ na hɛɛŋ kɩŋkɛŋ, dɩ ba jaŋ bemmi a nagɛ nɩpɛɩ. Bɛɛ nɛ tɩɩ ba ŋmʋnsɛ ŋɩɩ? 13Lɛɛlɛ mɩ jaŋ bʋla pɩma arɩ Ɩlaaja paala kɔ nɛ. Ba ŋaaʋ ŋɩɩ kala ba sɩɩ chɛ. Ba fa ŋmʋnsɛ ŋɩɩ nɛ a tɩgɛ ʋ lɛ Wɩa teniŋ tʋɔŋ.”
Yesu kiri jɩŋ-bɔmʋŋ bie lɛ
Mat. 17.14-21; Luuk 9.37-43
14Ba sɩ kɔ ʋ harɩ-tooroo kʋkaana-la leriŋ, ba na dɩ nɩaa yʋga a hilimi nɩmɛ. Ba dɩ Wɩa teniŋ kerichiba kɛŋ wɩaa lɩlɛrɛ. 15Nɩalɩŋ sɩ na Yesu dɩ ʋʋ kɔ, ba guu hirigi a sii fá a mʋ chemu a chʋɔlʋ.
16Ŋɩɩ nɛ ʋ pɩɛsɛba, “Wʋbɛɛ nɛ ma hilimi ŋɩɩ a kaa lɩlɛrɛ?” 17Nɩalɩŋ dɔŋɔ bʋl, “La kʋhɩaŋ, mɩ bie nɛ mɩ kaa kɔ ŋ teeŋ. Jɩŋ-bɔŋ nɛ kɛnʋ. Ʋ bɩrɩmɛ taŋɩɩ. 18Ʋ nɛ sii ʋ lɛ na-kala ʋ yie joŋu lo tinteeŋ nɛ, nantʋɔ-fʋnfʋga tɔ ʋ niiŋ, ʋ chɩchaŋ ʋ nyɩlaa a terigi. Mɩ sʋl ŋ harɩ-tooroo dɩ ba kiri jɩŋ-bɔŋ-la ʋ lɛ, ama ba bɩ wuo kiri.”
19Ŋɩɩ nɛ Yesu bʋla pɩba, “Ma lɛɛlɛ nɩaa, ma bɩ Wɩa laa dii. Ɛɛ nɛ mɩ jaŋ hɛ ma teeŋ a diene magɛ? Ɛɛ nɛ mɩ jaŋ nyalɩmɛ a diene magɛ? Má kɛŋ bile kaa kɔ mɩ teeŋ.”
20Ŋɩɩ nɛ ba kɛŋ bile kaa kɔ ʋ teeŋ. Jɩŋ-bɔŋ-la sɩ kʋ na Yesu, ʋ kɛŋ bile terigi, ʋ tuu tel tinteeŋ a bibilimi, nantʋɔ-fʋnfʋga kʋ tɔ ʋ niiŋ.
21Ŋɩɩ nɛ Yesu pɩɛsɛ ʋ nyɩmma, “Wɩɩŋ deeŋ sɩ jʋʋ diene magɛ ɛɛ nɛ?” Ʋ bʋl, “Ʋ hambiiriŋ kala lɛ nɛ ʋ suomi. 22Bʋa dɔŋɔ ʋ yie joŋu lo nyiniŋ lɛ arɩ lɩɩŋ lɛ a chɩchɛ dɩ ʋ kpʋʋ. Ŋ-na sɩ wuo wɩɩ-na kala ŋɩŋaa, fá la nenige aŋ pɛ la lɛ.”
23Ŋɩɩ nɛ Yesu pɩɛsʋ, “Bɛɛ nɛ tɩɩ ŋ sɩ dɩ mɩ nɛ jaŋ wuo? Nɩɩ-la kala sɩ laa Wɩa dii, ʋ jaŋ wuo ŋaa wɩɩ na-kala.”
24Ŋɩɩ nɛ bile nyɩmma sii chɩŋ a faasa bubunsi, “Mɩ laa Wɩa dii nɛ, ama ʋ bɩ yʋgɛ. Pɛ mɩ lɛ dɩ mɩ laaʋ dii a yʋgɛ.”
25Yesu sɩ na dɩ nɩ-daŋ fa kʋ hihilimiba, ʋ kpɩa jɩŋ-bɔŋ-la lɛ, “Jɩŋ-taŋɩɩ, mɩ nɛ bʋla, kʋ lɩɩ bile lɛ. Pʋpɔ dɩ ŋ maachie bɩra sɩ́ ʋ jʋʋ.”
26Jɩŋ-bɔŋ-la chɩɩrɛ aŋ kɛnʋ faasa terigi aŋ lɩɩ ʋ lɛ, ka bile nagɛ dɩ ʋ sʋba. Nɩalɩŋ jesiŋ kala bʋl, “Bile sʋba nɛ.” 27Ama Yesu mʋ kɛŋ ʋ nɩsɩŋ lɛ a chʋʋlɛ ʋ sii chɩŋ.
28Ŋɩɩ nɛ Yesu arɩ ʋ harɩ-tooroo jʋʋ dɩa. Ba lʋara pɩɛsʋ, “Bɛɛ nɛ tɩɩ la-na bɩ jɩŋ-bɔŋ-la wuo kiri?”
29Ʋ bʋla pɩba, “Nʋʋkala bɩ jɩŋ-bɔŋ-la sɩ nagɛ ŋɩɩ wuo kire tɩta, see ʋ chʋɔlɛ Wɩa woruŋ.”
Yesu bɩra bʋl ʋ sʋʋŋ wɩaa
Mat. 17.22-23; Luuk 9.43-45
30Ŋɩɩ nɛ ba sii lɩɩ lee-la a mʋ to Galilii tinteeŋ. Yesu bɩ cho dɩ nʋʋkala jɩŋ lee-la ʋ sɩ hɛ, 31bɛɛ wɩaa ʋʋ dagɛ ʋ harɩ-tooroo nɛ arɩ ba jaŋ kɛŋ ʋ-na, Nuhuobiine Bie a hɛ nɩaa nɩsɩŋ lɛ dɩ ba kpʋʋ, ka dɩ ʋ sii sʋʋŋ lɛ tapʋlaa batori chɛɛŋ a kɛŋ mɩɩsɩŋ. 32Ama ba fa bɩ wɩɩ-la ʋ sɩ bʋla bʋbʋɔŋ jɩŋ aŋ fɩfá fawʋllʋŋ dɩ ba pɩɛsʋ.
Yesu harɩ-tooroo chɛ dɩ ba jɩŋ ba tʋɔŋ kʋhɩaŋ
Mat. 18.1-5; Luuk 9.46-48
33Ŋɩɩ nɛ ba sii kɔ Kapɛnam. Ba sɩ jʋʋ dɩa, Yesu pɩɛsɛ ʋ harɩ-tooro-la, “Wʋbɛɛ nɛ ma fa kaa lɩlɛrɛ ŋɩɩ wombiiŋ lɛ?” 34Ŋɩɩ nɛ ba tɔrɛ ba niiŋ, bɛɛ wɩaa ba fa kɛŋ ba tʋɔŋ kʋhɩaŋ wɩaa nɛ lɩlɛrɛ.
35Ŋɩɩ nɛ Yesu hɔŋ aŋ yɩrɛ ʋ harɩ-tooro-la fii arɩ balɩa a bʋla pɩba, “Nɩɩ-la sɩɩ chɛ dɩ ʋ ŋaa ma tʋɔŋ kʋhɩaŋ, see dɩ ʋ kʋ ŋaa ma tʋɔŋ hambie a tɩmaa pɩ ma kala.”
36Ŋɩɩ nɛ ʋ kɛŋ bii-bie a kaa kʋ bil ba tʋtʋɔbaanɩŋ a guoru aŋ bʋla pɩba, 37“Dɩ nʋʋ nɛ kɛŋ bii-bie deeŋ dɔŋɔ woruŋ a tɩŋ mɩ wɩaa, mɩ nɛ ʋ kɛŋ woruŋ ŋɩɩ. Nɩɩ-la ma kala sɩ kɛmmɛ woruŋ, mɩ dʋndʋŋa dee ʋ kɛŋ woruŋ ŋɩɩ. Nɩɩ-la sɩ tɩmmɛ ma nɛ ʋ kɛŋ woruŋ ŋɩɩ.”
Baala kiri jɩŋ-bɔŋŋɔɔ Yesu yɩrɩŋ lɛ
Luuk 9.49-50
38Ŋɩɩ nɛ Jɔɔŋ bʋla pɩ Yesu, “La Kʋhɩaŋ, la na baal kʋbala dɩ ʋʋ kiri jɩŋ-bɔŋŋɔɔ nɩaa lɛ ŋ yɩrɩŋ lɛ. La kiru dɩ ʋ sɩ́ ŋɩɩ ŋaa, bɛɛ wɩaa ʋ bɩ la dɔŋɔ ŋaa.”
39Ama Yesu bʋla pɩba, “Má sɩ́ ʋ kiru. Dɩ nʋʋ nɛ ŋaa wʋkpuŋkpere kala mɩ yɩrɩŋ lɛ, ʋ chie bɩra bɩ jaŋ chei mɩ yɩrɩŋ. 40Nɩɩ-la kala sɩ bɩ la harɩŋ lɩa, ʋ ŋaa la dɔŋɔ nɛ. 41Wʋtɩtɩɩ mɩ bʋlaa pɩma, dɩ nʋʋ nɛ joŋ gbaŋa ŋaa lɩɩŋ a pɩ ma kʋŋ a tɩŋ ma sɩɩ tomi wɩaa, ʋ jaŋ laa ʋ time.
Wɩalɩŋ sɩ jaŋ kɛnɩŋ hɛ wʋbɔmʋŋ lɛ
Mat. 18.6-9; Luuk 17.1-2
42Nɩɩ-la kala sɩ na hambiisi-la sɩɩ tomi dɔŋɔ a nyɩsʋ dɩ ʋ ŋaa wʋbɔmʋŋ, dɩ ba nɛ joŋ nɔmʋŋ a vɔɔ laalɛ ʋ baŋŋaa lɛ a joŋu yuo hɛ mʋgʋ-balɩŋ tʋɔŋ, ŋɩɩ nɛ kpɩa ʋ sɩ weye. 43Dɩ ŋ nɩsɩŋ nɩɩ chɛ dɩ ʋ kɛnɩŋ hɛ wʋbɔmʋŋ lɛ, kere ta. Ŋ sɩ jaŋ jʋʋ Wɩa kuorii-la tʋɔŋ arɩ nakuuŋ, ʋ nɛ kpɩa ŋ sɩ kɛŋ napilimee aŋ jʋʋ Wɩa nyiniŋ. Lee-la nyiŋ-la bɩ jaŋ dɩsɛ. [ 44Lee-la nanchʋɔlaa jaŋ dii ŋ yaraa deeŋ deeŋ ba bɩ jaŋ sʋʋ, ka nyiŋ-la ma bɩ jaŋ dɩsɛ.] 45Dɩ ŋ naaŋ nɩɩ chɛ ʋ kɛnɩŋ hɛ wʋbɔmʋŋ lɛ, kere ta. Ŋ sɩ jaŋ jʋʋ Wɩa kuorii-la tʋɔŋ arɩ naakuuŋ, ʋ nɛ kpɩa ba sɩ jaŋ joŋuŋ yuo hɛ Wɩa nyiniŋ lɛ arɩ naapilimee. [ 46Lee-la nanchʋɔlaa jaŋ dii ŋ yaraa deeŋ deeŋ ba bɩ jaŋ sʋʋ, ka nyiŋ-la ma bɩ jaŋ dɩsɛ.] 47Dɩ ŋ sɩɩŋ nɩɩ chɛ dɩ ʋ kɛnɩŋ hɛ wʋbɔmʋŋ lɛ, lɩɩsa ta. Ŋ sɩ jaŋ jʋʋ Wɩa kuorii-la tʋɔŋ arɩ sɩɩ-togo, ʋ nɛ kpɩa ba sɩ joŋuŋ yuo hɛ Wɩa nyiniŋ lɛ arɩ sɩaa balɩa. 48Lee-la nanchʋɔlaa jaŋ dii ŋ yaraa
deeŋ deeŋ ba bɩ jaŋ sʋʋ,
ka nyiŋ-la ma bɩ jaŋ dɩsɛ.
49Wɩa jaŋ leŋ dɩ nʋʋkala na hɛɛŋ aŋ-na na wʋzɔmʋŋ.
50Yɩsɩŋ sɩma, ama dɩ ʋ nɛ sɛbɩsɛ, ŋ bɩra bɩ jaŋ wuo ŋaa dɩ ʋ sɩŋ. Má leŋ dɩ ma tʋɔŋ sɩŋ, arɩ yɩsɩŋ sɩ sɩma ŋɩɩ, aŋ kala kɛŋ nii-bala.”
©Ghana Institute of Linguistics Literacy and Bible Translation 1984, 2014