LUKAS 21
21
Aonggolu sangkatou wawine wal᷊u
(Mrk. 12:41-44)
1Su Wal᷊e Mawu, Mawu Yesus naasilo manga taumata ala nantaṛṛon roitta sulal᷊ummu tampan roitta. 2I Tou naasilo lai sangkatou wawine wal᷊u asiangnga, nantaṛṛon ruam bau roitta witu'a. 3See Mawu Yesus nabbisara, “Padaringikka: Wawine wal᷊u indi nantaṛṛo mannamboanna wuassu al᷊awo'u taumata waine. 4Ana waugu i mangitou sarangkanambone nangonggolla wuassu lebben darotongnge. Arawe wawine wal᷊u indi, salaiwe i tou asiangnga, nangonggolu apa apan tatahuananni tou apan ipappaatta su pabbiaṛṛanne.”
Mawu Yesus nabbati'u ahahohakku Wal᷊e Mawu
(Mat. 24:1-2; Mrk. 13:1-2)
5Pia manga taumata apan mabbisara su ola'u aroddi aṛṛamage Wal᷊e Mawu nilogakku manga watu apan mangkaṛṛamaga wuṛṛu ringannu manga sarannapa nionggolla su Ruata. Ne Mawu Yesus nabbisarate si mangitou, 6“Paṛṛado pia tempone, apa apan niasiloanni yamiu indi sarun ihohakka; tawe saran sambau watu isindi apan mallambe uaatokka su tampane!”
Asasusa wuṛṛu pananansara
(Mat. 24:3-14; Mrk. 13:3-13)
7I mangitou naiwal᷊o Mawu Yesus, “Iamangnga Huru, angngerate olangnge udde sarun mariaddi? Wuṛṛu apa tatialane manungku nia'omante tempone olangnge udde sarun mariaddi?”
8Mawu Yesus nabbisara, “Paatehamma, arie i yamiu awahianna. Manambo taumata sarun rumanta ringannu arang-Ku, wuṛṛu mabbisara, ‘Ete i Ya'u i Tou!’ wuṛṛu ‘Nia'omante tempone.’ Arawe arie i yamiu tumantalongnga si mangitou. 9Arie lai yamiu matta'utta napawe maaringikka watti'a su ola'u pangalo wuṛṛu pasaseetta. Sarangkanambone udde ṛinone mariaddi paarorone. Arawe udde tawe manungku nia'omante tempone kiamatta.”
10See Mawu Yesus nanassukku watti-Nge, wisara-Ne, “Walahanna sambau sarun mamangalo walahanna waine, wuṛṛu araratuanna sambau mamangalo araratuanna waine. 11Su alawo'u tampa sarun mariaddi linukka apan wahewa, al᷊aṛṛutumma wuṛṛu al᷊aṛṛusa'itta. Sarun mariaddi manga tanda apan ma'ata'utta wuṛṛu wahewalla su langitta. 12Arawe tantal᷊anna sarangkanambone udde taambe nariaddi, i yamiu sarun sametanna wuṛṛu sansaranna. I yamiu sarun parikisanna su manga wal᷊e pattataṛṛamawuanna wuṛṛu itaṛṛo su tuttupanna. Wuṛṛu i yamiu sarun iapidda su saruannu mararatu wuṛṛu manga tembonanne, ana waugu i yamiu mallal᷊aṛṛenggeng-Ku. 13Eteudde tempone i yamiu mabatti'u Watti'u Al᷊al᷊uassa wuassu Ruata. 14Sidutua'e manungku i yamiu tawe suminggawangnga su ola'u apan ṛinone iwisarang kamiu ipanahekku watangannu. 15I Ya'u sassane sarun mangonggolu wisara wuṛṛu apande udde, ma'oman tawe saran sangkatou wuassu manga seetti yamiu wotongnge lumawangnga ara'e massinaaddu apa apan suete niapaasingkatti yamiu. 16I yamiu sarun pateannu inangnga iamangngi yamiu, wuṛṛu manga tuṛṛangngu, manga ana'u tuṛṛangngi yamiu wuṛṛu manga haweng kamiu. Sangkawageanganna wuassi yamiu sarun pateanni mangitou. 17I yamiu sarun iarantinnu manga taumata ana waugu i yamiu mallal᷊aṛṛenggeng-Ku. 18Arawe uta'a sambua wuassu puanu tawe mawul᷊i. 19Amungkangngu i yamiu mataṛṛangnga wuṛṛu masabare i yamiu masal᷊amatta.”
Mawu Yesus nabbisara su ola'u ahahohakku Yerusalem
(Mat. 24:15-21; Mrk. 13:14-19)
20“Napawe i yamiu naasilo Yerusalem tatalliwunannu tantara, i yamiu sarun maasingkatta manungku soa udde tate mal᷊annu lai mahohakka. 21Su tempo udde ṛinone taumata apan uatana'a su Yudea sarun tumal᷊angnga su wowone. I mangitou apan uatana'a su soa sarun manantangngu soa, wuṛṛu i mangitou apan su liuddu soa arie passutta sulal᷊ummu soa. 22Ana waugu manga allo udde ‘Eteudde Allon Ṛuumanna Iapaamatta’, tadea'u ringannu olangnge udde, apa apan uawoṛṛetta sulal᷊ummu Wuke Susi sarun matipussa. 23Ma'ata'utta atonna manga allo udde su wawine apan ta'e pia illoṛṛo, wuṛṛu wawine apan ta'e mappasusun ana'a! Wanua indi sarun maapendamma asasusa wahewa, wuṛṛu Mawu sarun maṛṛuumannu walahanna udde. 24Piaddu pateannu hal᷊ele, pia lai apan sarun iapidda ere taumata niatawanna watukku manga wanuan taumata; wuṛṛu manga taumata apan tawe maaillal᷊a Ruata sarun maṛṛinda Yerusalem ma'oman sara masue tempone apan suete tinantunnu Mawu si mangitou.”
Darantan Ana'u Taumata
(Mat. 24:29-31; Mrk. 13:24-27)
25“Paṛṛadote, su matannallo, wul᷊anna, wuṛṛu manga anumpitanna sarun asiloanna manga tatialane. Su runia, manga taumata sarun matta'utta wuṛṛu ma'al᷊iwu sumaruanna wallada wuṛṛu tingikku lua'a. 26Taumata sarun matta'utta atonna-tonna sumaruanna apa apan sarun mariaddi su ahewallu runia indi, ana waugu manga tembonanne su winalanganna, sarun massongkakka. 27Su tempo udde Ana'u Taumata sarun rumanta sulal᷊ummu winabbawa ringannu taṛṛinone wuṛṛu awawantuga apan bahewa. 28Amungkangngu manga olangnge udde mannatakke mariaddi, atimpu'ote wuṛṛu paningngarate, ana waugu ete adio'a lai yamiu sarun maasomba asasal᷊amatta.”
Al᷊aṛṛa'a wuassu alu ara
(Mat. 24:32-35; Mrk. 13:28-31)
29See Mawu Yesus nabbati'a lai si mangitou sasumandingnga ere indi, wisara-Ne, “Panutukka mapia-pia alu ara wuṛṛu manga alu waine. 30Napawe manga lal᷊uwone ia'asilote, i yamiu masingkatta manungku tempom padissa maranite. 31Aroddi lai amungkangngu i yamiu ma'asilo manga olangnge udde mariaddi, i yamiu sarun maasingkatta manungku Ruata mal᷊ihakke mamarenta ere sangkatou Ratu.
32Asingkatewe! Sarangkanambone udde sarun mariaddi tantal᷊anna manga taumata apan wiakka tempo indi taambe nate abbi. 33Langitta wuṛṛu runia sarun mawul᷊i, arawe manga wisara-U sidutu ma'oman sara mal᷊annu-l᷊annu.”
Sidutu Paatehamma
34“Paariagai wadangngu, arie ma'oman sara i yamiu tumanite manambo ma'ola'a andeangnga wuṛṛu ma'inumma ua'e ma'awu'anna, ara'e tumanite maṛṛingiddu al᷊awo'u hattom biakki yamiu, na'oman sara i yamiu tawe naasaddia napawe allo udde nirumanta ringannu awagananna. 35Ana waugu Allo udde sarun rumanta ere wal᷊ati'a su anambon taumata su wowon runia indi. 36Paariagate, wuṛṛu sidutu a'al᷊iomanna tadea'u i yamiu matohassa mamipen al᷊awo'u hatto apan sarun mariaddi wuṛṛu i yamiu wotongnge sumaruanna Ana'u Taumata.”
37Mawu Yesus mangngaṛṛa'a su Wal᷊e Mawu su tempo allattune, wuṛṛu ṛabbine i Tou inaite watukku Wuiddu Zaitun wuṛṛu natana'a isudde. 38Suapan rua'allo, manga taumata rudanta su Wal᷊e Mawu madaringikka Mawu Yesus mangngaṛṛa'a.
@ LAI 2003
LUKAS 21
21
Aonggolu sangkatou wawine wal᷊u
(Mrk. 12:41-44)
1Su Wal᷊e Mawu, Mawu Yesus naasilo manga taumata ala nantaṛṛon roitta sulal᷊ummu tampan roitta. 2I Tou naasilo lai sangkatou wawine wal᷊u asiangnga, nantaṛṛon ruam bau roitta witu'a. 3See Mawu Yesus nabbisara, “Padaringikka: Wawine wal᷊u indi nantaṛṛo mannamboanna wuassu al᷊awo'u taumata waine. 4Ana waugu i mangitou sarangkanambone nangonggolla wuassu lebben darotongnge. Arawe wawine wal᷊u indi, salaiwe i tou asiangnga, nangonggolu apa apan tatahuananni tou apan ipappaatta su pabbiaṛṛanne.”
Mawu Yesus nabbati'u ahahohakku Wal᷊e Mawu
(Mat. 24:1-2; Mrk. 13:1-2)
5Pia manga taumata apan mabbisara su ola'u aroddi aṛṛamage Wal᷊e Mawu nilogakku manga watu apan mangkaṛṛamaga wuṛṛu ringannu manga sarannapa nionggolla su Ruata. Ne Mawu Yesus nabbisarate si mangitou, 6“Paṛṛado pia tempone, apa apan niasiloanni yamiu indi sarun ihohakka; tawe saran sambau watu isindi apan mallambe uaatokka su tampane!”
Asasusa wuṛṛu pananansara
(Mat. 24:3-14; Mrk. 13:3-13)
7I mangitou naiwal᷊o Mawu Yesus, “Iamangnga Huru, angngerate olangnge udde sarun mariaddi? Wuṛṛu apa tatialane manungku nia'omante tempone olangnge udde sarun mariaddi?”
8Mawu Yesus nabbisara, “Paatehamma, arie i yamiu awahianna. Manambo taumata sarun rumanta ringannu arang-Ku, wuṛṛu mabbisara, ‘Ete i Ya'u i Tou!’ wuṛṛu ‘Nia'omante tempone.’ Arawe arie i yamiu tumantalongnga si mangitou. 9Arie lai yamiu matta'utta napawe maaringikka watti'a su ola'u pangalo wuṛṛu pasaseetta. Sarangkanambone udde ṛinone mariaddi paarorone. Arawe udde tawe manungku nia'omante tempone kiamatta.”
10See Mawu Yesus nanassukku watti-Nge, wisara-Ne, “Walahanna sambau sarun mamangalo walahanna waine, wuṛṛu araratuanna sambau mamangalo araratuanna waine. 11Su alawo'u tampa sarun mariaddi linukka apan wahewa, al᷊aṛṛutumma wuṛṛu al᷊aṛṛusa'itta. Sarun mariaddi manga tanda apan ma'ata'utta wuṛṛu wahewalla su langitta. 12Arawe tantal᷊anna sarangkanambone udde taambe nariaddi, i yamiu sarun sametanna wuṛṛu sansaranna. I yamiu sarun parikisanna su manga wal᷊e pattataṛṛamawuanna wuṛṛu itaṛṛo su tuttupanna. Wuṛṛu i yamiu sarun iapidda su saruannu mararatu wuṛṛu manga tembonanne, ana waugu i yamiu mallal᷊aṛṛenggeng-Ku. 13Eteudde tempone i yamiu mabatti'u Watti'u Al᷊al᷊uassa wuassu Ruata. 14Sidutua'e manungku i yamiu tawe suminggawangnga su ola'u apan ṛinone iwisarang kamiu ipanahekku watangannu. 15I Ya'u sassane sarun mangonggolu wisara wuṛṛu apande udde, ma'oman tawe saran sangkatou wuassu manga seetti yamiu wotongnge lumawangnga ara'e massinaaddu apa apan suete niapaasingkatti yamiu. 16I yamiu sarun pateannu inangnga iamangngi yamiu, wuṛṛu manga tuṛṛangngu, manga ana'u tuṛṛangngi yamiu wuṛṛu manga haweng kamiu. Sangkawageanganna wuassi yamiu sarun pateanni mangitou. 17I yamiu sarun iarantinnu manga taumata ana waugu i yamiu mallal᷊aṛṛenggeng-Ku. 18Arawe uta'a sambua wuassu puanu tawe mawul᷊i. 19Amungkangngu i yamiu mataṛṛangnga wuṛṛu masabare i yamiu masal᷊amatta.”
Mawu Yesus nabbisara su ola'u ahahohakku Yerusalem
(Mat. 24:15-21; Mrk. 13:14-19)
20“Napawe i yamiu naasilo Yerusalem tatalliwunannu tantara, i yamiu sarun maasingkatta manungku soa udde tate mal᷊annu lai mahohakka. 21Su tempo udde ṛinone taumata apan uatana'a su Yudea sarun tumal᷊angnga su wowone. I mangitou apan uatana'a su soa sarun manantangngu soa, wuṛṛu i mangitou apan su liuddu soa arie passutta sulal᷊ummu soa. 22Ana waugu manga allo udde ‘Eteudde Allon Ṛuumanna Iapaamatta’, tadea'u ringannu olangnge udde, apa apan uawoṛṛetta sulal᷊ummu Wuke Susi sarun matipussa. 23Ma'ata'utta atonna manga allo udde su wawine apan ta'e pia illoṛṛo, wuṛṛu wawine apan ta'e mappasusun ana'a! Wanua indi sarun maapendamma asasusa wahewa, wuṛṛu Mawu sarun maṛṛuumannu walahanna udde. 24Piaddu pateannu hal᷊ele, pia lai apan sarun iapidda ere taumata niatawanna watukku manga wanuan taumata; wuṛṛu manga taumata apan tawe maaillal᷊a Ruata sarun maṛṛinda Yerusalem ma'oman sara masue tempone apan suete tinantunnu Mawu si mangitou.”
Darantan Ana'u Taumata
(Mat. 24:29-31; Mrk. 13:24-27)
25“Paṛṛadote, su matannallo, wul᷊anna, wuṛṛu manga anumpitanna sarun asiloanna manga tatialane. Su runia, manga taumata sarun matta'utta wuṛṛu ma'al᷊iwu sumaruanna wallada wuṛṛu tingikku lua'a. 26Taumata sarun matta'utta atonna-tonna sumaruanna apa apan sarun mariaddi su ahewallu runia indi, ana waugu manga tembonanne su winalanganna, sarun massongkakka. 27Su tempo udde Ana'u Taumata sarun rumanta sulal᷊ummu winabbawa ringannu taṛṛinone wuṛṛu awawantuga apan bahewa. 28Amungkangngu manga olangnge udde mannatakke mariaddi, atimpu'ote wuṛṛu paningngarate, ana waugu ete adio'a lai yamiu sarun maasomba asasal᷊amatta.”
Al᷊aṛṛa'a wuassu alu ara
(Mat. 24:32-35; Mrk. 13:28-31)
29See Mawu Yesus nabbati'a lai si mangitou sasumandingnga ere indi, wisara-Ne, “Panutukka mapia-pia alu ara wuṛṛu manga alu waine. 30Napawe manga lal᷊uwone ia'asilote, i yamiu masingkatta manungku tempom padissa maranite. 31Aroddi lai amungkangngu i yamiu ma'asilo manga olangnge udde mariaddi, i yamiu sarun maasingkatta manungku Ruata mal᷊ihakke mamarenta ere sangkatou Ratu.
32Asingkatewe! Sarangkanambone udde sarun mariaddi tantal᷊anna manga taumata apan wiakka tempo indi taambe nate abbi. 33Langitta wuṛṛu runia sarun mawul᷊i, arawe manga wisara-U sidutu ma'oman sara mal᷊annu-l᷊annu.”
Sidutu Paatehamma
34“Paariagai wadangngu, arie ma'oman sara i yamiu tumanite manambo ma'ola'a andeangnga wuṛṛu ma'inumma ua'e ma'awu'anna, ara'e tumanite maṛṛingiddu al᷊awo'u hattom biakki yamiu, na'oman sara i yamiu tawe naasaddia napawe allo udde nirumanta ringannu awagananna. 35Ana waugu Allo udde sarun rumanta ere wal᷊ati'a su anambon taumata su wowon runia indi. 36Paariagate, wuṛṛu sidutu a'al᷊iomanna tadea'u i yamiu matohassa mamipen al᷊awo'u hatto apan sarun mariaddi wuṛṛu i yamiu wotongnge sumaruanna Ana'u Taumata.”
37Mawu Yesus mangngaṛṛa'a su Wal᷊e Mawu su tempo allattune, wuṛṛu ṛabbine i Tou inaite watukku Wuiddu Zaitun wuṛṛu natana'a isudde. 38Suapan rua'allo, manga taumata rudanta su Wal᷊e Mawu madaringikka Mawu Yesus mangngaṛṛa'a.
@ LAI 2003