Kutoma 2
2
1Natenepo kudzulu na pansi pano, pontho na pyonsene pili mwenemo pidamala sasanywa. 2Pansiku yachinomwe Mulungu adapuma, thangwi iye akhadamalisa basa yonsene ikhaphata iye.#Kub. 20.11. #Aheb. 4.4, 10. 3Tenepo iye adatsanzayisa nsiku yachinomwe mbaipambula kukhala nsiku yakupambulika, thangwi pansiku yeneyo iye adapuma podi akhadamalisa basa yonsene yakulenga.#2.3 thangwi pansiku…yonsene yakulenga: penu pansiku yeneyo iye adamalisa basache yakulenga. 4Mwenemu ndiye mule mukhadalengwa kudzulu na pansi pano.
Munda wa Edeni
Pidalenga MBUYA#2.4 MBUYA: (Yang'anani Nyandandanda wa Mafala). Mulungu dziko yapansi na kudzulu, 5padziko yapansi pakhali nkhabe chakumera na chibodzi chene, thangwi ndzidzi wenewu MBUYA Mulungu hakhadadzati vumbisa mvula tayu, pontho pakhali nkhabe munthu wakulima; 6mbwenye madzi akhadza kubulukira pansi pa mataka mbawazira mataka.
7Tenepo MBUYA Mulungu adasasanya mamuna kubulukira kumataka a pansi pano#2.7 Mamuna…mataka a pansi pano: m'Chiheberi mafala akulonga “mamuna” na “mataka a pansi pano” ambaveka chibodzi-bodzi. mbampumira muya wakupasa moyo mphuno mwache, tenepo munthuyo adakhala na moyo.#1Akor. 15.45.
8Tenepo MBUYA Mulungu adalima munda mu Edeni kumabulukiro dzuwa, mwenemo adaikhamo munthu adasasanya iye ule. 9MBUYA Mulungu adachitisa kuti miti yonsene yakubalika imere mwenemo na kubala nsapo zadidi. Kati na kati ya munda ule, pakhali muti wakupasa moyo, pontho na muti wakupasa udziwisi wa chadidi na chakuipa.#2.9 udziwisi wa chadidi na chakuipa: penu udziwisi wa pyonsene.#Chid. 2.7; 22.2, 14.
10Mkulo ukhafamba mu Edeni mbukapira m'mundamo. Kubulukira penepo mkulo ule udaswa mphapa mbukhala mikulo minayi. 11Mkulo wakutoma dzinache ndi Pishoni; wenewu ndiye umbafamba kugwanda na m'dziko ya Havila, kule kumbagumanwa golidi. 12Golidi weneyu ndi golidi chadi-chadi, pontho kweneko kuna mafuta akununkhira okhonda oneka-oneka na miyala yakudula yakuthulwa onekisi. 13Mkulo wachiwiri dzinache ndi Gihoni; wenewu umbafamba kugwanda na m'dziko ya Kushi. 14Mkulo wachitatu dzinache ndi Tigrisi; wenewu umbafamba kumabulukiro dzuwa a dziko ya Asiria. Mkulo wachinayi ndi Yufurate.
15Tenepo MBUYA Mulungu adaikha munthu ule m'munda wa Edeni kuti aulime na kuuyang'anira. 16MBUYA Mulungu adampanga munthu ule mbati, “Iwe unakwanisa kudya nsapo za miti yonsene ili m'mundamu, 17mbwenye nsapo za muti wakupasa udziwisi wa chadidi na chakuipa leka kudya, thangwi nsiku inadya iwe nsapo za muti wenewu, unati ufe.”
18Tenepo MBUYA Mulungu adalonga mbati, “Si pyadidi tayu kuti mamuna akhale yekha. Ndinamsasanyira mwanzache wakuthemerana naye kuti amphedze.” 19Tenepo MBUYA Mulungu adakwata mataka mbasasanya nyama zonsene na mbalame zonsene mbadza nazo kuna munthu ule kuti aone madzina akhafuna iye kuzithula. Dzina yonsene idathula munthu ule, kuthula nyama zile, yeneyo ndiye dzinache. 20Natenepo munthu ule adazithula madzina nyama zonsene na mbalame zonsene; mbwenye nkhabe ibodzi mwa izo ikhali mwanzache wakuthemerana naye kumphedza tayu.
21Tenepo MBUYA Mulungu adachitisa munthu ule kugona chitulo chakufa nacho. Iye mbali m'chitulo, Mulungu adabulusa mbavu ibodzi ya munthu ule, mbafunga pambutopo na mnofu. 22MBUYA Mulungu adasasanya mkazi kubulukira kumbavu idabulusa iye pa mamuna mbadza naye kuna iye. 23Tenepo mamuna ule adalonga mbati, “Pakumalisira pache ushu ndiye gogodo ya magogodo anga, pontho mnofu wa mnofu wanga; iye anachemerwa ‘Mkazi,’ thangwi adabulukira muna mamuna.”#2.23 Mkazi…mamuna: m'Chiheberi mafala akulonga “mkazi” na “mamuna” ambaveka chibodzi-bodzi. 24Na thangwi yeneyi mamuna anasiya babache na mache mbaphatikana na mkazache, tenepo awiriwo anakhala mbodzi.#Mt. 19.5; Mk. 10.7, 8; 1Akor. 6.16; Aef. 5.31.
25Onsene awiriwa mamuna na mkazi akhakhala chipezi-pezi, kwache hakhachita manyadzo tayu.
© Bible Society of Malawi