Luka 1
1
Me zuŋŋuna gə Luka hadzəna a Tiyufil
1Tiyufil ɗu duwuna hwa, ɗaha hay duna ɗa kutsak a hətsɗika labara s'ihay gə gagaka a duvak man de saŋa. 2Ɗa hadzək ba s'ihay gə mene ma nzəka a ma ɗa gə de ɗa tsaka ihay sahan al aray tan kwa ada tamandar ene ka saŋa. Ɗa sahan ga, sləra tan gaka ba nanɗilhətan labara sahan a ɗaha hay. 3Ənne kini əŋ sakede te ahwam a me sahan‑a ba cecena kwa ada a tamandar ene ka. Kugwan ga, əŋ hiyiika awiba a hətsɗiyakana ayika kini, abi kutə zhek i kutə zhek Tiyufil ɗu duwuna hwa, 4gəni kə sənede a jire tsəre tsugəɗay hay gə kə nzənzəka saŋa.
Malika dza labara wuh Zhaŋ ɗu bunə ɗaha
5A zamane de gə Hirudus bay a higay Zhude de ga, ɗu slumə ɗaha hay atə Askwaf s'iŋgeɗe zak, sləmay ene Zakari, wuran a giwa s'Abiya de. Hər ene shef Haruna, sləmay ene Elizabet. 6Cawuna tan atə hər ene, ɗa jire a ma s'Askwaf de, ɗa ɗəf mbəray apə me gurɗay hay Ɗuduwuna ka atə ihay gə wuran tatəfkəla saŋa ba cecena apə kalkala ene ka. 7Amá ga, ba kine ɓile kini ɗa wahika ba, aɗaba Elizabet zak təghar, cawuna tan kini ɗa ghaghalaka.
8Bigeɗe ga, Zakari niya ge sləra ene a slumə ɗaha hay atə Askwaf a adaw s'Askwaf de, aɗaba laka apə alay s'ahwam giwa tan‑a. 9Ɗa slumə ɗaha hay atə Askwaf sahan ba ka aŋa gəkəlhətəna saŋa, ɗa kətka afəka ga, bək sahan taŋəkpan a Zakari, lide ala a ma cuɗiɗɗina Ɗuduwuna de, a ləɗay a ɗuzəɗin kajiji. 10A aŋəde wuran ɗuzhe kajiji sahan ga, fuɗəɗay ɗaha hay saŋa ba cecena ɗa ŋaŋala Askwaf amide. 11Kugwan ga, Zakari ane tsa ba malika Ɗuduwuna i təfɗay a alay ɗəfka ma ɗuzə kajiji de sahan. 12Zakari ba tsaka ga, zləgutsaka, kaya a dadəɗay. 13Amá malika dzakəna, wa: «Zakari, zləŋwaɗ á viɗken ba, aɗaba Askwaf təvika maduwa aka. Hər aka Elizabet ǎ wahakana kine humas, ikə ɗəfən sləmay Zhaŋ. 14Ikə hige awiba, ɗaha hay kini duna à ɗá higiya apə barka wahaɗaya ene ka. 15Aɗaba wuran ǎ za məlmal a ma Ɗuduwuna de. Ǎ sawa bə məhay, atə ba kəla igə ŋgushike ŋgusɗay. Ǎ ruhwa i Shinekw Cuɗiɗɗina ba kwa ada tənday məman‑a. 16Ǎ mbəɗiltənŋa i ɗa s'Israyila duna ala a ma Ɗuduwuna de, Askwaf tan. 17Wuran ǎ nayede te apə miya a Ɗuduwuna ka, i shinekw atə i nzəɗa gə Eliya ɗu mbəɗɗitənande me s'Askwaf a ɗaha hay zak al ayina saŋa, a mbəɗɗilŋa i bembec pəbe hay ala a ma waghay tan de, a təfɗitənŋa a ɗa gə ɗa ge dəkdəka tsəre ŋa, gəni ɗá nje həŋkale ka i ɗa jire, a slumɗinka ɗaha hay a Ɗuduwuna ka#Malashi 4:5-6.»
18Zakari dzana a malika ane, wa: «Ə̌ŋ sənede kəma ənna ahan sahan jire saŋa? Aɗaba na ənne əŋ gika midisher, hər hwa kini ghalaka duna.» 19Malika ane zləmkənhənaŋa, wa: «Ənne ga, ənne Gabriyel, əŋ zheke a ma s'Askwaf de a gəɗin sləra. Ba wuran sləninaw a dzaɗiyak me saŋa, atə a məɗiyakana Labara Sələmna saŋa. 20Amá ike kə ɗəfəkpənŋa bə tsaw a me hwa‑a gə ǎ giya ba jire abə sərte ene ǎ naya saŋa ga, ikə giya ɗu gə peka bə me, ikə dzawa bə cine ha ala sərte de gə isahan ǎ giya.»
21A ahan de sahan, ɗaha hay ɗa ba Zakari, ghaya ɗa ge ba s'ajipu s'i mbasaɗaya ene a adaw s'Askwaf de saŋa. 22Wuran ane nayede ga, dzəgwika bə cine dzaɗitən me. Mezlene ɗa sənkede wa aŋa gə tsaya aweɗe a adaw s'Askwaf de. Akura dzaɗay ene ga, ndukikinpətan aba al alay, dzəgwika bə cine paɗipəna me a dzaɗay.
23A aŋəde sərte sləra ene kəɗaka a adaw s'Askwaf de ga, huwak aba ala adaw. 24Hənaka kutew adede a ahan ga, hər ene Elizabet nzək tənday, ha pika kiyəhka ɗara shuɓɨkəla, mezlene, wa: 25«Na igə Ɗuduwuna gəkuka ayuwa: Pakuwaŋa mbəray s'i təghar tsəre hwa saŋa a ma ɗaha hay de ba cecena.»
Malika nenil labara wuh Yesu
26Kiyəhka s'Elizabet dzəkŋa ala apə marka ga, Askwaf slənika malika Gabriyel ala a hu de gə ɗa hawa i Nazaret saŋa a higay Galile de, 27ala a ma kine dile s'iŋgeɗe de sləmay ene Mari. Di sahan ga, dagwa s'iŋgeɗe sləmay ene Zhuzef shef bay Davit yawa. 28Malika ane laka ala a ma ene de, wa: «Hige Mari! Askwaf giyakana səlam tsəre ene, Ɗuduwuna niya atə ayika.» 29Me malika sahan wushkənakude ŋa a Mari, ha dzəmka igə sa sahan gus dzaɗiya a ŋa ene de. 30Mezlene malika dzakəna, wa: «Zləŋwaɗ á viɗken bə Mari, aɗaba Askwaf giyakana səlam tsəre ene. 31Zlama ikə nje tənday, ikə wihka kine humas, ikə ɗəfən sləmay Yesu. 32Kine sahan ǎ za məlmal, à ɗá hawa i Kine s'Askwaf gə i kufa ka aŋa a away hay‑a ba cecena. Askwaf Ɗuduwuna ǎ vərən kurshi bay tsəre ceje ene Davit. 33Ǎ gure shef Zhakup ha ala bəgəna bəgəna de. Bay tsəre ene, kəɗɗay ene ǎ za ba aride.»
34Mari dzakəna a malika ane, wa: «Ahan sahan mà, ǎ giya kəmkəma, aɗaba ənne zlama əŋ səna ba a ɗaha?»
35Malika zləmkənhənaŋa, wa: «Shinekw Cuɗiɗɗina ǎ niyakaŋade, nzəɗa s'Askwaf gə i kufa ka aŋa a away hay‑a ba cecena saŋa ǎ fatiyakaŋade ba ka shinekw. Aɗaba sahan tsaw, kine gə ikə waha saŋa ǎ za cuɗiɗɗa, à ɗá hawa i Kine s'Askwaf. 36Elizabet di pabay nzək tənday, ǎ wuh kine humas. Gha ghalaka ɗəma, ɗa dzawa wa təghar kini, səgan gə nzək tənday, na kiyəhka ene dzəkŋa ala apə marka. 37Aɗaba niba igə firshiya Askwaf.»
38Mari ane, wa: «Ənne ga, ənne ɗu sləra Ɗuduwuna. Á giya aba apə dzaɗay aka ka sahan.» Mezlene malika ane hərkənde, ba huɗay ene.
Mari like adə Elizabet
39A ahan de sahan ga, Mari huwak ba yakwa yakwa ala a hu s'iŋgeɗe de a tənday kuwan s'i gurɗay Zhude de. 40Laka ləɗide a tənday s'adaw Zakari de, gəkən sa a Elizabet. 41A aŋəde Elizabet sənay a sa ene sahan ga, kine ene hahavakakude a tənday de. Mezlene Elizabet ruhwaka i Shinekw Cuɗiɗɗina. 42Ŋgulahaka ba dunduna, wa: «Askwaf giyakaŋade barka ndəmika i hər hay ba cecena, kine gə ike ikə waha saŋa kini niya i barka. 43Ənne wiya ta ɗəma ni, ha məman a Ɗuduwuna hwa nike ala a ma hwa de saŋa? 44Aɗaba a aŋəde əŋ sənay a sa aka ga, kine hwa hahavakakude a tənday de, a ma higəɗay de. 45Kə nzək higəɗay, aɗaba kə ɗəfəkpənŋa a igə Ɗuduwuna dzayaka, ǎ giya saŋa.»
Mari zəmbəla Askwaf
46Mezlene Mari, wa:
«Shifa hwa niya ɗəɗəm Ɗuduwuna,
47bembec hwa ruhwaka i higəɗay ala apə Askwaf hwa‑a, Ɗu Zluɗinaw.
48Aɗaba wuran tsiwaŋa aray a ayuwa ənne ɗu sləra ene gə aba a ama kini əŋ slaka bə saŋa.
Ba kugwan, ba kwa bəkwa bəkwa, ɗa zamane hay ba cecena à ɗá dzawa wa ənne i barka.
49Aɗaba Askwaf gə nzəɗa ba cecena a alay ene de saŋa gəgəkuka idəbələmməna.
Sləmay ene ayina cuɗiɗɗa,
50gɨtən səlam tsəre ene a ɗa gə ɗa ɗəf mbəray apə ayina ada zamane tan‑a,
ha ala ceje hay tan de.
51Wuran gika sləra duwuna i nzəɗa s'alay ene,
putsəkəltənakude ɗa gə wutə i dzəmŋa wawaɗa tsəre a ŋa de.
52Fafətkəlpətəna ɗa nzəɗa a kurshi bay tsəre tan‑a,
papəktənŋakude a ɗa mishishina.
53Tsuməktənka isələmna sələmna a ɗa gə wutə i may a tənday de,
amá ɗa gelipe ga, ɓərəktənakude al alay tan ɗara.
54Təfkənde adede a Israyila ɗu sləra ene,
səlam tsəre ene dəkəndəŋa ba,
55ka ba s'aŋa dzəktəna a ceje hay man wutə Abraham atə shef hay ene,
ha ala bəgəna bəgəna de saŋa.»
56Slɨkiya kiyəhka məŋgan, Mari pika adə Elizabet, ta huwak ala adaw.
Ɗa wahika Zhaŋ ɗu bunə ɗaha
57Sərte s'Elizabet slaka a wuhɗay ga, wahika kine humas. 58Ɗa mavendew ene atə yaha hay ene ɗa sənay wa Ɗuduwuna gəkənka səlam tsəre ene duna ga, ɗa naya a higəɗay amazhekde. 59Hənɗay adəɓa ala apə zhire ga, ɗa masləkŋa a slaɗin baŋwe a kine ane, wutan ɗa guski ɗəfɗin sləmay pəban, Zakari. 60Amá məman a kine, wa: «Kugwan ba, ma ɗəfən Zhaŋ.»
61Wutan ane ɗa dzakəna, wa: «Ajiba sləmay saŋa ba ɓile kini niba a ɗagadiyaka de.» 62Ɗa ndukikinka al alay a pəban a kine ka a mbutsəɗinamiya sləmay gə wuran gus ɗəfɗina a kine ene sahan. 63Zakari mbutsəktənamiya ihətsɗipan away, ɗa minəka ga, hadzəkpan, wa: «Sləmay ene Zhaŋ.» Wutan ane ba cecena tan ɗa ge ba s'ajipu ene. 64Ciɗa me Zakari ane pəkmiya, miɗesl ene paparakede, takənmandar‑a a dzaɗay, kaya a zəmbəl s'Askwaf abi pa taŋw. 65Mezlene zləŋwaɗ vəɗəktəna ɗa slala tan ba cecena, a tənday kuwan s'i Zhude de ba cecena ɗa dza ba me hay sahan. 66Ba cecena ɗa gə ɗa sənay a labara sahan ɗa takənmandar‑a a dzəmɗiya a ŋa tan de, wa: «Kine saŋa mà, ǎ za wiya ta wuran?» Aɗaba nzəɗa Ɗuduwuna niya a kine sahan de ba parakka.
Zakari zəmbəla Askwaf
67Mezlene Zakari pəban a kine ane, ruhwaka i Shinekw Cuɗiɗɗina ga, takənmandar‑a a mbəɗɗitənande me s'Askwaf, wa:
68«Zhimbilinmən Ɗuduwuna, Askwaf s'Israyila,
aɗaba ɗəfəktənande sləmay a ɗagadiyana, səsəkərəktənede.
69Dzakəlhəmənŋa i ɗu zluɗimene gə nzəɗa ene niya saŋa,
a shef Davit de, ɗu sləra ene,
70ka ba s'aŋa zak dzaɗiya zuwuna ada me ɗa cuɗiɗɗina ene ka gə ɗa mbəɗəktənande me ene a ɗaha hay saŋa.
71Zak dzaɗiya wa ǎ mbirzlemenede ada alay ɗa dawa man‑a,
atə ada alay‑a ɗa gə ka ɗa micmene bə saŋa ba cecena.
72Gəktənka səlam tsəre ene a ceje hay man‑a,
amana cuɗiɗɗina ene saŋa dəkəndəŋa ba.
73Aɗaba zak pəɗinka muɗəɗay a ceje man s'Abraham‑a,
74wa ǎ mbirzlemenede ada alay ɗa dawa man‑a,
gəni ma gɨna bə sləra i zləŋwaɗ aride,
75ma gɨkiya ɗa cuɗiɗɗina atə ɗa jire,
a aray ene de a zaɗay man de ba cecena.
76Ike kini, kine hwa, à ɗá heken i ɗu mbəɗɗitənande me s'Askwaf gə i kufa ka aŋa a away hay‑a ba cecena saŋa a ɗaha hay,
aɗaba ike ikə ŋgəran a Ɗuduwuna a slumɗinka ciba.
77Ikə ɗəftənde a zhek de a ɗagadiyana a sənɗiyede
gəni wuran ǎ naya a zluɗitəna i ɓusɗitənka hipe hay tan.
78Aɗaba Askwaf man wuran ɗu magwe, səlam tsəre ene awiba,
ahan tsaw, parakka tsəre s'i ŋamandaɗay ǎ nimənaŋade ada akufa,
79a mbəslɗilhətan parakka tsəre a ɗa gə wutə a wurek de, ghaya wutə abi humbats mətska a ŋa de saŋa,
atə a məɗimene ala apə ciba lapiya tsəre ka.»
80Zhaŋ ane təf ba ghərɗay, həŋkale ene kini təf ba ɗəfɗinaŋade. Wuran zak aba akiɓde ha laka apə sərte ka gə mbəslkəlhətan ŋa ene a ɗa s'Israyila.
© (Active), Wycliffe Bible Translators, Inc. All rights reserved.