ഓഗന്നാന് 2
2
കാനാവുല കല്യണ
1ഇദ് കളിന്ത് മൂറാവാദ് നാള് ഗലീല നാഡ്‌ല കാനാവു എന്നുവ പട്ടണാത്ത്‌ല് ഒന്റു കല്യണ മാഡ്‌നാര്. അയി കല്യണാത്ത്‌ല് ഏസ്സ് അവ്വേസിമ് ഇന്താള്. 2ഏസ്സ്‌നാമ് അയാള് സൊല്ലുപഡി നഡാക്ക്‌ന്റവാര്‌നാമ് കല്യണാക്ക് ബ്‌ളിത്തിന്താര്. 3ഊറബെത്ത മുന്തിരി സാര തീര്‌ഗാട്ടി ഏസ്സ് അവ്വേസി ഏസ്സ്‌ക്ക്: <<അവാര്‌ക്ക് ഊറബെത്ത മുന്തിരി സാര തീന്ത് പോറ്റു>> എന്റ് സൊന്നാള്.
4ഏസ്സ് അവാള്‌ക്ക്: <<പെ്ണ്ണ്‌പെ്ളേഗെ, നാന് എന്ത് ഗേഡൊ എന്റ് നീ എനാക്ക് സൊല്ലുഡൊ എന്റില്ലെ? അദ് ഗേയ എനാക്കുള്ള നേര ഇന്നിമ് ആഗാലെ>> എന്റ് സൊന്നാന്.
5പ്‌റ ഏസ്സ് അവ്വേസി ഗിലാസഗാറാര്‌ക്ക്: <<അവാന് എന്തൊന്റു സൊന്നദാന നിമ്മ അദേപാസെ താനെ ഗേന്>> എന്റ് സൊന്നാള്.
6അദ്‌ല് കല്ല്‌ല് താനെ മാഡിര്‌ക്കുവ ആറ് അണ്ടാവുഗാള് ഇന്ത്‌ദ്. എഗുദാര് സട്ട്‌മെ്ട്ട്‌പഡി അവാര്‌ന സുത്താപ്പ് മാഡ്യ ബേ്ണ്ടി നീര് തുമ്പിസി ബെക്കുവാദ് ഈ അണ്ടാവുഗാള്‌ക്ക്‌ത്തെ. ഈ ഒന്റൊന്റു അണ്ടാവുഗാള്‌ക്ക് എമ്പദ് പഡിലിന്ത് നൂറ്റിരുവദ് പഡി മാട്ട്‌ക്ക് നീര് പ്‌ഡിക്ക്‌മ്.
7<<ഈ അണ്ടാവുഗാള്‌ക്ക് നീര് തുമ്പുസുനു>> എന്റ് ഏസ്സ് ഗിലാസഗാറാര്‌ക്ക് സൊന്നാന്. അദുക്കുള ഗിലാസഗാറാര് അണ്ടാവുഗാള് ബക്ക് മാട്ട്‌ക്ക് നീര് തുമ്പുസുനാര്. 8അദ്‌ക്ക് പ്‌റ ഏസ്സ് ഗിലാസഗാറാര്‌ക്ക്: <<ഇന്നാല് അയി അണ്ടാവുഗാള്‌ലിന്ത് മുളുക്കി എ്ഡ്‌ത്ത് പോയി പന്തി കാര്യ നോഡുന്റവാന്‌ക്ക് കൊഡുനു>> എന്റ് സൊന്നാന്.
അദുക്കുള അവാര് എ്ഡ്‌ത്ത് പോയി കൊഡുത്താര്. 9അദുക്കുള ഊറബെത്ത നല്ല മുന്തിരി സാര ആയി തീന്ത അയി നീര്‌ന പന്തി കാര്യ നോഡുന്റവാന് കുഡിത്ത് നോഡുനാന്. അദ് ഏദ്‌ലിന്ത് കെ്ഡേത്ത്‌ദെന്റ് നീര് മറ്‌ഗ്‌നവാര്‌ക്ക് അല്ലാദെ പന്തി കാര്യ നോഡുന്റവാന്‌ക്ക് തെര്യാലെ. അദുക്കുള അയാള് കല്യണ മാപ്‌ളെന ബ്‌ളിത്ത് 10അയാള്‌ന: <<എല്ലാ ആള്‌ഗാള്‌മ് ഊറബെത്ത നല്ല മുന്തിരി സാരനത്തെ മുദാല് കൊഡുക്കുവാര്. അദ്‌ന കുഡിത്ത് മദ്യാന പ്‌റാത്തെ അത്ത്‌റ നല്ലാദല്ലാത്ത ഊറുന മുന്തിരി സാര കൊഡുക്കുവാദ്. ആന നീ ഊറുന നല്ല മുന്തിരി സാര ഇന്നമാട്ട്‌ക്ക് ഈ്ട്ടി ബെത്തിന്തായല്ല?>> എന്റ് സൊന്നാന്.
11ഇദ്‌ത്തെ ഏസ്സ് മുദാല് ഗേന്ത അദിസ്യമാന അഡ്യാള. ഇദ്‌ന ഗലീല നാഡ്‌ല കാനാവു എന്നുവ പട്ടണാത്ത്‌ല് ബെത്ത് ഗേന്ത് ഏസ്സ് തന്ന് മദ്‌പ്പ്‌ന കാട്ടി കൊഡുത്താന്. ഇദ്‌ന കണ്ട് ഏസ്സ് സൊല്ലുപഡി നഡാക്ക്‌ന്റവാര് അയാള്‌ന നമ്പ്‌നാര്. 12അദ്‌ക്ക് പ്‌റ ഏസ്സ്‌മ് അയാള് അവ്വേസിമ് തമ്പ്യച്ചനാമ്‌മ് അയാള് സൊല്ലുപഡി നഡാക്ക്‌ന്റവാര്‌മ് കവറ്‌ണഗൂമു പട്ടണാക്ക് പോയി അദ്‌ല് ലേസ നാള് ഇന്താര്.
ഏസ്സ് സാമിബീ്ഡ്‌ന സുത്താപ്പ് മാഡ്‌ന്റാന്
13എഗുദാര് ഗേവ പെസഗെ നോമ്പി അഡ്‌ത്തിന്താദ്‌നാലെ ഏസ്സ് എര്‌സലേമ്‌ക്ക് പോനാന്. 14അദ്‌ലിര്‌ക്കുവ സാമിബീ്ഡ്‌ല് ആള്‌ഗാള് ഓരി മാഡ്‌ഗാള്, കൊറ്യാഡ്‌ഗാള് സോറെ പക്കിഗാള്‌നെല്ല ബിക്കുവാദ്‌നാമ്, പണ കയിമാറ്‌ന്റവാര് കുക്കാന്ത്‌റ്‌ക്കുവാദ്‌നാമ് ഏസ്സ് കണ്ടാന്. 15അദുക്കുള ഏസ്സ് കണ്ണിഗാള്‌ല് ഒന്റു സാട്ടെവാര് മാഡി കൊറ്യാഡ്‌ഗാളോഡാമ് ഓരി മാഡ്‌ഗാളോഡാമ് ഒപ്പ എല്ലാവാര്‌നാമ് അദ്‌ലിന്ത് ബെ്ളിഗെ മുഡിക്കി ബ്‌ട്ടാന്. പണ കയിമാറ്‌ന്റവാര് പണാന ഇലാസി തള്ളി അവാര് മേസെഗാള്‌ന ഉന്തി ബീ്ക്ക്‌നാന്. 16സോറെ പക്കിഗാള്‌ന ഏവര ഗേന്റവാര്‌ക്ക് ഏസ്സ്: <<ഇദ്‌ഗാള്‌നെല്ല ഇദ്‌ലിന്ത് ബെ്ളിഗെ എ്ഡ്‌ത്ത് പോനു. എന്നപ്പാന് ബീ്ഡ്‌ന സന്തെ കഡെ മാഡദേന്>> എന്റ് സൊന്നാന്.
17അദുക്കുള അയാള് സൊല്ലുപഡി നഡാക്ക്‌ന്റവാര്‌ക്ക്: <<നിന്ന് ബീ്ഡ്‌ന പറ്റി എനാക്കിര്‌ക്കുവ എ്ണ്ണ എന്ന് മനേസ്സ്‌ല് ബെന്തുരുഗുന്റു>>#സാമി പാട്ട് ബൊക്കു 69:9 എന്റ് സാമി സൊല്ലുസുലാക്കാത്ത്‌ല് എ്ള്‌ദിര്‌ക്കുവാദ്‌ന നെനേവു ബന്ത്‌ദ്.
18അദുക്കുള എഗുദാര് ഏസ്സ്‌ന: <<ഇത്തെല്ല ഗേയ നിനാക്ക് അദിഗര ഇര്‌ക്ക്‌ന്റ് എന്റ് കാട്ട്യ നിനാക്ക് എന്ത് അദിസ്യമാന അഡ്യാള ഗേയ മുഡിമ്?>> എന്റ് കേ്ട്ടാര്.
19അദുക്കുള ഏസ്സ് അവാര്‌ക്ക്: <<ഈ സാമിബീ്ഡ്‌ന പിര്‌ങ്ക്‌ന്. നാന് അദ്‌ന മൂറു നാള് കുള്ളുക്കു കെ്ട്ടി തന്റെ>> എന്റ് സൊന്നാന്.
20അദുക്കുള എഗുദാര് ഏസ്സ്‌ന: <<ഈ സാമിബീ്ഡ്‌ന കെ്ട്ടി മുഡിക്ക്യ നാപത്താറ് ബര്‌സ്സ പ്‌ഡിത്ത്‌ദ്. ആന നീ അദ്‌ന മൂറു നാള് കുള്ളുക്കു കെ്ട്ടി മുഡിക്കുവായ?>> എന്റ് കേ്ട്ടാര്. 21ആന ഏസ്സ് തന്ന് ഉരുവു എന്നുവ സാമിബീ്ഡ്‌ന പറ്റിത്തെ സൊന്നാദ്. 22ഏസ്സ് ഇത്തെ സൊന്നാദ്‌ന അയാള് സത്തവാര്‌ലിന്ത് ഉജുര്‌ളാഗ്‌ന പ്‌റ അയാള് സൊല്ലുപഡി നഡാക്ക്‌ന്റവാര് നെനേത്താര്. ഇദ്‌ന പറ്റി സാമി ബൊക്കുലു എ്ള്‌ദിര്‌ക്കുവാദ്‌നാമ് ഏസ്സ് സൊന്നാദ്‌നാമ് അവാര് നമ്പ്‌നാര്.
മന്‌സാന് പളാക്കന പറ്റി ഏസ്സ്‌ക്ക് ഇര്‌ക്കുവ അറുവു
23പെസഗെ നോമ്പി ഗളിഗെ ഏസ്സ് എര്‌സലേമ്‌ല് ഇര്‌ക്കാട്ടി ഗേന്ത അദിസ്യമാന അഡ്യാളഗാള്‌ന കണ്ട് എഞ്ചോ ആള്‌ഗാള് ഏസ്സ്‌ന നമ്പ്‌നാര്. 24ആന എല്ലാ മന്‌സാര് പളാക്കഗാള്‌നാമ് ഏസ്സ്‌ക്ക് തെരിവാദ്‌നാലെ അവാര്‌ന നമ്പി ഏസ്സ് തനാന പറ്റി അവാര്‌ക്ക് നേരെ സൊല്ലാലെ. 25മന്‌സാന് മനേസ്സ്‌ല് ഇര്‌ക്കുവ എ്ണ്ണ എത്തവാദ് എന്റ് ഏസ്സ്‌ക്ക് താനെ തെരിന്തിന്ത്‌ദ്. അദ്‌നാലെ അവാര്‌ന പറ്റി ബേ്റെ ആള്‌ഗാള് തനാക്ക് സൊല്ലി കൊഡുക്കുവ തേവി ഇല്ലാദിന്ത്‌ദ്.
New Life Computer Institute