മത്തായി 2
2
ക്‌ളാക്ക് സാരിന്ത് നോഡ്യ ബന്തവാര്
1എരോദ രാജാവായിന്ത കാലാത്ത്‌ല് എഗുദ നാഡ്‌ല ബെദ്ദ്‌ലെഗേമ് പട്ടണാത്ത്‌ല്‌ത്തെ ഏസ്സ് പ്‌റാന്താദ്. ഏസ്സ് പ്‌റാന്ത പ്‌റ ക്‌ളാക്ക് സാരിന്ത് നാള്‌നച്ചെത്ത്‌റ നോഡുന്റവാര് എര്‌സലേമ്‌ക്ക് ബന്താര്. 2<<എഗുദാര് രാജാവായി പ്‌റാന്ത മഗ ഏദ്‌ല്? അയാള് പ്‌റാന്താന് എന്റ് കാട്ടുവ ബെ്ള്ളി ക്‌ളാക്ക് സാരി കഡാന്ത്‌ദ്‌ന കണ്ട് എമ്മ അയാള്‌ന കുമ്മുഡ്യ ബന്ത്‌റ്‌ന്റേമ്>> എന്റ് അവാര് ആള്‌ഗാള്‌ക്ക് സൊന്നാര്.
3ഇദ്‌ന കേ്ള്‌ക്കാട്ടി എരോദ രാജാവുമു എര്‌സലേമ് പട്ടണഗാറാര്‌മ് ഒട്ടുക്കു അങ്കലാപ്‌പട്ടാര്. 4എരോദ രാജാവു എഗുദാര് പൂസാരി തലെവാര്‌ഗാള്‌നാമ് ബേദബാത്ത്യനാമ്‌ഗാള്‌നാമ് ഒന്റായി ബ്‌ളിത്ത് ബരിസ്സി: <<ക്‌റ്‌സ്‌ത്ത് പ്‌റാക്കുവാദ് ഏദ്‌ല്>> എന്റ് അവാര്‌ന കേ്ട്ടാന്. 5-6അദുക്കുള അവാര്: <<എഗുദ നാഡ്‌ല ബെദ്ദ്‌ലെഗേമ്‌ല്‌ത്തെ പ്‌റാക്കുവാദ്>> എന്റ് സൊന്നാര്. <<ഇദ്‌ന പറ്റി സാമിദാസ്:
<എഗുദ നാഡ്‌ല ബെദ്ദ്‌ലെഗേമേ,
നീ സ്‌ന്ന പട്ടണാനാല്‌മ് എഗുദ നാഡ്‌ല പട്ടണഗാള്‌ല് നീ മുക്ക്യമാന പട്ടണത്തെ.
എന്ത്‌ക്കെന്റ് സൊന്ന എന്ന് കൂട്ടാര് ഇസ്‌റവേല്‌ഗാറാര്‌ന
ഒന്റു മാട്ട്യാന്‌ന പാസെ നഡാത്ത്യ പോന്റവാന് നിന്ന് പട്ട്‌ലിന്ത്‌ത്തെ ബന്റാന്>#മീഗ 5:2
എന്റ് എ്ള്‌ദിര്‌ക്ക്‌ന്റാന്>> എന്റ് സൊന്നാര്.
7അദുക്കുള എരോദ രാജാവു അയി നാള്‌നച്ചെത്ത്‌റ നോഡുന്റവാര്‌ന സൂഗാന ബ്‌ളിത്ത് ഏദ് ഗളിഗെ ബെ്ള്ളി കഡാന്ത്‌ദെന്റ് സൊക്കാന കേ്ട്ട് ബെത്താന്. 8പ്‌റ എരോദ രാജാവു: <<നിമ്മ ബെദ്ദ്‌ലെഗേമ്‌ക്ക് പോയി അയി മഗാന പറ്റ്യുള്ള കാര്യന സൊക്കാന കേ്ട്ട് നോഡുനു. കണ്ടപ്‌റ നാന്‌മ് അയി മഗാന കുമ്മുഡ്യ ബേ്ണ്ടി നിമ്മ ബന്ത് എനാക്ക്‌മ് സൊല്ലുനു>> എന്റ് സൊല്ലി അവാര്‌ന സൊല്ലി ബ്‌ട്ടാന്.
9അത്തെ രാജാവു സൊന്നാദ്‌ന അവാര് കേ്ട്ട് അദ്‌ലിന്ത് പോനാര്. അവാര് ക്‌ളാക്ക് സാരി കണ്ട ബെ്ള്ളി മഗ ഇര്‌ക്കുവാദ്‌ക്ക് നേരെ ബന്ത് നില്ല മാട്ട്‌ക്ക് അവാര് മുന്നുക്കു പോയി കൊണ്ടിന്ത്‌ദ്. 10അത്തെ അവാര് അയി ബെ്ളളിന കണ്ടാദ്‌നാലെ പിര്യപൊങ്കിമറ്‌ന്താര്. 11അവാര് അയി ബീ്ഡ്‌ക്ക് എജ്ജ്‌ഗാട്ടി അവ്വേസി മറിയോഡൊപ്പ മഗാന അവാര് കണ്ടാര്. അവാര് സഡങ്ക ബ്‌ന്ത് അയി മഗാന കുമ്മുഡുനാര്. പ്‌റ അവാര് പെ്ട്ടിന ത്‌റാന്ത് പൊന്നുനാമ്, തുമ്മനാമ്, മൂരു#2:11മൂരു ഇദ് തുമ്മാന പാസെ ഇര്‌ക്കുവ മര കറേത്തെ. ഇദ്‌ക്ക് നല്ല ബാഡെ ഇര്‌ക്ക്‌മ്. എന്റ് സൊല്ലുവ നല്ല ബാഡെ അഡിക്കുവ ജാദിനാമ് കാണിക്കെ ബെത്താര്. 12ആന എരോദ രാജാവു പട്ട്‌ക്ക് തിരിഗി പോഗാദേന് എന്റ് കനേസ്‌ല്‌ല് ബന്ത് സാമി സൊന്നാദ്‌നാലെ അവാര് ബേ്റൊന്റു ബട്ടെമേലെ തമ്മ് നാഡ്‌ക്ക് തിരിഗി പോനാര്.
മിസ്‌റേമ് നാഡ്‌ക്ക് ഓഡി പോന്റാര്
13അവാര് പോന പ്‌റ ആണ്ടവാന് ദൂദാന് കനേസ്‌ല്‌ല് ബന്ത് ഓസേപ്‌ക്ക്: <<നീ ഇ്ളാഗി മഗാനാമ് അവ്വേസിനാമ് കൂട്ടി മിസ്‌റേമ് നാഡ്‌ക്ക് ഓഡി പോയി നാന് നിനാക്ക് സൊല്ലമാട്ട്‌ക്ക് അദ്‌ല് താനെ ഇര്. എന്ത്‌ക്കെന്റ് സൊന്ന എരോദ രാജാവു മഗാന കൊല്ല്യ ബേ്ണ്ടി പരാക്ക്യ നെനേക്ക്‌ന്റാന്>> എന്റ് സൊന്നാന്. 14അദ്‌നാലെ ഓസേപ് ജാമാത്ത്‌ല് താനെ ഇ്ളാഗി മഗാനാമ് അവ്വേസിനാമ് കൂട്ടി എ്ഡ്‌ത്ത് മിസ്‌റേമ് നാഡ്‌ക്ക് പോനാന്. 15എരോദ രാജാവു സാഗ മാട്ട്‌ക്ക് അവാര് അദ്‌ല് താനെ ഇന്താര്. <<മിസ്‌റേമ് നാഡ്‌ലിന്ത് നാന് എന്ന് മഗാന്‌ന ബ്‌ളിത്ത് ബര്‌സ്സ്‌നെ>>#ഓസേയ 11:1 എന്റ് ആണ്ടവാന് സാമിദാസ്‌ഗാള്‌ന ബെത്ത് സൊന്ന കാര്യ അദേപാസെ നഡാന്ത്‌ദ്.
എരോദ രാജാവു ബെദ്ദ്‌ലെഗേമ്‌ല ഗണ്ട്‌മക്കാള്‌ഗാള്‌ന കൊല്ലുന്റാന്
16നാള്‌നച്ചെത്ത്‌റ നോഡുന്റവാര് തനാന ഏമാത്ത്‌നാര് എന്റ് തെരിഗാട്ടി എരോദ രാജാവു ദൊഡ്ഡാദ്‌ക്ക് മൊനേക്ക് തെ്ട്ട്‌നാന്. അദ്‌നാലെ മഗ പ്‌റാന്താദ്‌ന കാട്ട്‌ന ബെ്ള്ളിന പറ്റി നാള്‌നച്ചെത്ത്‌റ നോഡുന്റവാര്‌ന കേ്ട്ട് ബെത്ത സമ്യ കണാക്ക്‌ന നോഡി അയി രാജാവു ബെദ്ദ്‌ലെഗേമ് പട്ടണാക്ക്‌മ് അദ്‌ക്ക് സുറ്റീല്‌മിര്‌ക്കുവ എല്ലാ എ്ഡെഗാള്‌ക്ക്‌മ് ആള് ബ്‌ട്ട് റാഡ് ബയിസ്സ്‌മ് റാഡ് ബയിസ്സ്‌ക്ക് അഡിമ് ഇര്‌ക്കുവ ഗണ്ട്‌മക്കാള്‌ഗാള്‌ന ഒട്ടുക്കു കൊന്റാന്. 17-18അത്തെ:
<<റാമാല് ഒന്റു ജദ്ദ കേ്ട്ട്‌ദ്.
കേ്സി ജദ്ദാമ് ദുക്കാക്ക് മണ്ടെനമാര്‌ന അഡിത്ത് കേ്യിവ ജദ്ദാമ്‌ത്തെ.
റാഗേല് തന്ന് മക്കാള്‌ഗാള്‌ക്ക് ബേ്ണ്ടി കേ്യിന്റാള്,
ആള്‌ഗാള് പിരാക്കുവാദ്‌ന കേ്ള്‌ക്ക്യ ഗുഡി അവാള്‌ക്ക് മനേസ്സില്ലാദിന്ത്‌ദ്.
എന്ത്‌ക്കെന്റ് സൊന്ന അവാള് മക്കാള് സത്തിന്താര്>>#ഇരെമ്യാവു 31:15
എന്റ് ഇരെമ്യ സാമിദാസ്#2:17–18 സാമിദാസ് സാമിക്ക് സൊല്ല്യ ഇര്‌ക്കുവ കാര്യഗാള്‌ന ആള്‌ഗാള്‌ക്ക് സൊല്ലുവ ആള്‌ത്തെ സാമിദാസ്. ഇയാള്‌ന സാമിത്തെ തെരിന്തെ്ഡ്‌ത്ത് ഇര്‌ക്കുവാദ്. മുന്തെ കാലാത്ത്‌ല് നഡാന്താദ്‌ന പറ്റിമ് ഇന്നാല് നഡാക്കുവാദ്‌ന പറ്റിമ് ഇന്നി നഡാക്ക്യ പോവാദ്‌ന പറ്റിമ് അയാള് ആള്‌ഗാള്‌ക്ക് സൊല്ലുവാന്. സൊന്നാദ് അദേപാസെ നഡാന്ത്‌ദ്.
നസറേത്ത് പട്ടണാക്ക് തിരിഗി ബന്റാര്
19അത്തെ എരോദ രാജാവു സത്ത പ്‌റ ആണ്ടവാന് ദൂദാന് മിസ്‌റേമ്‌ല് ബെത്ത് ഓസേപ്‌ക്ക് കനേസ്‌ല്‌ല് ബന്ത്: 20<<മഗാന കൊല്ലുഡൊ എന്റ് നെനേത്തിന്തവാര് സത്താര്. അദ്‌നാലെ നീ ഇ്ളാഗി മഗാനാമ് അവ്വേസിനാമ് കൂട്ടി എ്ഡ്‌ത്ത് ഇസ്‌റവേല് നാഡ്‌ക്ക് പൊ>> എന്റ് സൊന്നാന്.
21അദ്‌നാലെ അയാള് ഇ്ളാഗി മഗാനാമ് അവ്വേസിനാമ് കൂട്ടി എ്ഡ്‌ത്ത് ഇസ്‌റവേല് നാഡ്‌ക്ക് പോനാന്. 22ആന എരോദ രാജാവു സത്ത പ്‌റ അയാള് മഗാന് അറ്‌ക്കലോസു എഗുദ നാഡ്‌ന ആള്‌ന്റാന് എന്റ് ഓസേപ്‌ക്ക് സേദി കെ്ഡേത്ത്‌ദ്. അദുക്കുള അയാള് അദ്‌ക്ക് പോയ അഞ്ച്‌നാന്. അദ്‌ക്ക് പോഗ ബേ്ഡ എന്റ് കനേസ്‌ല് കാട്ട്‌നാദ്‌നാലെ അയാള് അദ്‌ലിന്ത് ഗലീല നാഡ് സാരിഗാള് പോനാന്. 23അദ്‌ല് ഓസേപ് നസറേത്ത് എന്നുവ പട്ടണാക്ക് പോയി ഇന്താന്. അത്തെ ഏസ്സ്‌ന പറ്റി <<നസറേത്ത്‌ഗാറാന് എന്റ് ബ്‌ളിക്കുവാര്>> എന്റ് സാമിദാസ്‌ഗാള്‌ന ബെത്ത് സൊല്ലിന്താദ് നഡാന്ത്‌ദ്.
New Life Computer Institute