മത്തായി 23
23
ഏസ്സ് പരിസാര്‌ഗാള്‌ന പറ്റിമ് ബേദബാത്ത്യനാമ്‌ഗാള്‌ന പറ്റിമ് സൊന്റാന്
1പ്‌റ ഏസ്സ് ആള്‌ഗാള്‌ക്ക്‌മ് തന്ന് സൊല്ലുപഡി നഡാക്ക്‌ന്റവാര്‌ക്ക്‌മ് ഇത്തെ സൊന്നാന്: 2<<ബേദബാത്ത്യനാമ്‌ഗാള്‌മ് പരിസാര്‌ഗാള്‌മ് മോസെ ബെത്ത സാമി സട്ടാന പറ്റി പഡുസുവാദ്‌ക്കുള്ള അദിഗാരിഗാളായി ഇര്‌ക്ക്‌ന്റാര്. 3അദ്‌നാലെ അവാര് നിമാക്ക് സൊല്ലുവാദ്‌ന ഒട്ടുക്കുമു കേ്ട്ട് നഡാന്. അവാര് ഗേയ സൊല്ലുവാദ്‌ന ഗേന്ത്‌മ് നഡാന്. ആന അവാര് ഗേവ പാസെ നിമ്മ ഗേഗാദേന്. എന്ത്‌ക്കെന്റ് സൊന്ന അവാര് സൊല്ലുവാദല്ലാദെ ഗേവാദില്ല്യല്ല? 4ആള്‌ഗാള്‌ക്ക് ബുദ്ദിമുട്ടു മാഡുവ കഡ്‌പ്പമാന സട്ടഗാള് അവാര് ബെത്ത് അദേ സട്ടപഡി നഡാക്ക്യ ആള്‌ഗാള്‌ന നത്ത്‌ന്റാര്. ആന അവാര് ബെക്കുവ സട്ടഗാള് പഡി നഡാക്ക്യ ആള്‌ഗാള്‌ക്ക് ഒന്റു ഉദാവിമ് ഗേയ അവാര്‌ക്ക് മനേസ്സില്ലെ.
5തമ്മ ഗേവ ഗിലാസഗാളെല്ല മന്‌സാര് കാണ്യ ബേ്ണ്ടിത്തെ അവാര് ഗേവാദ്. സാമി സൊല്ലുസുലാക്കന എ്ള്‌ദി ഇക്കി ബെത്ത്‌റ്‌ക്കുവ പെ്ട്ടിന ദൊഡ്ഡാദ് മാഡി തലേക്ക് കെ്ട്ടി ബെക്ക്‌ന്റാര്. തമ്മ ഇക്കുവ ജൊഗേക്ക് കുത്തി മൂട്ടുവ താനെന നീ്ട്ട മാഡ്‌ന്റാര്#23:5 ഇത്തെ ഗേവാദ് തമ്മ ബക്‌തിഗാറാര് എന്റ് കാട്ട്യ ബേ്ണ്ടിത്തെ. . 6ബിര്‌ന്ത് പട്ട്‌ല് എല്ലാര് മുന്നുക്കു ഇര്‌ക്ക്യാമ് എഗുദാര് പരേസുവ ബീ്ഡ്‌ല് മുക്ക്യമാന എ്ഡേല് കുക്കാക്ക്യാമ് 7സന്തേക്ക്‌റാഗ ഇര്‌ക്ക്‌ന്റവാര് മദ്‌പ്പ് കെ്ഡേസ്യാമ്, ആള്‌ഗാള് തമാന <ഗുരുവെ> എന്റ് സൊല്ല്യാമ് അവാര് ആസെപഡ്‌ന്റാര്.
8ആന അഡ്‌ത്തവാര് നിമാന <ഗുരുവു> എന്റ് ബ്‌ളിക്ക്യ പാങ്കില്ലെ. നിമാക്ക് ഗുരുവു ഒരുത്താന്‌ത്തെ. നിമ്മ ഒട്ടുക്കു അണ്ണാര്‌തമ്പ്യാര്‌ന പാസെത്തെ. 9നിമ്മ ബൂമില് ആര്‌നാമ് <അപ്പാന്> എന്റ് ബ്‌ളിക്ക ബേ്ഡ. മേലോഗാത്ത്‌ല സാമി ഒരുത്താന്‌ത്തെ നിമാക്ക് അപ്പാന്. 10നിമ്മ <തലെവാര്> എന്റ് പേര് എ്ഡ്‌ക്കദേന്. ക്‌റ്‌സ്‌ത്ത് ഒരുത്താന്‌ത്തെ നിമാക്ക് തലെവാന്. 11നിമ്മ് കൂട്ടാത്ത്‌ല് എല്ലാര്‌ക്ക് ബ്‌ഡ ദൊഡ്ഡവാന് ആയിര്‌ക്ക്‌ന്റവാന് നിമ്മ് കൂട്ടാത്ത്‌ല എല്ലാ ആള്‌ഗാള്‌ക്ക്‌മ് ഗിലാസഗാറാന് ആയിര്‌ക്കുഡൊ. 12തനാന താനെ ദൊഡ്ഡവാന് മാഡ്‌ന്റവാന്‌ന സാമി സ്‌ന്നവാന് മാഡുവാന്. തനാന താനെ സ്‌ന്നവാന് മാഡ്‌ന്റവാന്‌ന സാമി ദൊഡ്ഡവാന് മാഡുവാന്.>>
ഏസ്സ് ബേദബാത്ത്യനാമ്‌ഗാള്‌നാമ് പരിസാര്‌ഗാള്‌നാമ് കുറ്റ സൊന്റാന്
13<<ബക്‌തിഗാറാരായി നഡിക്കുവ ബേദബാത്ത്യനാമ്‌ഗാള്‌മ് പരിസാര്‌ഗാള്‌മ് ആയിര്‌ക്ക്‌ന്റവാരെ, നിമാക്ക് എത്ത്‌റ കജട്ട. നിമ്മ ആള്‌ഗാള്‌ന സാമി ആളുവാദ്‌ക്ക് കഡാക്ക്യ ബ്‌ഡുവാദില്ലെ. നിമ്മ സാമി ആള്‌ന്റവാര് ആയ മനേസ്സ് ബെക്കുവാദ്‌മില്ലെ. സാമി ആള്‌ന്റവാര് ആയ ഓരാഡ്‌ന്റവാര്‌ന നിമ്മ അദ്‌ക്ക് ബ്‌ഡുവാദ്‌മില്ലെ.#23:13 മുദാല് എ്ള്‌ദ്‌നാദ്‌ന നോഡി എ്ള്‌ദ്‌ന പാദി കായിദാത്ത്‌ല് പദിനാലാവാദ് സൊല്ലു ഇല്ലെ. <<ബക്‌തിഗാറാരായി നഡിക്കുവ ബേദബാത്ത്യനാമ്‌ഗാള്‌മ് പരിസാര്‌ഗാള്‌മ് ആയിര്‌ക്ക്‌ന്റവാരെ, നിമാക്ക് എത്ത്‌റ കജട്ട. നിമ്മ മ്‌ണ്ടേസ്യാര് സൊത്തുഗാള്‌ന എ്ഡ്‌ക്ക്‌ന്റ്‌റ്. ആള്‌ഗാള് കാണ്യ ബേ്ണ്ടി എഞ്ചോ ഗളിഗെ പരേസ്‌ന്റ്‌റ്. ഇത്തെ ഗേവാദ്‌നാലെ നിമാക്ക് ദൊഡ്ഡ ദെ്ണ്ടണെ ബര്‌മ്.>>
15ബക്‌തിഗാറാരായി നഡിക്കുവ ബേദബാത്ത്യനാമ്‌ഗാള്‌മ് പരിസാര്‌ഗാള്‌മ് ആയിര്‌ക്ക്‌ന്റവാരെ, നിമാക്ക് എത്ത്‌റ കജട്ട. നിമ്മ ഒരുത്താന്‌ന മദാക്ക് സേത്ത്യ ബേ്ണ്ടി കഡാല് കഡാന്ത്‌മ് പോന്റുറു. എല്ലാ നാഡ്‌ക്ക്‌റാഗാമ് പോന്റുറു. അത്തെ ഒരുത്താന്‌ന നിമ്മ മദാക്ക് സേത്ത്‌ന പ്‌റ നിമാക്ക് കെ്ഡേക്കുവ നരഗ ദെ്ണ്ടണെന ബ്‌ഡ ദൊഡ്ഡ ദെ്ണ്ടണേക്ക് അയാള്‌ന തഗ്‌ദ്യുള്ളവാന് മാഡ്‌ന്റ്‌റ്.
16കുറുഡാര്‌ന പാസെ ബട്ടെ കാട്ടി പോന്റവാരെ, നിമാക്ക് എത്ത്‌റ കജട്ട. <ആരാറ്റ സാമിബീ്ഡ്‌ന സൊല്ലി സത്ത്യ ഗേന്തദാന അദ് ദൊഡ്ഡ കാര്യല്ല എന്റ്‌മ്, സാമിബീ്ഡ്‌ല പൊന്നുന സൊല്ലി സത്ത്യ ഗേന്തദാന സത്ത്യ ഗേന്ത കാര്യന ഗേന്ത് കൊഡുക്ക്യ പൊറുപ്പിര്‌ക്ക്‌ന്റ്> എന്റ്‌മ് നിമ്മ സൊന്റുറു. 17ബുദ്ദില്ലത്തവാര്‌മ് കണ്ണ്‌കുറുഡാര്‌ന പാസേമ് ഇര്‌ക്ക്‌ന്റവാരെ, പൊന്നൊ പൊന്നുന സുത്താപ്പ് മാഡുവ സാമിബീ്ഡൊ ഏദ് ദൊഡ്ഡാദ്? 18<ഒരുത്താന് പലി കൊഡുക്കുവ മദ്‌ല്‌ന സൊല്ലി സത്ത്യ ഗേന്തദാന അദ് ദൊഡ്ഡ കാര്യല്ല എന്റ്‌മ്, ആരാറ്റ പലി കൊഡുക്കുവ മദ്‌ല്‌ക്ക് ബെക്കുവ നേര്‌സെന സൊല്ലി സത്ത്യ ഗേന്തദാന സത്ത്യ ഗേന്ത കാര്യന ഗേന്ത് കൊഡുക്ക്യ പൊറുപ്പിര്‌ക്ക്‌ന്റ്> എന്റ്‌മ് നിമ്മ സൊന്റുറു. 19കുറുഡാര്‌ന പാസെ ഇര്‌ക്ക്‌ന്റവാരെ, നേര്‌സെ ദൊഡ്ഡാദൊ ഇല്ലെ നേര്‌സെന സുത്താപ്പ് മാഡുവ മദ്‌ല് ദൊഡ്ഡാദൊ? 20അദ്‌നാലെ പലി കൊഡുക്കുവ മദ്‌ല്‌ന സൊല്ലി സത്ത്യഗേന്റവാന് മദ്‌ല്‌നാമ് അദ്‌കുദ്ദാക്ക് ബെത്ത്‌റ്‌ക്കുവ പലി കൊഡുക്കുവ ജാദിനാമ് സൊല്ലി സത്ത്യഗേന്റാന്. 21സാമിബീ്ഡ്‌ന സൊല്ലി സത്ത്യഗേന്റവാന് സാമിബീ്ഡ്‌നാമ് സാമിബീ്ഡ്‌ല് ഇര്‌ക്ക്‌ന്റവാന്‌നാമ് സൊല്ലി സത്ത്യഗേന്റാന്. 22മേലോഗന സൊല്ലി സത്ത്യഗേന്റവാന് സാമി കുക്കാന്ത്‌റ്‌ക്കുവ കുറിഞ്ചിനാമ് അദ്‌ല് കുക്കാന്ത്‌റ്‌ക്കുവ സാമിനാമ് സൊല്ലി സത്ത്യഗേന്റാന്.
23ബക്‌തിഗാറാരായി നഡിക്കുവ ബേദബാത്ത്യനാമ്‌ഗാള്‌മ് പരിസാര്‌ഗാള്‌മ് ആയിര്‌ക്ക്‌ന്റവാരെ, അവ്വോ, നിമാക്ക് എത്ത്‌റ കജട്ട. കല്ല്‌പൂര തൊളേസി, സദുകുപ്പെ, ജീരഗെ എന്നുവാദ്‌ഗാള്‌ല് ഗുഡി പത്ത്‌ല് ഒന്റു ബാഗ നിമ്മ സാമിക്ക് കൊഡുക്കുന്റുറു. ആന സാമി സട്ടാത്ത്‌ല് സൊല്ലിര്‌ക്കുവ പാസെ നേര്‌മെഗാറാന് ആയിര്‌ക്കുവാദ്‌നാമ്, ബേ്റ്‌വേന്റവാന് ആയിര്‌ക്കുവാദ്‌നാമ് സാമ്യോഡ നമ്പിക്കെ ബെത്ത് നഡാക്ക്‌ന്റവാന് ആയിര്‌ക്കുവാദ്‌നാമ് ഇത്തെ ബെലെ ഉള്ള കാര്യഗാള്‌ന നിമ്മ തള്ള്‌ന്റ്‌റ്. മുദാല് ഗേന്ത കാര്യന തള്ളാദെ റണ്ടാവാദ് സൊന്ന കാര്യന ഗേന്ത് നഡാന്തിന്ത്‌മിര്‌ക്കുഡൊ. 24കുറുഡാര്‌ന പാസെ ബട്ടെ കാട്ടി പോന്റവാരെ, നിമ്മ കുഡിക്കുവ ജാദിലിന്ത് കുന്നിന അരിത്തെ്ഡ്‌ത്ത് ഒട്ടഗന നുങ്കുന്റുറു.
25ബക്‌തിഗാറാരായി നഡിക്കുവ ബേദബാത്ത്യനാമ്‌ഗാള്‌മ് പരിസാര്‌ഗാള്‌മ് ആയിര്‌ക്ക്‌ന്റവാരെ, നിമാക്ക് എത്ത്‌റ കജട്ട. നിമ്മ ക്‌ണ്ടിഗാള്‌നാമ് ഗളാസ്‌ഗാള്‌നാമ് ബെ്ളിഗെ നലമായി കച്ച്‌ന്റ്‌റ്. അദേപാസെ നിമ്മ ബെ്ളിഗെ നല്ലവാരാനാല്‌മ് നിമ്മ് മനേസ്സ്‌കുളാക്ക് എഞ്ച്‌ക്ക് കെ്ഡേത്താല്‌മ് ഇന്നിമ് ഇന്നിമ് ബേ്ഡ്‌മെന്നുവ ആസേമ് മിദിമീ്റി ഗേയ ഉള്ള എല്ലാ കെ്ട്ട നെനേവുഗാള്‌മ് തുമ്പിര്‌ക്ക്‌ന്റ്. 26കുറുഡാന്‌ന പാസെ ഇര്‌ക്കുവ പരിസാനെ, മുദാല് ക്‌ണ്ടിഗാള്‌നാമ് ഗളാസ്‌ഗാള്‌നാമ് ഉളാക്ക് ബ്‌ളാക്കുഡൊ. അന്നാപ്പ് ബെ്ളിഗേമ് സുത്താപ്പായിര്‌ക്ക്‌മ്.
27ബക്‌തിഗാറാരായി നഡിക്കുവ ബേദബാത്ത്യനാമ്‌ഗാള്‌മ് പരിസാര്‌ഗാള്‌മ് ആയിര്‌ക്ക്‌ന്റവാരെ, നിമാക്ക് എത്ത്‌റ കജട്ട. സ്‌ന്നാമ്പ് പൂസിര്‌ക്കുവ സുഡലെഗാള്‌ന പാസെത്തെ നിമ്മ. അയി സുഡലെഗാള് ബെ്ളിഗെ അളഗളാഗ ഇന്താല്‌മ് ഉളാക്ക് സത്തവാര് എല്‌മ്പ്‌ഗാള്‌മ് തുമ്പിര്‌ക്ക്‌ന്റ്. സത്ത് നാറുവ നാറ്റാമ് അഡിക്ക്‌ന്റ്. 28അദേപാസെ ആള്‌ഗാള് ബെ്ളിഗെ നിമാന നോഡുഗാട്ടി നിമ്മ നേര്‌മെഗാറാര് എന്റ് അവാര് നെനേക്ക്‌ന്റാര്. ആന മനേസ്സ്‌കുളാക്ക് ബക്‌തിഗാറാരായി നഡിക്കുവ നെനേവുഗാള്‌മ് എല്ലാ കെ്ട്ട എ്ണ്ണഗാള്‌മ് തുമ്പിര്‌ക്ക്‌ന്റ്.
29ബക്‌തിഗാറാരായി നഡിക്കുവ ബേദബാത്ത്യനാമ്‌ഗാള്‌മ് പരിസാര്‌ഗാള്‌മ് ആയിര്‌ക്ക്‌ന്റവാരെ, നിമാക്ക് എത്ത്‌റ കജട്ട. സാമിദാസ്‌ഗാള് സുഡലെഗാള്‌ന നിമ്മ അണിമാഡി കൊണ്ടുമു നേര്‌മെഗാറാരായി പെ്ളേത്തവാര് സുഡലെഗാള്‌ന അളഗളാഗ മാഡികൊണ്ടുമു ഇര്‌ക്ക്‌ന്റ്‌റ്: 30<എമ്മ് പാട്ടനാമ് കാലാത്ത്‌ല് എമ്മ പെ്ളേത്തിന്തദാന സാമിദാസ്‌ഗാള്‌ന കൊല്ലുവാദ്‌ക്ക് എമ്മ കൂട്ടു എ്ണേന്ത്‌റ്‌ക്കമാട്ടേമ്> എന്റ് നിമ്മ സൊന്റുറു. 31അത്തെ സാമിദാസ്‌ഗാള്‌ന കൊന്റവാര് പ്‌ള്ളെഗാള്‌ത്തെ നിമ്മ എന്റ് നിമ്മ താനെ കാട്ടി കൊഡുക്കുന്റുറു. 32നിമ്മ് പാട്ടനാമ് ഗേയ പ്‌ഡിത്ത പാവാന നിമ്മ ഗേന്ത് മുഡിക്ക്‌ന്റ്‌റ്.
33പാമ്പ്‌ന പാസെ, നാഗ പാമ്പ്‌ന പാസെ ഇര്‌ക്ക്‌ന്റവാരെ, നിമാക്ക് ബന്ത്‌റ്‌ക്കുവ നരഗ ദെ്ണ്ടണേലിന്ത് എത്തെ നിമ്മ തപ്പിസി കഡാക്കുവുറു? 34അദ്‌നാലെ നാന് സാമിദാസ്‌ഗാള്‌നാമ്, അറുവു ഇര്‌ന്റവാര്‌നാമ്, ബേദബാത്ത്യനാമ്‌ഗാള്‌നാമ് നിമ്മ് പട്ട്‌ക്ക് സൊല്ലി ബ്‌ഡ്‌ന്റെ. അവാര്‌ല് ലേസ ആള്‌ഗാള്‌ന നിമ്മ കൊല്ലുവുറു. ലേസ ആള്‌ഗാള്‌ന കുരുസുക്കു സേത്തി ആണി അഡിക്കുവുറു. ലേസ ആള്‌ഗാള്‌ന എഗുദാര് പരേസുവ ബീ്ഡ്‌ക്ക്‌റാഗ ബെത്ത് സാട്ടെവാര്‌ല് അഡിത്ത് ഒന്റു പട്ടണാത്ത്‌ലിന്ത് അഡ്‌ത്ത പട്ടണാക്ക് അവാര്‌ന മുഡിക്കി ബ്‌ഡ്‌വുറു. 35അദ്‌നാലെ നേര്‌മെഗാറാന് ആവേല്‌ന കൊന്റ കാലാത്ത്‌ലിന്ത് സാമിബീ്ഡ്‌ക്ക്‌മ് പലി കൊഡുക്കുവ മദ്‌ല്‌ക്ക്‌മ് നഡ്‌ക്കെ ബെത്ത് നിമ്മ കൊന്റ ബെരെക്ക്യാവു മഗാന് സെക്കെര്യാവു പെ്ളേത്തിന്ത കാല മാട്ട്‌ക്ക് ബൂമില് കൊന്റ നേര്‌മെഗാറാര് കുറ്റ ഒട്ടുക്കു ഇന്നാല് പെ്ളേക്കുവ നിമ്മ് തലേക്ക് ബര്‌മ്. 36ഈ കുറ്റ ഒട്ടുക്കു ഇന്നാല് പെ്ളേക്ക്‌ന്റവാര്‌ക്ക് ബര്‌മ് എന്റ് നാന് സത്ത്യമായിമ് നിമാക്ക് സൊന്റെ.>>
ഏസ്സ് എര്‌സലേമ്‌ന നോഡി ദുക്കപഡ്‌ന്റാന്
37<<എര്‌സലേമെ, എര്‌സലേമെ, നീ സാമിദാസ്‌ഗാള്‌ന കൊന്റവാള്‌മ് നിന്ന് പട്ട്‌ക്ക് സൊല്ലി ബ്‌ട്ട സേദിഗാറാര്‌ക്ക് കല്ലെ്റിന്തവാള്‌മ്‌ത്തെ. കോയി തന്ന് കുഞ്ചിഗാള്‌ന ഇ്റാക്കെ കുളാക്ക് സേത്തി ബെക്കുവ പാസെ നിന്ന് ജനഗാള്‌ന സേത്തി ബെക്ക്യ എനാക്ക് എത്ത്‌റാഗോ മനേസ്സിന്ത്‌ദ്. ആന നിനാക്ക് മനേസ്സിര്‌ക്കാലെ. 38അദ്‌നാലെ നിന്ന് ബീ്ഡ് ബ്‌ട്ടബീ്ഡായി ഒന്റുമില്ലദായിതള്ള്‌മ്. 39<ആണ്ടവാന് പേര്‌ല് ബന്റവാന് ബാഗ്യകേ്ട്ടവാന്>#സാമി പാട്ട് ബൊക്കു 118:26 എന്റ് നിമ്മ സൊല്ലമാട്ട്‌ക്ക് നിമ്മ ഇന്നി എനാന കാണമാട്ട്‌റ് എന്റ് നാന് നിമാക്ക് സൊന്റെ.>>
New Life Computer Institute