Matie 7

Tɩ ‑na 'lilɛ ‑zijle tunɩ

(Lwiikö 6.37-38,41-42)

1Tɩ ‑na 'lilɛ ‑zijle tunɩ, nzɩɩ Lagɔ ‑tɩmöa ‑zijle tunɩ. 2Ɛ'ɛ ‑bhö nyɩasɛ, ‑maa sɛɛ ‑n tunɩɛ ‑na 'lilɛ ‑zijlee, ‑sɩbhä Lagɔ ‑kamö ‑zijle tunɩmö. Sɛɛ ‑n zʋä ‑na 'bhɩaa, ‑sɩbhä Lagɔ ‑kamöä 'zʋmö. 3Zaa, ‑mä ‑na 'ylimö sukïbhë ‑kä ‑mä ‑wʋ, 'n a gbʋ ‑nɩmö plɛnɩɩ, sɛɛ ‑na 'lilɛ a 'ylimö a klekëyi a gbʋ ‑kamö bhä plɛnɩ 'nɩ? 4‑Nmö sukïbhëa ‑wʋä 'ylimö 'n a gbʋ 'nɩ plɛnɩmöä, sɛ ‑n 'kä bhä ‑na 'lilɛ 'dɩ 'nyɛ nɩɩ: 'Tua, yi n 'kä ‑na 'ylimö a klekëyi ‑mä ‑sɛ 'nɩ? 5'Kwlɩsɔkänyɔ nɩmä, ‑sɛɛ ‑mä ‑na 'ylimö a sukïbhëa ‑a ‑wʋä ‑mä 'wë, ‑n 'kä sɛ yɩlɩ sɛ ‑yi, ‑n 'kä bhäla ‑na 'lilɛ a 'ylimö a klekëyi ‑mä ‑sɛ.

6Lagɔlii, nɩkpa ‑wa 'kä ‑bhɩɩɛ gʋ ‑wa flaniɛ 'ylimöö, a nɩ tuënyɩ 'nyɛ, wa tanyɩa gʋ a sɛ 'yi ‑dɩ. A nɩ tɩ 'a 'nglɩmözikpïï kokotie 'yli 'pä, yɩ tia 'wʋ nyɛzɔnyɛzɔnɩ.

A nɩ zɛla Lagɔ ‑maa ɔ yeanyɩ 'nyɛ

(Lwiikö 11.9-13)

7A nɩ zɛla ‑maa wa yeanyɩ 'nyɛ. A nɩ tɛlɩ sɛ ‑maa a yi ghlɩ. A nɩ bhɔtɔ ‑gbïlii, ‑maa a za wa yi ‑lɛ kälɩ. 8Ɛ'ɛ ‑bhö nyɩasɛ, ‑maa ‑ɔ zɛlaa 'mö wa nyɛɛ, ‑ɔ tɛlɩɛ sɛɛ, mɔɔ ghlɩɛ, ‑ɔ ‑wʋä ‑lɛ ngloluë 'wʋ ‑ɔ bhɔtɔɔ, ɔ za wa kälɩɛ ‑lɛ. 9A gla'mö a ‑nʋ ‑bhlʋ, 'n ɔ 'yu ‑kɔɔ 'fɔlɔbhë zɛlaa, ɔ yo bhä kpiyi 'nyɛ ‑a? 10‑Maa zibhiyi ɔ ‑kɔɔ zɛlaa, ɔ yo bhä tɩmɛ 'nyɛ ‑a? N'nn a'a 'zʋ na a ‑sɩbhä. 11Zaa, abhʋaa glɩnɩɛ abhlɩ 'kpʋkpʋwaa, a ‑yi'ɛ 'a yuëa ‑li a ‑li a 'nyɛsɛɛ, mɛɛ 'kä zi'e a Dɩba ‑ɔ ‑wʋ ‑mä ghäyɩ 'wʋ, 'n 'ɔ yuëa ‑kɔɔ ‑li a ‑li zɛlaa, mɔɔ 'naa 'kʋänyɩ bhä 'nyɛ ‑a?

Sɛ'ɛ nɩkpa 'wuë kää wa 'kä zʋ

12Sɛ a yɩbhää wa nɩ 'zʋanyɩɩ, a nɩ 'zʋmö ‑sɩbhä a 'bhɩa. Moyizɩ 'a Gböö mi, Lagɔ 'a 'möbhïlanɩwaa a 'cɩawɛlɩɩ mi, sɛ yɩ gbää, ‑sɩbhä ma‑a da'a.

Ywii 'sɔɔ a wɛlɩɩ

(Lwiikö 13.24)

13A nɩ ghlɛnɩ ‑mä ngloluë 'tikëyi 'mö! Ɛ'ɛ ‑bhö nyɩasɛ, ‑maa 'yioo ‑wʋ möä ‑mä ‑kosu 'möö, 'klʋ wʋ 'ghïliɛ, wʋ ngloluëa 'mö a 'ghïliɛ zaa nɩkpaa ‑wa bhïluä wa'aa muënɩ. 14‑Maa 'yioo ‑wʋ möä ‑mä Lagɔ yɔwʋʋ, wʋ'ʋä 'klʋ 'ghïli, wʋ ngloluëa 'nɩɛ 'mö 'ghïli, wʋ bhlibhle 'mö ɛ 'tɛɛ. Zaa, nɩkpaa ‑wa bhïluä wa'aa ‑zu.

Suu ‑nyɛ 'wʋ bhïï 'sɔ a wɛlɩɩ

(Lwiikö 6.43-44)

15Nɩkpa Lagɔ 'nɩɛ tie ‑wa laa wanyɩ Lagɔ a 'möbhïlanɩwaa, a nɩ 'nɛmanuë 'wʋ. Wa ‑kä ‑mä a jijo'wʋ yi, ‑n ‑kʋä 'ylɩmöö, wa 'kä ‑bhɩɛ wïlaa 'nɩ yɔwʋ kälɩ. ‑Zɛglɛgbaa glanɩma wa glɩnɩɛ.

16'Wa nʋnʋlii 'mö a 'kää 'wʋ yɩlɩ a 'kʋä ‑tiamö yɩbhlɩnɩ. ‑Kpakaklɔkwa 'wlu wa'a ‑sɛ ‑mä ‑bidlu. Wa'aa 'yɛ ‑zɩ ‑gbäglɛtɛlɩsu 'yli pɛ ‑sɛ. 17Su a su, 'bhï a bhï wʋ tlʋä, suzokwë, 'bhïzoku wʋ tlʋä. 18‑Maa su a su 'nɩ tlʋ 'bhïzoku, suzokwë 'nɩ tlʋ'ɛ 'bhï a bhï. 19Swi 'wuë ‑yɩɩ tlʋä 'bhïï, 'klɛ wa 'kɩɛ 'klɛ wa 'kɩ sia. 20‑Sɩbhä a za n gbää nɩɩ, nɩkpa 'la Lagɔ 'nɩɛ tiee, 'wa nʋnʋlii 'mö a 'kää 'wʋ yɩlɩ, a 'kʋä ‑tiamö yɩbhlɩnɩ.

A nɩ nʋ 'saa Lagɔ yɩbhää

(Lwiikö 13.25-27)

21Nɩkpaa ‑wa nʋä 'kwädlɩ ‑Alowli, ‑Alowli, 'pɩwʋ mää Lagɔ 'kämanɩɛ, wa 'wuë mʋa 'naa 'kä ‑sɩbhä ‑mä 'bhle ghlɩ. ‑Maa na dɩba Lagɔ ‑ɔ ‑wʋä ‑mä ghäyɩ 'wʋ, nɩkpa ‑wa nʋä 'saa ɔ 'yɩbhää, wa 'yize mʋa 'kää ‑mä 'bhle ghlɩ. 22Lagɔ 'a ‑zijle 'käda a zlɩɩ ‑kä ghlɛɛ, nɩkpa a ‑bɛ, wa yi nɩɩ ‑Alowli, wɛlɩɩ Lagɔ bhïlanɩnyɩɛ 'möö, ‑na 'nglɩ 'mö, ‑a 'nyɩ nɩkpa. ‑Na 'nglɩ 'mö ‑a kpëti zuzukuzoku nɩkpa ‑gömö. ‑A 'pä zɩzɛ a ‑bɛ ‑na 'nglɩ 'mö. 23‑Maa sɛ'ɛ n 'kʋää 'dɩ 'nyɛ nɩɩ, abhʋaa nʋä ‑lizokuu, a 'dionɩ gwë. N 'nanyɩɛ ‑yi 'lɩlɩlɩ.

‑Bïdii 'sɔ ‑kpɔ a ninea

(Lwiikö 6.47-49)

24‑Sɩbhä a za, wɛlɩ 'la 'wuë n 'bhööä da'a bhïlaa, ‑ɔ ‑pʋniɛ sasɛ 'yukwli, sɛ yɩ gbää ‑ɔ zʋä ‑sɩbhä, ‑mɔ ɔ ‑nyɛ 'wlʋnɩɛ, 'mö n 'kanyɩɛ dɛ'ɛ sʋlʋnɩ. 'Nɛɛnɩnyɔ ‑bhlʋ, ‑lɛ kpayi 'klʋ, ‑lɛ ɔ 'sɩbhää 'ɔ ‑buduu. 25'Nyizakwëa lɩbhää 'ylɩ ‑bhlʋ 'möö, gbisogbisonyu zumanɩɛ tenyii, 'vuu yiɛ wʋ 'sɛlɩnɩɛ wʋnyɩ ‑buduu 'ylimöö, sɛ wʋ sɩbhää ‑lɛ kpayi 'klʋ a za, wʋ'ʋä bhli. ‑Ɔ ‑pʋnɩɛ 'na wɛlɩɩ 'yukwli, sɛ yɩ gbää ‑ɔ zʋä ‑sɩbhä, ‑lɛ a 'nɛɛnɩnyɔ 'la 'mö ɔ ‑nyɛɛ 'wlʋnɩɛ. 26-27‑Maa nɩkpɛ ‑mɔmɔɔ, ɔ'ɔɔ ɔbhlɩ 'nɛɛ. ‑Mä bʋsɛ 'mö, ‑mä ɔ 'sɩbhää 'ɔ ‑buduu. 'Nyizakwëa 'käda lɩbhää 'ylɩ ‑bhlʋ 'möö, gbisogbisonyu zumanɩɛ tenyii, 'vuu yiɛ, wʋ 'sɛlɩnɩɛ wʋnyɩ ‑budu 'ylimöö, wʋ 'wuë bhli wʋ bhliɛ, wʋ'ʋä glu tʋʋ. Nɩkpɛ a ‑mɔɔ ‑pʋnɩɛ 'na wɛlɩɩ 'yukwli, sɛ yɩ gbää ‑ɔ 'nɩ 'zʋä ‑sɩbhä, ‑lɛ a ‑ɔɔ'nɛɛnɩnyɔ 'la 'mö ɔ ‑nyɛɛ 'wlʋnɩɛ.» 28Zezwii bhïlaa wɛlɩ 'la 'wëë, nɩkpa 'wuë ‑wa ‑pʋnɔɔɔ 'yukwlii, 'ɔ 'cɩacɩasaa, ‑sɩbhä zuzu a ‑sʋää ‑gömö tenyii. 29Ɛ'ɛ ‑bhö nyɩasɛ, ‑maa sɛɛ Moyizɩ 'a Gböö a 'cɩawaa 'cʋä a‑a 'kwädlɩɩ, ‑sɩbhä ɔ 'nuë 'cɩa, ‑maa nɩkpɛ a ‑mɔ Lagɔ ‑wʋ ‑gömö a sɛ ɔ 'cʋää.

選択箇所:

Matie 7: bet

ハイライト

コピー

すべてのデバイスで、ハイライト箇所を保存したいですか？サインアップまたはサインインしてください。

BdG2について知る