लूका 22
22
ईसु ञेंड लगड कू सलाह एना
(मत्ती 26:1-5; मरकुस 14:1,2; मरकुस 14:45-53)
1अखमीरी रोटी जोम हेना पस्का परब#22:1 अखमीरी रोटी जोम हेना पस्का राः परब एहूदिकू गुलामी वरी भगवान छडो तेडकुआ, हेना उहयर लगड परब कू मनो तेडा, हेना कू अखमीरी रोटी वआ। तयाः बंचो तना। 2अवुर बड बडे आजककू अवुर एहूदी नियम चेचेडकू काःते ईसु ले ञेंड गोजेया मेनाआँ दाव कू जोहो दोहो एनु, लेकिन हेंकू होड़कू कू बोरोवा दोहो एनु।
एहूदा ईसुय एर पकड़ोआ
(मत्ती 26:14-16; मरकुस 14:10-11)
3बारह झन चेलाकू मेंडे रे, मियाँहोड़ एहूदा इस्करयोती मेनते कू कहनी वय दोहो एनु, हेंय थरे सयतान समो यनु। 4हेना वरी हेंय बड बडे आजककू अवुर मँडिल पपाहराकू रेनकू अधिकारिकू थरे सेनकेन ते इंञ काःते ईसु धोखा ते नेकू रेंञ एर पकड़ोविया मेनाआँ, हेंकू सुदाय चरचा तेडा। 5हेना वरी हेना मेन अँजोम केतेकू खुसी एना, अवुर हेंय पेयसा ओवाय लगड कू जबान वडिया। 6तहाँ हेंय राजू यनियू, अवुर हेंय भीड़ मेने दोहोन घनी हेंकू ती रे एर पकड़ोविय लगड मोकाय छपा बेड़ा दोहो एनु।
ईसु चेला कुतय सुदा पस्का पराबिय मनो तेडा
(मत्ती 26:17-25; मरकुस 14:12-21; एहुन्ना 13:21-30)
7अखमीरी रोटी जो-मा राः परब दिन मेजेना, हेना परब रे भेड़ी होपोन पूजा लगड जरूरी दोहो एना। 8ईसु पतरस अवुर एहुन्ना हाँःते कहनी केतेय कुलतेड किञाँ, “सेनकोःते अबू लगड परब रे जो-मेआँ रोटी बा तयारू।” 9हेना वरी हेंकींञ होंबोर तेडिया, “अम करेम चहोः तना अलिंञ नआँ लिंञ तयारू?”
10तहाँ हेंय हेंकींञ थरेय कहनी तेडा, “अँजोमेबा, सहर बा बोल तोलोग मियाँहोड़ कोड़ाहोन गगेर ते दाः गोः तोलोग बा ञँमेया, जे ओड़ाः रे हेंय सेनुआँ, अबा हो हे-नी तयोम तेबा सेनुऊ। 11अवुर ओड़ाः मुवर थरे बा कहनियूँ, ‘गुरू कहनी यडा, पोहनाकू दुड़ूब हेना जघा करेआ, ईञाःकू चेलाकू सुदा रोटिंञ जो-मा।’ 12हेंय अबा छत अगस रे सजो केडा कोठरिय तिःवा बआ, हें-डे बा तयारे।” 13जेयसे हेंकींञ थरेय कहनी तेडा, हेन घयते कींञ सेन ञँमतेडा, अवुर हेना रे परब लगड रोटी कींञ तयार तेडा।
परभु भोज
(मत्ती 26:26-30; मरकुस 14:22-26; 1 कुरि 11:23-25)
14हेना वरी जोमुः राः बेला होया एना, तहाँ परेरितकू हो ईसु सुदा जोमुः लगड कू दुड़ूब एना। 15अवुर हेंय कहनी तेडा, “दुख सहो वरी मड़ंग ते, नआँ पस्का परब राः रोटी अपे सुदा जोमे लगड ईञाः अखीर मन दोहो एना। 16इंञ अपे थरेंञ कहनी यडा, भगवान राः राज रे सींड़कू नआँ राः सही मतलोब तू जेर केते पस्का परब राः रोटी कू जो-मा, हेना मेन दिन इंञ एरोंञ जोम तेडा।”
17तहाँ हेंय अंगूर रस दोहो एना हेना डुबहा सबकेते भगवानिय धन्यावाद वडा, अवुरिय कहनी तेडा, “ने तिलाय पे अवुर हटींग जोम पे। 18कहेकि अपे थरे इंञ कहनी यडा, भगवान राः राज अनायिन मेजुः मेन दिन, इंञ अंगूर रस अब वरी एनेरोंञ ञुँतेडा।”
19हेना वरी हेंय फेर रोटी सबके ते भगवानिय धन्यावाद केतेय टुटका तेडा, अवुर हेंकू थरे न याःते कहनी केतेय एमतेडा, “ना ईञाः देंह हवे, अपे लगाडिंञ एमियाडा; इंञ उहयर लगड नेन घयतेपे करोवे।”
20नेनेन घयते हेंय जोम केन चरो केन वरी तयोम ते, हेंय अंगूर रस दोहो एना, हेना डुबहा सबके तेय कहनी तेडा, “ना ईञाः लोहू हवे, अवुर इंञ गोजुः हेना राः चलते ते भगवान होड़कू सुदा नवाँः रिस्ताय जोरोआ। 21अँजोमे पे, इंञ एर साबय होड़ इंञ सुदा इदानियाँ। 22इंञ होड़ होपोन दो भगवान राः मरजी घयतेंञ गोनोजुअञूँ, लेकिन जे होड़ एर सबेञाँ हेंय अखीर दुख रेय पड़ोआ।” 23तहाँ हेंकू अनाकू अनाकू होंबोर ओड़ेंगू, किदो अबू मेंडे रे न घयते ईया कामेआ।
चेलाकू मेंडे ईया बडे गिआ?
24 #
मत्ती 18:1; मरकुस 9:34; लूका 9:46 हेंकू अनाकू अनाकू होंबोर ओड़ेंग एना, “अबू मेंडे ईया बडे गिआ।” 25ईसु हेंकू थरेय कहनी तेडा, “नआँ धरती रेनिय राजा होड़कू थरेय राजेआ, अवुर होड़कू थरे अधिकार कू रखोः हेंकू सहेता ए-मय होड़ मेनते कू कहनी वकुआ, 26#मत्ती 23:11; मरकुस 9:35#मत्ती 20:25-27; मरकुस 10:42-44लेकिन अपे न घयते अलोपे बनोऊ, अपे मेंडे रे जे बडे गिआ, हेंय होडीञाँय घयते दोहोनू, अवुर मुखिया सेवेखिया घयतेय बनोऊ। 27#एहुन्ना 13:12-15अपे मेंडे ईया बडे गिआ, जोमूईय दुड़ूब केन हेनी किदो सेसेवतन हेनी? जोमूईय दुड़ूब केन हेनी बडे गिआ। लेकिन इंञ अपे मँझर रे सेसेवाअय घयगिअञूँ।”
28“अपे ईञाः दुख संकट रे इंञ सुदा दोहोएन हेंकू हवे; 29अवुर जेयसे अपुंञ इंञ राजे लगड अधिकारिय ओवाडिञाँ, हेन घयते अपे हो राजे लगड अधिकारिय ओवापे तना। 30#मत्ती 19:28ताकि अपे भगवान राः राज रे इंञ सुदा पे जोमुः चरोऊ, अवुर राज गद्दी रे दुड़ूब कोःते इसराएल रेनकू बारह गोतिकू राः पे न्याये।”
ईसु पतरस नहकारिया हेनय भविस्यवाड़ी तेडा
(मत्ती 26:31-35; मरकुस 14:27-31; एहुन्ना 13:36-38)
31“सिमोनू! अँजोमेमू, जेयसे गोहोम गुमके ते कुस्टत वरी कू हिगरो वेआ, हेन घयते सयतान अजमो पे लगड भगवान वरी अनुमतिय असी केडा, 32लेकिन इंञ अमाः बिसवास अलो टोवीजुः लगाडिंञ बिनती केना। अम पसतो कोःते फेर इंञ थरेम मेजुआ, हेना वरी अम भाईकू बिसवास रेम मजबूत कुआ।” 33हेना वरी सिमोन ईसु थरेय कहनी तेडा, “परभु इंञ अम सुदा जेहेल सेनुः अवुर गोजुः लगड हो तयार इदानिञाँ।” 34तहाँ ईसु कहनी तेडा, “ए पतरस, इंञ अम थरेंञ कहनी यडा, तेनेसिंञ ञींद मुरगा कुकड़ूचुः वरी पहील ते ‘मेनेंञ पपाड़ी तना’ मेनते पेय एस मी नहकारि़ञाँ।”
बिरोध सहो लगड पे तयार कोऊ
35 #
मत्ती 10:9,10; मरकुस 6:8,9; लूका 9:3; 10:4 हेना वरी फेर ईसु चेला कुय होंबोर तेडा, “अपे इंञ बेगर पेयसा ते, बेगर झोला ते अवुर बेगर फनहीं तेंञ कुलतेड पेआ, हेना तोलोग कनर चीज राः कमी होया एना किदो?” हेना वरी हेंकू जबाब तेडा, “कनर चीज राः कमी मेने होया गना।” 36अब वरी चेलाकू राः अखीर बिरोध होयाः रे तयार दोहोन लगड ईसु हेंकू थरेय कहनी तेडा, “जे जे थरे पेयसा अवुर झोला इदान हेंकू हेना कू सबजोमू; अवुर जे जे थरे तरवार कोवाः हेंकू अपन कपड़ा केजा केते तरवारिय तिला जोमू। 37‘हेंय कसूर केड हेंकू सुदा कू लेखा एड़वा केडिया,’ नआँ याःते ईञाः बिसेय ते पहील ते धरमग्रंथ रे लिखल इदाना, हेना पूराः राः समय मेजियाना।” 38हेना वरी चेला कुतय कहनी तेडा, “परभु न रे बाटंग तरवार इदाना।” हेना वरी फेर ईसु हेंकू थरेय कहनी तेडा, “बस निहों दो तरवार राः बिसेय ते अलोपे टेबोगे।”
जयतून बुरू रे ईसु बिनती एना
(मत्ती 26:36-46; मरकुस 14:32-42)
39हेना वरी ईसु ओड़ाः वरी बहेर उडूंग केनते पनाहिल घयते जयतून बुरू रेय सेनेना, अवुर चेलाकू हो हेंय कू ओतोंग तेडा। 40हेना वरी हेना रे सेनकोःते ईसु चेला कुतय थरेय कहनी तेडा, “बिनतीः महल रेपे दोहोनू ताकि अपे परिक्छा रे अलोपे पड़ोऊ।” 41हेना वरी ईसु हेंकू वरी दमभर अड़ी केनते, उकड़ूम केनते न याःतेय बिनती एना, 42“ओ अपा, अगर अम चहोः तन रेदो, नआँ दुख इंञ वरिम अड़ी गोत्ते, लेकिन ईञाः मेने अनामाआँ मरजी पूरा होयाऊ।” 43तहाँ सरग वरी मियाँटंग दूत मेजेना, अवुर हेंय सक्तिय ओवाडिया। 44अवुर हेंय अखीर दुखित केनते मन लगाय तेय बिनती एना; अवुर उगर तेडिय हेना एकदम रक्ती घयते बूँदे बूँद ते ओतेत रे जोर दोहो एनु। 45हेना वरी हेंय बिनतीः वरी रिमकेनते, चेलाकू फिकीर लँगा यनते गितीज तन तोलोगिय मेज ञँमतेड कुआ। 46हेना वरी हेंकू थरेय कहनी तेडा, “ची लगड पे गितीज तना? रिमुःपे, बिनतीः महल रेपे दोहोनू ताकि अपे परिक्छा रे अलोपे पड़ोऊ।”
ईसु कू पकड़ो तेडा
(मत्ती 26:47-56; मरकुस 14:43-50; एहुन्ना 18:3-11)
47ईसु कनाहनिय दोहो एनु, तबले भीड़ केनते होड़कू मेजियानू, अवुर बारह झन मेंडे रे मियाँहोड़ ञुमू एहूदा मेनते दोहो एना, हेंय होड़कू मड़ंग मड़ंग तेय सेन अगतेडा, ईसु थरेय तयाःतेड दोय चोः तेडिया। 48हेना वरी ईसु हेंय थरेय कहनी तेडा, “ए एहूदा, अम इंञ होड़ होपोन चोः केंञ तेम एर पकड़ो यडिञाँ किदो?”
49हेना वरी चेलाकू ञेंलतेड कुआ, तहाँ कू पसींद तेडा कनारा दो होयाआ, हेना वरी कू होंबोर तेडा, “परभु, अले तरवार ले चलो किदो?” 50अवुर हेंकू मेंडे रे मियाँहोड़ सींड़कू वरी बडेअय आजक रेनिय नोकर राः जोम गतर राः लुतूर तुय फंको गोत्तेडू। 51नेन तोलोग ईसु कहनी तेडा, “बस नेन मेनू होया यना।” अवुर हेंय लुतूर तुय सबकेड तेय जोरो तेडा।
52हेना वरी बड बडे आजककू, अवुर मँडिल रेनकू अधिकारिकू, अवुर चेचेड हेंकू सपायँड़कू हेंय सब कू मेजताना। अवुर ईसु हेंकू थरेय कहनी तेडा, “अपे इंञ चोर पे अड़ींग वंञतन ते तरवार अवुर लठी सबके तेपे मेजकेना? 53#लूका 19:47; 21:37इंञ मँडिल रे रोज दिन अपे सुदांञ दोहो एना, दो मेने पे सबगाडिञाँ, न अपे राः समय हवे, अवुर अंधकार राः अधिकार हवे।”
पतरस ईसुय नहकार तेडा
(मत्ती 26:57-58,69-75; मरकुस 14:53-54,66-72; एहुन्ना 18:12-18,25-27)
54तहाँ हेंकू ईसु कू सब गोःतेडिया, अवुर सींड़कू वरी बडेअय आजक ओड़ाः रेकू इदी तेडिया। अवुर पतरस तयोम तयोम ते ईसुय जोपोल दोहो एनु। 55अवुर कुछ होड़कू जवार केनते राच रे सेंगेल सलगो केतेकू जुरू तना, हेना वरी पतरस हो हेंकू मँझर रेय दुड़ूब यनु। 56दुड़ूब तन तोलोग मियाँहोड़ हरवाहिन कोड़ीहोन हेंय सेंगेल मरसल रे ञेंल ञँमकेडिय तेय कहनी तेडा, “नेय होता मे-नी सुदाय दोहो एना।” 57पतरस कोड़ीहोन थरेय कहनी तेडा, “ए बेहिन, इंञ मेय मेनेंञ पपाड़ी तना।”
58तहाँ मियाँ घड़ी रे अवुर मियाँहोड़ ञेंलकेडिय तेय कहनी वडियू, “अम होता हे-नी सुदाम दोहो एना।” तहाँ पतरस कहनी तेडा, “ए भाई, इंञ न लगे।”
59कुछ समय बितो केन राः बाद रे, अवुर मियाँहोड़ जिदहाय तेय कहनी तेडा, “सहिच मेते नेय हो मे-नी सुदाय दोहो एना, कहेकि नेय हो गलील जिला रेनिय होड़ हवे।” 60हेना वरी पतरस कहनी तेडा, “ए भाई, इंञ मेनेंञ पपाड़ी तना, अम ची मेनतेम कहनी यडा!” हेन घयते मियाँ हनतेय कनाहनियाडू, तहाँ तुरेत्ते मुरगा कुकड़ूचुः यनु। 61तहाँ परभु मुँहियों केनते हेंय हनिय तको तेडा, अवुर पतरस न याःते परभु कहनी वडिया, हेना टेबोईय उहयर तेडा, “तेसींञ मुरगा कुकड़ूचुः वरी पहील ते अम पेय एस मी नहकारिञाँ।” 62अवुर हेंय बहेर हँडेय उडूंग केनते एनेक धँधेहिय ईयाम एना।
ईसु कू ठट्ठाआ
63जे होड़कू ईसु कू सबताडा, हेंकू मजाग कू उड़ोवियू, अवुर कू ञेंडेयू; 64अवुर हेंय मेड रे कपड़ा तेकू तोलकेडिय तेकू होंबोरियू, “भविस्यवाड़ी केतेम लाये अम ईया ञेंडतेड मिआँ।” 65अवुर हेंकू अखीर निन्दा राः टेबोः हेंय राः बिरोध रेकू कहनी तेडा।
महासभा रे ईसु
(मत्ती 26:59-66; मरकुस 14:55-64; एहुन्ना 18:19-24)
66हेना वरी अँगा एना, तहाँ होड़कू रेनकू सपायँड़कू जवार एना, हेना रे बड बडे आजककू, अवुर एहूदी नियम चेचेडकू होकू दोहो एना, अवुर ईसु अनाकू राः कोट रेकू इदी केडिय तेकू होंबोर तेडिया। 67“अम मसीहा हवे रेदो अले थरेम लाय गोत्ते,” हेना वरी हेंय हेंकू थरेय कहनी तेडा, “अगर अपे थरेंञ लाये रेदो एरो पे बिसवास तेडा। 68अवुरिंञ होंबोर पे रेहो जबाब एरो पे एम सको एना। 69अब वरी इंञ होड़ होपोन सर्वसक्तिमान भगवान वरी जोम गतर रेंञ दुड़ूबा।” 70नआँ अँजोम केते सींड़ होड़कू कहनी तेडा, “अम भगवान होपोन हवे किदो?” हेना वरी हेंय हेंकू थरेय कहनी तेडा, “अपे कहनी यडा कहेकि इंञ हवे।” 71तहाँ हेंकू कहनी तेडा, “अबू एटाःकू अहा वरी गोवाही अअँजोम राः जरूरत कोवाआ, कहेकि अबू अनानेज अहा वरी बू अँजोम केडा।”
© 2022, Wycliffe India. All rights reserved.