यूहन्ना 3
3
यीशु त नीकुदेमुस
1नीकुदेमुस नओएं यक यहूदी नेता थिआ। से फरीसी नओएं यक धार्मिक दले मेह्णु थिआ। 2तेन ब्यादि टेम यीशु केईं एई कइ तस जे बोलु, “ए गुरु! जे जे चमत्कारे कम तुस कते, तसे बेलि असी पता लगो असा कि परमेश्वरे शक्ति तुसी जुए असी त सच्चे परमेश्वर तुस हें गुरु बणाई कइ लंघो असे।” 3यीशु तस जे बोलु, “अउं तोउ जे बोता कि जपल तकर तु दुबारी ना जमता, तपल तकर तु परमेश्वरे राज्ये कदी हेस्सेदार ना बणता।” 4नीकुदेमुसे बोलु, “मेह्णु स्याणा भोई कइ दुबारा कीं जमते? से कि दुबारी अपु ईये पेट अन्तर घेई सकता ना?” 5त यीशु जवाब दिता, “अउं तोउ जे बोता कि पोणि त शुची आत्माई जुए जमणे#3:5 एसे मतलब यक मेह्णु पाणि अन्तर चुसी कइ ई हरालुण जरूरी असु कि तेन अपु मन बदलो असा त परमेश्वर तसे दिल शुची आत्माई बेलि भर कइ तसे गुण बदलता त अपु राज्ये हेस्सेदार बणान्ता। बगैर कोई परमेश्वरे राज्ये हेस्सेदार ना बण बटता।#यहजे 36:25-27 6किस कि जपल अस जमते, अस अपु ईया बोउए गभुर भुन्ते। पर अगर अस शुची आत्माई बेलि दुबारी जमते, त अस परमेश्वरे गभुर बणते।#3:6 मूल भाषा अन्तर “जे जिसम केईआं जमता से जिसम असा, होर जे आत्माई केईआं जमती से आत्मा असी” लिखो असु। 7त, तु हैरान ना भुओ कि मेईं तोउ जे बोलु ‘दुबारी जमुण जरूरी असा।’ 8ब्यार जीं चहन्ती, तीं चलती। तु तसे अवाज शुण सकता, पर तोउ पता ना लगता कि ए कोठिआ अओ असी त कोठि जे घेण लगो असी। तीं ‘शुची आत्माई बेलि दुबारी जमुणे’ बारे बि तु पता ना लाई सकता।” 9नीकुदेमुसे पुछु “ई कीं भोई सकतु”? 10त यीशु बोलु, “तु इस्राएले मेह्णु के गुरु भोई कइ बि ई बोक ना समझता ना? 11जेस सच्चाई असी पता असा, तस अस बोते, त जे जे असी काओ असु, तसे बारे उगाह देन्ते, पर तुस सम्हाई हें उगाह ना मानते। 12जपल मेईं इस धरती पुठ भुणे बाड़ी बोके की, त तुस तस ना मानते। त अगर अउं स्वर्ग पुठ भुणे बाड़ी बोके करुण त कीं कइ तुस तस मानते? 13अउं मनखे कुआ छड़ दी कइ होर कोई बि स्वर्ग जे गोओरा नेईं, किस कि अउं स्वर्ग केआं अओ असा। 14पर ई भुन्तु कि जीं मूसे अरुणि धार अन्तर पित्तले बड़ो कीड़ा ढना#गिणणे 21:4-9, तीं मोउं मनखे कुआ बि यक रोज ढनाई छते।#3:14 जपल मूसा इस्राएले मेह्णु मिस्र देश केआं अण्हुण लगो थिआ, त बण अन्तर इस्राएल मेह्णु परमेश्वरे त मूसे खिलाफ भुओ। त तेन्हि सावधान करण जे परमेश्वर तेन्हि बुच जहरिले कीड़े लंघाए, ताकि से तेन्हि डसे। ई हेर कइ तेन्हि मेह्णु अपु मन बदला त मूसा केईं घेई कइ कीड़े केआं बचणे तरीका लाण जे बोलु। त परमेश्वरे मूसा जे यक पित्तले कीड़ा बणाई कइ तस यक लम्मे दार पुठ ढनाई कइ खड़ करण जे बोलु, ताकि जे बि तस कीड़े हेरते, से सम्हाई कीड़े डसो भोई कइ बि मरुण केआं बच घेन्ते। 15ताकि जे बि मोउं पुठ विश्वास कराल, से हमेशा परमेश्वर जुए बिश्ता।”
16“परमेश्वर सम्हाई जुए ती परेम कता। तोउं त तेन अपु इकलौता कुआ इस धरती पुठ लंघा। त जे बि तस पुठ विश्वास कराल, हमेशा परमेश्वर जुए बिशाल। पर जे बि परमेश्वरे कुआ पुठ विश्वास न कराल से परमेश्वर केआं हमेशा लिए दूर भोई घियाल त खतम भोई घियाल। 17परमेश्वरे अपु कुआ इस धरती पुठ तोउं लंघा, ताकि तसे बेलि मेह्णु अपु पापे सज्जा केआं बच सकियेल। से मेह्णु सज्जा शुणाण जे ना थिआ अओ। 18पर सज्जा तेन्हि पुठ असी, जे परमेश्वरे इकलौता कुआ पुठ विश्वास ना कते। पर तेन्हि पुठ सज्जा नेईं जेन्हि तस पुठ विश्वास किओ असा। 19सज्जा शुणाणे बझह ई बि असी कि परमेश्वरे कुआ टगड़ियारी ईं इस धरती पुठ आ, ताकि मेह्णु सच्चाई पता चले। पर मेह्णु टगड़ियार केआं ज्यादा अन्हारु ट्यारु लगु, किस कि तेन्के कम खराब थिए। 20किस कि जे बि पापे कम कते, से टगड़ियार पसंद ना कते, त तसे भेएड़ बि ना एन्ते। ना त तेन्के पापे कम सम्हाई के नजर एई घेन्ते। 21पर जे परमेश्वरे वचने सच्चाई मान कइ जीन्ते, से टगड़ियार जे एन्ते, ताकि सोबी जेईं केईयेल कि तेन्हि अपु कम परमेश्वरे वचन मान कइ किओ असे।”
यीशु बारे चुसुणे बाड़े यूहन्ने शिक्षा
22पता यीशु त तसे चेले यरुशलेम शेहर केआं नश कइ यहूदिया राज्ये औत-कोती ग्रां जे घेई गे त तठि बिशे। तेस इलाके जेन्हि जेन्हि मेह्णु पाप केआं अपु मन बदलो थिए, से तेन्हि मेह्णु पाणि अन्तर चुसुण लगा। 23त शालीम ग्रां भेएड़ ऐनोन नओएं जगाई पुठ सुआ पुओणि भुणे बझई जुए यूहन्ना बि मेह्णु चुसताथ। त मेह्णु एई कइ तठि तसे बेलि चुसीन्तेथ। 24#मत्ती 14:3; मरकुस 6:17; लूका 3:19,20(किस कि अभेईं तकर यूहन्ना जेहेल अन्तर नेओथ छोओ।)
25तठि यूहन्ने चेले केसे यहूदी जुए तेन्के रिवाजे मुताविक शुचा भुण जे धूणे बारे#3:25 यहूदी मेह्णु मूसे नियम अन्तर लिखो शुचा भुण जे धूणे बारे होरे होरे नियम मानतेथ। परमेश्वर पूजा करण केईआं पेहले, त रौठि खाण केईआं पेहले से अपु जिसमे कुछ अंग धुन्तेथ। झगड़ा भुण लगा। 26त तेन्हि यूहन्ना केईं एई कइ तस जे बोलु, “गुरुजी, यरदन दरेउ पार यक जेईं मेह्णु चुसुण लगो असा त सुआ जेईं तस केईं घेण लगो असे। ए सेईंए भो जे पेहले तुसी जुए मिओ थिआ, त तसे बारे तुस लगो थिए ‘ए मसीह भो’” 27त यूहन्ने बोलु, “अगर परमेश्वर केसे कमियाब ना बणाल त कोई जेईं बि एतु कमियाब ना भोई सकता। 28#यूहन्ना 1:20तुस अपफ में उगाही असे कि मेईं बोलो थिउ कि अउं मसीह ना भो, पर तस केईआं अगर लंघो असा। 29इए शुणे! जे कुआ दुल्हन जुए ब्याह कता, से दुल्हा भो। त जीं दुल्हे मितर दुल्हे जुए खड़ भोई कइ दुल्हे अवाज शुणणे बेलि खुशी मेती, ती खुशी जुए में छाड़ि भीं लगण लगोरी नेईं। 30त ई जरूरी असु कि यीशु शान बधो लौती त में घट भो लौती।”
31तोउं यूहन्ने बोलु, “जे स्वर्ग केआं अओ असा, से होरी सोबी केआं बोडा असा। मेह्णु इस मतोके भिन्थ त से मतोके बोके कते। पर से परमेश्वर केआं अओ असा त से होरी सोबी केआं बोडा असा। 32तेन जे बि स्वर्ग अन्तर काउ त परमेश्वर केआं शुणु तसे उगाह देन्ता। पर कोई बि तसे बोक ना मानते। 33तोउं बि जेन केनि तसे बोके मनी से सोबी के अगर उगाह देन्ता कि परमेश्वरे वचन सच्चा असा। 34यीशु परमेश्वरे लंघो असा, त से परमेश्वरे बोक कता, किस कि परमेश्वर खुल कइ अपु आत्मा तसे धे देन्ता। 35परमपिता परमेश्वर अपु कुआ यीशु ट्यारा असा त तेन सोबी चीज पुठ तसे धे हक दुतो असा।#मत्ती 11:27; लूका 10:22 36त जे परमेश्वरे कुआ पुठ विश्वास कता, तस परमेश्वर जुओई अमर जीवन मेता। पर जे बि तस पुठ विश्वास ना कता, तस जीवन ना मेता। पर तस जे परमेश्वरे भयंकर कोप असा।”
© 2023 (Active) Wycliffe Bible Translators, Inc. All rights reserved.