San Mateo 5
5
Allempo Jesúspaꞌ serrpareꞌtatosanet all aspentho
1Allempoña entan shonteꞌ acheñeneshaꞌ ñeñth kotheneꞌ, Jesúsñapaꞌ awoꞌ aspentho. Allña anorrospaꞌ waxhaꞌtoña allowen poeyochreshaxhno. 2Ñañapaꞌ yexhatapanetpaꞌ ateth otapan acheñeneshaꞌ ñeñth poꞌñoxh atarr kosheñtsoꞌtsaꞌyenet:
Acheñeneshaꞌ ñeñth poꞌñoxh atarr kosheñtsoꞌtsaꞌyenet
(Lc. 6.20-23)
3—Nanak kosheñtsoꞌtsaꞌyen allowen ñeñth ama esoyeꞌ asherbenayeꞌ entyetso poeyoxhreto Yomporekop tharroꞌmar ñetpaꞌ oꞌpaterretchaꞌ Yompor poꞌkowenña attho ayochreshathtena poeꞌntañoth.
4‘Nanak kosheñtsoꞌtsaꞌyen allowen ñeñth llekaꞌyetsa Yomporekop tharroꞌmar ñetpaꞌ koshaterranetchaꞌ Yompor.
5‘Nanak kosheñtsoꞌtsaꞌyen allowen ñeñth ama añeyeꞌ eꞌneneto ñeñth eꞌñe ñokpoeta tharroꞌmar ñetpaꞌ oꞌpataterranetchaꞌ Yompor allowanen pats.
6‘Nanak kosheñtsoꞌtsaꞌyen allowen ñeñth nanak moeneneꞌ oꞌch eꞌñe orrtatyenet ñeñth eꞌñe pokteꞌ enten Yompor. Ñetpaꞌ eꞌñe ateth moeneñet ñerraꞌmrratheꞌ xho nanak yachporrena ñamha nanakchaꞌ yoꞌñpaꞌten. Nanak kosheñtsoꞌtsaꞌyenet ñet tharroꞌmar Yomporña eꞌñe ateth moenaterranet.
7‘Nanak kosheñtsoꞌtsaꞌyen allowen ñeñth nanak kowen moerannetsa tharroꞌmar elloña Yomporpaꞌ atarrchaꞌ moererranet ñet.
8‘Nanak kosheñtsoꞌtsaꞌyen allowen ñeñth eꞌñe poeyoxhretopaꞌ ama eñalle sosyaꞌtsañ amaꞌt koñeꞌtha tharroꞌmar ñetpaꞌ enteretchaꞌ Parets.
9‘Nanak kosheñtsoꞌtsaꞌyen allowen ñeñth xhokma amoꞌtstannaꞌtatenawet tharroꞌmar ñetpaꞌ poꞌñoxhchaꞌ Yompor poechemer perranet.
10‘Nanak kosheñtsoꞌtsaꞌyen allowen ñeñth eꞌmoñeꞌtyenet attho ñetpaꞌ eꞌñe pokteꞌ es phaꞌyenet Yomporekop. Nanak kosheñtsoꞌtsaꞌyenet tharroꞌmar ñetpaꞌ oꞌpaterretchaꞌ Yompor poꞌkowenña attho ayochreshathtena poeꞌntañoth.
11‘Sapaꞌxhoꞌña nanak kosheñtsoꞌtsaꞌyenes ñerraꞌm esempo errotwanen penset noꞌmar. Nanak kosheñtsoꞌtsaꞌyenes ñerraꞌm xho sapaꞌ sasareꞌtyenset, eꞌmoñeꞌtyenset, paꞌnamen sosey tomaꞌtampesyenset. 12Xhokmoepaꞌchña soksha tharroꞌmar shonteꞌ ñeñth oꞌpatatensa Yompor poeꞌntaño; ñeñthchaꞌña atarr sokshaterreꞌ. Amaꞌt awathotheñ allempo ama seꞌñalletenaꞌ atthekma eꞌmoñeꞌtyeseteꞌth ñamha ñeñth aꞌmhtaꞌyesayeꞌth Yompor poꞌñoñ.
Acheñeneshaꞌ ñeñth sherbets Yomporekop arr patsro ñetpaꞌ ateth atmaꞌntatarethtenet ñerraꞌm pos ñamha poetareꞌ
(Mr. 9.50; Lc. 14.34-35)
13‘Sapaꞌ ñeñthes nameꞌñenaya añ netmaꞌntatensa ateth ñerraꞌm pos ñeñth atarr sherbeneꞌ allowen acheñeneshaꞌ arr patsro. Tharraña pospaꞌ ñerraꞌm oꞌch wañerr poꞌposerrteña amach errothenoth ellopaꞌ yaꞌposerrtatere. Allempopaꞌ oꞌwañchaꞌ es sherbhaꞌ acheñeneshakop; añekpach sherberr oꞌch yewaporeꞌch aꞌyo allchaꞌ athmamaꞌch acheñeneshaꞌ.
14‘Ñamha añ netmaꞌntatensa poetareꞌ elloña ñeñthña atarr sherbeneꞌ acheñeneshaꞌ arr patsro. Sapaꞌ xhokmach kowen es sorrtatyen. Atethchaꞌ sepena ñerraꞌmrratheꞌ patherr anets ñeñth eꞌñe aꞌnosoꞌtsen aspentho. Ñeñthña anetserpaꞌ xhokmach kowen orrtena allemhatheñ, amach errothenoth maꞌnatacheto. 15Ñamha ñerraꞌm esempo yaꞌllchaten lampareñpaꞌ ñeñthpaꞌ ama tharrekpayeꞌ yaꞌllchateñe oꞌch yeꞌrramampes koymho. Ñeñthpaꞌ añekopña yaꞌwortateñ oꞌch yeneꞌ enoneth atthoch eꞌñe xhoyoꞌtampeswan allowen ñeñth pokolloꞌtsaꞌyen. 16Sapaꞌ atthekmoepaꞌchña sorrtatyen ñeñth kowen enten Yompor. Allochñapaꞌ poꞌpotantañpaꞌxhoꞌña eꞌñech kowenareꞌ entennaset ateth es sorrtatyen kowen. Atthochña ñetpaꞌxhoꞌña kowentatapreterrnasetchaꞌ Seyomporer ñeñth poeꞌntañoꞌtsen.
Attho Jesúspaꞌ yexhatosanet atarr sherben Yompor poꞌñoñ ñeñth ateth anareth awathotheñ
17Jesúsñapaꞌ ateth oterraneterr:
—Amach sokthapeꞌchatsto napaꞌ añekoptheꞌ nowapa oꞌch newaporeꞌtaterr Yompor poꞌñoñ ñeñth awathotheñ ateth anareth ateth ñerraꞌm Moisés poꞌñoñ ñamha añ poꞌñoñ ñeñth kellkaꞌyeseꞌth ñeñth aꞌmhtaꞌyesayeꞌth Yompor poꞌñoñ. Napaꞌ ama añekpayeꞌ nowapo oꞌch newaporeꞌtach, napaꞌ eꞌñechkaꞌyeña netsotatwer. 18Eꞌñe poꞌñoxh notenes: Ama awaporeꞌtpawoyaye Yompor poꞌñoñ ñeñth ateth anareth awathotheñ, amaꞌt thayotheñ tharrempowach esempowañenchaꞌ chenkaꞌwerra pats ñamha enet. Amaꞌt pathrra ñoñets ñeñth ateth anarethpaꞌ amach chenkërro amaꞌt eꞌñe pathrra kellek poeshempothollowenpaꞌ amach chenkërro amaꞌt thayotheñ tharrempowach esempowañenchaꞌ eꞌñe etsotwerra ñeñth ateth oten awathotheñ. 19Ñeñthoꞌmarña ñerraꞌm eseshaꞌ oꞌwañ eꞌñeyeꞌ ameꞌñaꞌpoꞌ entan amaꞌt pathrratholla ñoñets ñeñth ateth anareth awathotheñ ñamha ñerraꞌm atthach yexhatan poꞌpotantañ, ñeñthña acheñerpaꞌ amach tama sherbeno Yomporekop ñeñth attho ayochreshathtena ña poeꞌntañoth. Tharraña ñerraꞌm eseshaꞌchña eꞌñe etsoterreꞌ ñamha ñerraꞌm eꞌñech ateth yexhatan poꞌpotantañ, ñeñthña acheñerpaꞌ ñeñthchaꞌña atarr sherberrets Yomporekop atthoch ayochreshathterra ña. 20Napaꞌ oꞌch notas, poꞌñoxhkaꞌye sa ateth eꞌñe pokteꞌ es sorrtatyen, ellochña semhtanaꞌtwerepaꞌch ateth es kowen orrtatyeneñ fariseoneshaꞌ ñamha añ ñeñth atarr etsotayenayeñ ñoñets ñeñth ateth anareth. Ñerraꞌm amach semhtanaꞌtwerranetopaꞌ amach errothenoth soꞌpataprechoña Yompor poꞌkowenña attho ayochreshathtena ña poeꞌntañoth. Atthoña amaꞌt awathapaꞌ amach sexherro all amhchaꞌtarethtena poeꞌntaño.
Attho Jesúspaꞌ yexhatosanet ama eꞌmoñeꞌtannaꞌtpawoyaye
(Lc. 12.57-59)
21Jesúsñapaꞌ alla yerpaterraneterr ñeñth ateth anarethteteꞌth awathotheñ ñoñets, ñeñthpaꞌ ateth oterraneterr:
—Sa awathotheñpaꞌ seꞌmartheꞌña ateth otarethteꞌth awath acheñeneshaꞌ. Ñeñthpaꞌ ateth otarethteteꞌth: “Amach moetsatsteto acheñ. Ñerraꞌm eseshaꞌ moetseneꞌ acheñpaꞌ ñapaꞌxhoꞌña moetseretchaꞌ tharroꞌmar ñeñthothchaꞌña oꞌpatateret koñcheñets.” 22Elloña na theꞌpaꞌ oꞌch noterres, amaꞌt ñeñth attha eꞌmoñeꞌteneꞌ pamoꞌtspaꞌ ñapaꞌxhoꞌña ñeñthothach oꞌpatateret koñcheñets. Ñamha ñerraꞌm eseshaꞌ atarr sosyoth sochatseꞌteñet pamoꞌts ñeñthpaꞌxhoꞌña ñeñthothach oꞌpatateret koñcheñets alloꞌtsaꞌyen amhchaꞌtarethneshaxhno allekma aꞌpoktatenet ñoñets. Ñamha ñerraꞌm eseshaꞌ poepenkareꞌteñoth atarr sosyoth sochatseꞌteñet pamoꞌts ñeñthpaꞌxhoꞌña acheñerpaꞌ añ oꞌpatenaya tsoꞌ ñeñth parrarets errapharen.
23‘Ñeñthoꞌmarña napaꞌ oꞌch notas: Ñerraꞌm esempo xho es phapoen Yomporekop allekma sherbeñet Yompor allñapaꞌ thaya oꞌ peyerposya phamoꞌtsñapaꞌ xha phatsrreꞌmateñ, 24phañapaꞌ ñeñthchaꞌ phap Yomporpaꞌ penaꞌner alla. Oꞌch awerreph, pemoꞌnasheñña ñanom phamoꞌtsterraꞌ. Allempochña pepoerrerra allekma sherbeñet Yompor allempochña phapwer Yompor ñeñth phoꞌpatateña.
25‘Ñamha ñerraꞌm esempo eseshaꞌ setmanteneꞌ oꞌch anmaset amhchaꞌtarethesho allchaꞌ saꞌpoktaterraꞌ señoñ, sañapaꞌ eꞌñech allorokma samoꞌtstera ñeñth seꞌmoñeꞌteneꞌ thayepaꞌtñapaꞌ ama sexhenaꞌ amhchaꞌtarethesho. Xhosachña amoꞌtsterraya ñeñth setmanteneꞌ theꞌt atthoth pomataterrset amhchaꞌtarethesho ñañapaꞌ oꞌch pomoensaꞌ guardiyesho ñeñthchaꞌ seyottamphseꞌ. 26Poꞌñoxhkaꞌye oꞌch notas, ñerraꞌm xhoch yottamphsasetpaꞌ allenasachkaꞌye oꞌpono allothpaꞌ amachkaꞌye awen xhaꞌnmaterrseto. Esempowañenchaꞌ xhoch sexhaꞌnmaterret ñerraꞌm esempoch eꞌñe setsaꞌtwerra ora allowen ñeñth allpon kelle moenenet. Amaꞌt eꞌñe eptalla centavothollña ñerraꞌm ama setsaꞌtweñaꞌpaꞌ amachkaꞌye xhaꞌnmaterrseto alloth. Ñeñthoꞌmarña notenes oꞌch eꞌñe kowen samoꞌtstera ñeñth seꞌmoñeꞌteneꞌ thayepaꞌtñapaꞌ ama xhennasaꞌ ñeñth atarr yoroxhen senten sokop.
Attho Jesúspaꞌ yexhatosanet ama achtapretpawoyaye thaporets
27‘Ñamha sapaꞌ awathotheñ seꞌmartheꞌña ateth otarethteꞌth acheñeneshaꞌ: “Amach chetapretatsteto thaporets.” 28Elloña na theꞌpaꞌ oꞌch noterres, ñerraꞌm eseshaꞌ koweneꞌ koyaneshaꞌ poeyeꞌcheñoth, oꞌkaꞌye ochñaꞌtet poeyoxhreto.
29‘Ñeñthoꞌmarña notenes: Ñerraꞌm seklleꞌ phatyenes ñeñth ama pokteyeꞌ enteno Yompor, añ poktetsa oꞌch sekexhpoerr ñeñth seyeꞌchena seklloyoth. Ñeñthpaꞌ eꞌñe ateth ñerraꞌmrratheꞌ xho serrothen seklleꞌ oꞌch sewaporeꞌch, amaꞌt ñeñth seklleꞌ sekowenrotheꞌtsen ñeñth atarr sesherbeneꞌ. Añña ama tama yoroxhenayaye sokop oꞌch saꞌypoꞌñer eꞌne thayekma ñeñth sokthapeꞌchateneꞌ sosyaꞌtsañ. Añchaꞌña atarr yoroxhen sokop ñerraꞌm ama thayekma saꞌypoꞌñerepaꞌ esempowañenpaꞌ orach waporeꞌterrset koñchaꞌpoetso all parraren tsoꞌ. Ñeñthpaꞌ añ tomaꞌntena ateth ñerraꞌmrratheꞌ oꞌ yaꞌchenkaterr patherr yechets amaꞌt yeklleꞌ amaꞌt yot, theꞌt esempowañen ora yechtsowenpaꞌ waporeꞌterryet koñchaꞌpoetso. 30Atthekma ñamha ñerraꞌm sotpaꞌ phatyenes ñeñth ama pokteyeꞌ enteno Yompor añ poktetsa oꞌch sekexhpoerr ñeñth ateth xhokma phatseꞌtatyenes sot. Ñeñthpaꞌ eꞌñe ateth ñerraꞌmrratheꞌ xho sepechen sotpaꞌ oꞌch sewaporeꞌch, amaꞌt ñeñth sekowenrotheꞌtsen sot ñeñth atarr sesherbeneꞌ. Ñeñthpaꞌ oꞌch alla noterrserr. Añña ama tama yoroxhenayaye sokop oꞌch saꞌypoꞌñer eꞌñe thayekma ñeñth sokthapeꞌchateneꞌ sosyaꞌtsañ. Añchaꞌña atarr yoroxhen sokop ñerraꞌm ama thayekma saꞌypoꞌñerepaꞌ esempowañenpaꞌ orach waporeꞌterrset koñchaꞌpoetso.
Attho Jesúspaꞌ yexhatosanet ama asannaꞌtpawoyaye
(Mt. 19.9; Mr. 10.11-12; Lc. 16.18)
31‘Ñamha theꞌpaꞌ oꞌch noterrserr poꞌpoñ: Sapaꞌ awathotheñpaꞌ señoteñeꞌtña ateth otarethteteꞌth: “Ñerraꞌm eseshaꞌ serreꞌ poethaporpaꞌ apaꞌnmepaꞌña papell all akellkareth atthoch kexhpoerran poethapor.” 32Elloña na theꞌpaꞌ oꞌch noterres: Ñerraꞌm ama añekpayeꞌ kexhpoerrano poethapor attho ama xhoyeꞌ agënano poꞌpsheñeñ yakma, ñerraꞌm atthotha serran poethapor, ñañapaꞌ ochñaꞌtaterranchaꞌ poethaporesheꞌmañ poꞌpsheññeshoth; ñeñthpaꞌ ama kowenayeꞌ enteñe Yompor. Ñamha ñerraꞌm eseshaꞌña yorerreꞌ ñeñth asarethpaꞌ ñeñthña yakmarpaꞌ xhach chetapretenan poꞌpsheñeñ poethapor; ñeñthpaꞌxhoꞌña ama kowenayeꞌ enteñe Yompor.
Attho Jesúspaꞌ yexhatosanet amach natsteto poꞌñoñ Parets paꞌsoꞌchño
33‘Ñamha theꞌpaꞌ oꞌch noterrserr poꞌpoñ: Sa awathotheñpaꞌ seꞌmareꞌtña ñeñth ateth otarethteteꞌth: “Amach eꞌñe orrena naꞌyeneto poꞌñoñet Parets paꞌsoꞌchño tharroꞌmar ñerraꞌm erraꞌtsen neneꞌ poꞌñoñ Parets paꞌsoꞌchño ñeñthpaꞌ atarr womenk ñoñets amach attha poesatscheto, xhokmachña eꞌñe aꞌpoktatyenet ñeñth ateth oꞌ nowetña poꞌñoñet Parets paꞌsoꞌchño.” Ñeñthpaꞌ atethkaꞌye otarethteteꞌthña awathotheñ. 34Tharraña elloña na theꞌpaꞌ oꞌch noterres: Amaꞌt eꞌñe erraꞌtsena paꞌsoꞌchñopaꞌ amach senatsto señoñ. Amach sotatsto oꞌch senaꞌ señoñ Yompor poeꞌntañ paꞌsoꞌchño; ñeñthpaꞌ ama tama womenkayeꞌ senteññe ñeñthekop ateth senen señoñ. Tharroꞌmar napaꞌ oꞌch notas amaꞌt poeꞌntañpaꞌ ñeñth poꞌkonañ pen Parets ñeñthoꞌmarña atthera atarr womenk ñerraꞌm Pamoꞌmteꞌ. 35Ñamha amach sotatsto oꞌch senaꞌ señoñ Yompor poꞌpatseñ paꞌsoꞌchño tharroꞌmar ñeñthpaꞌxhoꞌña atthera atarr womenk tharroꞌmar ñeñthpaꞌ ñeñthña nen Parets paꞌtkoneth. Ñamha amach sotatsto oꞌch senaꞌ señoñ Jerusaléñ paꞌsoꞌchño tharroꞌmar ñeñthpaꞌxhoꞌña atthekma atarr womenk tharroꞌmar ñeñthpaꞌxhoꞌña ñeñth paꞌnetser pen Parets. 36Ñamha amach sotatsto oꞌch senaꞌ señoñ eꞌñe sa soñ paꞌsoꞌchño tharroꞌmar ñeñthpaꞌxhoꞌña ama soyaye seyexhkatar. Amaꞌt eꞌñe poepharra sechpaꞌ amatheꞌ errothenoth selloꞌtacheña sa. Ñamha ñerraꞌm esempoch selloꞌtenpaꞌ amach errothenoth alla saꞌkellwetatereña sa. 37Amaꞌt errothena sephaꞌyesaꞌchpaꞌ atethchaꞌ sotannaꞌtyesa: Ñeñthpaꞌ atethchaꞌkaꞌye yepeꞌ. Ama palltenoña oꞌch senaꞌyen señoñ amaꞌt eꞌñe esa paꞌsoꞌchño tharroꞌmar ñerraꞌm ateth sephaꞌyenapaꞌ ñeñthpaꞌ oneñetheshotha wena.
Attho Jesúspaꞌ yexhatosanet ama atsaꞌtatpawoyaye attho eꞌmoñeꞌtenyet
(Lc. 6.29-30)
38‘Oꞌch alla noterrserr poꞌpoñ: Ñamha sapaꞌ awathotheñ seꞌmareꞌtña ñeñth ateth oteteꞌth: “Ñerraꞌm eseshaꞌ pochoklleꞌcheꞌ pamoꞌts, semoñseñoth ñeñth apochoklleꞌcharethpaꞌ sepochoklleꞌch ñamha ñeñth pochoklleꞌcheneꞌ pamoꞌts. Ñamha ñerraꞌm eseshaꞌ poeꞌmoñeꞌteñothan aꞌkayamphsan pamoꞌts paꞌspaꞌ semoñseñothpaꞌ saꞌkayampes ñamha paꞌs ñeñth aꞌkayampeneꞌ pamoꞌts paꞌs.” Ñeñthpaꞌ atethkaꞌye otarethteteꞌthña awath. 39Tharraña na theꞌpaꞌ oꞌch notas elloneth: Amach semoñsatstoña sa eꞌñe sañeña ñerraꞌm esempo eꞌmoñeꞌtyenset. Ateth ñerraꞌm esempo eseshaꞌ poeꞌmoñeꞌteñothetas oꞌch takllaset setsaꞌpo sekowenroth, sañapaꞌ poktepaꞌchña señch takllerrserrepaꞌ ñamha poꞌpshemhtañoth. 40Ñamha ñerraꞌm esempo eseshaꞌ moeneneꞌ oꞌch temantaset atthoch poerratamphsaset seshtam, sañapaꞌ poktepaꞌchña señch poerratamphsasetepaꞌ seshtam ñeñth moenenet amaꞌt ñamha poꞌpmañ seshtam allo sepmatena. 41Ñamha ñerraꞌm eseshaꞌ sanmatsreꞌtateneꞌ eꞌñe attha patherr kilómetro, sañapaꞌ poktepaꞌchña señch oꞌch sanmatsreꞌch amaꞌt epa kilómetro. 42Ñamha ñerraꞌm eseshaꞌ es senamoeneꞌ, sañapaꞌ sapepaꞌch. Ñamha ñerraꞌm eseshaꞌch senamoeneꞌ oꞌch es sarchapaꞌ sañapaꞌ sarchepaꞌch.
Attho Jesúspaꞌ yexhatosanet amorrentpoꞌch yeñch ñeñth yeꞌmoñeꞌtyeneꞌ
(Lc. 6.27-28, 32-36)
43‘Ñamha sapaꞌ seꞌmartheꞌña ateth oteteꞌth awath: “Moeryetchaꞌ pamoꞌtset ñeñth moerenawet. Tharraña ñeñth eꞌmoñeꞌtenawetpaꞌ ñetpaꞌxhoꞌña oꞌch eꞌmoñeꞌchet ñamet.” Ñeñthpaꞌ atethkaꞌye oteteꞌth amaꞌt awathotheñ. 44Tharraña naña theꞌpaꞌ elloña oꞌch noterres: Semoeryach amaꞌt ñeñth seꞌmoñeꞌteneꞌ. Ñamha ñeñth sarrnomareꞌtenaya sañapaꞌ oꞌch senamaterrñañ Yompor paꞌnateña. Ñamha ñeñth erroth sepeneꞌpaꞌ sañapaꞌ añchaꞌ ateth sepoñ ñeñth atarr kowen enten ña. Ñamha ñeñth saꞌmoeroxhtateneꞌ sañapaꞌ oꞌch semaꞌyochampesya. 45Atthochña sapaꞌ eñotenset poꞌñoxh poechemer penes Yompor ñeñth poeꞌntañoꞌtsen tharroꞌmar sapaꞌ añ sorrtatyen kowen amaꞌt eꞌñe allowenakop eꞌñe ateth pena Sompor ñapaꞌ eꞌñe kowenareꞌ es orrtatyen amaꞌt allowenakop. Ateth ñapaꞌ xhokma wapataꞌmoenaneꞌth poꞌpoetarenña allowenakop amaꞌt atsrreꞌmñathekop ñamha ñeñth kowenakop acheñer. Ñamha ñapaꞌ xhokma watateñ añekop ñeñth eꞌñe pokteꞌ es pets amaꞌt ñamha añekop ñeñth ama pokteyeꞌ es phaꞌyetso. 46Ñeñthoꞌmarña notenes: Ñerraꞌm aña eꞌñe semorrentena ñeñth semorrentenaya samha ñeñthpaꞌ amach eꞌñeyeꞌ sorrtatenoña ñeñth eꞌñe poꞌñoxh kowentetsa, atthoña Yomporpaꞌ amach es apoerrso ñeñthchaꞌ atarr sokshaterreꞌ. Tharroꞌmar ñeñth ama ameꞌñenayo Yompor, ñetpaꞌ aña morrentenet ñeñth eꞌñe morrentenawet ñamet. Sapaꞌ eꞌñekaꞌye señoteñ eꞌñe ateth pena ñeñth poeshkëñotheꞌna cobrenan acheñeneshaꞌ shonteꞌ kelle. Añña atarr kowentetsa amaꞌt ñeñth ama yemorrentenayepaꞌ oꞌch yemorreñcha eꞌñe kowen. 47Ñamha ñerraꞌm eꞌñe aña kowen sagën ñeñth eꞌñe samoꞌts sepen, ñeñthpaꞌ amach errothenoth semhtanoña ñeñth ama ameꞌñetso, tharroꞌmar ñetpaꞌ eꞌñe aña kowen agënet ñeñth eꞌñe pamoꞌts penet. 48Ñeñthoꞌmarña napaꞌ notenes: Sapaꞌ eꞌñepaꞌchña kowenareꞌ es sorrtatyen allowenakop eꞌñe ateth pena Sompor ñeñth poeꞌntañoꞌtsen eꞌñe kowenareꞌ es orrtatyenña ña.
© 2014, Wycliffe Bible Translators, Inc. All rights reserved.