Génesis 9
9
Noéi'ccu fae'ngae injancco'fa'cho
1Chigaja Noé, tise dutssiyendeccuma'qque ñotsse tsoñe in'jamba qquen su: “Pa'cco andeni japa can'jemba atapa'faja. 2Toya'caen tsu poiyi'cco va andeni canseqque'su, sefani chhajeqque'su chhiriria, andenga manguqque'su, marni'su avu'qque que'ima dyoe'sui'ccu in'jan'faya. Nane ña que'inga afesi qui poiyi'cco tsendeccuma manda'faya. 3Toya'caen pa'cco cansian jincho'cho tsu que'i anqque'su. Nane ande'ye sho'yoqque'su tetachoma anqque'suve que'inga afeqquia'caeñi gi osha'cho cansian jincho'choma'qque que'inga afe cuintsu amba canse'faye. 4Tsa'ma aña'cho na toya canseqquia'caen anjampapama qui an'faya'bi. 5Toya'caen poi a'i shacama, poi cansian jincho'cho shacama'qque gi iñajaña. Nane que'i anjampai'ccu qui afepoeña'cho. Poiyi'ccoma gi shacave iñajaña tisupapora canse'chone.
6Majan faesu a'ima fi'tti'ninda
faesu a'i tsu tsama'qque fi'ttiya.
Nane Chiga tisia'caen a'ive agattoen'choma fi'ttipa tsu tsa'caen paya.
7Tsa'ma que'ija poi andenga japa
tsain'bio du'shuve isupa ñotsse atapa'faja.”
8Toya'caen Chigaja Noéma, tise dutssiyendeccuma'qque su: 9“Que canjan. Que'i'ccu gi fae'ngae injanccopa toya'caen que'i omba'su dutssiyendeccui'ccu'qque fae'ngae injancco'faya. 10Nane poiyi'cco que'i'ccu tsa'o shavo'ye sombopa can'jendeccu —chhiriria, vaura'can, poi tsampini jincho'choi'ccu'qque gi fae'ngae injancco'faya. 11Que'i'ccu cambian'masia've fae'ngae injanccopa gi su: Ccatsse gi poiyi'cco cansian jincho'choma ccase na'ei'ccu fi'ttiya'bi. Ni ccatsse gi pa'cco andema ccase na'ei'ccu piccopa dañoña'bi. 12-13Uttufasima gi canjaeña unjimbanga cuintsu que'i attepa Ña que'i'ccu ja'ño jai'ngae'qque poi cansian jincho'choi'ccu injancco'fa'choma injan'jeñe. Tsama attepa qui in'jan'faya Ña va ande'sui'ccu injancco'fa'choma. 14Nane ña mandasi unjimba jangisi uttufasima attepa 15gi Ña que'i'ccu, poi cansian jincho'choi'ccu fae'ngae injancco'fa'choma injan'jeña. Ccatsse tsu na'enjan ccase andema piccoya'bi poi cansian jincho'choma fi'ttiye. 16Nane uttufasi unjimbanga attiansi gi tsama attepa ña poi ande'su osha'cho cansian jincho'choi'ccu fae'ngae injancco'fa'choma injan'jeña. 17Tsa uttufasi tsu ña poi ande'su osha'cho cansian jincho'choi'ccu fae'ngae injancco'fa'choma canjaen'cho.” Tsa'caen tsu Chigaja Noéma su.
18Noé dutssiyendeccu tisei'ccu tsa'o shavo'ye sombo'chondeccu tsu Sem, Cam, toya'caen Jafet. Camjan Canaán quitsa tsu. 19Tsa tres Noé dutssiyendeccupa tise'pa omba'su dutssiyendeccui'ccu tsu pa'cco andenga atapa'fa.
20Noéjan andema sema'su tsu. Tise tsu o'tie ofa tsajama joñe ashaen. 21Jomba tsa nasi nama taipa vinome cupaen. Vinome cupaemba cu'ipa ccusi. Ccusipa chu'cco ccui tise carpa tsaoni. 22Tsa'caen ccuisi Cam, tsa Canaán quitsa, tise yaya chu'cco ccui'choma atte. Attepa sombopa tise antiandeccuma conda. 23Pañamba Sem, Jafeti'ccu sarupama sepaccofanga indipa sepaccopayi carpa tsa'onga ca'nimba tise'pa yaya chu'cco ccui'choma picco'fa. Nane ccanima camba tise'pa yaya chu'cco ccui'choma atte'fambi.
24Ccusipa pasasi qquendyapa Noéjan in'jan tise du'shu chu'a tisema tson'choma. 25In'jamba su:
“Egae tsu tsoña Canaánga.
Nane tise antiandeccu tisema mandasi
me'detssia sema'suve tsu daya.”
26Toya'caen tsu Noéjan su:
“Na'su ña Chiga tsu Semnga ñotsse tsoña.
Nane Sem tsu Canaánma semoeña.
27Chiga anttesi Jafetja ñoa'me atapaya.
Atapapa Semi'ccu fae'ngae can'jemba tise'qque Canaánma semoeña.”
28Na'en tsa'caen pa'cco andema piccopa sambasi Noéjan ti'tsse tresciento cincuenta canqque'fave can'jen. 29Nane noveciento cincuenta canqque'fave an'biamba pa.
© 1998, Wycliffe Bible Translators, Inc. All rights reserved.