Salmos 15
15
1DSAˉJØ̱Ø̱Hˈ kya̱a̱nꜙ, ¿hi̱i̱ˉ dsaˉnääꜗ yaꜙjwɨɨꜗ kyahꜗ?
¿Hi̱i̱ˉ dsaˉta̱a̱hˋ jeeˊ naˉjngɨɨˈ kyahꜗ?
2Hi̱ˉ saꜙ maˉhlä̱ä̱hˉ kya̱a̱hˊ hneˉ, hi̱ˉ jmeeꜙ heˉ lluꜗ,
hi̱ˉ hlëëhꜙ juˈdsooꜘ läꜙka̱a̱ˉ tuhˉdsëꜗ,
hi̱ˉ heꜘ baˊ naˉngëˈ jwëꜗ dsaˉta̱a̱hˋ jeeˊ ja̱ˉ.
3Läꜙja̱ˉ hi̱ˉ saꜙ hlëëhꜙ wɨɨꜘ kihꜗ dsaꜙ,
hi̱ˉ saꜙ jmeeꜙ heˉ hlɨɨhˈ kihꜗ dsaˉkya̱a̱hˊ,
niꜙ saꜙ ta̱a̱yhˉ mɨɨhˊ dsaˉ hi̱ˉ tä̱ä̱hˊ kooꜘ kiyhꜗ.
4Saꜙ hnääyꜗ hi̱ˉ hñaaˉ dsëꜗ, pero hnääꜗ bihꜗ hi̱ˉ hnääꜗ Dio,
hiꜙ miˉteyꜗ heˉ maˉbä̱ä̱yhˉ hñiiyꜘ maꜙkeꜙ cha̱a̱yˉ wɨɨꜘ.
5Läꜙ maˊ miˉhä̱ä̱yꜙ dsaˉ kuuˊ, saꜙ ngɨɨyh˜ saˊjo̱o̱ꜘ,
hiꜙ saꜙ he̱e̱yhˉ heˉ ji̱i̱hꜗ dsaˉ kuuˊ
mahꜗ jmeeyꜗ hñaaˉ dsëyꜗ kihꜗ hi̱ˉ saꜙ ä̱ä̱ˉ dsooˊ.
Ja̱a̱ˉ hi̱ˉ jmeeꜙ läꜙja̱ˉ, ji̱hˊko̱hꜘ saꜙ tä̱yhꜙ.
© 2003, Wycliffe Bible Translators, Inc. All rights reserved.