Matiu 1
1
Yisasina aginago-mogami amakia.
1Mamona Yisasi Kalaisina aginagomogami amaki hane. Yisasiꞌa Teviti nofipiti kano maineanagino Tevitiꞌa Apalahamu nofipiti kanoe. Apalahamuꞌa Yisasina aginagomo maine.
2Apalahamuꞌa Aisakina nefaꞌe.
Aisakiꞌa Yekopuna nefaꞌe.
Yekopuꞌa Yutagami konagamogami neꞌamafaꞌe.
3Yutaꞌa Pelesigani Silagani neꞌanafa maineanagino itaꞌanimo agia Tamaꞌe.
Pelesiꞌa Hesalonina nefaꞌe.
Hesaloniꞌa Lamana nefaꞌe.
4Lamaꞌa Aminatapina nefaꞌe.
Aminatamiꞌa Nasonina nefaꞌe.
Nasoniꞌa Salamonina nefaꞌe.
5Salamoniꞌa Poasina nefa maineanagino itaꞌamo agia Lahapuꞌe.
Poasiꞌa Opetina nefa maineanagino itaꞌamo agia Lutiꞌe.
Opetiꞌa Yesina nefaꞌe.
6Yesiꞌa Tevitina nefa maineanagino Tevitiꞌa Isaleli veaꞌmogami ala sauve kanoꞌami maineane.
Tevitiꞌa Solomonina nefa maineanagino itaꞌamoꞌa hagoteno Yulia a maineane.
7Solomoniꞌa Lehopoamina nefaꞌe.
Lehopoamiꞌa Apiana nefaꞌe.
Apiaꞌa Asana nefaꞌe.
8Asaꞌa Yehosafatina nefaꞌe.
Yehosafatiꞌa Yeholamina nefaꞌe.
Yeholamiꞌa Usiana nefaꞌe.
9Usiaꞌa Yotamina nefaꞌe.
Yotamiꞌa Ahasina nefaꞌe.
Ahasiꞌa Hesekiana nefaꞌe.
10Hesekiaꞌa Manasena nefaꞌe.
Manaseꞌa Emonina nefaꞌe.
Emoniꞌa Yosaiyana nefaꞌe.
11Yosaiyaꞌa Yehoiyakiniꞌene ani koganamogami neꞌamafaꞌe. Ani kanafina Papiloni kotega vayaꞌmoꞌya tu huteꞌya Isaleli veala amavaleꞌya Papiloni kotega nofi mo hu-ma-tageꞌya miya oꞌali aliꞌya ali-mainae.
12Ani veaꞌmoꞌya Papiloni kotega nofi huma-tageꞌya miya oꞌali aliꞌyana aliꞌya mainayanagino Yehoiyakinina Sealitielona nefaꞌe.
Sealitieloꞌa Selapapelina nefaꞌe.
13Selapapeliꞌa Apiutana nefaꞌe.
Apiutaꞌa Eliakimana nefaꞌe.
Eliakimaꞌa Asolana nefaꞌe.
14Asolaꞌa Satokina nefaꞌe.
Satokiꞌa Akimina nefaꞌe.
Akimiꞌa Eliutina nefaꞌe.
15Eliutiꞌa Eleasana nefaꞌe.
Eleasaꞌa Matanana nefaꞌe.
Matanaꞌa Yekopuna nefaꞌe.
16Yekopuꞌa Yosefena nefa maineanagino Yosefeꞌa Maliana anauꞌamoꞌagino ani aꞌmoꞌa Yisasina ategeꞌya agaifena Kalaisiꞌe* huꞌya Anumaya Kotiꞌa taugafa aligatigahe hu-tenea kanoe huꞌya hu-mainae.
17Apalahamuꞌa hagoteno maineno falitegeꞌya haenagaꞌa fotiniꞌa (14) aginagomoꞌya maime maime haiꞌya mo falitageno anile Tevitiꞌa evaꞌyi huno maineno falitegeꞌya haenagaꞌa fotiniꞌa (14) aginagomoꞌya maime maime haigeꞌya Papiloni vayaꞌmoꞌya eꞌya Isaleli veaꞌmogamina nofi hu-ma-tageꞌya miya oꞌali aliꞌyana aliꞌya mainageno haenagaꞌa fotiniꞌa (14) aginagomoꞌya maime maime haigeno Kalaisiꞌa falote hu-maine.
Maliaꞌa Yisasina atene.
18Yisasi Kalaisima atenea kea mage huno hu-maine itaꞌamo agia Maliaꞌe Yosefete ago hage-malenaya munalagino nagola vene ofaenea munaꞌmoꞌa aipaene maine. Anumaya Kotina Alu Aotage Avamuꞌaleti aipaene hu-maine. 19Yosefeteꞌma, hage-malenaya kanoa, fatago kano maineanagino havigu Maliaꞌa agaye huyafenagiꞌna kesi atalesue agesa havimaine. 20-21Ani kehena agesa havige havigeteno faeno maineno himona ageana Anumayamo ensole kanoa evaꞌyi huno mage huno hie “Yosefegae, Tevitina neꞌamogae, kolia ohuka Maliaꞌa akamoꞌagi afaꞌa avalo. Anumaya Kotina Alu Aotage Avamuꞌaleti aipaene maineanagino neꞌnafaꞌne ategahie. Ani nafaꞌneꞌmoꞌa agaiꞌa veaꞌmogamina kefo yaꞌamimo nofi hu-matenea veala ali kalu heno amaugafa ali-gatisiafe agia Yisasiꞌe huka malegane.” huno hu-maine.
22-23Nayona Anumayamo aune kanomo avayafiti mage huno hama-pai-maineane
“Haviho nagola vene ofaenesia munaꞌmoꞌa aipaene huteno neꞌnafaꞌne ategahie. Ani nafaꞌnemo agia mage huꞌya ayegahae Imanueliꞌe huꞌya ayegahae.” huno hu-maineane.
“Tagai kefina ani agimoꞌa Anumaya Kotiꞌa tagaiꞌene maine.” huno hu-maine. Yisasina atenea yupa ani kemoꞌa ago falote huno tamage hu-maineane.
24Yosefeꞌa ani himona ageteno aupiti hetino Anumayamo ensole kanomoꞌma hapaiya kea havino akave maleteno “Maliaga aꞌnimogae.” huno ali-tene. 25Yosefeꞌa ani afena “Aꞌnimogae” huteno alave yana ohuno afaꞌa maineꞌana ani nafaꞌnea ategeno Yosefeꞌa agia Yisasiꞌe huno malene.
© 2002, Wycliffe Bible Translators, Inc. All rights reserved.