Amangʼana agha Abhatomwa 10
10
Körönëriö aratomana amangʼana okobherekera Peetero
1Yaare-ho omonene uwa abhasirikare, mu-mughi ghono ghwaabherekerwanga igha Kaisaaria, ömöntö uyö, yaabherekerwanga igha Körönëriö. Körönëriö uyö, yaaimererranga ritabhë irya abhasirikare righana imwë, ukurwa mu-rikomo reno ryaabherekerwanga igha irya Ikiitaaria. 2Ömöntö uyö, ti-Muyahudi yaarë hë, kasi yaaighweranga Waryobha na okomosaasaama hamwë na abhantö abhaaye bhonswe igho. Kora yaasërëënianga abhantö bhököngʼu senkaagha syonswe igho.
3Urusikö urwöndë, kya saa kenda isya omobhasö, Körönëriö akeesherwa na amamaaho. Yaabhööshökëëywë mo-mamaaho muyö na maraika uwa Waryobha. Maraika uyö, akamobherekera igha, “Körönëriö!” 4Körönëriö akamaaherra maraika uyö na eno aroobhoha. Akamöbhöörya igha, “Omonene, kana n-kë?”
Maraika uyö akamötëëbhya igha, “Okosaasaama ukwaho na ökösërëënia abhatöbhu, kobhaayë ikimwenso ikya okoheetokwa na Waryobha. 5Bhoono uwe, toma abhantö bhaghi Yafa, bhabherekere Simööni ono akobherekerwa igha Peetero. 6Aikaayë wa Simööni omobhambi uwa amaseero. Inyumba iyaaye, haangʼë ërë na inyansha.”
7Hano maraika yaamarrë ökötëëbhya Körönëriö amangʼana ghayö, akatanora. Mbe, Körönëriö akabherekera abhaköri abha emeremo bhaaye bhabhërë, na umusirikare ömwë, mo-bhasirikare abhaaye, ono yaaighweranga Waryobha. 8Hano Körönëriö yaamarrë okobhatëëbhya ghonswe igho ghano ghaaikörrë, akabhatoma Yafa.
Amamaaho agha Peetero
9Urusikö urwa kabhërë, hano waanyöörrë abhantö bhayö bhaahikirë haangʼë na umughi ughwa Yafa, Peetero akariina ko-rosara#10:9 Orosara. Abhayahudi bhaasereetanga sinyumba isyabho ku ukwarya amahero kighörö. Hano bhamara bhahëtya-ko sëntë, bhahoma-ko amatoto. Hayö ho bhaaghösörryanga. okosaasaama Waryobha. Enkaagha iyö yaarë kya saa isansabha isya omobhasö. 10Akaighwa umweko, akaighomba okorya. Hano bhaamösëëmëryanga ibhyakorya, akeesherwa na amamaaho. 11Mo-mamaaho muyö, akamaaha mu-ryobha hahönyökirë, na ëkëntö ekenene kenga ishuuka, keraikibhwa hansë, këghöötërrëywë ëbhëköbhöbhi ibhya-ko bhine. 12Ku-shuuka kuyö, syaare-ko sityënyi teemo syonswe igho nyamaghörö ane. Bhyaare-ko bheno bhikwingʼuura, hamwë na ibhinyönyi.
13Ho Peetero yaaighuurë engamba, eno yaamötëëbhëri igha, “Peetero, emoka oghooghe, oraaghere!”
14Peetero akahonshora igha, “Tekeebhe hë ore Omonene! Ko bhoora tenakarëëyë ibhyakorya bhyobhyonswe bheera, bheno amaraghërryö agha Mosa ghakoraghërrya igha m-binyanku na mughiro okobherya!”#10:14 Maaha mo-ketabho ikya Amangʼana agha Abharaawi 11.
15Engamba iyö akamweshera urwa kabhërë, ekamötëëbhya igha, “Otakaabherekera ëkëntö keno Waryobha yaasendoora igha n-kinyanku.” 16Engʼana iyö yaaikörrë katatö. Ho kamwë igho, ishuuka iyö, ekahönshökibhwa mu-ryobha.
17Peetero akaroghoora. Akabha araibhöörya ensonga iya amamaaho aghaaye ghayö. Enkaagha iyöiyö, abhantö bhano bhaatömirwë na Körönëriö, waanyöörrë bhörökiibhwi inyumba iya Simööni, mu-kihiita hayö bhaarë bhaimërëëyë. 18Bhakabherekera ku-mughi kuyö, na ököbhöörya igha, “Simööni ono akobherekerwa igha Peetero, n-hano akotooka?” 19Hano Peetero waanyöörrë akiitegherra ensonga iya amamaaho aghaaye ghayö, Umwika Ömöhörëëru akamötëëbhya igha, “Oraighwa, abhantö abhatatö bharëngë kebhara hayö, nu-uwe bhakutuna. 20Iika hansë, uhinane nabho. Otakaakubhya, ko bhoora nö-öni mbatömirë.”
21Peetero akaika hansë, akatëëbhya abhantö bhayö igha, “Ömöntö ono mukutuna nö-öni. Ne-ngʼana kë ebharëëtirë hano?” 22Bhakamötëëbhya igha, “Töötömirwë na omonene uwa abhasirikare, ono akobherekerwa igha Körönëriö. Körönëriö uyö, nkosookwa arë na Abhayahudi bhonswe igho, ko bhoora akwighwera Waryobha, ghwiki m-möntö uwa heene. Maraika uwa Waryobha yaamötëëbhëri igha, akobherekere oghende waaye ka, okore aighwe amangʼana ghano oraamötëëbhi.” 23Peetero akabhasërëënia, bhakakora öbhöghëni.
Peetero arahika wa Körönëriö
Hano bhwaakëëyë, Peetero akatanora na abhaghëni bhayö, bhakahinana hamwë na abhakumya bharikyaye abha ikishaasha, abha Yafa hayö. 24Urusikö urwa kabhërë, bhakahika Kaisaaria. Körönëriö yaarenga akomaini bhahiiri abhaaye hamwë na abhasaani bhaaye, akabha araghanya Peetero.
25Hano Peetero yaahikirë, Körönëriö akamuturungʼana, akatema hansë ibhiru, akamosaasaama. 26Kasi Peetero akamwimökya aramötëëbhya igha, “Emoka wemerre! Ko bhoora öni wonswe, nö-möntö kya uwe ndë!” 27Peetero akasoha mu-nyumba na eno arashumaasha na Körönëriö. Akanyoora-mo abhantö abhaaru bhasangeraini. 28Peetero akabhatëëbhya igha, “Bhëënyu momanyirë bhuuya igha, amaraghërryö aghëëtö Abhayahudi teghakutwikërërrya igha tosange na abhantö bhano bhatarëngë Abhayahudi, handë okobhataarra. Kasi Waryobha, ankaanëri igha, ntakabherekera ömöntö wowonswe igho igha, m-munyanku handë igha taana ubhwera hë. 29Ku bhuyö, kiyö nkyo këghërrë nishirë, hano ntëëbhiibhwi igha moramberekera, tinkubhiri hë. Bhoono mbe möntëëbhi, ne-ngʼana kë mömbërëkërëëyë?”
30Körönëriö akamötëëbhya igha, “Syahëtirë-ho sinsikö isatö, ukurwa urusikö rono naarenga mu-nyumba iyaane ndasaasaama Waryobha, enkaagha kya eno, iya saa kenda isya omobhasö. Nkatookera ömöntö aimërëëyë mbere yaane, atöörrë singibho seno sekomekameka. 31Akantëëbhya igha, ‘Körönëriö, Waryobha yaaighuurë okosaasaama ukwaho, ghwiki namanyirë, na kora nkuhiita arë, kya bhono ökösërëënia abhatöbhu. 32Ku bhuyö, toma abhantö bhaghende Yafa, bhabherekere Simööni ono akobherekerwa igha Peetero. Ömöntö uyö, aikaayë mu-nyumba iya Simööni, omobhambi uwa amaseero. Inyumba iyö haangʼë ërë na inyansha.’ 33Kiyö nkyo kyaaghërrë nkatoma abhantö bhakobherekere. Na uwe wonswe, ökörrë bhuuya wishirë, okore ötötëëbhi bhano bhonswe igho törëngë mbere iya Waryobha hano. Twighwe amangʼana ghonswe igho, ghano Omonene yaakoraghërrëëyi.”
34Mbe, Peetero akatëëbhya abhantö bhayö igha, “Bhoono ndööshë igha, m-maheene Waryobha taana ekeroterro hë! 35Kasi nahanshirë abhantö abha heene, abha ibhyaro bhyonswe igho, bhano bhakumwighwera. 36Waryobha yaatomaini amangʼana ko-Bhaisiraëri agha okoraareka Amangʼana Amaiya agha omorembe, okohetera ku-Yëësu Kiristo, Omonene uwa bhonswe igho. 37Mmomanyirë keno kyaabhaayë mo-mokowa ughwa Yudea ghwonswe igho, ukusimirya mo-mokowa ughwa Ghariraaya, hano Yohana yaamarrë okoraarekera abhantö amangʼana igha, bhabhatiisibhwi. 38Waryobha yaahööyë Yëësu uwa Nazarëëti, ko okomohaana Umwika Ömöhörëëru na obhotoro. Yëësu uyö, yaainaarrënaarrë arakora amangʼana amaiya na ukuhwënia bhonswe igho, bhano bhaanyankibhwanga na Oghosambwa, ko bhoora Waryobha, n-hamwë yaarë nawe.
39“Bhëëtö mbo abhaimërërri abha amangʼana ghayö ghonswe igho, ghano yaakörrë mu-kyaro ikya Abhayahudi, na Yërusarëëmu. Akaitwa, ko okohanekwa ko-mosarabha. 40Kasi urusikö urwa katatö, Waryobha akamuryökya, kora akamokora amaahekane ko-bhantö. 41Kasi tiyaamaahekaini ko-bhantö bhonswe igho hë, nko-bhaimërërri bhano Waryobha yaahööyë ukurwa kare. Abhaimërërri bhayö, m-bëëtö. Hano yaaryökirë ukurwa mo-bhaku, ntwaasangirë hamwë ibhyakorya na ukunywa nawe. 42Akatoraghërrya toraarekere abhantö, na ukwimererra igha, we yaatoorwa-ho na Waryobha igha, abhotore ibhiina ibhya abhahöru na abhaku. 43Uyö we abharööti bhonswe igho bhaaimërërrëëyë bharaghamba igha, ömöntö wowonswe igho ono arimukumya, naryabherwa ëbhëbhë bhyonswe igho, ko okohetera iriina irya Yëësu.”
44Enkaagha eno waanyöörrë Peetero akeeghamba ghayö, Umwika Ömöhörëëru akabhaitoomera bhonswe igho bhayö bhaamwitegherranga. 45Hano Abhayahudi abhakumya Yëësu bhano bhaahinaini na Peetero ukurwa Yafa bhaarööshë amangʼana ghayö, bhakaroghoora okomaaha igha Abhakyaro bhonswe bhatuhirwë Umwika Ömöhörëëru. 46Keno kyaaghërrë abhakumya abha Yëësu bhakamanya, m-boora bhaaighuurë abhantö bhayö bharatöönia Waryobha, ko okoghamba ebheghambo ebhehya.
Mbe, Peetero akaghamba igha, 47“Bhoono n-nawë ono akotora okorebherra abhantö bhano bhatakabhatiisibhwa mo-manshë? Rëndë mbe abheene bhonswe, bhanyöörrë Umwika Ömöhörëëru kya bhëëtö!” 48Peetero akaraghërrya igha bhabhatiisibhwi, ku iriina irya Yëësu Kiristo. Hano bhaamarrë okobhatiisibhwa, bhakasabha Peetero aikare hamwë nabho sinsikö nyabhorebhe.
Currently Selected:
Amangʼana agha Abhatomwa 10: ssc
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.