Amangʼana agha Abhatomwa 12
12
Peetero aratööribhwa ukurwa mo-kebhohe
1Ko-nkaagha iyö, omokama Herode Aghiripa#12:1 Herode Aghiripa. Maaha mo-faharaasa. uwa mbere, akasimya ukunyankya abhantö abha ekanisa. 2Akaraghërrya igha Yaakobho#12:2 Yaakobho. Uyö yaarenga omoona uwa Zebhedaayo, na kora mweegha uwa Yëësu yaarë mu-ikömi na bhabhërë bhaara. Maaha mo-ketabho ikya Ruuka 5:10. mura uwaabho Yohana, aitwe na umushonge. 3Hano yaarööshë igha engʼana iyö ishömëëyë Abhayahudi, akaraghërrya igha Peetero wonswe aghootwe. Amangʼana ghayö ngaaikörrë enkaagha iya inyangi iya emekaate gheno ghetatöörrwë-mo ehamiira. 4Hano Herode Aghiripa uwa mbere uyö yaaghöötirë Peetero, akaraghërrya igha, atoorwe mu-nyumba iya ekebhohe. Akamotoora anaghibhwi na abhasirikare abhane abhane manga ane. Herode uyö, yaatunanga akore ikiina ikya Peetero harabhu igho ko-bhantö, hano inyangi iyö iya Epasaka ekaahööyë. 5Kasi enkaagha iyö Peetero yaarenga atöörrwë mo-kebhohe, abhantö abha ekanisa bhaakoranga omotono ughwa okosaasaama Waryobha.
6Ubhutikö ubhwa urusikö rono Herode uyö yaatunirë okokora ikiina ikya Peetero, Peetero yaarenga araayë mu-nyumba iya ekebhohe. Yaaraayë ghatëghatë iya abhasirikare abhabhërë, na eno abhöhirwë na iminyorro ëbhërë. Abhasirikare abhandë bhaarendanga mo-kesaku ikya inyumba iya ekebhohe iyö.
7Kamwë igho, maraika uwa Omonene Waryobha akaasha akaimerra haangʼë na Peetero. Obhorabhu bhokaromaana mu-kinyumba kiyö. Maraika uyö, akakunia Peetero mo-sembaru, akamutura, aramötëëbhya igha, “Bhookera këmwë!” Këmwë iminyorro gheno bhaabhöhirë Peetero ko-mabhoko, ghekatanshoka, ghekaghwa hansë. 8Mbe, maraika akamötëëbhya igha, “Ibhoha singibho isyaho, otoore na ebheraatö.” Peetero akakora kya igho yaatëëbhiibhwi. Ghwiki akamötëëbhya igha, “Toora ëkööti iyaaho, undwe nyuma!” 9Peetero akarwa nyuma maraika uyö, bhakarishoka kebhara iya inyumba iyö, iya ekebhohe. Kasi Peetero tiyaamanyirë igha m-maheene hë. Yaakanyanga igha, nkoroota arë. 10Peetero na maraika uyö, bhakaheta kö-mörëndi uwa mbere, na uwa kabhërë, bhakahika mu-kihiita ikya ibhyoma, ikya öbhöröngë ubhwa ukughya mu-mughi. Ikihiita ikya ibhyoma kiyö, kekeeghoka-ho ikyene igho, bhakarishoka kebhara iya inyumba iya ekebhohe. Hano bhaaghendanga ko-mohanda kuyö, maraika uyö akatigha Peetero kamwë igho.
11Ho Peetero yaasësëmökirë, akaghamba igha, “Bhoono manyirë igha, m-maheene. Omonene we atömirë maraika uwaaye, okore antööri ko ghano Herode uyö na Abhayahudi, bhaaitengʼeranga igha nkorrwe.”
12Hano Peetero yaamanyërrëëyi ghayö, akaghya këmwë wa Maryamu, nyakuwaabho Yohana. Yohana uyö, we yaabherekerwanga igha Maariko. Mu-nyumba iyö, waanyöörrë abhakumya abhaaru bhaikomaini-mo, bharasaasaamera Peetero ku-Waryobha. 13Peetero akakongʼonta ku-kihiita. Umwisëkë ömököri uwa emeremo ono yaabherekerwanga igha Rooda, akaghya ukwitegherra mu-kihiita hayö. 14Hano yaamanyërrëëyi igha engamba ni-iya Peetero, akashomerwa bhököngʼu, kora tiyaamwëghörrëëyë hë. Keno yaakörrë, no-kokenya ukughya mu-nyumba. Akabhatëëbhya igha, “Peetero mu-kihiita hayö arë aimërëëyë!”
15Abhantö bhayö bhakamohonshora igha, “Kana nkushuura örë!” Kasi umwisëkë uyö, akaghëndërrya okokangʼasërrya igha, ne-ngamba iya Peetero umwenemwene yo yaaighuurë. Ho ghwiki bhaaghambirë igha, “Uyö m-maraika uwaaye wighuurë.”#12:15 Ensonga iya uyö m-maraika uwaaye wighuurë ni-igha, maraika uwa okorenda Peetero we yaaishirë, handë igha në-këhwë ikya Peetero kyaaishirë. 16Kasi ku-ribhagha riyö ryonswe igho, Peetero yaaghëndërryanga okokongʼonta ku-kihiita hayö. Hano bhaaighööyë-ho ikihiita, bhakamaaha igha we, bhakaroghoora bhököngʼu. 17Peetero akabhainyökërya kighörö okobhoko okore bhakire. Akabhatëëbhya amangʼana ghonswe igho kya bhono Omonene amotangatirë ukurwa mu-nyumba iya ekebhohe. Ho yaamarrë, akabhatëëbhya igha, “Amangʼana ghayö mbatëëbhëri, mötëëbhi Yaakobho, na abhakumya bharikyëtö.” Peetero akatanora akaghya ahasë ahandë.
18Hano öröghörö rwaasambirë, abhasirikare mu-nyumba iya ekebhohe muyö, bhakahaha bhököngʼu, ko bhoora bhataamanyirë keno kyaabhaayë ko-Peetero. 19Herode akaghamba igha, Peetero atunwe. Kasi tebhamunyöörrë hë. Ku bhuyö akabhöörërrya bhuuya abharëndi bhayö. Hano yaamarrë, akaghamba igha bhaitwe. Hano Herode uyö yaamarrë okokora ghayö, akangʼaaraara ukurwa Yudea, akaghya mu-mughi ghono ghwaabherekerwanga igha Kaisaaria. Akaikara iyö sinsikö enke igho.
Ukukwa ukwa omokama Herode Aghiripa
20Mbe, okanyoora omokama Herode uyö, yaarererra bhököngʼu abhantö abha mu-mighi gheno ghyaabherekerwanga igha Tiiro bheena Siidööni. Ku bhuyö abhantö abha mu-mighi ghiyö, bhakatoma abhahiri abha amangʼana ko-Herode uyö, bhamosaasaame, okore bharengerrani bhabhe na omorembe. Abhahiri abha amangʼana bhayö, bhakangʼënërrya Bhurasito, umwimërërri uwa ughunyumba ughwa omokama Herode, okore aghootane nabho, abhe orobhareka urwabho ko mangʼana aghaabho na Herode. Bhaatunirë omorembe ko bhoora imighi ighya Tiiro na Siidööni, ngyaanyooranga ibhyakorya ukurwa mu-kyaro ikya omokama Herode.
21Hano urusikö rono Herode uyö yaashaaghööyë ukwitegherra amangʼana ghayö rwaahikirë, akatoora singibho isyaye isya ekekama. Akaikara ku-kitumbë ikyaye ikya ukwitegherra amangʼana agha abhantö. Bhoono mbe akaghambera abhantö. 22Ho rikomo irya abhantö bhayö, ryaaköngirë rekaghamba igha, “Engamba iyö, ti-iya ömöntö hë! Ni-iya Waryobha!” 23Hano Herode uyö yaakumiibhwi igha we Waryobha, tiyaasöökirë Waryobha hë, akaigheghera ubhuhika. Ku bhuyö maraika uwa Omonene Waryobha akamohaana öbhörööyë ubhwa amashangö, akaheta akakwa.
24Amangʼana agha Waryobha, ghakaghëndërrya okoromaana ko-bhantö, na abhakumya bhakaaruha bhököngʼu. 25Hano Bharinaabha na Sauri bhaaruurë ko-kehaheeno ikya Yërusarëëmu, bhakakyora Antiökia hamwë na Yohana, ono yaabherekerwanga igha Maariko.
Currently Selected:
Amangʼana agha Abhatomwa 12: ssc
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.