Amangʼana agha Abhatomwa 18
18
Pauro mu-mughi ughwa Körintö
1Hano amangʼana ghayö ghaahööyë, Pauro akarwa Atene hayö, akaghya mu-mughi ghono ghwaabherekerwanga igha Körintö. 2Akasikana-yo na Umuyahudi ono yaabherekerwanga igha, Akiira. Akiira uyö, nu-mwebhorrwa uwa omokowa ughwa Ponto yaarë. Akiira hamwë na mokaaye ono yaabherekerwanga igha Purisika,#18:2 Purisika. Iriina reno senkaagha isyëndë, nkobherekerwa rërë igha, Purisira. bhaarwërëëyë mu-mughi ughwa Ruumi mu-kyaro ikya Itaaria, ko bhoora Kaisaari Kiraudio yaaraghërrëëyi igha Abhayahudi bhonswe igho, bharughibhwi ukurwa Ruumi. Mbe, Pauro akaghya okobhakëërya. 3Ko bhono Pauro wonswe m-mutumi uwa amaghutu agha amatondobhaari yaarë, kya bhaabho Akiira, akaikara waabho hayö, bharakora hamwë emeremo ghiyö. 4Pauro akabha arasoha mu-nyumba iya esango iya Abhayahudi kera urusikö urwa Obhotooro, arashumaasha na Abhayahudi hamwë na Abhayunaani.
5Mbe, hano Siira na Timoteo bhaangʼaaraarrë ukurwa Makedonia ukuusha Körintö, Pauro akahengera mo-Bhayahudi ököbhëëghya engʼana iya Waryobha senkaagha syonswe igho. Akaimererra igha Yëësu we Kiristo. 6Kasi Abhayahudi bhayö, bhakamunyeera senkaani na okomotoka, ku bhuyö akaghankamora singibho isyaye, na okobhatëëbhya igha, “Hano moraasire m-bëënyu abheene, taaho ömöntö ono amaanyinga aghaaye gharaanyiromberre hë! Tigha öni bhoono ngende okoraarekera Abhakyaro.”
7Mbe, Pauro akatanora, akaghya, akaikara wa Tiito Yusito, ono yaasookanga Waryobha. Ömöntö uyö, inyumba iyaaye yaaheegheraini na inyumba iya esango iya Abhayahudi. 8Omonene uwa inyumba iya esango iyö, ono yaabherekerwanga igha Kirisipo, hamwë na abhantö abhaaye bhonswe igho, bhakakumya Omonene Yëësu. Abhakörintö abhaaru bhano bhaaitegherranga Pauro, bhonswe mbaakumiri, bhakabhatiisibhwa.
9Urusikö nyabhorebhe ubhutikö, Omonene Yëësu akatëëbhya Pauro mo-kerooto igha, “Otakoobhoha, uwe ghëndërrya okoraareka, otakaakira! 10Öni hamwë ndë na uwe, taaho ömöntö ono araakukuni-ko hë, ko bhoora neena abhantö abhaaru mu-mughi mono, bhano bharëngë orobhaara urwane.” 11Ku bhuyö Pauro akaikara omooka na imyëri esansabha Körintö hayö, arëëghya abhantö engʼana iya Waryobha.
12Enkaagha eno Ghario yaarenga ömötöngi uwa Akaaya, ho Abhayahudi bhaaghootaini hamwë, bhakaseeta Pauro, bhakamoghoota, bhakamuhira mo-bharasa. 13Bhakaghamba igha, “Twishirë ukushongera ömöntö ono, ko bhoora aköngʼënërrya abhantö igha, bhasaasaamenga Waryobha, ko-teemo eno etakorengerrania na amaraghërryö aghëëtö.”
14Enkaagha eno Pauro yaatunirë igha aikoorerre, Ghario akatëëbhya Abhayahudi bhayö igha, “Bhëënyu bhare Abhayahudi, singa nkushongera mörë ömöntö ono ko-bhosarya, hayö ho nkaabhaitëghërrëëyë. 15Kasi ko bhono n-senkaani isya amangʼana, amariina na amaraghërryö ghëënyu, moghamare bhëënyu abheene. Öni tëndëngë umwahokania uwa amangʼana ghayö hë.” 16Ghario akabharughya ukurwa mo-bharasa hayö.
17Mbe, abhantö bhayö bhonswe igho bhakaghoota Sositene, omonene uwa inyumba iya esango iya Abhayahudi, bhakamotema mo-bharasa hayöhayö. Kasi Ghario akamaaha igha, engʼana iyö, tëmötönëri hë.
Pauro arakyora mu-mughi ughwa Antiökia
18Mbe, hano amangʼana ghayö ghaahööyë, Pauro akaikara Bhökörintö hayö sinsikö sinsharu këmwëkëmwë. Ho yaamarrë, akaragha abhakumya bharikyaye, akaghya mu-mughi ghono ghwaabherekerwanga igha Siria. Hano yaahikirë Kenkirea, akaghingira situukya syaye ko-teemo iya Ikiyahudi, ko okoghera iya okohekerania ikityano keno yaarenga aihiimirriyi. Mbe, umwene hamwë na Purisika bhaana Akiira bhakariina mu-ryato irya ukughya mu-kyaro ikya Siria. 19Hano bhaahikirë Ëfësö, Pauro akatigha hayö bhaabho Pirisiira na Akiira, akasoha mu-nyumba iya esango iya Abhayahudi, akabha arashumaasha na Abhayahudi. 20Abhayahudi bhayö, bhakamosabha igha, ëngëri sinsikö isya ukwikara nabho hayö, Pauro tiyaikërëëyi hë. 21Kasi yaaraghaini nabho akabhatëëbhya igha, “Hano Waryobha arehansha, nindikyora.” Akariina iryato, akatanora ukurwa Ëfësö hayö.
22Hano Pauro yaahikirë Kaisaaria, akatiira ukughya Yërusarëëmu, ökökëërya-yo Abhakiristo. Ho yaamarrë, akangʼaaraara ukughya mu-mughi ughwa Antiökia. 23Hano yaamarrë-ho sinsikö nke igho, akarwa hayö. Akahetera Gharatia na Furighia, aratogheka Abhakiristo bhonswe igho.
Emeremo ighya Apöörö mu-mughi ughwa Ëfësö
24Mbe, Ëfësö hayö, yaaishirë-ho Umuyahudi uwöndë ono yaabherekerwanga igha Apöörö. Apöörö uyö, nu-mwebhorrwa uwa umughi ghono ghwaabherekerwanga igha Arekisandiria. Apöörö m-mokarë yaarë ko okoghamba, na yaamanyirë bhuuya Amaandeko Amahörëëru. 25Ömöntö uyö, yaarenga yëghiibhwi amangʼana agha Omonene Yëësu. Na ko bhono yaarë na omotono, akasimya ukwëghya abhantö ko obhokarë na obhoheene. Kasi obhobhatiisyo bhono yaamanyirë, nu-bhwa Yohana ubhwene igho. 26Apöörö akasoha mu-nyumba iya esango iya Abhayahudi, akasimya ukwëghya-mo Amangʼana Amaiya agha Yëësu ko obhokarë. Hano Purisika bhaana Akiira, bhaaighuurë kya bhono Apöörö yëëghyanga, bhakamuhira waabho, bhakamwörökërrya enshera iya Waryobha bhuuya kya igho ërë.
27Hano Apöörö yaatunirë igha amboke inyansha aghende Akaaya, abhakumya bharikyaye bhakamwikërërrya igha aghi. Ku bhuyö, bhakandekera Abhakiristo abha iyö ritashandighi igha, bhamösërëëni bhuuya. Hano yaahikirë iyö, akatöörrya bhököngʼu bhano bhaarenga bhakumiri Yëësu kö rööbhö urwa Waryobha. 28Apöörö yaahengeranga Abhayahudi mo-bhantö, harabhu igho ko-Maandeko Amahörëëru igha, Yëësu we Kiristo.
Currently Selected:
Amangʼana agha Abhatomwa 18: ssc
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.