Abharuumi 15
15
1Mbe, bhoono bhëëtö bhano toona umukumo ghono ghonaghirë, ni-igha töghömërringa na ökötöörrya bhanyamukumo mötëntëëru. Totakaakora amangʼana ghano ghakötötëghërya bhëëtö abheene igho. 2Kera ömöntö mö-bhëëtö, akorre umukumya murikyaye nyamukumo mötëntëëru, amangʼana agha ökömötëghërya, okore umukumo ughwa nyamukumo mötëntëëru ghonaghe. 3Ko bhoora kora Yëësu Kiristo umwene, tiyaimaahanga igha, aana ubhwera okokera abhandë. Kasi ghano yaakörrë ngaarë kya bhono Amaandeko Amahörëëru ghakoghamba igha,
“Amatöki ghano bhakokotoka Waryobha,
nö-öni umwahorwa uwaaho ghaanyöörrë.”#15:3 Maaha mo-ketabho ikya Zabhuri 69:9.
4Amangʼana ghonswe igho ghano ghaandëkirwë kare, ngaandëkirwë, okore ghatwëghi ököghömërrya inyanko. Amaandeko ghayö nkotohaana gharë ubhweseghe.
5Nkosabha ndë igha, Waryobha ono akoghera toraghömërrya na okoseghwa mo-senkoro isyëtö, abhakore mobhe ikiina ëkëmwë, ko bhoora Kiristo Yëësu we ekemanyërryö ikyënyu. 6Hayö ho bhonswe igho moraatore ökötöönia Waryobha, Suwaabho Omonene uwëëtö Yëësu Kiristo, kwa enkoro ëmwë, na obhoghambi öbhömwë.
Amangʼana Amaiya agha Waryobha ko-Bhayahudi na Abhakyaro
7Kera ömöntö asërëëninga murikyaye, kya bhoora Yëësu Kiristo yaabhasërëënëri, okore abhantö bhatööni Waryobha. 8Ndabhatëëbhya obhoheene igha, Yëësu Kiristo yaaishirë ökötöörya Abhayahudi, okore ööröki abhantö igha, Waryobha wa heene, ko bhoora ahekeraini amaraghano aghaaye okohetera ku-Yëësu Kiristo. Amaraghano ghayö n-gaara yaaraghaini abhakörö abhëëtö. 9Ghwiki ni-igha, yaaishirë, okore Abhakyaro bhatööni Waryobha ko amaabhë aghaaye. N-kya bhono Amaandeko Amahörëëru ghakoghamba igha,
“Mbe, nendaakötööni ko-Bhakyaro,
nendaakörëëtëri amarëëtyö agha ökökötöönia uwe.”#15:9 Maaha mo-ketabho ikya 2 Samwëri 22:50; Zabhuri 18:49.
10Ghwiki Amaandeko Amahörëëru gharëngërya-ko igha,
“Bhëënyu Abhakyaro, mushomerwe
hamwë na abhantö abha Waryobha, Abhaisiraëri.”#15:10 Maaha mo-ketabho ikya Eheetoko iya Etoraati 32:43.
11Ghwiki ahasë ahandë gharaghamba igha,
“Bhëënyu Abhakyaro,
mukumi Omonene Waryobha.
Akumibhwi na abhantö bhonswe igho.”#15:11 Maaha mo-ketabho ikya Zabhuri 117:1.
12Kora ömörööti Isaaya wonswe yaaghambirë igha,
“Mu-bhuhiiri Yeese ömöntö aryebhoka-mo,
ono areetonga amakabhira ghonswe igho,
uyö we abhantö abha ibhyaro bhyonswe igho,
bharyesegha igha arebhatöörya.”#15:12 Maaha mo-ketabho ikya Isaaya 11:10.
13Waryobha we tukwitengʼera igha, naraatokorre ghonswe igho ghano yaaraghaini. Ku bhuyö nkobhasabhera ndë igha, abhahaane omorembe, okore mushomerwe bhököngʼu enkaagha eno mököghëndërrya ukumukumya. Hayö ho moraamweseghe bhököngʼu, ko bhoora moraatööribhwi na obhotoro ubhwa Umwika Ömöhörëëru.
Ikibhuno ikya Pauro ukwandeka amangʼana ghano
14Abhakumya bharikyëtö, öni umwene nemanyirë igha, bhëënyu m-bantö abha heene mörë bhököngʼu, mmomanyirë keno kikutunwa mokore, kora mmoona obhotoro ubhwa okoragherrania. 15Nokaanyoora igha ni-igho ërë, kasi mbandëkëëyë amangʼana mu-ritashandighi mono ko obhokarë, okore mbahiitöki amangʼana ghayö. Nënkörrë igho, ko okoghera iya örööbhö rono Waryobha yaangʼaana, 16okore mbe ömököri uwa emeremo uwa Kiristo Yëësu ko-Bhakyaro. Ensonga iyaamo ni-igha, naakorwa ömösëngëri uwa okoraareka Amangʼana Amaiya agha Waryobha, okore Abhakyaro bhabhe kya ibhimwenso bheno bhëkötëghërya Waryobha, bheno bhyaarabhwa na Umwika Ömöhörëëru.
17Mbe, hano nakorra Waryobha emeremo, n-Kiristo Yëësu we nkötöönia, tinkwitöönia hë. 18Tenkokareha okoghamba engʼana iyëndë hë, kasi ne-eera Kiristo Yëësu yaakora okohetera ku-öni, iya okokora Abhakyaro bhamwighwere. Engʼana iyö yaaghëkörrë okohetera ko ghano naaghambanga na ghano naakoranga. 19Mbaarutirwë bhakabha na umukumo, ko bhoora bhaarööshë obhotoro ubhwa Yëësu Kiristo bhono bhwaamahekaini ko-makono na ebhemanyërryö. Naanyöörrë obhotoro ubhwa okokora igho, ko obhotoro ubhwa Umwika uwa Waryobha. Ku bhuyö naainaarrë kera hasë ndaraareka Amangʼana Amaiya agha Yëësu Kiristo ukusimirya mu-mughi ughwa Yërusarëëmu okohekera mo-mokowa ughwa Iririko. 20Nkutuna ndë igha ndaareke Amangʼana Amaiya ahasë hano ömöntö ataakaraarëkirë-ho Amangʼana Amaiya agha Yëësu Kiristo. Ndakora igho, okore ntakaasha kukyorra emeremo bhohya, ahasë hano ömöntö uwöndë yaamara okokora-ho emeremo. 21Amangʼana ghano nkokora n-kya bhono Amaandeko Amahörëëru ghaaghambirë igha,
“Abhantö bhano bhataakaraarëkëëywë amangʼana aghaaye, mbo bhareghamaaha,
na abhantö bhano bhatakaaghaighuurë, mbo bhareghamanya.”#15:21 Maaha mo-ketabho ikya Isaaya 52:15.
Inyonta iya Pauro ukughya Ruumi
22Emeremo ghiyö, ngyo ghyaandebherranga bhököngʼu, ukuusha kö-bhëënyu iyö. 23Bhoono ko bhoora mmarrë emeremo ighyane mo-mokowa ghono, na ko bhoora m-myoka imyaru naatunanga niishe iyö, 24ku bhuyö nendebhataarra nikare na bhëënyu ribhagha ike igho, enkaagha eno ndeheta kö-bhëënyu hayö, ndaghya Hisipania. Ndabhasabha igha, muushe okonhaheenera ko amangʼana agha oroghendo ruyö, urwa ukughya Hisipania.
25Kasi bhoono, nkughya ndë Yërusarëëmu, okoherra abhakumya bharikyëtö abha Ikiyahudi ekehaheeno. 26Abhakumya abha Omonene uwëëtö Yëësu Kiristo bhano bharëngë Makedonia na Akaaya, bhaarööshë igha bharuusi ëbhëntö ibhyabho bhatöörri abhakumya abhatöbhu abha Ikiyahudi abha Yërusarëëmu. 27Na-bheene igho mbo bhaatunirë igha bhakore igho. Obhoheene ni-igha, ni-siirë bhakohaka, ko bhoora Abhakyaro na Abhayahudi bhabhaayë ëkëntö këmwë ko-bhongʼoore ubhwa öbhötöörya bhono bhokohetera ko-Bhayahudi. Ko okoghera iya engʼana iyö, ni-igha abheene bhonswe bhabhatöörri-ko amangʼana agha kinyamöbhërë, kö-bhëntö bheno bhataanabhyo. 28Hano ndemara okohaana abhakumya bhayö ekehaheeno kiyö, nendeheta mmaahane na bhëënyu enkaagha eno urinyoora ndëngë ko-roghendo urwa Hisipania. 29Nemanyirë igha, Yëësu Kiristo naretongʼoora öni na bhëënyu bhonswe igho hamwë ko-nkaagha eno urinyoora ndëngë kö-bhëënyu hayö.
30Abhakumya bharikyëtö, ko okorengʼaana na umukumo ughwëtö ghono toonagho ko-Monene uwëëtö Yëësu Kiristo, na okorengʼaana na righonshe reno tokohaanwa na Umwika Ömöhörëëru, ndabhasaasaama ko enkoro iyaane yonswe igho igha, möghëndërri okobha na omotono ughwa okonsabhera ku-Waryobha. 31Monsabhere igha, abhantö bhano bhatakukumya Yëësu Kiristo Yudea haara, bhatakaasha konkorra obhoghogho.#15:31 Maaha mo-ketabho ikya Amangʼana agha Abhatomwa 21:27-36. Ghwiki monsabhere, okore abhakumya abha Yëësu Kiristo Yërusarëëmu haara bhaikërri okoghegha ekehaheeno keno ndaabhaherre ukurwa ko-bhakumya Abhakyaro. 32Hano engʼana iyö eraabhe bhuuya, nendaashe kö-bhëënyu hayö, hano Waryobha araahanshe. Nendaashe nshömëëywë bhököngʼu, kora mbe na umweya ughwa ukumuunya hamwë na bhëënyu.
33Waryobha ono akobhahaana omorembe, abhe hamwë na bhëënyu bhonswe igho. Amina.
Currently Selected:
Abharuumi 15: ssc
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.