Abharuumi 16
16
Pauro aratomana amakëërërryö ko-bhantö hagharë hagharë
1Ndatuna mbatëëbhi ko amangʼana agha umusubhaati Fibhi, uyö n-shemaasi uwa ekanisa eno ërëngë mu-mughi ghono ghokobherekerwa igha, Kenkirea. 2Ndasabha mömösërëëni bhuuya, ko bhoora m-mukumya uwa Omonene Yëësu Kiristo. Ökösërëënia, yo engʼana eno ikutunwa igha ekorwe na abhakumya abha Yëësu Kiristo. Ghwiki nkobhatëëbhya ndë igha, hano oraanyoore aana obhohabhë bhwobhwonswe bhoora, ni-igha mömötöörri, ko bhoora umwene wonswe, yaatöörrya abhantö abhaaru, kora öni wonswe yaantöörrya.
3Mönkëërri abhaköri abha emeremo bharikyane, bhaabho Purisika bhaana mushaasha uwaaye Akiira.#16:3 Maaha mo-ketabho ikya Amangʼana agha Abhatomwa 18:2. Bhayö bhonswe m-baköri abha emeremo abha Kiristo Yëësu. 4Abhantö bhayö, mbaahönirë ukukwa ko okoghera iya öni. Tö-öni umwene igho ono nkobhakumya hë, kasi kora Abhakyaro abha mo-makanisa ghonswe igho, nkobhakumya bharë.
5Mökëëri na abhakumya bhano bhakusikaneranga waabho kuyö, hamwë na omoghonshe uwaane Epaineto. Epaineto uyö, we uwa mbere ukukumya Yëësu Kiristo Asia Enke haara.
6Mönkëërri Maryamu ono yaakoranga omotono ughwa okokora emeremo ko okoghera iya ehoorohooro iyëënyu.
7Mönkëërri Andurönikö na Yunia, Abhayahudi bharikyane bhayö, bhaabhöhirwë mo-kebhohe hamwë na öni. Mbaantangatëëyë ukukumya Yëësu Kiristo. Abhantö bhayö mbamanyëkaini bhököngʼu mo-bhatomwa.
8Mönkëërri Ampuriato omoghonshe uwaane, umukumya uwa Omonene uwëëtö Yëësu Kiristo.
9Mönkëërri Urubhano ömököri uwa emeremo murikyëtö ku-Yëësu Kiristo, mönkëërri na Sitaaku omoghonshe uwaane.
10Mönkëërri Apere, ono yaashaashwa bhököngʼu kora akaikërribhwa na Yëësu Kiristo. Mönkëërri na abhantö abha Arisitobhuuro.
11Mönkëërri Herodioni, Umuyahudi murikyane. Mönkëërri abhantö abha Narikiso bhano bhakukumya Omonene uwëëtö Yëësu Kiristo.
12Mönkëërri Tirifaina na Tirifosa. Abhakari bhayö, mbaana omotono ughwa okokora emeremo ighya Yëësu Kiristo. Kora ghwiki ni-igha mönkëërri omoghonshe uwaane Perisisi. Omokari uyö wonswe, yaakörrë omotono ughwa okokora emeremo ighya Omonene Yëësu Kiristo.
13Mönkëërri Rufo, umwahorwa uwa Omonene Yëësu Kiristo, mönkëërri na nyakuwaabho, ono anga kya maayö kinyebhora.
14Ghwiki ni-igha mönkëërri Asinkirito, Fireghoni, Herime, Patirobha, Herima na abhakumya abha Yëësu Kiristo bhonswe igho, bhano bharëngë hamwë nabho.
15Ko okomarërrya, mönkëërri Firorogho na Yuria, Nerea hamwë na mohara waabho, Örimpa na abhakumya abha Yëësu Kiristo bhonswe igho bhano bharëngë hamwë nabho.
16Mokeerani ku ukwibhaarana ököhörëëru. Morakëëribhwa na abhakumya abha amakanisa agha Yëësu Kiristo ghonswe igho ghano gharëngë eno.
Pauro araraghërrya abhakumya
17Bhoono abhakumya bharikyëtö, ndabhasaasaama igha, mwiyangarre ko-bhantö bhaara bhakwëghya amëëghyö agha ukunyaraghania abhantö. Amëëghyö ghayö, kora nkosarya gharë umukumo na seteemo isya abhantö. Abhantö kya bhayö, mobhahete hare, ko bhoora amëëghyö ghaabho teghanga kya ghaara mwëghibhwa hë. 18Abhantö kya bhayö to-Monene uwëëtö Yëësu Kiristo bhakokorra emeremo hë, kasi keno bhakutuna no-kokorra senda isyabho isyene igho. Bhaana amangʼana amaiya agha ököngʼöröngʼööbhya, okore bhangʼaine abhakumya abhatëntëëru. 19Abhantö bhonswe igho bhaighwa igha, m-baighwa mörë. Engʼana iyö nkunshomera ërë bhököngʼu. Nkutuna ndë mobhe na sehakëri isya okokora amangʼana amaiya, motakaabha na risoro irya amangʼana amaghogho.
20Bhoono Waryobha ono akotohaana omorembe, m-böngö araatashere hansë Oghosambwa.#16:20 Oghosambwa. Maaha mo-faharaasa. Naraaghotashere mo-bhora ubhwa amaghörö aghëëtö. Örööbhö urwa Omonene uwëëtö Yëësu Kiristo robhe hamwë na bhëënyu. [Amina.]
21Morakëëribhwa na Timoteo ömököri uwa emeremo murikyane. Kora Abhayahudi bharikyane bhaabho Ruukiyö, Yasööni na Söösipatiro, bhonswe nkobhakëërya bharë.
22Kora öni Teritio umwandëki uwa ritashandighi reno, nkobhakëërya ndë ku iriina irya Omonene uwëëtö Yëësu Kiristo.
23Ghaayo ono öni Pauro nikaayë waaye, wonswe nkobhakëërya arë. Kora waaye hayö, ho ekanisa iya Omonene uwëëtö Yëësu Kiristo ikusikanera. Ghwiki ömöntö uwöndë ono akobhakëërya, ne-Erasito omonaghya uwa seehera isya umughi ghono,#16:23 Umughi ghono. Eratora okobha igha, nu-mughi ughwa Körintö. na umukumya murikyëtö ono akobherekerwa igha Kwarito wonswe nkobhakëërya arë.
[24Örööbhö urwa Omonene uwëëtö Yëësu Kiristo robhe hamwë na bhëënyu. Amina.]#16:24 Amangʼana ghano gharëngë mo-bhebhandërryö kya bheno […] ni-igha, tegharëngë mo-senakara isyëndë isya Ikiyunaani.
Pauro aratöönia Waryobha
25Bhoono ni-igha tötööni Waryobha! Ko bhoora we nkotora arë okobhakora mobhe na umukumo ghono ghonaghirë, okohetera ko Amangʼana Amaiya agha Yëësu Kiristo ghano naabharaarekera, agha ësëëmyö iya Waryobha eno yaarenga ibhisirwë ukurwa kare. 26Bhoono amangʼana harabhu igho gharë okohetera ko-Maandeko Amahörëëru agha abharööti. Amangʼana ghayö agha imbumbure, ngamanyekaini ku-bhyaro bhyonswe igho. Waryobha uwa amakora ghonswe igho, we yaaraghërrya igha, obhoheene bhuyö bhoraarekwe ko-bhantö abha ibhyaro bhyonswe igho, okore abhantö bhayö, bhakumi Omonene Yëësu Kiristo, kora bhakore bhono akutuna.
27Waryobha umwene igho uwa obhongʼaini bhwonswe igho, atöönibhwinga amakora ghonswe igho, ko okohetera ku-Yëësu Kiristo! Amina.
Currently Selected:
Abharuumi 16: ssc
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
Abharuumi 16
16
Pauro aratomana amakëërërryö ko-bhantö hagharë hagharë
1Ndatuna mbatëëbhi ko amangʼana agha umusubhaati Fibhi, uyö n-shemaasi uwa ekanisa eno ërëngë mu-mughi ghono ghokobherekerwa igha, Kenkirea. 2Ndasabha mömösërëëni bhuuya, ko bhoora m-mukumya uwa Omonene Yëësu Kiristo. Ökösërëënia, yo engʼana eno ikutunwa igha ekorwe na abhakumya abha Yëësu Kiristo. Ghwiki nkobhatëëbhya ndë igha, hano oraanyoore aana obhohabhë bhwobhwonswe bhoora, ni-igha mömötöörri, ko bhoora umwene wonswe, yaatöörrya abhantö abhaaru, kora öni wonswe yaantöörrya.
3Mönkëërri abhaköri abha emeremo bharikyane, bhaabho Purisika bhaana mushaasha uwaaye Akiira.#16:3 Maaha mo-ketabho ikya Amangʼana agha Abhatomwa 18:2. Bhayö bhonswe m-baköri abha emeremo abha Kiristo Yëësu. 4Abhantö bhayö, mbaahönirë ukukwa ko okoghera iya öni. Tö-öni umwene igho ono nkobhakumya hë, kasi kora Abhakyaro abha mo-makanisa ghonswe igho, nkobhakumya bharë.
5Mökëëri na abhakumya bhano bhakusikaneranga waabho kuyö, hamwë na omoghonshe uwaane Epaineto. Epaineto uyö, we uwa mbere ukukumya Yëësu Kiristo Asia Enke haara.
6Mönkëërri Maryamu ono yaakoranga omotono ughwa okokora emeremo ko okoghera iya ehoorohooro iyëënyu.
7Mönkëërri Andurönikö na Yunia, Abhayahudi bharikyane bhayö, bhaabhöhirwë mo-kebhohe hamwë na öni. Mbaantangatëëyë ukukumya Yëësu Kiristo. Abhantö bhayö mbamanyëkaini bhököngʼu mo-bhatomwa.
8Mönkëërri Ampuriato omoghonshe uwaane, umukumya uwa Omonene uwëëtö Yëësu Kiristo.
9Mönkëërri Urubhano ömököri uwa emeremo murikyëtö ku-Yëësu Kiristo, mönkëërri na Sitaaku omoghonshe uwaane.
10Mönkëërri Apere, ono yaashaashwa bhököngʼu kora akaikërribhwa na Yëësu Kiristo. Mönkëërri na abhantö abha Arisitobhuuro.
11Mönkëërri Herodioni, Umuyahudi murikyane. Mönkëërri abhantö abha Narikiso bhano bhakukumya Omonene uwëëtö Yëësu Kiristo.
12Mönkëërri Tirifaina na Tirifosa. Abhakari bhayö, mbaana omotono ughwa okokora emeremo ighya Yëësu Kiristo. Kora ghwiki ni-igha mönkëërri omoghonshe uwaane Perisisi. Omokari uyö wonswe, yaakörrë omotono ughwa okokora emeremo ighya Omonene Yëësu Kiristo.
13Mönkëërri Rufo, umwahorwa uwa Omonene Yëësu Kiristo, mönkëërri na nyakuwaabho, ono anga kya maayö kinyebhora.
14Ghwiki ni-igha mönkëërri Asinkirito, Fireghoni, Herime, Patirobha, Herima na abhakumya abha Yëësu Kiristo bhonswe igho, bhano bharëngë hamwë nabho.
15Ko okomarërrya, mönkëërri Firorogho na Yuria, Nerea hamwë na mohara waabho, Örimpa na abhakumya abha Yëësu Kiristo bhonswe igho bhano bharëngë hamwë nabho.
16Mokeerani ku ukwibhaarana ököhörëëru. Morakëëribhwa na abhakumya abha amakanisa agha Yëësu Kiristo ghonswe igho ghano gharëngë eno.
Pauro araraghërrya abhakumya
17Bhoono abhakumya bharikyëtö, ndabhasaasaama igha, mwiyangarre ko-bhantö bhaara bhakwëghya amëëghyö agha ukunyaraghania abhantö. Amëëghyö ghayö, kora nkosarya gharë umukumo na seteemo isya abhantö. Abhantö kya bhayö, mobhahete hare, ko bhoora amëëghyö ghaabho teghanga kya ghaara mwëghibhwa hë. 18Abhantö kya bhayö to-Monene uwëëtö Yëësu Kiristo bhakokorra emeremo hë, kasi keno bhakutuna no-kokorra senda isyabho isyene igho. Bhaana amangʼana amaiya agha ököngʼöröngʼööbhya, okore bhangʼaine abhakumya abhatëntëëru. 19Abhantö bhonswe igho bhaighwa igha, m-baighwa mörë. Engʼana iyö nkunshomera ërë bhököngʼu. Nkutuna ndë mobhe na sehakëri isya okokora amangʼana amaiya, motakaabha na risoro irya amangʼana amaghogho.
20Bhoono Waryobha ono akotohaana omorembe, m-böngö araatashere hansë Oghosambwa.#16:20 Oghosambwa. Maaha mo-faharaasa. Naraaghotashere mo-bhora ubhwa amaghörö aghëëtö. Örööbhö urwa Omonene uwëëtö Yëësu Kiristo robhe hamwë na bhëënyu. [Amina.]
21Morakëëribhwa na Timoteo ömököri uwa emeremo murikyane. Kora Abhayahudi bharikyane bhaabho Ruukiyö, Yasööni na Söösipatiro, bhonswe nkobhakëërya bharë.
22Kora öni Teritio umwandëki uwa ritashandighi reno, nkobhakëërya ndë ku iriina irya Omonene uwëëtö Yëësu Kiristo.
23Ghaayo ono öni Pauro nikaayë waaye, wonswe nkobhakëërya arë. Kora waaye hayö, ho ekanisa iya Omonene uwëëtö Yëësu Kiristo ikusikanera. Ghwiki ömöntö uwöndë ono akobhakëërya, ne-Erasito omonaghya uwa seehera isya umughi ghono,#16:23 Umughi ghono. Eratora okobha igha, nu-mughi ughwa Körintö. na umukumya murikyëtö ono akobherekerwa igha Kwarito wonswe nkobhakëërya arë.
[24Örööbhö urwa Omonene uwëëtö Yëësu Kiristo robhe hamwë na bhëënyu. Amina.]#16:24 Amangʼana ghano gharëngë mo-bhebhandërryö kya bheno […] ni-igha, tegharëngë mo-senakara isyëndë isya Ikiyunaani.
Pauro aratöönia Waryobha
25Bhoono ni-igha tötööni Waryobha! Ko bhoora we nkotora arë okobhakora mobhe na umukumo ghono ghonaghirë, okohetera ko Amangʼana Amaiya agha Yëësu Kiristo ghano naabharaarekera, agha ësëëmyö iya Waryobha eno yaarenga ibhisirwë ukurwa kare. 26Bhoono amangʼana harabhu igho gharë okohetera ko-Maandeko Amahörëëru agha abharööti. Amangʼana ghayö agha imbumbure, ngamanyekaini ku-bhyaro bhyonswe igho. Waryobha uwa amakora ghonswe igho, we yaaraghërrya igha, obhoheene bhuyö bhoraarekwe ko-bhantö abha ibhyaro bhyonswe igho, okore abhantö bhayö, bhakumi Omonene Yëësu Kiristo, kora bhakore bhono akutuna.
27Waryobha umwene igho uwa obhongʼaini bhwonswe igho, atöönibhwinga amakora ghonswe igho, ko okohetera ku-Yëësu Kiristo! Amina.
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.