Abharuumi 2
2
Waryobha tarebhotora ibhiina kwa keroterro hë
1Mbe, uwe Umuyahudi murikyane, ono okobhotorra abhandë ibhiina, omanye igha, tootore ukwikoorerra ku-Waryobha. Omanye igha, hano wabhotorra murikyaho ikiina, nkunyoora örë oraibhotorra ikiina uwe umwene. Nkobha ërë igho, ko bhoora ëbhëbhë bhiyö akokora, mbyo uwe wonswe okokora. 2Bhëëtö ntomanyirë igha, okobhotora ikiina ukwa Waryobha, n-kwa heene kö-möntö ono akokora amangʼana amaghogho kya ghayö. 3Kasi bhoono uwe ono okobhotorra murikyaho ikiina, na eno uwe wonswe na-maghogho ghayöghayö okokora, nkokanya örë igha Waryobha narikutigha igho, ataköbhötörrëëyë ikiina? 4Waryobha n-wa heene bhököngʼu, nkukwabhera arë na ökököghömërrya bhököngʼu. Kasi uwe, nkwörökya örë igha, nkosera örë. Nyoore otakosera, n-kwakë otakomaaha öbhöntö ubhwa heene ubhwaye bhono akokora, ku bhuyö ohongore ëbhëbhë ibhyaho? 5Hano okomaaha igha oona ekeghaaka, kora tukutuna igha ohongore ëbhëbhë ibhyaho hë, ku bhuyö nkwibheekera örë ubhushibhu, okohekera ku-rusikö roora Waryobha arebhotora ubhwa heene ibhiina ibhya abhantö.
6Urusikö ruyö, Waryobha narehaka kera ömöntö okorengʼaana na ghano yaakora.#2:6 Maaha mo-ketabho ikya Zabhuri 62:12. 7Abhantö bhano arehaana öbhöhöru ubhwa amakora ghonswe igho, m-mbano bhaana omotono ughwa okokora amangʼana amaiya. Ko bhoora nkutuna bharë ubhuhika, esooko na öbhöhöru bhono bhotakosareka. 8Kasi abhaingʼahërya, na bhano bhakwanga amangʼana agha obhoheene, kora m-baköri abha amangʼana amaghogho, Waryobha narebharererra, abhashibhi. 9Abhantö bhonswe igho bhano bhakokora amangʼana amaghogho, mbakaabha Abhayahudi handë abhantö bhano bhatarë Abhayahudi, mbarinyoora inyanko na inyaanyi. 10Abhaköri abha amangʼana amaiya, mbakaabha Abhayahudi handë abhantö bhano bhatarë Abhayahudi, bhayö mbarinyoora ubhuhika, bhasookwe kora bhahaanwe omorembe. 11Ko bhoora Waryobha taana ekeroterro hë.
12Abhakyaro bhano bhakokora ëbhëbhë, mbarisikibhwa nokaanyoora bhatamanyirë amaraghërryö agha Mosa.#2:12 Amaraghërryö agha Mosa. Ghayö na-maraghërryö ghano Waryobha yaahaayë Abhaisiraëri okohetera ko-Mosa. Maaha mo-faharaasa engʼana, Mosa. Kasi Abhayahudi, mbamanyirë amaraghërryö ghayö, ku bhuyö hano bharaakore ëbhëbhë, mbaraabhotorrwe ikiina ko okorengʼaana na amaraghërryö ghayö. 13Mbarebhotorrwa ikiina, ko bhoora Waryobha takobhara ömöntö igha uwa heene, ku ukwighwa amaraghërryö aghaaye ukwene igho. Kasi nkobhara arë ömöntö igha wa heene, ono akokora bhono amaraghërryö ghakomoraghërrya igha akore. 14Abhakyaro, bhayö tebhamanyirë imighiro ighya Waryobha hë. Kasi hano amaitegherro aghaabho gharaaghere bhakore kya bhono imighiro ghyaaraghërya, hayö nkwörökya ërë igha, amaitegherro aghaabho ngamanyirë okokora amangʼana ghano ghakorengʼaana bhono imighiro ghiyö ghikutuna. 15Ku bhuyö abhantö bhayö, nkwörökya bharë igha, amaraghërryö ghayö ghaandekwa mo-maitegherro aghaabho. Enkaagha iyëndë amaitegherro aghaabho nkobhabhotorra gharë ikiina. Enkaagha iyëndë nkobhatëëbhya gharë igha, m-buuya bhakokora. 16Ni-igho erebha ko-nkaagha iya okobhotorrwa ibhiina. Hayö ho Waryobha arebhotorra abhantö ibhiina okohetera ku-Kiristo Yëësu. Narebhabhotorra ibhiina ibhyabho kora imbumbure iya amaitegherro aghaabho. Amangʼana Amaiya ghano nkoraareka, ni-igho gharë.
Ömöntö takobharwa igha wa heene ko koghera iya okosaarwa
17Uwe ono ukwibherekera igha, Umuyahudi ekenaina, oraitengʼera okobharwa igha n-wa heene örë okohetera ko-maraghërryö agha Mosa, kora oraikumya igha m-möntö uwa Waryobha örë. 18Orakanya igha nomanyirë keno Waryobha akutuna okore, nomanyirë amangʼana amaiya ko bhoora wëëghibhwa amaraghërryö aghaaye. 19Ko okoghera iya amangʼana ghayö, nkwimaaha örë igha wingʼarëëyë okotangata Abhakyaro, kya ömöntö ono akoraahuuna abhahukuru, handë igha kya etara eno ëkömërëkërya abhantö mu-kisuntë. 20Kora ghwiki nkwimaaha örë igha, m-mwëghya uwa abhaana örë, uwa abhantö bhano bhatamanyirë Waryobha. Nkwimaaha örë igho, ko bhoora amaraghërryö ghayö, nkokoraghërrya gharë amangʼana agha obhongʼaini bhwonswe igho, na obhomanyi ubhwa obhoheene. 21Uwe ono ukwëghya abhantö abhandë, n-kwakë otakokora kya bhuyö ukwëghya? Örëëghya abhantö igha bhatakaibha, ndarra uwe umwene nkwibha örë? 22Uwe ono ukwëghya abhantö igha bhatakaakora obhosooraare, ndarra uwe umwene nkokora örë obhosooraare? N-kë kekoghera oraregha ëbhëtöndö ibhya amasambwa, na eno mbe nkwibha örë ëbhëntö mu-sinyumba isya okosengerra-mo amasambwa ghayö? 23Uwe ono ukwihasha igha nomanyirë amaraghërryö agha Waryobha, nkösöökya örë Waryobha, ko okosarya amaraghërryö aghaaye. 24Ku bhuyö ghayö ngarëngë kya bhoora Amaandeko Amahörëëru ghakoghamba igha, “Abhakyaro nkotoka bharë iriina irya Waryobha, ko okoghera iya amangʼana amaghogho ghano mokokora.”#2:24 Maaha mo-ketabho ikya Isaaya 52:5; Ezekieri 36:20, 22.
25Okosaarwa ukwaho, nkoraabhe na ubhwera, hano oraakore bhono amaraghërryö agha Mosa ghakutuna. Hano oraabhe omosarya uwa amaraghërryö, okosaarwa ukwaho, tekoona ubhwera bhwobhwonse bhoora hë. Kora hayö nkobha örë kya ono atasaarrwë. 26Ku bhuyö ni-igha, omotasaarwa, hano araakore bhono amaraghërryö agha Mosa ghakutuna igha akore, Waryobha nkumwikërrya arë, kya uwa eteemo iya okosaarwa. 27Ghwiki ömöntö ono atasaarrwë, hano araakore bhono amaraghërryö agha Mosa ghakutuna igha akore, amangʼana ghayö akokora, nkwörökya gharë igha, uwe Umuyahudi m-mosarya örë. Ni-igho ekobha ko bhoora igha, uwe Umuyahudi waasaarwa, kora noona amaraghërryö, kasi m-mosarya uwa amaraghërryö örë. 28Mbe, momanye igha, te-kera ömöntö ono yeebhorwa na Umuyahudi, naraabhe ömöntö uwa Waryobha. Ömöntö taatore okobha ömöntö uwa Waryobha, ko okoghera iya okosaarwa ukwene igho. 29Ti-igho hë! Kasi ömöntö ono akosooka Waryobha mo-nkoro iyaaye, uyö we uwaaye. Na esaaro inshiiya, ne-eera iya Umwika Ömöhörëëru akotogheka ömöntö mo-nkoro, tokoghoota amaraghërryö agha Mosa hë. Ömöntö kya uyö takukumibhwa na abhantö hë, kasi Waryobha we akumukumya.
Currently Selected:
Abharuumi 2: ssc
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.