मती 2
2
गेयानिकु रआ हिजुः
1ईसु रआ जनम जहुदिया पोरदेस रआ बयतुलम रे, हेरोदेस राजा रआ पोरया रे होयकेना। इना तयनोम, गेयानिकु पुरुब एते जरुसलेम हेच्चेनाकु। 2अरो कुली हेलावेनाकु, “जहुदिकु रिई राजा जे जनम एकानाय करेः इचा? चिलिमेनचि आले पुरुब सोझ रे उनी रिई इपिल नेल एकाःदेयाले, इनाते उनी के जोहार कथिर हेच एकानाले।”
3नुवां अयुम केते हेरोदेस राजा, अरो सुबिन जरुसलेम रेन घबराव एनाकु। 4राजा ता जहुदी जाइत रेन धरम पोथी सिखाविकु अरो सुबिन होरकु रेन मुध जाजककु के पंचेत रे होहो केते उनकु के कुलिवेःकुवाय, “मसी रआ जनम कारे होयुःआ?”
5उनकु ता गाम्मेताकु, “जहुदिया पोरदेस रआ बयतुलम रे,” चिलिमेनचि परमेसर सोझ एते नधनी वनकु रआ दोवासते नियां ओल एकाना
6 #
मीका 5:2
“ए बयतुलम, अपे जे जहुदा रआ पोरदेस रेपेया,
अपे जहन रिति एते जहुदी रेन अधिकारी एते सुबिन एते हुडिञ बनुः पेया;
चिलिमेनचि अपे रे एते मिहोर नेता उपनेग ओःओय,
जे इञ रेन होर इसराइलिकु रिई गोरखी वनीः बयुःआय।”
7तोब हेरोदेस राजा ता गेयानिकु के हपे-हपे एते होहो केते उनकु के कुलिवेःकुवाय चि इपिल करा समेय नेल इरी केनाय। 8अरो उनी ता नुवां गाम केते उनकु के बयतुलम कुलेःकुवाय “सिनुःपे, होपोन रआ बबेत रे बेढ़ियां एते पता लगावेपे; आर जोब उनी के नमेयापे, दो इञ के खभेर वञपे, ताकि इञ हों हेच केते उनी के जोहारिञ।”
9उनकु राजा रआ गानाम ओनाव केते तोराकुवा; अरो जे इपिल पुरब सोझ रे नेल लेदेयाकु उनी इपिल उनकु रआ लहा-लहा सेसेन हेलावेनाय, जे ठिनुः बालेच होपोन तहिकेनाय उना ठांव रआ चेतान तेबाः केते थिरावेनाय। 10उनकु ता इपिल के नेल केते, बेचोट अनादित एनाकु। 11उनकु ता उना ओड़ाः तेबाः ता बोलो एनाकु, अरो बालेच होपोन के आच रिई एंगातेः मरियम लोः नेलेःदेयाकु, अरो उकरुम केते, जोहार एदेयाकु। अरो अपन-अपन झोला एते सोना, लोबान अरो गंधरस उडुङ केते उनी के दान रकाप वदेयाकु।
12तोब, कुकमु रे चेतोवन नाम केते चि हेरोदेस ठिनुः अरो ओलोपे सिनुःआं, उनकु एटाः होरा एते अपन दिसुम रुवाड़ेनाकु।
एंगा होपोन लेयकेते मिसर दिसुम रे सिनुः
13उनकु तोराकुवा उना तयनोम परभु रिई मिहोर सोवारागदूत कुकमु रे जुसूफ के नेल इरी केते, गामवादेयाय, “बिरितमी, नोकिन एंगा होन के लेयकेते मिसर दिसुम रे सेन जोनमी, अरो जोब तक इञ काइञ गामवापेया तोब तक एंडेगी तहीःपे, चिलिमेनचि हेरोदेस राजा नोंय होपोन के दंड़ाय कनाय चि नोंय के गोजेयाय।”
14तोब उनी निदा गी बिरीत केते, बालेच होपोन के अरो एंगातेः के लेयकेते मिसर दिसुम रे तोराया, 15#होसे 11:1अरो हेरोदेस राजा अवरी गोजुः तक एंडेगी तही एनाकु, इनाते चि उना बचन जे परभु ता परमेसर सोझ एते नधनी वनकु रआ दोवासते गाम लाःआय, पुराःका, “इञ ता अपन होपोन हेरेल के मिसर दिसुम एते होहो एदेयिञ।”
हेरोदेस राजा बलेच होपोन के गोच इरीवेःकुवाय
16हेरोदेस राजा ता नुवां सारी केते बेचोट खिंस एनाय; चि गेयानिकु इञ के धोखा एमाःदेञाकु। मगर उनी ता सिपाही के कुलेःकुवाय अरो गेयानिकु रआ उदुः समेय मोताबिक बयतुलम अरो उना रआ हेनात-जपाः ठिनुः रेन, सुबिन धिंगाला के बार बरीस रेन के अरो हुडिञ इकु, केहों गोच इरीवेःकुवाय।
17तोब जे बचन जिरमियाह परमेसर सोझ एते नधनी वनीः रआ दोवासते गाम केना उना पुरावेना,
18 #
जिरमि 31:15
“रमाह रे खोभराव-खोभराव एते
इयाम राः ओनाव एना,
राहेल अपन होपोन कथिर इयाम केनाय
अरो उनी खुद के डिढ़ काय एमइरी वकुकेनाय,
चिलिमेनचि उनकु नेबरीक दो बनुःकुवा गोच एनाकु।”
मिसर दिसुम एते रुवाड़ोः
19हेरोदेस राजा रआ गोच तयोम, परभु रिई दूत मिसर दिसुम रे जुसूफ के कुकमु रे नेल इरी एनाय, 20अरो नुवां गामवादेयाय, “बिरीत केते नुकिन एंगा होन के लेयकेते इसराइल दिसुम रे सेन जोनमी, चिलिमेनचि उनी जे उनी बालेच होपोन रआ जीव घताव कथिर ओःकेनाय उनी हेरोदेस राजा गोच्चेनाय।” 21अरो जुसूफ ता बिरितेनाय, आर एंगा होन के लेयकेते, इसराइल दिसुम रे रुवाड़ हेच्चेनाकु।
22उनी ता अयुम एताय चि अरखिलाउस अपन आपु हेरोदेस राजा रआ राइज गदी रे दुरुप केते जहुदिया पोरदेस रे राइज कनाय, इनाते उनी के ओन्डो सिनुः रे बोरो अटकार एताय। अरो कुकमु रे जुसूफ चेतावनी नाम केते गलील पोरदेस तोराया। 23#मर 1:24; लूका 2:39; जोह 1:45उनी ओन्डो एते नासरत लुतूम चट्टी रे सेन केते बोसावेनाय। इना लेका परमेसर सोझ एते नधनी वनकु रआ नुवां बचन पुरावेना “उनी नासरत रिई गामुःआय।”
ამჟამად არჩეულია:
मती 2: BIY
ხაზგასმა
კოპირება
შედარება
გაზიარება
გსურთ თქვენი ხაზგასმები შენახული იყოს ყველა თქვენს მოწყობილობაზე? დარეგისტრირდით ან შედით
© 2023 NLCI CC BY-NC-ND 4.0