ទំនុកតម្កើង 114

114

ការអស្ចារ្យរបស់ព្រះនៅពេលចេញពីស្រុកអេស៊ីព្ទ

1កាលអ៊ីស្រា‌អែលចាកចេញពីស្រុកអេស៊ីព្ទ

គឺកាលពូជ‌ពង្សរបស់យ៉ាកុប

ចាកចេញពីសាសន៍មួយ

ដែលមានភាសាចម្លែក

2យូដាបានត្រឡប់ជាទីបរិសុទ្ធរបស់ព្រះ

គឺអ៊ីស្រា‌អែលជានគររបស់ព្រះ‌អង្គ។

3៙ សមុទ្របានឃើញ ហើយក៏រត់បាត់ទៅ

ទន្លេយ័រដាន់ក៏ដកថយ។

4ភ្នំធំៗនាំគ្នាលោតដូចចៀមឈ្មោល

ហើយភ្នំតូចៗដូចកូនចៀម។

5៙ ឱសមុទ្រអើយ

ហេតុអ្វីបានជារត់គេចដូច្នេះ?

ឱទន្លេយ័រដាន់អើយ ហេតុអ្វីបានជាដកថយ?

6ឱភ្នំធំៗអើយ

ហេតុអ្វីបានជាឯងលោតដូចចៀមឈ្មោល

ឱភ្នំតូចៗអើយ ហេតុអ្វីបានជាលោត

ដូចកូនចៀមដូច្នេះ?

7៙ ឱផែនដីអើយ

ចូរញ័ររន្ធត់នៅចំពោះព្រះ‌អម្ចាស់

គឺនៅចំពោះព្រះរបស់លោកយ៉ាកុប

8ជាព្រះដែលធ្វើឲ្យថ្មដាប្រែទៅជាត្រពាំងទឹក

គឺធ្វើឲ្យថ្មដ៏រឹងទៅជាប្រភពទឹក។

ទើបបានជ្រើសរើសហើយ៖

ទំនុកតម្កើង 114: គកស១៦

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី ព្រះគម្ពីរបរិសុទ្ធកែសម្រួល ២០១៦