Markus 13
13
Kattshiiy mhi kyess khi yill ni
(Mat 24:1-28; Luk 21:5-24)
1Kaarooh Jesu yakhal kihfur LuhNaan p'ee put, bhi kihmeh dhighin zheppkamm khinyi satt nyi le, “Gukamm, ghi naah n'an pangg dy'ik ni mwopp a'ng! Ghi naah rett khi dy'ik ni mwopp a'ng!”
2Bhi Jesu pring nyi le, “Gha phi naah n'an dy'ik mhize ni mwopp weett shisihng? T'o, ih kihh satt a zeenn wunn, kooh pangg kihmeh p'ee dheeh dhen kihdab wu'nat bihze w'u dheng'pee mwopp p'ee p'ar rumm nyi mou.”
3Kaarooh Jesu kihh tong kih Bwumm Paatt, bwumm w'u mwopp yit shag kihh LuhNaan ni, bhi Bitrus kihh Yakub, kihh Yohanna, kihh Andrawus mwopp ja kihpee nyi diy mhishut, mwopp nang phi nyi le, 4“Daah, ghi satt munn, bii mihhse mwopp p'ee sh'in a phiranggyeh? Yakhal a mihyeh p'ee dhen a bii'kattshiiy w'u p'ee kamm le bii mihhse ni mwopp weett kih arr g'am?”
5Bhi Jesu satt mwopp le, “Wu kihh kangg tapp menguh d'ihk wunn mou. 6P'ee gurum dhess p'ee ja dhighin shumm nah, kooh meehrangg kihh satt le, wai a riy a Kristi, harr mwopp p'ee l'e tihh gurum dhess mwopp pal dhighin pihhzeenn keeru. 7Mihh wu klihng v'ur l'ek kihh mwan yakhal kihh v'ur pwookaah l'ek zag, bhi tapp nhikhin'teghem dyi shwat wunn mou. P'ee nyi a ching tihh bii mihhse ni mwopp sh'in, dhangg kyess ni kihh ji. 8Seghen'gurum p'ee kihh yakhal l'ek kaah Seghen'gurum, yakhal dhenglong p'ee kihh yakhal l'ek kaah dhenglong. V'ur tabhal'yill p'ee mwan kwed dhighin yill ni shi'pee-shi'pee, kihh tekhell zag. Bii mihhse mwopp kudyi a sh'ee khi v'ur zheell w'u kudyi kihh ja kihkyeen.
9“Wu kihh kangg kihh kaah wuh, p'ee mwopp p'ee pihh wunn sarr mhidyeell mwopp, yakhal mwopp nas wunn dhighin Luh'kang keeru zag. Wunn p'ee dyarrang dyeell tekhem govno mwopp kihh Dazkakhamm mwopp pee'rooh wunn a maan'nah, a kihhsheh bhi wunn p'ee kad arr tupp'pwoo kaah nah mwopp. 10Dhangg nyi a ching tihh mwopp satt Pwoo'wurett Seghen'gurum mwopp weett dhangg. 11Mihh mwopp yak wunn dum kihh wunn kihkyeen dyeell, bhi tapp shep wu kihh ann shukk kaah bii w'u wunn p'ee satt nyi mou. Wu satt kapp bii w'u Naan p'ee l'e nyi pwoo wu kad mihh pee nyi wull, p'ee mihh wull kihhsheh bhi baah a wunn phi kadpwoo dyi mou; a Riin Wu'bhangg phi kadpwoo.
12“Emnhikhin p'ee seett kihh emnhikhin harr muutt, yakhal puup seett kihh em niy zag; zhepp mwopp p'ee yakhal kihh teepee kaah mhishee runn, harr mwopp l'e tihh mwopp twa mwopp diy. 13Gurum weett p'ee shiih kihh wunn pee'rooh wunn a maan'nah, dhangg gwooh mihh dharr bhall-bhall harr kyess ni, bhi a nyi p'ee kad bh'am.
14“Mihh wu naah bii mwelleg-en mhi shenpee kihh dharr pee w'u a mhinyi mou, (gha g'u tang'ran ghi manshiiy pwoo mihhse) bhi mwooh yill Yahudiya mwopp shwa ka duam kih v'ur bwumm mwopp#Dan 9:27; Dan 11:31; Dan 12:11 . 15Tapp gwooh tihngg kih daghabluh keeniy diy sam dheeh m'ang mee'bii lhiput mou. 16Tapp gwooh dhighin bhokk b'aa ji p'ee m'ang bh'aar keeniy mou. 17Kai, mak kihh shwarab ak mwopp, kihh mwooh kihh zhepp pwoo'yukhur dhighin t'eer mhizeh ni mwopp! 18Wu dhangNaan tapp bii mihhse diy taah a tarr peezhughum waapp mou. 19P'ee t'eer mhizeh ni mwopp p'ee kwed a t'eer mhi zheell w'u baah m'ee zheell cham wull wu'nyi mou, phi'wu yill ni shee diy, phi'wu Naan l'e yill ni diy harr ji put mwasseh se. Yakhal baah m'ee zheell wu'kihhsheh p'ee cham yakhal dyi.#Dan 12:1; DKZ 7:14 20Kaddyinn dheng'pee Naan shep gab t'eer mhi zheell ni mwopp mou, bhi baah dyinn m'ee gurum p'ee bar mou. Dhangg lhiwaa mwooh bih-blihp, w'u a mwooh Naan blihp, bhi Naan ni gab t'eer mhizeh ni mwopp. 21Dhighin shiiy'teer mhizeh ni mwopp, bhi mihh menguh satt wunn le, ‘Wu naah, Kristi ni se!’ h'aa kooh ‘Wu naah, nyi seh!’ bhi tapp wu pihhzeenn mou. 22P'ee v'ur kristi-dwungg kihh mhi-wanggshiiy dwungg mwopp p'ee mwan yakhal dhess, harr mwopp kihh sh'in n'an bii'aapwoo kihh bii'kattshiiy w'u nan-nan tihh mwopp t'ang pillip diy kihh mwooh bih-blihp, kaddyinn kihh mak sh'in kihhsheh. 23Pee'mhinyi bhi wu tong sh'i gonggpee. Baa ih shep ih satt koohmeeh wunn dhangg pee nyi kihh wull.
B'aa ji khi L'aa khi Gurum
(Mat 24:29-31; Luk 21:25-28)
24“Dhighin shiiy'teer w'u bwoon zheell mhizeh ni mwopp, bhi
“ ‘Puus p'ee taah'kwoo,
bhi baah tarr p'ee bhanggpee dyi mou.
25Dhaghar mwopp p'ee pwat chaat sh'i phikihtihngg,
bhi Naan p'ee shoghon v'ur bii w'u bhall-bhall w'u phikihtihngg’.#13:25 Ish 13:10; Ish 34:4
26“Sh'i pee mhizeh ni, bhi gurum mwopp p'ee naah L'aa khi Gurum kihh sam dhighin liw, kihh maa'pee w'u mett bhall mhi satt, kihh men'riin zag. 27Bhi nyi p'ee lop mhi'lop keeniy tihh mwopp chakk mwooh bih-blihp keeniy diy lhija riy, koohneeh dhighin yill ni kihhdihng'dihng, kapp pee w'u yill ni dum wull diy.
28“T'o, wu kad kamm sh'i tihngg koon sihng: mihh songg nyi mwopp y'aa bih'khil, mwopp tang kom wu'pwooh, bhi wu man rooh tarr log l'ang kuss. 29A kihhsheh zag, mihh wu naah bii mihhse mwopp, bhi wu man wu le ji keena wull kuss, dheeh ih kihh dharr a pwooluh. 30A kihh satt a zeenn wunn, baah gurum w'u gangg mhize ni mwopp p'ee mwarrap kyess weett mou, seeh bii mihhse weett gam. 31Phikihtihngg kihh yill p'ee ji dhel, weett kihhsheh bhi pwoo keena p'ee cham taah yill mou.
32“Baah gwooh man puus ji keena ni mou, kooh mhi'lop w'u kih dhengNaan, kooh wu'an L'aa ni maah, a Daa kyekk man. 33T'o, wu tong sh'i gonggpee, sh'i dhakkshuk, p'ee baah wu man shiipp ji keena ni mou. 34Nyi p'ee kwed a kaa m'ee gurum w'u kihh t'ang dhel mwaan. Gwoh ni yet luh keeniy dheeh sarr mhidhakk keeniy mwopp, kooh meehrangg kihh dhakk w'u guluh ni pihh nyi, bhi satt gutapp phi fokhol'pang ni le gw'ar tong sh'i gonggpee.
35“Pee'mhinyi bhi wu tong sh'i gonggpee, p'ee baah wu man puus w'u guluh ni p'ee b'aa ji dyi mou, kooh kyed a kan'sihkhin aa'h, h'aa kooh a naar khipar aa'h, h'aa kooh a dooldyeell aa'h, h'aa kooh a tarrbyitt oh. 36Mihh b'aa ji rukg, bhi tapp diy ji shep wunn a s'aam mou. 37Bii w'u ih satt wu'wunn, bhi ih satt a gurum mwopp weett. ‘Wu tong sh'i gonggpee!’”
ទើបបានជ្រើសរើសហើយ៖
Markus 13: Chakfem
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2022 Luke Initiative for Scripture Translation