Dii  -2001 - BSCAM (NT) Drama

Nouveau Testament en Dii © Bible Society of Cameroon, 2001.

Sey Tayɨɨ ka dəŋ yɨb hȩn vu̵ máa, ı̵́ ku̵u̵ beewu̵ “Moo” máa ká dɨlı̵́. “Moo” yȩ ká dɨ Tayɨɨ woolı̵́. Ká Tayɨɨɨ á̧ḿ.
Sey hȩn ka dəŋ máa, dɨ Tayɨɨ woolı̵́. Hȩn 'waapád kɔ́y kan wu̵ yu̵. Kan pɛ́lı̵́ tée, hȩn 'waapád ku̵u̵ kɔ́y yȩ, ka vu̵n kɔ́y né. Hȩn tóó ká dɨ woolı̵́, wu̵ kɔ́ ma hȩn 'waapád vu̵ mbaa zá̧a̧d. Hȩn yȩ wu̵ túlí nánán voo. Túlí dɨ túlí ya dimmí, a̧máa dim sɛ́nnɔ né.
Tayɨɨ ba' nán tóó yaa, yéé woo Yoohá̧na. Ká yaa bi du̵ ya̧g yúú túlí yȩ woolı̵́, moo nán 'waapád u̵u̵ duu túlí yȩ yúú ya̧g du̵lı̵́ woolı̵́. Yoohá̧na ká woo túlíi pɛ́lı̵́, a̧máa yaa woo bi du̵d túlí yȩ wu̵ ya̧g. Túlí yȩ, ká wu̵ túlí də́ń kəd, ka yaa hágá yɛlı̵́ máa, túd nánán vu̵ 'waapád. “Moo” yȩ ká mbaa dɨ hágá yɛlı̵́. Hág ká yı̵́b kan wu̵ yu̵, a̧máa nánán hágá yɛlı̵́ vu̵ ho̧ gaanɔ né. Yaa nán woo voolı̵́, ma nán woo vu̵ fȩȩnɔ né. A̧máa nán 'waapád ku̵u̵ fȩȩwo̧, ku̵u̵ 'yɛ́ zó̧ó̧ woolı̵́ máa, pú̵ vu̵ néélȩ́ u̵u̵ tii waa Tayɨɨ woo vu̵ yu̵. Vu̵ tiin voo waa Tayɨɨ woo moo zig voo nɔ né, kóó kan hí̧í̧lí̧ fó̧ó̧ nánán tóó woo, kóó kan hí̧í̧lí̧ nánán tóó woo nɔ né á̧ḿ. A̧máa aga Tayɨɨ wu̵ ha̧a̧ vu̵.
“Moo” yȩ tii nánán, ya mbaa vóólı̵́ sa̧a̧mé, vɔ́ ho̧ na"ȩ́ woo. Na"ȩ́ woo yȩ man kan na"ȩ́ waa dágá 'nɛ́ŋ́ ka nuŋ ba"oo woolı̵́ má nɔ. Zó̧ó̧ nán hi̧' dɨ woolı̵́, kan moo yȩ́ń á̧ḿ. Yoohá̧na pa moo, du̵ddu̵ ya̧g yúba, o̧: “Mí moo moo yúú woolı̵́ sú̵'ú̵. Mí o̧ nán tóó wú̵ń dɨ yaalı̵́ pig míílí̧, wu̵ mban, moo ká wu̵ mbaa tíŋ́ míílí̧. Máa, wu̵ yɛ nɔ.”
Ya vóó 'waapád vɔ́ nuŋ hȩn du̵u̵ 'waapád dɨ woolı̵́. Hȩn woo maa zó̧ó̧ nán mɛ́ń, moo Tayɨɨ ká pú̵ Múúsa moo woo, a̧máa Yesu Krístu yaan woo kan zó̧ó̧ nán kan hȩn yȩ́ńne. Nán tóó ho̧n Tayɨɨ né sá̧ḿ. Waa dágá 'nɛ́ŋ́ Tayɨɨ woo ka mbaa dáŋ́ Ba'á woolı̵́ yȩ, wu̵ tú'ud ba ví Tayɨɨ.


Sey tóólı̵́ máa, nán Yúúda vu̵ ba' nán hȩn ha"ı̵́ tóó vu̵ kan nán Levíd tóó vu̵ u̵u̵ lúú Yerúsalemmé, u̵u̵ laa Yoohá̧na woolı̵́, u̵u̵ vigi: “Mɔ́ nɔ́nná?”
Ma ya̧g du̵lı̵́ Yoohá̧na woo, wu̵ yɛ nɔ. Yoohá̧na hí̧í̧ ya̧g, su̵u̵ né, o̧d vu̵ la ha̧d: “Mí ı̵́ nán sənnée pɛ́lı̵́.”
Ma vu̵ duu vigi: “Kɔ́ woo née? Mɔ́ Elíaa?”
Hí̧i̧d vu̵: “Mí wu̵ yu̵ pɛ́lı̵́.”
Ma vu̵ duu vigi: “Mɔ́ anábi pee naa?”
Duu hí̧í̧: “Áá'a.”
Ku̵u̵ ki máa, vu̵ duu vigi: “Máa mɔ́ nɔ́nná? Oo la o̧d nán ku̵u̵ ba' vɔ́ ya yɛ vu̵ nɛ́nná? Aga mɔ́ o̧ móó bin nɔ́nná?”
Ma o̧d vu̵:
“Mí yɛ́g nánán tóó woo ka kiy hó̧g kȩŋŋı̵́, ka o̧:
‘I zȩȩ hi̧naa ı̵́ 'yɛ́lı̵́ woo a líí ú,’
kɔ́ ı̵́ anábi Esáya ká o̧ máa wɔgɔ.”
Nán ku̵u̵ ba' vu̵ yȩ, tóó vu̵ nán farísa vu̵ yu̵. Vu̵ duu vigi moo yɛ: “Móo ı̵́ nán sənné pɛ́lı̵́, tóó tée Elía wu̵, tóó tée anábi pee nɔ pɛ́lı̵́, ma moo ȩn mɔ́ woo nán vu̵ mam Tayɨɨlá?”
Ma Yoohá̧na hí̧i̧d vu̵ o̧: “Ɨ́ míí, mí woo vu̵ míí mam Tayɨɨ kan mamme. A̧máa nán tóó dɨ víílí sa̧a̧mé, ví gaanɔ né. Dɨ woo yaalı̵́ míílí̧ pigim. Mí maan míí zaŋ tɛ́gɛ́ woo buuní ní á̧ḿ.”
Hȩn yȩ vu̵ kɔ́y kaa Bɛtaníilí̧, ka' ziŋ dən Yu̵ŕdɛnné. Yoohá̧na ká baa woo nán vu̵ mam Tayɨɨ wu̵lı̵́.

Ya̧g ka̧'a̧m woo máa, Yoohá̧na ho̧ Yesu dɨ yaalı̵́ woolı̵́, o̧: “Mbee waa Tayɨɨ woo ka dɨ hȩn ɓı̵́d nán voo gané luu máa, wu̵ yȩ nɔ. Ká mí o̧d ví sı̵́ moo yúú woolı̵́ ú̵, mí o̧ nán tóó ban dɨ yaalı̵́ pig míílí̧, wu̵ ı̵́ nii míí, moo ká wu̵ mbaa tíŋ́ míílí̧. Ká mí gaanɔ míí ní, a̧máa mí ya woo nán vu̵ mam Tayɨɨ, moo waa Izraɛ́l u̵u̵ gaawu̵ ú̵ má nɔ.”
Yoohá̧na duu du̵ ya̧g, o̧: “Mí ho̧ yigid Tayɨɨ woo sí zu̵u̵ be"ı̵́ kɔ́ ı̵́ gbɔkii wɔgɔ, mbaa yúú woolı̵́. Ká mí gaanɔ míí ní, a̧máa Tayɨɨ ka ba'an moo a̧n ya woo nán vu̵ mam Tayɨɨɨ yɛ, wu̵ o̧n: ‘Káḿ ho̧ nán tóó, yigid Tayɨɨ woo ka sí zu̵u̵ mbaa yúú woolı̵́ tée, wú̵ńnɔ woo nán vu̵ mam Tayɨɨ kan yigid Tayɨɨ woo.’ Mí ho̧, mí du̵ ya̧g sú̵'ú̵. Wu̵ Waa Tayɨɨ woo.”

Ya̧g ka̧'a̧m woolı̵́ máa, Yoohá̧na duu dii kan waa duulí woo vu̵ idú, ka ho̧ Yesu ka dɨ daa ya̧a̧lȩ́ máa, o̧: “Mbee waa Tayɨɨ woo wu̵ yȩ nɔ.”
Waa duulí ı̵́ idú Yoohá̧na woo pee ku̵u̵ ki moo yȩ máa, vu̵ lúú duu Yesu. Yesu tii daa nɔ́ɔ́, ho̧ vu̵, vu̵ dugu, vi vu̵: “Ví soo ȩná?”
Vu̵ hí̧i̧du̵: “Rábi! (Yéé woo tú' ‘Akaw.’) Mɔ́ń sí nóo woolı̵́lá?”
O̧d vu̵: “I ya ho̧ ó̧.”
Ma vu̵ laa, vu̵ ho̧ ya mbaalı̵́ woo.
Zá̧ga̧ woo, zamndi ka ya̧ sı̵́ ndaddú̵ ú̵ máa, vu̵ mbaa woolı̵́ há̧á̧ vid sa̧' wu̵lı̵́. Nán idú yȩ ku̵u̵ ki moo Yoohá̧na ı̵́ mam Tayɨɨ wooné woolı̵́, ma ku̵u̵ duu Yesu yȩ, tóó yéé woo A̧ndɛrée, Simɔ́ŋ Piɛ́r daa sá̧ŋ́ŋɨ. A̧ndɛrée ká wu̵ dəŋ soo daa nii Simɔ́ŋ, ma o̧ddu̵: “Vɔ́ nuŋ ı̵́ nán sənné sú̵'ú̵.” (Yéé yɛ tú' “Krístu.”)
A̧ndɛrée pa̧ŋ Simɔ́ŋ laan Yesu woolı̵́. Yesu tə́ggu̵, o̧ddu̵: “Móo Simɔ́ŋ Yoohá̧na waa. 'Ya̧'a̧ yɛ vú̵ń beem Kééfa.” (Yéé woo tú' “Piɛ́r.”)

Ya̧g ka̧'a̧m woolı̵́ máa, Yesu hí̧í̧ bi laa hág Gáliléelı̵́, vu̵ kan kan Filíb, beewu̵: “A̧m duun ya ú̵.”
(Filíb ká nán kaa Bɛdsáýdaɨ, ká kaa A̧ndɛrée voo, kan Piɛ́r á̧ḿ.) Filíb la soo Natanaɛ́l, o̧ddu̵: “Ɨ́ Múúsa ká bíńda moo yúú woolı̵́ debtere woolı̵́, kan anábi tóó vu̵ á̧ḿ pee, vɔ́ nuŋŋɔ sú̵'ú̵. Wu̵ Yesu, nán Naazaréddɨ, Yu̵u̵séfu waaɨ.”
Ma Natanaɛ́l hí̧i̧du̵: “Hȩn du̵u̵ tóó wú̵ń yaa kaa Naazaréddı̵́ áa?”
Filíb duu o̧ddu̵: “A̧m yaa tée, mɔ́ń ho̧.”
Sey Yesu ka ho̧ Natanaɛ́l ka dɨ yaalı̵́ woolı̵́ máa, moo moo yúú woolı̵́, o̧: “Moo yȩ́ńne, nán Izraɛ́l ka kan hȩn kə̧ə̧g tóó woolı̵́ pɛ́lı̵́ máa, wu̵ yɛ nɔ.”
Natanaɛ́l ka ki moo Yesu woo máa, vigi: “Mɔ́ gaan tɛ́lá?”
Yesu hí̧i̧du̵: “Sey Filíb ka been mɔ́ lá né, káḿ dɨ mbaalı̵́ zɔgɔb do̧o̧lȩ́ máa, mí ho̧mmɔ́.”
Ma Natanaɛ́l o̧ddu̵: “Akaw, móo Waa Tayɨɨ woo, móo gbanii Izraɛ́l voo.”
Yesu duu hí̧i̧du̵, o̧: “Moo káń o̧m: ‘Káḿ mbaa zɔgɔb do̧o̧lȩ́ máa, mí ho̧mmɔ́’ máa, mɔ́ fȩȩ moo, moo woo naa? Mɔ́ń ho̧ hȩn gbo̧o̧ tóó vu̵ mba ı̵́ yɛ vu̵ ú̵ á̧ḿ.”
Duu o̧ddu̵: “Mí o̧d ví moo yȩ́ńne, ı̵́ míí Tayɨɨ ka ba'an ya yɛ, víń ho̧ be' wú̵ń tú̵'ú̵, maleeka Tayɨɨ woo vú̵ń ɗáá dɔg, vú̵ń sí zu̵u̵ yúú míílí̧.”

Listen to Yoohá̧na 1